اسلام آباد: (ویب ڈیسک) عالمی مالیاتی ادارے (آئی ایم ایف) نے پاکستان کے دورے کے بعد اعلامیہ جاری کر دیا۔
آئی ایم ایف کی جانب سے جاری اعلامیے میں کہا گیا ہے کہ آئی ایم ایف ٹیم نے 31 جنوری تا 9 فروری پاکستان کا دورہ کیا جو پروگرام کے نویں جائزے کے لیے تھا جب کہ دورے میں پاکستان سے تعمیری بات چیت ہوئی۔
اعلامیے کے مطابق مذاکرات میں مقامی اور بیرونی ناہمواریاں دور کرنے کے لیے قابل ذکر بات چیت آگے بڑھی، دورے میں مستقل ریونیو حصول کے اقدامات، نان ٹارگٹڈ سبسڈی میں کمی، غریب ترین طبقے کے سماجی تحفظ بڑھانے اور سیلاب متاثرین کی مدد کرنے پر بھی بات ہوئی۔
اعلامیے میں کہا گیا کہ مذاکرات میں گردشی قرض میں کمی کرکے توانائی کے شعبے میں عملداری یقینی بنانے اور پاکستانی حکام سے توانائی کی فراہمی بہترکرنے پربات ہوئی۔
اعلامیے میں مزید کہا گیا کہ آئی ایم ایف ٹیم میکرو استحکام کے لیے پالیسیوں پر عمل درآمدکا خیر مقدم کرتا ہے، میکرو استحکام اور پائیدارترقی کے لیے سرکاری شراکت داروں سے مالی مدد پاکستان کے لیے ضروری ہے، فیصلہ کن پالیسوں پربروقت عملدرآمد سے پاکستان میں میکرو استحکام آئے گا جب کہ ان پالیسیوں پر عملدر آمد کے لیے ورچوئل مذاکرات جاری رہیں گے۔

منچن آباد: (ویب ڈیسک) پنجاب کے ضلع بہاول نگر کی تحصیل منچن آباد میں 2 موٹر سائیکلوں کے درمیان تصادم کے نتیجے میں تین افراد زخمی ہو گئے۔
ریسکیو حکام کے مطابق حادثہ منچن آباد کے علاقے منصور دیوا روڈ پر پیش آیا جبکہ حادثے کے نتیجے میں زخمی ہونے والے افراد میں ایک بچی بھی شامل ہے۔
حکام نے مزید بتایا کہ حادثے میں زخمی ہونے والے تمام افراد کو طبی امداد کے لئے قریبی ہسپتال منتقل کر دیا گیا ہے۔

لاہور : (ویب ڈیسک) لاہور میں ادب، موسیقی اور ثقافت کے رنگوں سے بھرپور پہلے پاکستان لٹریچر فیسٹیول کا آج سے آغاز ہورہاہے جو 12 فروری تک جاری رہے گا ۔
لاہور کے الحمرا آرٹ کونسل میں نگراں وزیراعلیٰ پنجاب محسن نقوی اور وزیراعلیٰ سندھ سید مراد علیٰ شاہ فیسٹیول کا افتتاح کریں گے جبکہ پنجاب کے نگران وزیر اطلاعات و ثقافت عامر میر اور سندھ کے وزیر ثقافت اور تعلیم سید سردار شاہ بھی شرکت کریں گے۔
پاکستان لٹریچر فیسٹیول کے 50 سے زائد سیشنز ہوں گے جس میں تفریح، مزاح ، موسیقی، رقص کے علاوہ ادب، تعلیم، معیشت، کتابوں کی تقریب رونمائی، ملک کے معروف دانشوروں اور فنکاروں کے ساتھ گفتگو اور دیگر سنجیدہ سیشن بھی شامل کیے گئے ہیں ۔
10سے 12 فروری تک جاری رہنے والے اس فیسیٹول میں کیا کچھ ہونے جارہا ہے ان سرگرمیوں کی تفصیل کچھ یوں ہے :
پہلا روز : 10فروری بروز جمعہ
پاکستان لٹریچر فیسٹیول کے پہلے روز الحمرا آرٹ کونسل کے ہال نمبر ایک میں افتتاحی سیشن ہوگا جس میں میاں اعجاز الحسن، عطا الحق قاسمی ، سلیمہ ہاشمی، مستنصر حسین تارڑ، کشور ناہید، افتخار عارف اور دیگر کئی نامور شخصیات شامل ہوں گی۔
صدر آرٹس کونسل احمد شاہ خطبہ استقبالیہ دیں گے ، جس کے بعد ” اکیسویں صدی کے تہذیبی چیلنج ، پاکستان اور فکراقبال” کے عنوان سے مذاکرہ ہوگا جس میں ڈاکٹر ناصرہ جاوید اقبال، تحسین فراقی ، سید نعمان الحق شرکت کریں گے ۔
سینئر اداکار سہیل احمد جو عزیزی کے نام سے معروف ہیں ، ان کے ساتھ ایک دلچسپ بات چیت ہوگی ، جس کے بعد معروف گلوکار علی عظمت اور سائیں ظہور پر مشتمل ایک خوبصورت میوزیکل شام سجے گی۔
دوسرا روز : 11فروری بروز ہفتہ
پاکستان لٹریچر فیسیٹول کے دوسرے روز کا آغاز صبح 11 بجے الحمرا آرٹ کونس کے ہال نمبر 2 سے ہوگا جہاں “اردو فکشن میں نیا کیا ؟” کے عنوان سے سیشن ہوگا ، جس میں نامور ادیب اردو فکشن پر بات کرینگے ۔
اس کے علاوہ اور بھی بہت سے دلچسپ سیشنز فیسٹول میں شامل ہوں گے ، ان میں ایک سیشن ” احمد بشیر کا کنبہ ” ہوگا جس کی اداکارہ بشریٰ انصاری نظامت کریں گی جبکہ نیلم احمد بشیر، اسماء عباس، زارا نور عباس اور احمد عباس بطور پینلسٹ شامل ہونگے ۔
ادب کے ساتھ آرٹ نہ ہوایسا ممکن نہیں ، فیسٹول کے سیشن ” لاہور پور کمال” میں نیئر علی دادا، سلیمہ ہاشمی، یوسف صلاح الدین اور کامران لاشاری شامل ہوں گے، جبکہ معروف مصنف مستنصر حسین تارڑ کے ساتھ ’’میں بھناں دلی دے کنگرے‘‘ کے عنوان سے ایک اہم گفتگو بھی ہوگی، جس کے پینل میں مشتاق صوفی، پروفیسر زبیر احمد اور نین سکھ شامل ہوں گے، سیشن کی نظامت ڈاکٹر صغری صدف کریں گی۔
فیسٹول کے دوسرے روز ہی ملک کے مایہ ناز صحافی حامد میر نوجوانوں کے نام ایک سیشن کریں گے جس میں وہ نوجوانوں کے فکرونظر پر بات کریں گے ، اس سیشن کی نطامت صدر آرٹس کونسل احمد شاہ کریں گے ۔
صرف ادب ہی نہیں تفریح پر بھی بات ہوگی اور پاکستان کے معروف اداکار شان سے بات چیت کا ایک سیشن بھی ہوگا ۔
ہفتے کے روز ہی ایک اور فکر انگیز سیشن ” ٹی وی پاکستانی سماج کا ترجمان ؟” میں منور سعید، نور الہدیٰ شاہ، اصغر ندیم سید، صنم سعید، بی گل، آمنہ مفتی اور کاشف نثار شرکائے گفتگو ہوں گے، اس سیشن کی نظامت عفت عمر کریں گی۔
“پاکستانی آرٹ کے 75 برس ” میں میاں اعجاز الحسن، راحت نوید مسعود، شاہد رسام اور قدوس مرزا جیسے نامور ورچوئل آرٹسٹ شریک ہونگے ۔
فیسٹول میں شاعری کا ذوق رکھنے والوں کیلئے مشاعرے کا بھی اہتمام کیا جارہاہے جس کی صدارت معروف شاعر افتخار عارف کرینگے جبکہ انورمسعود ، امجد اسلام امجد ، وصی شاہ سمیت نامور شعرائے کرام لفظوں کے موتی بکھیریں گے ۔
نوجوانوں کے پسندیدہ شاعر علی زریون اور معروف میزبان واداکار یاسر حسین کی گفتگو بھی فیسٹول کا حصہ بنے گی ۔
علاوہ ازیں فیسٹیول میں بچوں کے ادب اور مختلف کتابوں کی تقریب رونمائی ، فن مصوری کی نمائش بھی ہوگی ۔
دوسرے روز کا اختتام پاکستان کے نامور گلوکار علی ظفر اور یوکرین کی معروف گلوکارہ کمالیہ کی پرفارمنس سے ہوگا ۔
تیسرا روز : 12فروری بروز اتوار
پاکستان لٹریچر فیسٹول کا تیسرا اور آخری روز بھی ادب، مکالمے اور موسیقی سے بھرپور ہوگا ، اتوار کو صبح گیارہ بجے ہال نمبر تین میں ’پنجاب کی لوک داستانیں ‘ کے عنوان سے سیشن کا اہتمام کیا جائے گا ۔ اسی طرح شاہد ندیم کی کتاب ’’مزاحمتی ڈرامے‘‘ کی رونمائی ہوگی جس کے پینلسٹ اصغر ندیم سید اور شائستہ سراج الدین ہوں گے۔
تعلیم ، موسمیاتی تبدیلیوں کے موضوعات پربھی فکری سیشنز فیسٹول کا حصہ ہیں جس میں شرکا ء موضوع پر بحث اور اپنا نقطہ نظربیان کرینگے ۔
فیسٹول میں افتخار عارف، فواد احمد فواد ، اخلاق احمد ، حارث خلیق (شاہد صدیقی ) ، عرفان صدیقی سمیت مخلتف مصنفین کی کتابوں کی تقریب رونماء بھی شامل ہے ۔
“انورمقصود کا پاکستان ” اس سیشن میں معروف ڈرامہ و افسانہ نگار ، میزبان انور مقصود گفتگو کریں گے ۔
فیسٹیول کے آخری دن ناہید صدیقی کا کلاسیکل رقص بھی پیش کیا جائے گا جبکہ عاصم اظہر ، ساحر علی بگا، نتاشا بیگ سمیت معروف فنکار میگا کنسرٹ میں اپنی آوازوں کا جادو بکھیریں گے ۔

کراچی: (ویب ڈیسک) پاک بحریہ کے زیر اہتمام آٹھویں کثیر القومی بحری امن مشق کا آغاز ہوگیا، مشقیں 14 فروری تک جاری رہیں گی۔
تفصیلات کے مطابق پاک بحریہ کے زیراہتمام 8 ویں کثیر القومی بحری امن مشقوں میں 50 سے زائد ممالک کے نمائندگان بحری اثاثوں ، مبصرین اور سینئر افسران کے ساتھ شریک ہیں، تقریب کے دوران امن مشق میں شامل 50 ممالک کی پرچم کشائی بھی کی گئی۔
تقریب کے مہمان خصوصی کمانڈر پاکستان فلیٹ وائس ایڈمرل اویس احمدبلگرامی تھے، پاک بحریہ کے سربراہ محمد امجد خان نیازی کا پیغام پڑھ کر سنایا گیا۔
سربراہ پاک بحریہ محمد امجد خان نیازی نے اپنے پیغام میں کہا کہ امن مشقوں میں 50 ملکوں کے دوستوں کو خوش آمدید کہتے ہیں، امن، ہم آہنگی اور استحکام کیلئے آگے بڑھنے والوں کا خیر مقدم کرتے ہیں، ان مشقوں کا مقصد علاقائی امن و سلامتی کو یقینی بنانا ہے۔
نیول چیف کا کہنا تھا کہ پاک بحریہ عالمی امن اور سلامتی کیلئے ہر اول دستے کا کام کرتی رہی ہے، میری ٹائم سکیورٹی کو غیرروایتی خطرات کا سامنا ہے، ماحولیاتی تبدیلی نے سمندری ماحول پر گہرے اثرات مرتب کئے ہیں۔
تقریب سے خطاب کرتے ہوئے مہمان خصوصی کمانڈر پاکستان فلیٹ وائس ایڈمرل اویس احمد بلگرامی نے کہا کہ تمام معزز مہمانوں کو خوش آمدید کہتے ہیں، میری ٹائم سکیورٹی تمام ملکوں کیلئے بہت اہم ہے، بحری سکیورٹی کیلئے مل کر کام کرنا پڑے گا، میری ٹائم سکیورٹی کو غیر روایتی خطرات کا سامنا ہے۔
وائس ایڈمرل اویس احمد بلگرامی کا کہنا تھا کہ امن مشق کا مقصد دوستی اور پارٹنر شپ کو فروغ دینا ہے، امن مشق کے ذریعے ہم دنیا میں امن لانے کیلئے اپنی کوششیں کریں گے، ان مشقوں کا فائدہ تمام شریک ملکوں کو ہوگا، ترکیہ اور شام میں ہولناک زلزلے میں جانی نقصان پر افسوس کا اظہار کرتے ہیں۔
واضح رہے کہ امن مشقیں ہر دو سال بعد منعقد ہوتی ہیں، پہلی 2007 میں منعقد ہوئی تھیں، ہرخطے سے بحری فوج کو اکٹھا کرنا پاکستان بحریہ کا بڑا اعزاز ہے۔
بحری مشق کا مقصد شامل ممالک کے درمیان ہم آہنگی، امن کا فروغ ہے، امن مشقوں کا مقصد خطے کا بحری استحکام، مشترکہ کارروائیوں کی صلاحیتوں میں اضافہ اور مثبت تصور کو اجاگر کرنا بھی ہے۔

اسلام آباد: (ویب ڈیسک) قومی ادارہ صحت ( این آئی ایچ) نے کہا ہے کہ گزشتہ 24 گھنٹوں کے دوران ملک بھر میں 4 ہزار 526 کورونا ٹیسٹ کئے گئے ہیں۔
این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 4 ہزار 526 کورونا ٹیسٹ کئے گئے جن میں سے 21 افراد کے کورونا ٹیسٹ مثبت آئے ہیں۔
اس طرح گزشتہ 24 گھنٹوں میں کئے گئے مثبت کورونا ٹیسٹ کی شرح 0.46 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 10 مریضوں کی حالت تشویشناک ہے۔

لاہور : (ویب ڈیسک) صوبائی دارالحکومت کے علاقے جوہر ٹاؤن میں مین بلیوارڈ روڈ پر شگاف پڑ گیا، پچیس فٹ سے زائد شگاف پڑنے سے گاڑی اندر جاگری، گاڑی میں سوار تین افراد زخمی ہوئے جنہیں ریسکیو کر لیا گیا ہے۔
جوہر ٹاؤن میں شوکت خانم ہسپتال سے چند گز کے فاصلے پر زیر زمین سیوریج پائپ لائن بیٹھ جانے سے شگاف پڑگیا، شگاف پڑ جانے سے ایک گاڑی دھنس گئی جس میں تین افراد سوار تھے ، ریسکیو نے ایک گھنٹے کی کوشش کے بعد زمین میں دھنس جانے والی گاڑی سے تین افراد کو ریسکیو کیا جبکہ گاڑی نکالنے کے لیے ہیوی مشینری منگوائی گئی۔
ڈپٹی کمشنر ( ڈی سی ) لاہور رافعہ حیدر نے کہا کہ کئی سال پرانی پائپ لائن ہے ، شگاف پڑنے سے کوئی جانی نقصان نہیں ہوا، تین افراد معمولی زخمی ہوئے ہیں جنہیں نکال لیا گیا ہے۔
مینجنگ ڈائریکٹر ( ایم ڈی ) واسا کا کہنا ہے کہ اس سال ترقیاتی سکیم میں مین جوہر ٹاؤن روڈ کو شامل کیا گیا ہے، سڑک کی تعمیر میں تین دن سے زائد لگ سکتے ہیں۔

گوجرانوالہ: (ویب ڈیسک) پاکستان تحریک انصاف (پی ٹی آئی) سنٹرل پنجاب کی صدر اور سابق صوبائی وزیر ڈاکٹر یاسمین راشد نے کہا ہے کہ جب بھی سابق وزیراعظم عمران خان حکم کریں گے ہم پنجاب کی جیلیں بھر دیں گے۔
انسداد دہشتگردی کی خصوصی عدالت کے باہر میڈیا سے گفتگو کرتے ہوئے رہنما پی ٹی آئی یاسمین راشد نے کہا کہ حکومت اوچھے ہتھکنڈوں سے باز نہیں، آج تفتیشی افسر نے ریکارڈ عدالت میں پیش کرنا تھا، عدات نے ڈی جی اینٹی کرپشن کو بلایا تھا لیکن انہوں نے راتوں رات اس کی ٹرانسفر کر دی۔
انہوں نے کہا کہ یہ پوری کوشیش کر رہے ہیں کہ ہمیں انصاف نہ ملے لیکن ہمیں عدالتوں پر پورا یقین ہے، 14 فروری کو کیس کی دوبارہ سماعت ہو گی، اسلام آباد سے جے آئی ٹی مسلط کرنے کی کوشش کر رہے ہیں، یہ نگران حکومت جو بنائی گئی ہے ان کی تحریک انصاف سے دشمنی عیاں ہے۔
رہنما پی ٹی آئی نے کہا کہ امپورٹڈ حکومت نے ملک کا بیڑا غرق کر دیا ہے، الیکشن نہ کروانے کے بہانے تلاش کیے جا رہے ہیں، سکیورٹی فورسز کہتی ہیں کہ ہم الیکشن میں سکیورٹی فراہم نہیں کر سکتیں، ضمنی الیکشن کیلئے سیکیورٹی مل سکتی ہے تو صوبائی انتخابات کیلئے کیوں نہیں مل سکتی۔
یاسمین راشد کا کہنا تھا کہ 25 مئی کو جو ظلم کیا گیا اس کی مثال نہیں ملتی، یہ سمجھتے ہیں کہ تاخیر کرنے سے الیکشن جیت جائیں گے لیکن الیکشن جب بھی ہو گا جیتے گا صرف عمران خان۔
ان کا مزید کہنا تھا کہ اسمبلی میں واپس جانے کا مقصد یہ ہے کہ وفاق میں جو نگران حکومت بنائی جائے اس میں من مانی نہ کی جا سکے، اے پی سی میں جانے کا فیصلہ عمران خان کریں گے۔

لاہور: (ویب ڈیسک) پاکستان تحریک انصاف (پی ٹی آئی ) کے رہنماؤں نے کہا ہے کہ 3 دن گزر گئے تو آئینی مسائل پیدا ہوں گے، الیکشن کی تاریخ نہ دی گئی تو ہمیں آئین کی بحالی کیلئے تحریک چلانی پڑے گی۔
لاہور ہائی کورٹ کے باہر میڈیا سے گفتگو کرتے ہوئے تحریک انصاف کے جنرل سیکرٹری اسد عمر نے کہا کہ آئین کہتا ہے الیکشن کا انعقاد کروانا الیکشن کمیشن کی ذمہ داری ہے، ذمہ داری پوری نہ ہونے کی صورت میں اس کا نتیجہ بھی آئین میں لکھا ہوا ہے۔
اسد عمر نے کہا کہ ان کو سیاسی موت نظر آرہی ہے، یہ عمران خان کا مقابلہ نہیں کر سکتے اس لیے الیکشن کی تاریخ کا اعلان نہیں کررہے، تحریک انصاف آئین کے ساتھ کھڑی ہے، کارکنان حلقوں میں اتریں اور انتخابی مہم شروع کریں، الیکشن آ رہا ہے۔
رہنما پی ٹی آئی فواد چودھری نے کہا کہ اس وقت پنجاب میں 12 کروڑ سے زائد لوگوں کے حقوق سلب کیے جا رہے ہیں، اگر 90 روز میں الیکشن نہیں ہوتے تو آرٹیکل 6 میں سزا موجود ہے، انتخابات ہونے سے پنجاب کے عوام کو ان کا آئینی حق ملے گا۔
فواد چودھری کا کہنا تھا کہ الیکشن کی تاریخ نہیں دی جاتی تو ہمیں آئین کی بحالی کے لئے تحریک چلانی پڑے گی، پی ڈی ایم پہلے عوام، پھر الیکشن اب عدالت سے بھاگ رہی ہے۔

مری: (ویب ڈیسک) اسلام آباد کی مقامی عدالت نے مری پولیس کی 3 روزہ جسمانی ریمانڈ کی استدعا مسترد کرتے ہوئے سربراہ پاکستان عوامی مسلم لیگ شیخ رشید کو 14 روز کے جوڈیشل ریمانڈ پر جیل بھیج دیا۔
سابق صدر آصف زرداری پر عمران خان کے قتل کی سازش کا الزام لگانے کے کیس میں گرفتار شیخ رشید کیخلاف تھانہ مری میں مقدمہ درج تھا، گزشتہ روز عدالت نے ایک روزہ راہداری ریمانڈ پر مری پولیس کے حوالے کیا تھا۔
مری پولیس نے شیخ رشید کو سول کورٹ میں پیش کیا اور 3 روزہ جسمانی ریمانڈ کی استدعا کی تھی، مری پولیس کی جانب سے استدعا کی گئی تھی کہ شیخ رشید سے مقدمے سے متعلق تفتیش کرنی ہے اور کچھ ریکوریز کرنی ہیں۔
درخواست میں استدعا کی گئی کہ شیخ رشید کو 3 روزہ جسمانی ریمانڈ پر پولیس کے حوالے کیا جائے، عدالت نے مری پولیس کی جسمانی ریمانڈ کی استدعا مسترد کرتے ہوئے شیخ رشید کو 14 دن کے جوڈیشل ریمانڈ پر جیل بھیج دیا۔
شیخ رشید
میڈیا سے گفتگو کرتے ہوئے سربراہ عوامی مسلم لیگ شیخ رشید نے کہا ہے کہ ساری زندگی جیل میں گزار سکتا ہوں مگر اتحایوں سے بے وفائی نہیں کر سکتا۔
سابق وزیر داخلہ شیخ رشید کا کہنا تھا کہ مخالفین چاہتے ہیں کہ پیٹریاٹ پارٹی کی سربراہی کروں مگر بے وفائی نہیں کروں گا۔
شیخ رشید نے کہا ہے کہ خان صاحب کو پیغام دینا چاہتا ہوں کہ یہ صوبائی الیکشن نہیں کرانے جا رہے، یہ قومی اور صوبائی الیکشن اکٹھے کرائیں گے، میں ضمنی انتخاب میں قلم دوات پر این اے 62 سے الیکشن لڑوں گا۔
عوامی مسلم لیگ کے سربراہ کا یہ بھی کہنا ہے کہ میرے خلاف کوئی کیس نہیں، کیس کے پیچھے فیس ہے، میرے گھر میں ڈکیتی کی گئی، سامان لوٹا گیا۔

اسلام آباد: (ویب ڈیسک) وفاقی وزیر خزانہ اسحاق ڈار نے کہا ہے کہ وہ آج آئی ایم ایف سے مذاکرات سے متعلق اچھی خبر دیں گے۔
اسلام آباد میں تقریب کے بعد میڈیا نمائندوں سے غیر رسمی گفتگو میں اسحاق ڈار نے کہا کہ آئی ایم ایف مشن کے ساتھ ملاقات کر رہا ہوں اور ان کے ساتھ مذاکرات آن ٹریک ہیں۔
وزیر خزانہ نے کہا کہ آئی ایم ایف سے کوئی اختلاف نہیں، ان کے ساتھ آج فائنل راونڈ چل رہا ہے، ان مذاکرات سے متعلق آج اچھی خبر دیں گے۔