لاہور: (ویب ڈیسک) لاہور ہائیکورٹ نے پنجاب میں الیکشن کی تاریخ سے متعلق پاکستان تحریک انصاف کی درخواست منظور کرتے ہوئے الیکشن کمیشن آف پاکستان کو الیکشن کی تاریخ دینے کا حکم دے دیا۔
لاہور ہائیکورٹ نے پاکستان تحریک انصاف کی الیکشن کی تاریخ دینے کی درخواستیں منظور کر لیں اور الیکشن کمیشن پنجاب کو 90 روز میں الیکشن کرانے کا حکم دے دیا۔
لاہور ہائیکورٹ کے جسٹس جواد حسن نے پنجاب اسمبلی کے الیکشن کی تاریخ نہ دینے کی درخواست پر محفوظ فیصلہ سنایا۔
اسلام آباد: (ویب ڈیسک) چیف الیکشن کمشنر سکندر سلطان راجہ کی زیر صدارت اہم اجلاس میں صدر مملکت کے بھیجے گئے مراسلے پر غور و خوض کیا گیا۔
اجلاس میں الیکشن کمیشن ممبران، سیکرٹری و دیگر حکام نے شرکت کی جنہوں نے خط کے آئینی و قانونی مضمرات، گورنرز کے اختیارات اور کمیشن کی آئینی ذمہ داریوں پر تفصیلاً غور کیا، الیکشن کمیشن اجلاس میں وزرات داخلہ کی جانب سے بھیجے گئے خط کا بھی جائزہ لیا گیا۔
وزرات داخلہ نے بتایا کہ سکیورٹی حالات کے مدنظر الیکشن کے دوران فوج اور سول آرمڈ فورسز کو انتخابی ڈیوٹی پر نہیں لگایا جا سکتا، اجلاس میں فنانس ڈویژن کی طرف سے الیکشنز کے انعقاد کے لئے مطلوبہ فنڈز کی عدم دستیابی پر بھی غور کیا گیا۔
الیکشن کمیشن کے اجلاس میں خیبر پختونخوا اور پنجاب چیف سیکرٹریز، آئی جیز اور کے پی کی طرف سے پیش کئے گئے سکیورٹی خدشات اور دیگر عوامل کا بھی جائزہ لیا گیا۔
لاہور: (ویب ڈیسک) پاکستان تحریک انصاف کے رہنما اور فوکل پرسن جیل بھرو تحریک سینیٹر اعجاز احمد چودھری کی زیر صدارت اجلاس ہوا۔
اجلاس میں تحریک انصاف کی سنٹرل پنجاب کی صدر ڈاکٹر یاسمین راشد، عندلیب عباس، شیخ امتیاز محمود، زبیر نیازی، علی امتیاز وڑائچ، ڈاکٹر نوشین حامد معراج، شنیلہ علی، سعدیہ سہیل، شینلا روتھ، طارق ثناء باجوہ، علی اعجاز چودھری، اعظم خان نیازی، رخسانہ نوید، وسیم رامے، عارف خان، عمر آفتاب ڈھلوں سمیت دیگر نے شرکت کی۔
اس موقع پر جیل بھرو تحریک کی تیاریوں کا جائزہ لیا گیا، اعجاز احمد چودھری نے پارٹی رہنماؤں سے جیل بھرو تحریک کے حوالے سے حلف لیا، انہوں نے کہا پورے لاہور میں جیل بھرو تحریک کیلئے رجسٹریشن کیمپ لگائے جائیں گے، پارٹی سیکرٹریٹ میں اس حوالے سے ڈسک قائم کر دیا گیا ہے۔
اسلام آباد: (ویب ڈیسک) وزیر اعظم شہباز شریف کی زیر صدارت امن و امان کی صورت حال کے حوالے سے اہم اجلاس ہوا جس میں وزیر داخلہ سمیت متعلقہ اداروں کے حکام نے شرکت کی۔
اجلاس کے دوران وزیر اعظم نے گفتگو کرتے ہوئے کہا کہ کسی قسم کا سکیورٹی لیپس برداشت نہیں کیا جائے گا، امن و امان کے حوالے سے وفاق اور صوبوں میں رابطوں، ہم آہنگی مزید بہتر کی جائے اس حوالے سے وفاقی وزیر داخلہ چاروں صوبوں کا دورہ کریں۔
شہباز شریف نے مزید کہا کہ صوبوں میں کاؤنٹر ٹیررازم ڈیپارٹمنٹس کی استعداد کار میں بہتری لانے کیلئے مؤثر اقدامات کیے جائیں، قانون نافذ کرنے والے اداروں کو جدید ہتھیاروں، سامان سے لیس اور اپیکس کمیٹی میں کئے گئے فیصلوں پر بھرپور عمل درآمد یقینی بنایا جائے۔
وزیراعظم نے کوہلو میں دہشت گردوں کے خلاف آپریشن میں پاک فوج کے افسران میجر جواد اور کیپٹن صغیر کی شہادت پر گہرے دکھ اور افسوس کا اظہار کرتے ہوئے کہا کہ ہماری سکیورٹی فورسز دہشت گردوں کے مذموم مقاصد کی راہ میں بڑی رکاوٹ ہیں۔
انہوں نے کہا دہشت گرد امن کیلئے ہماری کوششوں کو سبوتاژ نہیں کر سکتے، دہشت گردی کے خلاف لڑائی میں شہید ہونے والوں کو پوری قوم سلام پیش کرتی ہے، وزیراعظم نے شہداء کی بلندی درجات کیلئے دعا اور سوگوار خاندانوں سے اظہار تعزیت بھی کیا۔
کراچی: (ویب ڈیسک) بلاول بھٹو کی قیادت میں پیپلز پارٹی کے پارلیمانی بورڈ کا اجلاس ہوا جس میں ملک میں سیاسی اور معاشی صورتحال پر تبادلہ خیال کیا گیا۔
اجلاس میں پی ڈی ایم رہنماؤں کی جانب سے ضمنی انتخابات میں حصہ نہ لینے کی تجویز پر بھی غور کیا گیا، ضمنی الیکشن کے حوالے سے پارلیمانی بورڈ کے شرکاء کی مختلف آراء سامنے آئیں۔
ذرائع کے مطابق پیپلز پارٹی کے رہنماؤں نے اجلاس میں فیصلہ کیا کہ پی ڈی ایم کی ضمنی انتخابات میں حصہ نہ لینے کی تجویز پر مشاورت کا دائرہ کار بڑھایا جائے گا، حتمی فیصلہ بعد میں ہوگا۔
لاہور: (ویب ڈیسک) امیر جماعت اسلامی سراج الحق نے کہا ہے کہ پی ٹی آئی اور پی ڈی ایم والوں کی جائیدادیں نیلام کر کے پیسہ خزانے میں جمع کروایا جائے۔
مریدکے میں خطاب کرتے ہوئے انہوں نے کہا کہ پاکستان کے عوام ہم پر اعتماد کریں، ہم کرپشن اور سودی نظام کو ختم کر سکتے ہیں، ہم ایک ایک پیسہ بچا کر قوم پر خرچ کریں گے، حکمرانوں کے کتوں اور بلیوں کیلئے باہر سے خوراک آتی ہے، یہاں گندم اور آٹا میسر نہیں ہے۔
انہوں نے کہا 70 لاکھ نوجوان پی ڈی ایم کی وجہ سے بے روزگار ہوئے، پیپلزپارٹی، مسلم لیگ (ن) اور پی ٹی آئی عوام سے مخلص نہیں، تینوں پارٹیاں عوام کی دشمن ہیں، ان کی سیاست خدمت نہیں کرسی کیلئے ہے، آج عوام کو نہیں ان کو قربانی کا بکرا بنانے کا وقت آ گیا ہے۔
سراج الحق نے مزید کہا کہ اسحاق ڈار نے دعویٰ کیا تھا میں معاشی جادوگر ہوں، انہوں نے ملک، معیشت، زراعت کو تباہ کیا، نیب اور ایوانوں کو یرغمال بنایا گیا، قرضہ پی ٹی آئی اور پی ڈی ایم والوں نے لیا ہے، ان کی جائیدادوں کو نیلام کر کے پیسہ خزانے میں جمع کروایا جائے۔
امیر جماعت اسلامی سراج الحق نے مزید کہا ہے کہ آپ نے اس ملک کو کئی دہائیوں سے یرغمال بنایا ہوا ہے، حکومت کو وارننگ دیتا ہوں اشیا ضروریہ کی قیمتوں میں کمی کرو، اگر ہماری آواز نہ سنی گئی تو ہمارے ہاتھ اور تمہارے گریبان ہوں گے۔
اسلام آباد: (ویب ڈیسک) وفاقی وزیر خزانہ اسحاق ڈار سے یو این ڈی پی کے نمائندے نٹ اوستبی نے ملاقات کی۔
ملاقات میں اسحاق ڈار نے سیلاب متاثرہ علاقوں میں امدادی سرگرمیوں پر یو این ڈی پی کا شکریہ ادا کیا، وزیر خزانہ نے سیلاب متاثرہ علاقوں میں تعمیر نو کے منصوبے تیار کرنے پر یو این ڈی کو سراہا۔
واضح رہے کہ منصوبہ جنیوا کانفرنس میں پیش کیا گیا جس کی بدولت پاکستان شراکت داروں سے حمایت حاصل کرنے میں کامیاب رہا۔
یواین ڈی پی کے نمائندے نے موسمیاتی تبدیلی سے بچاؤ، بحالی اور ریکوری کے ایکشن پلان کے اہداف سے آگاہ کیا، وزیر خزانہ نے پائیدار ترقی کے اہداف کے حصول کے لیے یو این ڈی پی کے کردار کو سراہا اور مکمل تعاون کا یقین دلایا۔
کراچی: (ویب ڈیسک) سیکرٹری ٹرانسپورٹ سندھ عبدالحلیم شیخ نے کہا ہے کہ بی آر ٹی ریڈ لائن پروجیکٹ پر کام کی بندش میں کوئی صداقت نہیں۔
اپنے ایک بیان میں عبدالحلیم شیخ نے کہا کہ بی آر ٹی ریڈ لائن پروجیکٹ کی فنڈنگ ایشیائی ترقیاتی بینک کر رہا ہے، فنڈنگ کا بھی کوئی مسئلہ نہیں، منصوبہ ایشیائی ترقیاتی بینک کی سخت نگرانی میں چل رہا ہے، سی ای او ٹرانس کراچی واصف جلال نے ذاتی وجوہات پر 3 ماہ قبل عہدے سے استعفیٰ دیا تھا۔
سیکرٹری ٹرانسپورٹ سندھ نے کہا کہ استعفیٰ ٹرانس کراچی کے بورڈ آف ڈائریکٹرز کی منظوری سے ایک ماہ قبل منظور کیا گیا تھا، نئے سی ای او کی تعیناتی تک عہدے کا عارضی چارج مجھے دیا گیا ہے، بی آر ٹی ریڈ لائن پروجیکٹ پر کام جاری ہے۔
سیکرٹری ٹرانسپورٹ عبدالحلیم شیخ نے کہا کہ بس ڈیپو، بائیو گیس پلانٹ اور روٹ کے انفراسٹرکچر پر کام کیا جا رہا ہے، ریڈ لائن پروجیکٹ کوریڈور میں مختلف محکموں کی یوٹیلٹی لائنز کے باعث مسائل کی وجہ سے کام کی رفتار میں رکاوٹیں آتی ہیں۔
کراچی: (ویب ڈیسک) وفاقی وزیر منصوبہ بندی احسن اقبال نے کہا ہے کہ ملکی ترقی میں پالیسیوں کا تسلسل ناگزیر ہے، بد قسمتی سے بلیو اکانومی کے پوٹینشل سے پوری طرح فائدہ نہیں اٹھا سکے۔
کراچی میں تقریب سے خطاب کرتے ہوئے انہوں نے کہا کہ بلیو اکانومی کے فروغ پر خصوصی توجہ دینے کی ضرورت ہے، بلیو اکانومی برآمدات کے فروغ میں اہم کردار ادا کر سکتی ہے، ہمیں بلیو اکانومی کے ذریعے پاکستان کی ایکسپورٹس کو بڑھانا ہے۔
احسن اقبال نے کہا کاربن کے اخراج میں پاکستان کا حصہ نہ ہونے کے برابر ہے، ہمیں موسمیاتی تبدیلیوں کے چیلنجز کا سامنا ہے، ماحولیاتی تبدیلی سے پاکستان کو شدید نقصانات اٹھانا پڑے، گوادر کی بندرگاہ ملکی معیشت کیلئے بڑی اہمیت کی حامل ہے۔
انہوں نے کہا ہمیں پاکستان کو ایکسپورٹ اکانومی پر انحصار کرنے والا ملک بنانے کی ضرورت ہے، منسٹری آف پورٹس اینڈ شپنگ کو منسٹری آف میری ٹائم افیئرز میں تبدیل کرنے کے پیچھے ایک پورا وژن تھا، پاکستان میں بحری تجارت میں سرمایہ کاری کے وسیع مواقع ہیں۔
وفاقی وزیر منصوبہ بندی احسن اقبال نے مزید کہا ہے کہ ہمیں ٹیکنالوجی کے لحاظ سے دنیا سے ہم آہنگ ہونا ہو گا، مصنوعی ذہانت نے ٹیکنالوجی کے میدان میں انقلاب برپا کر دیا ہے، سائنس و ٹیکنالوجی کے میدان میں مطلوبہ پیش رفت کیے بغیر ہم بہت پیچھے رہ جائیں گے۔
لاہور: (ویب ڈیسک) چودھری پرویز الہٰی کے دست راست سیکرٹری پنجاب اسمبلی محمد خان بھٹی کے خلاف نیب بھی حرکت میں آگیا۔
نیب نے محمد خان بھٹی کیخلاف ناجائز اثاثے بنانے اور مبینہ کروڑوں روپے کے الزام کی انکوائری شروع کر دی، اس حوالے سے سیکرٹری پنجاب اسمبلی کے اثاثوں کی چھان بین کیلئے ریکارڈ طلب کر لیا گیا، نیب نے بینک سے تنخواہ، مراعات، سیشن الاؤنس کا ریکارڈ حاصل کر لیا ہے۔
نیب لاہور کے ذرائع کے مطابق بینک نے سینکڑوں صفات پر مشتمل ریکارڈ نیب کو جمع کرا دیا، سیکرٹری پنجاب اسمبلی نے 2007 سے 2018 تک جبری رخصت پر ہونے کے باوجود 12 سال کی تنخواہیں وصول کیں، محمد خان بھٹی نے کروڑوں کی غیرقانونی مراعات بھی وصول کیں۔
نیب نے کروڑوں روپے کی مختلف ٹرانزکشن کا ریکارڈ بھی حاصل کر لیا، محمد خان پر مبینہ ناجائز اثاثے بنانے اور خرد برد کے الزام کی تحقیقات شروع کی گئی ہے، سیکرٹری پنجاب اسمبلی کے خلاف ایف آئی اے، اینٹی کرپشن میں بھی کروڑوں روپے مبینہ کرپشن کی تحقیقات جاری ہیں۔
