اسلام آباد: (خبریں ڈیجیٹل) سربراہ پاکستان ڈیموکریٹک موومنٹ (پی ڈی ایم) مولانا فضل الرحمان کی آج وزیر اعظم شہباز شریف سے ملاقات شیڈول ہے۔
جمعیت علما اسلام کے سربراہ مولانا فضل الرحمان وزیر اعظم شہباز شریف سے نگران وزیر اعظم اور نگران سیٹ اَپ پر مشاورت کریں گے۔
ذرائع کے مطابق دونوں رہنماؤں میں ملاقات کے دوران اسمبلیوں کی تحلیل پر بھی تبادلہ خیال کیا جائے گا۔
اسلام آباد: (خبریں ڈیجیٹل) وفاقی وزیر داخلہ رانا ثناء اللہ نے دورۂ عراق میں ملنے والے قیمتی تحائف توشہ خانہ میں جمع کرا دیئے۔
سماجی رابطے کی ویب سائٹ ’ایکس ‘ پر رانا ثناء اللہ نے کہا کہ دورۂ عراق کے دوران اپنے بھائی عراقی وزیر داخلہ سے ملنے والے قیمتی تحائف توشہ خانہ میں جمع کرا دیئے ہیں، تحائف میں ایک قیمتی پستول اور ایک موبائل فون شامل ہے۔
یہ تحائف عراقی وزیرداخلہ عبدالامیرالشماری نے جذبہ خیرسگالی کے طور پر دیئے تھے۔
اس حوالے سے وزیر داخلہ رانا ثناء اللہ کا کہنا ہے کہ تحائف ملک و قوم کی امانت ہیں، اس لئے انہیں قومی خزانے میں جمع کرا دیا ہے۔
لاہور: (خبریں ڈیجیٹل) مسلم لیگ (ن) کی چیف آرگنائزر مریم نواز کی زیر صدارت مسلم یوتھ فیڈریشن کی تنظیم نو کے حوالے سے اہم اجلاس ہوا، مریم نواز نے عہدیداروں کے 5 گھنٹے تک تفصیلی انٹرویو کیے۔
اس دوران گفتگو کرتے ہوئے مریم نواز نے کہا ہے کہ مسلم لیگ (ن) نوجوانوں کے ہاتھ میں قلم، لیپ ٹاپ اور ڈگریاں دینے کی متمنی ہے، بندوق، گالی اور بد تمیزی (ن) لیگ کا کلچر نہیں ہے، جو طلبہ زیر تعلیم ہیں ان کو زیادہ سے زیادہ پارٹی کے ساتھ منسلک کریں۔
مسلم لیگ (ن) کی چیف آرگنائزر نے کہا کہ طلبہ کو پارٹی میں نمایاں جگہ دی جائے، پاکستان کی 65 فیصد آبادی نوجوانوں پر مشتمل ہے، سب سے بڑی پارٹی ہونے کے ناطے مسلم لیگ (ن) پر لازم ہے کہ وہ نوجوانوں کی بہتری اور اچھے مستقبل کیلئے فیصلے کرے۔
مریم نواز نے مزید کہا پاکستان کی سیاست میں نوجوانوں کا رول بہت اہم ہے، مسلم لیگ (ن) کی مقبولیت میں نوجوانوں کا کلیدی کردار ہے، نواز شریف کی قیادت میں سب سے پہلے طلبہ کو لیپ ٹاپ اور نوجوانوں کو باعزت روزگار کیلئے اربوں روپے کے قرضے دیئے گئے۔
راولپنڈی: (خبریں ڈیجیٹل) وزیر اعظم شہباز شریف نے آرمی ہیڈ کوارٹرز (جی ایچ کیو) کا الوداعی دورہ کیا جہاں آرمی چیف جنرل عاصم منیر نے ان کا استقبال کیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ وزیر اعظم شہباز شریف نے جی ایچ کیو دورے کے دوران یادگار شہدا پر حاضری دی اور پھول چڑھائے۔
آئی ایس پی آر کے مطابق وزیر اعظم نے شہدا کے 70 خاندانوں اور جنگ میں زخمی ہونے والے 30 غازیوں کو امدادی چیک دیئے، اس کے علاوہ شہداء کے بچوں میں لیپ ٹاپس بھی تقسیم کیے گئے۔
.jpg)
جی ایچ کیو میں خطاب کرتے ہوئے وزیر اعظم شہباز شریف نے کہا ہے کہ سپہ سالار جنرل عاصم منیر اور ان کی ٹیم کا شکر گزار ہوں، آرمی چیف نے جیسے ہی منصب سنبھالا بغیر وقت ضائع کیے انہوں نے کہا یہ ہے پروگرام پاکستان کو آگے بڑھانے کا۔
وزیر اعظم نے مزید کہا کہ اپنی حکومتی ٹیم اور صوبائی حکومتوں کا بھی شکر گزار ہوں، سب نے ملکر اس ویژن کو اجاگر کیا، ہمارا ہاتھ بٹایا، آج پوری دنیا میں ایس آئی ایف سی ایک نام بن چکا ہے، اس میں اللہ برکت ڈالے گا اور پاکستان عظیم بنے گا۔
لاہور: (خبریں ڈیجیٹل) پاکستانی شوبز انڈسٹری کی جانی پہچانی اور خوبرو اداکارہ انمول بلوچ نے ڈراموں کے بعد فلمی دنیا میں قدم رکھنے کی تیاری کر لی۔
اپنے ایک حالیہ انٹرویو میں فلم انڈسٹری جوائن کرنے کے حوالے سے بات کرتے ہوئے اداکارہ انمول بلوچ نے کہا کہ پہلے اس سلسلے میں کچھ تذبذب کا شکار تھی لیکن اب ذہنی طور پر فلم کیلئے تیار ہوں، اب زیادہ انتظار نہیں کرنا پڑے گا۔
فلم میں آئٹم نمبر کے حوالے سے ان کا کہنا تھا کہ یہ میں کبھی بھی نہیں کروں گی کیونکہ ہمارے ملک میں اسے پسند نہیں کیا جاتا۔
انہوں نے مزید کہا کہ پاکستانی ڈراموں یا تو خواتین بہت رو رہی ہیں، یا پھر بہت ہی بری ہیں، اس وقت جتنے بھی سکرپٹ آرہے ہیں ان میں ایک ہی طرح کی کہانیاں ہیں، مصنفین کو چاہیے کہ وہ سکرپٹ کو ذرا تبدیل کریں۔
لاہور: (خبریں ڈیجیٹل) پاکستانی شوبز انڈسٹری کی خوبصورت جوڑی ایمن خان اور منیب بٹ کے ہاں دوسری بیٹی کی پیدائش ہوئی ہے جس کا نام بھی منظر عام پر آ گیا ہے۔
اداکارہ ایمن کی بہن منال خان نے فوٹو اینڈ ویڈیو شیئرنگ ایپ انسٹاگرام پر ایک سٹوری شیئر کی ہے جو گلابی بیک گراؤنڈ پر مبنی ایک پوسٹ پر مشتمل ہے۔
مذکورہ سٹوری میں منال خان نے ایمن خان کے گھر میں دوسری بیٹی کی آمد کی تصدیق کرتے ہوئے لکھا ہے کہ 7 اگست کی رات 3 بج کر 4 منٹ پر امل کی فیملی میں ایک نئے مہمان کا اضافہ ہوا ہے۔
انہوں نے مزید لکھا کہ ننھی پری کا نام مرال منیب رکھا ہے جس نے ہمارے دلوں کو خوشی اور پیار سے بھر دیا ہے۔
نئی دہلی:(خبریں ڈیجیٹل) بھارتی وزیراعظم نریندرمودی کے خلاف پیش کردہ تحریک عدم اعتماد پر لوک سبھا میں بحث کے آغاز پر بھارتیہ جنتا پارٹی کے رکن پارلیمنٹ نشی کانت دوبے نے مؤقف اختیار کرتے ہوئے کہا کہ وزیراعظم کہتے ہیں کہ یہ عدم اعتماد کا ووٹ نہیں ہے، یہ اپوزیشن پر اعتماد کا ووٹ ہے۔ وہ دیکھنا چاہتے ہیں کہ ان کی حمایت کون کرتا ہے؟
مؤقر امریکی و برطانوی نشریاتی ادارں اور بھارتی اخبارات کے مطابق نشی کانت دوبے نے لوک سبھا میں خطاب کرتے ہوئے اپوزیشن رہنما سونیا گاندھی پر کڑی نکتہ چینی کی اور کہا کہ وہ روایتی بھارتی خاتون کی طرح اپنے بیٹے (راہول گاندھی) کو سیٹ کرنا چاہتی ہیں اور خواہش مند ہیں کہ داماد (پریانکا گاندھی کے خاوند) کا بھی خیال رکھ سکیں۔
واضح رہے کہ بھارتی وزیراعظم نریندر مودی کی حکومت کو شمال مشرقی ریاست منی پور میں جاری نسلی فسادات کے حوالے سے خاموشی اختیار کرنے پر حزب اختلاف کی جانب سے تحریک عدم اعتماد کا سامنا ہے۔
اپوزیشن جماعتوں کے سیاسی اتحاد انڈین نیشنل ڈیولپمنٹل انکلوسیو الائنس نے گذشتہ ماہ جولائی میں نریندر مودی حکومت کے خلاف تحریک عدم اعتماد پیش کی تھی جس پر آج منگل سے بحث کا آغاز ہوا ہے۔
میڈیا رپورٹ کے مطابق قبل ازیں کانگریس کے رکن پارلیمنٹ گورو گوگوئی نے لوک سبھا میں عدم اعتماد پر بحث کا آغاز کرتے ہوئے کہا کہ اپوزیشن یہ تحریک منی پور کے لیے لائی ہے، اگر منی پور جل رہا ہے تو انڈیا جل رہا ہے۔
گورو گوگوئی نے کہا کہ تحریک عدم اعتماد میں وزیراعظم نریندر مودی سے تین سوالات کیے ہیں، اول وہ آج تک منی پور کیوں نہیں گئے؟ دوئم، اس مسئلے کو حل کرنے میں انہیں تقریباً 80 دن کیوں لگے؟ اور سوئم، مودی نے منی پور کے وزیر اعلیٰ کو اب تک کیوں نہیں ہٹایا؟
میڈیا رپورٹ کے مطابق پیش کردہ عدم اعتماد پر بحث جمعرات 10 اگست تک جاری رہنے کا امکان ہے، یہ بحث 16 گھنٹے تک جاری رہے گی اور اس میں 15 مقررین حصہ لیں گے۔
رپورٹ کے مطابق پارلیمنٹ میں تحریک عدم اعتماد سے قبل بی جے پی کی پارلیمانی میٹنگ سے خطاب کرتے ہوئے وزیر اعظم نریندر مودی نے کہا کہ انڈیا بلاک کی طرف سے پیش کی گئی تحریک صرف ان کے لیے ایک پروگرام ہے لیکن ہمارے لیے یہ ایک موقع ہے۔
نریندر مودی نے کہا کہ حکمراں این ڈی اے کا انڈیا کو بدعنوانی اور خاندانی سیاست سے پاک رکھنے کا ایک ہی نعرہ رہا ہے جب کہ اپوزیشن اتحاد باہمی عدم اعتماد سے بھی دوچار ہے۔
واضح رہے کہ بھارتی علاقے منی پور میں گزشتہ دو ماہ سے جاری نسلی فسادات کے دوران درجنوں افراد ہلاک ہو چکے ہیں، سینکڑوں زخمی ہیں، ہزاروں بے گھر ہیں اور تسلسل کے ساتھ اقلیتی آبادی کو بہیمانہ طریقے سے تشدد کا نشانہ بنانے کا سلسلہ تاحال جاری ہے۔
یاد رہے کہ منی پور ہی میں گزشتہ دنوں اقلیتی آبادی سے تعلق رکھنے والی دو خواتین کو انسانیت سوز تشدد کا نشانہ بناتے ہوئے انہیں پورے گاؤں میں برہنہ کر کے بھی گھمایا گیا تھا جس کی ویڈیو بنا کر وائرل بھی کی گئی تھی جس سے انسانیت کا سر شرم سے جھک گیا تھا۔
وفاقی وزیر داخلہ رانا ثنا اللہ نے کہا ہے کہ نگران وزیراعظم کے حوالے سے فیصلہ آج رات 10 بجے تک ہوجائے گا.
نجی ٹی وی چینل سے گفتگو کرتے ہوئے انہوں نے نگران وزیراعظم کے نام کے اعلان سے متعلق اظہار خیال کیا۔ انہوں نے کہا کہ سربراہ پاکستان ڈیموکریٹک موومنٹ (پی ڈی ایم) مولانا فضل الرحمان نے کہہ دیا ہے کہ وزیراعظم شہباز شریف جو فیصلہ کریں گے انہیں منظور ہوگا۔
رانا ثنا اللہ کا کہنا تھا کہ متحدہ قومی موومنٹ (ایم کیو ایم) نے کامران ٹیسوری کا نام دیا ہے جبکہ پیپلز پارٹی بھی ایک دو نام دے گی۔ آئین اور قانون کے مطابق فیصلے ہوں گے۔ آج شام یا کل تک نگران وزیراعظم کا نام شاید فائنل ہوجائے۔
عام انتخابات سے متعلق انہوں نے کہا کہ آئین میں ہے کہ 2017 میں جو مردم شماری ہوئی اس پر دوسرا الیکشن نہیں ہوسکتا۔ حلقہ بندیوں میں 20 دن لگتے ہیں، اس میں کئی ماہ والی تو بات نہیں ہے۔
لیگی رہنما نے کہا کہ آرمی چیف کا احسان کا بدلہ احسان سے متعلق تھا جو مناسب تھا۔ آرمی چیف نے دہشتگردوں سے متعلق بہترین بیان دیا، انہوں نے واضح کردیا کہ دہشت گردوں سے مذاکرات قابل قبول نہیں۔
وزیر دفاع خواجہ آصف نے کہا ہے کہ نومبر میں انتخابات ہو جائیں گے البتہ مخصوص حالات میں ایک سے دو ماہ کی تاخیر ہو سکتی ہے۔
وزیر دفاع نے امریکی ٹی وی کو انٹرویو دیتے ہوئے کہا کہ 9 اگست کی شام تک اسمبلی تحلیل کر دی جائے گی جس کے بعد آئین کے مطابق 90 دن میں انتخابات کرانا ضروری ہیں۔ دو ماہ سے زیادہ انتخابات میں تاخیر نہیں ہو سکتی۔
علاوہ ازیں میڈیا سے گفتگو میں خواجہ آصف نے کہا ہے کہ انتخابات ایک سے 2 ماہ میں ہو جانے چاہئیں کیونکہ کوئی نئی حلقہ بندیاں نہیں ہو رہیں، نواز شریف انتخابات سے قبل ضرور پاکستان آئیں گے۔
انہوں نے کہا کہ پی ٹی آئی ہمیں 20 سال پہلے والے سیاسی اور معاشی بحران کی طرف لے گئی ہے، جمہوریت میں وزیر اعظم کا آنا جانا لگا رہتا ہے۔
وزیراعظم شہباز شریف کا جی ایچ کیو کا الوداعی دورہ، وزیراعظم نے یادگار شہدا پر پھول چڑھائے۔
آئی ایس پی آر کی پریس ریلیز کے مطابق وزیراعظم نے اپنے الوداعی دورے پر یادگار شہداء پر پھولوں کی چادر چڑھائی۔ آرمی چیف جنرل سید عاصم منیر نے وزیراعظم شہباز شریف کا استقبال کیا۔
وزیراعظم نے اپنے دورے پر جی ایچ کیو میں پرنسپل اسٹاف آفیسرز سے ملاقات کی۔ وزیراعظم شہباز شریف کو گارڈ آف آنر بھی پیش کیا گیا۔ وزیراعظم نے علاقائی سالمیت اور دہشتگردی سے نمٹنے کیلئے مسلح افواج کے کردار کی تعریف کی۔
وزیراعظم کا اس موقع پر خطاب کرتے ہوئے کہنا تھا کہ پاکستان کے معرض وجود میں آنے سے آج تک قربانیوں کا سلسلہ جاری ہے۔ خون سے لکھی تاریخ قیامت تک احساس دلاتی رہے گی۔
وزیراعظم نے مزید کہا کہ پاکستان کے معرض وجود میں آنے سے آج تک قربانیوں کا سلسلہ جاری ہے۔ آرمی ہماری محافظ ہے، فخر ہے آپ نے پاکستان کے دفاع کے لیے قربانیاں دیں۔
