اسلام آباد: (ویب ڈیسک) اسلام آباد ہائیکورٹ نے الیکشن کمیشن کو محمد میاں سومرو کی نشست پر ضمنی انتخاب کرانے سے روک دیا۔
اسلام آباد ہائی کورٹ کے جسٹس میاں گل حسن اورنگزیب نے محمد میاں سومرو کی درخواست پر سماعت کی۔
پٹیشنر کی وکیل بیرسٹر زینب جنجوعہ نے عدالت کو بتایا کہ محمد میاں سومرو حلقہ این اے 196 جیکب آباد سے رکن قومی اسمبلی منتخب ہوئے، وہ پی ٹی آئی کے ان لوگوں میں سے ہیں جنہوں نے استعفیٰ نہیں دیا۔
انہوں نے کہا کہ 40 دن اسمبلی سے غیر حاضر رہنے پر اسپیکر نے نشست خالی قرار دی، درخواست گزار بیرون ملک ہیں، بیماری کی وجہ سے زیادہ سفر نہیں کرسکتے اور الیکشن کمیشن نے درخواست گزار کو ڈی نوٹیفائی کرکے ضمنی الیکشن کا اعلان کردیا۔
اس موقع پر عدالت نے کہا کہ پٹیشنر 40 روز تک اسمبلی نہیں گئے اور نہ ہی چھٹی کی درخواست دی۔
عدالت نے حکم دیا کہ ستمبر میں کیس کی آئندہ سماعت تک این اے 196 جیک آباد کی نشست پر الیکشن کمیشن ضمنی انتخاب نہ کرائے۔
جسٹس میاں گل حسن اورنگزیب نے ریمارکس دیے کہ اسپیکر قومی اسمبلی کو نوٹس نہیں جاری کرسکتے، سیکرٹری اسمبلی کو نوٹس جاری کریں گے، اپنے مؤکل سے پوچھیے کہ اگر ملک واپسی ہوتی ہے تو اسمبلی اجلاس میں جانا ضروری ہوگا، ایسا نا ہو کہ عدالت نوٹیفکیشن معطل کرے اور پٹیشنر اسمبلی ہی نہ جائے۔
وکیل نے بتایا کہ محمد میاں سومرو 27ستمبر کو واپس آئیں گے اور اسمبلی اجلاس میں شریک ہوں گے۔
عدالت نے وزارت قانون ،سیکرٹری قومی اسمبلی اور الیکشن کمیشن کو نوٹس جاری کرتے ہوئے جواب طلب کر لیا۔
اسلام آباد ہائیکورٹ نے رجسٹرار ہائی کورٹ کو ستمبر میں کیس دوبارہ مقرر کرنے کی ہدایت کی ہے۔
خیال رہے کہ گزشتہ دنوں الیکشن کمیشن نے محمد میاں سومرو کو 40 دن غیر حاضری پر ڈی نوٹیفائی کیا تھا اور وہ جیکب آباد کے حلقے این اے 196 سے تحریک انصاف کے ٹکٹ پررکن اسمبلی منتخب ہوئے تھے۔

اسلام آباد: (ویب ڈیسک) وفاقی وزیر اطلاعات و نشریات مریم اورنگزیب نے کہا ہے کہ عمران خان کے پاس ملاقات کے لیے کوئی اجازت نامہ نہیں تھا، وہ جھوٹ بولنے کے عادی ہیں، 22 سال سے الزامات لگا رہے ہیں، کورٹ آرڈر لے آئیں اور شہباز گل سے مل لیں۔
پاکستان مسلم لیگ (ن) سے تعلق رکھنے والی وفاقی وزیر مریم نواز نے کہا کہ عمران خان ریلی کا کہہ کر اصل چیز سے توجہ ہٹا رہے ہیں، میڈیکل بورڈ نے شہباز گل کو فٹ قرار دیا۔
انہوں نے کہا کہ عمران خان وزیراعلیٰ پنجاب اور ہائیکورٹ کو اپنے ماتحت کرنا چاہتے ہیں، ان کے مطابق سب ڈاکٹرز جھوٹ بول رہے ہیں، اگر تشدد ہوا ہے تو نشانات کیوں نہیں دکھاتے؟ یہ سمجھتے ہیں بدمعاشی اور غنڈہ گردی کرنے سے پولیس ان کے لیے ریڈ کارپٹ بچھائے گی۔
وفاقی وزیر اطلاعات و نشریات مریم نواز نے کہا کہ ایک شخص مسلسل قانون کی خلاف ورزی کر رہا ہے، مریم نواز اپنے والد سے ملنے کے لیے کورٹ آرڈر لے آئی تھیں، قانون کے مطابق کام ہو گا، آپ کورٹ آرڈر لے آئیں، شہباز گل سے ملنے کے لیے وکلا کو بھی کورٹ آرڈ ر چاہئے، نواز شریف کا بھی سرکاری بورڈ ہی چیک اپ کرتا تھا۔
ن لیگ کی مرکزی ترجمان مریم اورنگزیب نے استفسار کیا کہ کل یہ کس چیز کی ریلی نکال رہے ہیں، شہباز گل نے آپ کے کہنے پر یہ سب کچھ کہا ہے۔
مریم اورنگزیب نے کہا کہ اظہار یکجہتی کے لیے عمران خان کو کہنا چاہیے شہباز گل نے اس کے کہنے پر سب کچھ کہا، کہہ دیں شہباز گل نے میرے کہنے پر بیان دیا تھا، عمران خان احسان فراموش ہیں۔
مریم اورنگزیب نے کہا کہ کل ریلی نکالنے کی اجازت دینا نہ دینا انتظامیہ کا مسئلہ ہے، آج فارن فنڈنگ اور ایف آئی سے بھاگے ہوئے ہیں۔

گجرات: (ویب ڈیسک) وزیر اعلیٰ پنجاب چودھری پرویز الٰہی نے کہا ہے کہ پاکستان تحریک انصاف (پی ٹی آئی) کے چیئر مین عمران خان ستمبر میں گجرات آرہے ہیں اور وہی ہمارے وزیراعظم ہیں۔
میڈیا سے گفتگو کرتے ہوئے وزیراعلیٰ پنجاب نے کہا کہ وقت اتنا کم ہے ہم ایک دن میں ضائع نہیں کررہے ہیں۔ گجرات نے دل سے عمران خان کو وزیراعظم تسلیم کرلیا ہے شہباز شریف نے ایمرجنسی میں ادویات بند کردی تھی ہم نے دوبارہ ایمرجنسی میں مفت ادویات فراہمی شروع کردی ہے۔
وزیراعلیٰ نے کہا کہ گجرات میں انجینئرنگ یونیورسٹی بھی بنائیں گے۔ وزیر آباد کارڈیالوجی ہسپتال کو500 بیڈ کی گنجائش والا کردیا ہے جبکہ عزیز بھٹی شہید ہسپتال کو بھی 500 بیڈ تک توسیع کر رہے ہیں۔
انہوں نے کہا کہ ہمارے لیے ایک ایک گھنٹہ بھی قیمتی ہے ضائع نہیں کررہے پہلے بھی جنوبی پنجاب کا احساس محرومی ختم کیا اب بھی کریں گے۔ ریسکیو 1122 کیلئے 170 ایمبولینس تقسیم کی ہیں جبکہ گجرات کو ایک مثالی شہر بنائیں گے صاف پانی کے لیے انتظام کیا جارہا ہے شہر اور دیہاتوں میں بھی پکی سڑکیں بنائیں گے۔

اسلام آباد: (ویب ڈیسک) ادارے کی توہین کرنے پر الیکشن کمیشن آف پاکستان نے تحریک انصاف کے چیئر مین اور سابق وزیراعظم عمران خان سمیت دیگر رہنماؤں کو طلب کر لیا۔
ترجمان الیکشن کمیشن کی طرف سے جاری کردہ بیان کے مطابق عمران خان، اسد عمر اور فواد چودھری کو توہین الیکشن کمیشن کے نوٹسز جاری کرتے ہوئے 30 اگست کو طلب کیا گیا ہے۔
بیان میں کہا گیا ہے کہ عمران خان کو30 اگست 2022 کو ذاتی حیثیت یا بذریعہ وکیل پیش ہوں۔ اس کے علاوہ اسد عمر اور فواد چودھری کوبھی ذاتی حیثیت یا بذریعہ وکیل پیش ہونےکی ہدایت کی گئی ہے۔
ترجمان کے مطابق عمران خان کو نوٹس توہین آمیز بیانات پر جاری کیا گیا، عمران خان نے اپنی مختلف تقاریر میں غیر پارلیمانی اور توہین امیز بیانات دیئے۔

اسلام آباد: (ویب ڈیسک) سابق وزیراعظم عمران خان نے کہا ہے کہ پی ٹی آئی رہنما شہباز گل پر تشدد میں جنسی زیادتی بھی شامل ہے۔ دوسری طرف پی ٹی آئی چیئر مین پمز ہسپتال ملاقات کے لیے پارٹی رہنما کے پاس پہنچے تو یہ ملاقات ہو سکی، جس کے بعد انہوں نےکل ملک گیر ریلی کا اعلان کر دیا۔
پمز ہسپتال کے باہر میڈیا سے گفتگو کرتے ہوئے پی ٹی آئی چیئر مین کا کہنا تھا کہ عدالت کے حکم کے باوجود پولیس نے ہمارا راستہ روکا، پولیس نے مجھے شہباز گل سے ملاقات نہیں کرنے دی، پولیس بتائے وہ کس سے آرڈرلے رہی ہے، بتایا جائے ملک میں قانون یا ڈنڈے کی حکمرانی ہے۔
انہوں نے کہا کہ کل شہبازگل کے لیے ملک گیر ریلی نکالیں گے، اسلام آباد کے لوگوں کو ریلی میں شرکت کی دعوت دیتا ہوں، شہبازگل پر اگر ٹارچر ہو سکتا ہے تو کسی پر بھی ہوسکتا ہے، کل مغرب کے وقت ریلی نکالی جائے گی۔ میڈیا کا منہ بند کرکے چوروں کومسلط کیا جارہا ہے، ہم ان چوروں کی غلامی کبھی قبول نہیں کریں گے۔
اپنے ایک بیان میں اسلام آباد پولیس نے کہا ہے کہ شہباز گل سے ملنے کی کسی کو اجازت نہیں اور ہسپتال پراضافی نفری تعینات کردی گئی ہے۔ عوام یا کوئی بھی شخص ملاقات کی کوشش کرکے امن وامان کی صورتحال پیدا نہ کرے۔
ترجمان اسلام آباد پولیس کا کہنا ہے کہ پولیس نے ہسپتال میں سکیورٹی کا مناسب بندوبست کیا ہے، ملزم جسمانی ریمانڈ پر نہیں ہے اور ملزم سے ملاقات کی اجازت نہیں۔ کسی بھی لا اینڈ آرڈرکی صورتحال بننے پر قانون کے مطابق کارروائی کی جائے گی۔