اسلام آباد: (ویب ڈیسک) بنکنگ کورٹ نے فنڈنگ کیس میں عمران خان کے دو شریک ملزمان کی عبوری ضمانت منظور کر لی۔
بنکنگ کورٹ اسلام آباد میں پی ٹی آئی ممنوعہ فنڈنگ اور فارن ایکسچینج ایکٹ کے تحت مقدمے کی سماعت ہوئی، سابق وزیر اعظم عمران خان کے دو شریک ملزمان نے ضمانت کی درخواست کی۔
ملزمان کے وکیل نے کہا کہ ہائیکورٹ کے احکامات کے بعد فارن ایکسچینج ایکٹ کا کیس بنکنگ کورٹ کو منتقل ہوگیا ہے، طارق شفیع اور فیصل مقبول 20 اکتوبر کو ایف آئی اے کے سامنے شامل تفتیش ہوچکے ہیں۔
عدالت نے طارق شفیع اور فیصل مقبول کی 31 اکتوبر تک عبوری ضمانت منظور کرتے ہوئے انہیں ایک ،ایک لاکھ کے ضمانتی مچلکے جمع کرانے کا حکم دیا اور ایف آئی اے کو 31 اکتوبر کے لئے نوٹس جاری کر دیا۔
واضح رہے کہ سابق وزیر اعظم عمران خان پہلے ہی سپیشل جج سینٹرل سے 31 اکتوبر تک عبوری ضمانت لے چکے ہیں۔

راولپنڈی: (ویب ڈیسک) سربراہ عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ سیاست کا فائنل راؤنڈ شروع ہوگیا ہے، نومبر میں آر پار ہوجائے گا۔
سماجی رابطے کی ویب سائٹ ٹویٹر پر اپنے پیغام میں شیخ رشید احمد نے لکھا کہ جس طرح وزیر قانون سے استعفیٰ لیا گیا اسی طرح حکومت سےالیکشن کی تاریخ لی جائے گی، غیر مقبول بھکاریوں کو کہیں سے خیرات نہیں ملے گی۔
سربراہ عوامی مسلم لیگ نے کہا کہ ارشدشریف پرمریم کے ٹویٹ اور دیوالی کا کیک کاٹنے والے نواز شریف پر ساری قوم لعن طعن بھیج رہی ہے، جمعرات کو 2 بجے فیصل مسجد میں شہید کا نمازجنازہ پڑھیں گے۔
سابق وفاقی وزیر کا مزید کہنا تھا کہ جمعے کو 11 بجے لبرٹی چوک لاہور سے ظالم چوروں کے خلاف عمران خان کی قیادت میں نکلیں گے، پرامن آئینی اور قانونی احتجاج قوم کا حق ہے، رانا ثناءاللہ جسے ایئرپورٹ جانے کی ہمت نہیں ہوئی، اگر اس نے طاقت استعمال کی تواسے بھاگنے کی بھی مہلت نہیں ملے گی۔

لاہور: (ویب ڈیسک) وزیراعلیٰ پنجاب چودھری پرویزالٰہی نے کہا ہے کہ غریب آدمی کو ریلیف دیناعمران خان کا ویژن ہے، جسے ہم نے عملی جامہ پہنایا ہے۔
وزیراعلیٰ پنجاب چودھری پرویز الٰہی سے تحریک انصاف کے وفد نے ملاقات کی، اس موقع پر صوبائی وزیر راجہ بشارت بھی موجود تھے، وفد میں شرجیل یونس،ملک محبوب الہیٰ،حاجی ملک محمد رفیق،چودھری ذوالفقار اورزین اعجاز شامل تھے، وفد نے وزیراعلیٰ چودھری پرویزالٰہی کی فلاحی خدمات کو سراہا۔
وزیراعلیٰ پنجاب چودھری پرویزالٰہی نے اس موقع پر گفتگو کرتے ہوئے کہا ہے کہ پنجاب کے عوام کو ریلیف اور زیادہ سے زیادہ سہولتیں دینے کیلئے کوشاں ہیں، پنجاب احساس راشن رعایت پروگرام چیئرمین پی ٹی آئی عمران خان کا فلیگ شپ پروگرام ہے، اس پروگرام کے ذریعے 80 لاکھ مستحق خاندانوں کو 40 فیصد سستی اشیاء صرف فراہم کی جارہی ہیں۔
پرویزالٰہی کا کہنا تھا کہ مستحق خاندان رجسٹرڈ کریانہ سٹور سے 40 فیصد کم نرخ پر دالیں، گھی، آئل اور آٹا خرید سکتے ہیں، رجسٹرڈ کریانہ سٹورز کے مالکان کو 10 فیصد کمیشن بھی دیا جا رہا ہے، احساس راشن رعایت پروگرام غربت کے خاتمے اور فلاحی ریاست کی جانب ایک بہت بڑا قدم ہے۔
انہوں نے مزید کہا ہے کہ سیلاب سے متاثرہ تین اضلاع میں بھی متاثرین کو اس پروگرام میں رجسٹرڈ کرایاگیا ہے، ابتدائی طور پر پنجاب حکومت نے ایک سو ارب روپے اس پروگرام کے لئے رکھے ہیں۔