حسان خاور نے کہا ہے کہ (ن) لیگ اور پیپلز پارٹی والے الیکٹرانک ووٹنگ مشین سے خوفزدہ ہیں، یہ دونوں جماعتیں ٹھپہ مافیا کی ماسٹر مائنڈ ہیں۔
ترجمان پنجاب حکومت حسان خاور نے اپنے بیان میں کہا ہے کہ (ن) لیگ اور پیپلزپارٹی نے ہمیشہ دھاندلی کے ذریعے الیکشن جیتے ہیں، ای وی ایم کے ذریعے ووٹنگ سے اپوزیشن کی دھاندلی زدہ سیاست ہمیشہ کیلئے دفن ہوجائے گی، ای وی ایم سے الیکشن کے اعلان پر دھاندلی سے الیکشن جیتنے والی جماعتوں پر لرزہ طاری ہے، شفاف الیکشن ووٹ کی حرمت کیلئے ضروری ہیں۔
حسان خاور کا کہنا تھا کہ قوم ای وی ایم کے ذریعے ووٹنگ کی حامی ہے، انتخابات میں ای وی ایم تھرڈ امپائر کا کردار ادا کرے گی، الیکٹرانک ووٹنگ مشین سے خوفزدہ اپوزیشن کو اپنا سیاسی مستقبل تاریک نظر آرہا ہے۔

اسلام آباد : نیشنل کمانڈ اینڈ آپریشن سینٹر اومیکرون کے خطرے کے پیش نظر کورونا ویکسینیشن سے متعلق سخت اقدامات کا فیصلہ کرلیا اور صوبوں کو ویکسینیشن کےاہداف کے حصول کی ہدایت کردی۔

تفصیلات کے مطابق نیشنل کمانڈ اینڈ آپریشن سینٹر کا اجلاس ہوا ، جس میں این سی او سی نے کورونا صورتحال اور نیشنل ویکسین اسٹریٹجی پر غور کیا گیا۔

اجلاس میں متعلقہ حکام نے کورونا پھیلاؤ،شرح اموات،اسپتال میں داخلوں پربریفنگ دی ، این سی او سی نے شہروں میں جاری ویکسینیشن مہم پر تفصیلی غور
کیا۔

این سی او سی نے کورونا ویکسینیشن کےبارے میں سخت اقدامات پر اتفاق کیا اورکورونا ویکسینیشن کے ضلع کی سطح پر اہداف پر غور کرتے ہوئے کہا صوبے ویکسینیشن کےاہداف کے حصول کیلئے سخت اقدامات کریں۔

این سی او سی نے کورونا ویکسینیشن کی شرح، اسٹاک، خریداری کے امور پر غور کرتے ہوئے کہا صوبے کورونا ویکسینیشن میں بہتری کیلئےاقدامات کریں۔

این سی او سی کا کہنا تھا کہ اومی کرون کے تناظر میں ویکسینیشن میں اضافہ ناگزیر ہے، اومی کرون کا پھیلاؤ روکنے کا واحد حل کورونا ویکسینیشن ہے۔

نیشنل کمانڈ اینڈ آپریشن سینٹر نے ملک میں میڈیکل آکسیجن کی پیداوار، ترسیل کے نظام پر غور کرتے ہوئے مختلف مقامات پر آکسیجن پروڈکشن پلانٹس لگانے کی تجویز دے دی اور کہا ملک کےدوردرازعلاقوں میں آکسیجن پروڈکشن پلانٹس لگائےجائیں۔

سوئی ناردرن گیس کمپنی نے اوگرا کو گیس ٹیرف میں ڈیڑھ سو فیصد اضافے کی درخواست دے دی۔
چیئرمین اوگرا مسرور خان نے لاہور میں گیس کی قیمت میں اضافے سے متعلق درخواست پر سماعت کی۔
اس موقع پر ایم ڈی سوئی ناردرن علی جے ہمدانی نے مؤقف اپنایا کہ اس سال 269 روپے فی ایم ایم بی ٹی یو اضافے کا مطالبہ کیا ہے، گیس کی قیمت میں اضافہ مانگنا نئی بات نہیں۔
انہوں نے کہا کہ گیس نہ ہونے کی افواہیں چل رہی ہیں جو درست نہیں، آر ایل این جی اس میں شامل کرکے ضرورت پوری کرتے ہیں۔
چیئرمین اوگرا کا کہنا تھا کہ جو بھی فیصلہ ہوگا وہ صارفین کے مفادات کو سامنے رکھ کر کیا جائے گا، فی الحال کمپنیوں کی پٹیشن کو سپورٹ کریں گے کیونکہ گیس درآمد کرکے قیمت کم کرنا مشکل ہے۔

لاہور میں رواں سال 110 کم سن بچوں اور 18 بچیوں کو زیادتی کا نشانہ بنایا گیا جب کہ اجتماعی زیادتی کے 37 واقعات ہوئے۔
2021 کے 11 ماہ لاہور میں جنسی زیادتی کے 747 واقعات ہو ئے جن میں سے اجتماعی زیادتی کے 37 اور انفرادی زیادتی کے 582 واقعات رپورٹ ہوئے۔
پولیس ریکارڈ کے مطابق ڈی این اے کے 575 نمونے فرانزک کے لیے بھجوائے گئے جن میں سے صرف 30 کا رزلٹ مل سکا جب کہ 545 نمونے فرانزک سائنس ایجنسی میں تاحال التوا کا شکار ہیں۔
پولیس ریکارڈ میں بتایا گیا ہےکہ زیادتی کے 796 ملزمان میں سے 567 کو گرفتار کیا گیا، 172 مقدمات زیر تفتیش ہیں جب کہ 103 کیسز کے چالان مکمل کر کے عدالتوں میں بھجوا دیے گئے۔
پولیس حکام کا کہنا ہے کہ زیادتی کے 217 مقدمات فریقین کی رضامندی سے خارج ہوگئے جب کہ دیگر کی تفتیش جلد مکمل کر لی جائے گی۔