اسلام آباد: (ویب ڈیسک) وفاقی وزیرداخلہ رانا ثنا اللہ نے پی ٹی آئی کے چیئر مین عمران خان کو غیر مشروط طور پر پی ڈی ایم قیادت سے بیٹھ کر بات کرنے کی پیشکش کر دی۔
سوشل میڈیا پر سامعین کے ساتھ گفتگو کرتے ہوئے رانا ثنااللہ نے کہا کہ عمران نیازی اپنا رویہ سیاستدانوں والا رکھے تو پھر بات ہو سکتی ہے،وہ غیرمشروط طور پر پی ڈی ایم قیادت سے رابطہ کریں اور بیٹھ کر بات کریں۔
وزیرداخلہ کا کہنا تھا کہ الیکشن موجودہ اسمبلی کی آئینی مدت پوری ہونے پر ہوں گےجبکہ عمران خان کے لانگ مارچ میں 10 سے 12 ہزار کے قریب لوگ ہیں۔
ان کا کہنا تھا کہ وزیراعظم نے لانگ مارچ کا جائزہ لینے کیلئے ایک کمیٹی تشکیل دی ہے، عمران نیازی پر امن احتجاج کرنا چاہیں تو پھر ہمیں حق حاصل نہیں کہ اسے روکیں، اگر یہ اسلام آباد کا محاصرہ کریں گے تو بھرپور طاقت سے روکیں گے۔
انہوں نے کہا کہ عمران خان عجیب آدمی ہے جو نہ سیاست کو سمجھتا ہے نہ جمہوریت کو، وہ اپنا رویہ تبدیل کرے اور سیاسی جماعتوں کے ساتھ آکر بیٹھے، ملک سیلاب کی تباہی سے دوچار ہے، معاشی بدحالی ہے، اس پر بات کرے۔
اس کے علاوہ وزیرداخلہ کا کہنا تھا کہ بہت سے لوگ بجلی کے بلوں پر بھی ناراض ہیں،جب تک ہم عوام کو ریلیف نہیں دیں گے اسی صورتحال کا سامنا رہے گا،ہم چاہتے تھے الیکشن میں جائیں،دوسری سیاسی جماعتوں کی جمہوری رائے کےساتھ جانا پڑا۔
انہوں نے کہا کہ ادارے کے کسی عمل پر اختلاف تو کیا جا سکتا ہے لیکن حملہ نہیں کیا جاسکتا، کل ادارے کی طرف سے قوم کو گواہ بنا کر کہا گیا آئینی کردار ادا کریں گے۔

اسلام آباد: (ویب ڈیسک) وزیراعظم شہباز شریف نے پولیو ٹیم کی حفاظت کے دوران شہید ہونے والے لیویز اہلکار حبیب الرحمن کو خراج عقیدت پیش کیا ہے۔
انہوں نے کہا کہ پولیو ٹیم کی حفاظت کرتے ہوئے جام شہادت نوش کرنے والے حبیب الرحمن کو قوم سلام پیش کرتی ہے، دہشت گرد پاکستان کے بچوں کو معذور بنانا چاہتے ہیں۔
شہباز شریف نے کہا کہ قوم کی حمایت اور افواج کی مدد سے دہشت گردی کے مرض کا خاتمہ کریں گے، پولیو کے خلاف جنگ لڑنے والے ورکرز اور ان کے محافظوں کو خراج تحسین پیش کرتے ہیں۔
واضح رہے کہ بلوچستان کے علاقے چمن میں پولیو ٹیم کی حفاظت مامور لیویز سیکیورٹی اہلکار نامعلوم افراد کی فائرنگ سے شہید ہوگیا تھا جس کی شناخت حبیب الرحمان ولد گلزمان ماسٹر سے ہوئی تھی۔

اسلام آباد: (ویب ڈیسک) اقتصادی رابطہ کمیٹی (ای سی سی) نے ٹریڈنگ کارپوریشن آف پاکستان کو اوپن ٹینڈر کے ذریعے یا حکومتی سطح پر آٹھ لاکھ میٹرک ٹن گندم اور تین لاکھ میٹرک ٹن یوریا کھاد درآمد کرنے کی منطوری دے دی۔
کابینہ کی اقتصادی رابطہ کمیٹی (ای سی سی) کا اجلاس گذشتہ روز یہاں وفاقی وزیر خزانہ اسحاق ڈار کی زیر صدارت منعقد ہوا، اجلاس میں ای سی سی نے تین لاکھ میٹرک ٹن یوریا کھاد کی درآمد کے لیے میسز مخدوم لاجسٹک سروسز کی طرف سے دی جانیوالی 520 ڈالر میٹرک ٹن کی کم سے کم بولی کی بھی منظوری دیدی ہے۔
ای سی سی نے پر ٹریڈنگ کارپوریشن آف پاکستان کو میسز مخدوم لاجسٹک سروسز کی طرف سے دی جانیوالی 520 ڈالر میٹرک ٹن کی کم سے کم بولی پر یوریا درآمد کرنے کا پراسیس آگے بڑھانے کی اجازت دیدی ہے۔
ای سی سی نے ٹر یڈنگ کارپوریشن آف پاکستان کو اوپن ٹینڈرکے ذریعے یا حکومتی سطع پر آٹھ لاکھ میٹرک ٹن گندم درآمد کرنے کی اجازت دیدی ہے جبکہ ای سی سی نے پاسکو کے سٹاک سے صوبوں کو درآمدی گندم کی اضافی سپلائی فراہم کرنے کی اجازت دے دی ہے۔
علاوہ ازیں ای سی سی نے ایک لاکھ بیس ہزار میٹرن ٹن گندم درآمد کرنے کیلئے چھٹے بین الاقوامی ٹینڈر کے تحت میسز ایسٹن ایف ایف آئی ڈی ایم سی سی اور میسز فرٹائل پرائیویٹ لمیٹڈ کی جانب سے دی جانیوالی 373 ڈالر فی میٹرک ٹن کی کم سے کم پیشکش کی بھی منظوری دیدی ہے۔

اسلام آباد:(ویب ڈیسک) پاکستان نے اقوام متحدہ ( یو این ) کی انسداد دہشت گردی کمیٹی اجلاس میں بھارت کا بے بنیاد پروپیگنڈا مسترد کر دیا ۔
ترجمان دفتر خارجہ کی جانب سے جاری کردہ بیان کے مطابق بھارت نے یو این کی سلامتی کونسل کی ایک اہم کمیٹی کا غلط استعمال کیا، عالمی برادری کو عالمی دہشتگردی کیخلاف پاکستان کے کردار پرگمراہ کیا، بھارت کی ہتک آمیز حرکتیں کمیٹی کے مقاصد اور مینڈیٹ کو نقصان پہنچاتی ہیں اور قابل مذمت ہیں، بھارت نے جان بوجھ کر ممبئی حملہ کیس کی عدالتی کارروائی کو روکا ہوا ہے، بھارت کیس کی قانونی کارروائی کو غیر منصفانہ طور پر طول دینے کی کوششوں کے لیے جوابدہ ہونا چاہیے۔
دفتر خارجہ کے ترجمان کے مطابق ممبئی میں سی ٹی سی کے آج کے اجلاس میں بھارت کی ناروا مداخلت ایک بار پھر پاکستان کے دیرینہ خدشات کی تصدیق کرتی ہے، بھارت صرف پاکستان کو بدنام کرنے کے لیے انسداد دہشتگردی کے عالمی فورمز پر سیاست کرنے میں دلچسپی رکھتا ہے، بھارت کو یاد رکھنا چاہیے کہ ممبئی حملوں کا معاملہ عدالت میں ہے، دہشت گردی کے خلاف عالمی جنگ میں پاکستان کے کردار کو عالمی برادری نے تسلیم کیا ہے، بھارت اپنی اور دوسرے ممالک کی سرزمین استعمال کرتا ہے، بھارت پاکستان کیخلاف دہشتگردی کی حمایت میں ملوث رہا ہے، پاکستان میں رنگے ہاتھوں پکڑا جانے والا بھارتی جاسوس کلبھوشن یادیو زندہ ثبوت ہے۔
انہوں نے مزید کہا کہ کالعدم ٹی ٹی پی اور دیگر عالمی دہشتگرد تنظیموں کے ساتھ ہندوستانی تعاون بھی مشہور ہے، بھارت کی منافقت بھارتی غیر قانونی طور پر مقبوضہ جموں و کشمیر میں اس کی ریاستی دہشتگردی سے بھی عیاں ہے۔

اسلام آباد: (ویب ڈیسک) پیمرا نے پاکستان تحریک انصاف (پی ٹی آئی) کے لانگ مارچ کی لائیو کوریج پر پابندی عائد کر دی۔
پاکستان الیکٹرانک میڈیا ریگولیٹری اتھارٹی نے ٹی وی چینلز کو ہدایات جاری کی ہیں کہ پی ٹی آئی کے لانگ مارچ اور اس کے رہنماؤں کی تقریروں سمیت دیگر پروگراموں کو براہِ راست نشر نہ کیا جائے۔
پیمرا کی جانب سے 28 اکتوبر کو جاری ہونے والے نوٹیفکیشن میں بتایا گیا ہے ٹی وی چینلز کو پروگرام براہ راست نشر نہ کرنے کی ہدایات پہلے بھی دی گئی تھیں، تاہم اس کی کمپلائنس بہت خراب ہے۔ آج ٹرانسمیشن کو مانیٹر کیا گیا، اس بات کا مشاہدہ کیا گیا کہ تقریر کے دوران اداروں کے خلاف بیانات براہ راست نشر ہوئے، جو عدالتی حکم اور ضابطہ اخلاق کی خلاف ورزی ہے۔
ٹیلی ویژن چینلز کو احکامات دیے گئے ہیں کہ وہ ایسا مواد نشر کرنے سے گریز کریں جو (دانستہ یا نادانستہ) ریاستی اداروں کو بدنام کے مترادف ہے، اور اپنے ایڈیٹوریل بورڈز، ڈائریکٹرز، بیوروز اور رپورٹرز کو اس حوالے سے ہدایات دیں۔
پیمرا نے انتباہی انداز میں کہا کہ ہدایات پر عمل نہ کرنے کی صورت میں قانونی کارروائی ہو سکتی ہے، جس کے تحت لائسنس کی معطلی اور منسوخی بھی ہوسکتی ہے۔

لاہور: (ویب ڈیسک) پاکستان تحریک انصاف چھوڑنے کا اعلان کرنے والے رکن پنجاب اسمبلی خرم لغاری نے نیا ویڈیو بیان جاری کردیا۔
ویڈیو بیان میں خرم لغاری کا کہنا تھاکہ میرا قافلہ لانگ مارچ میں شرکت کیلئے رواں دواں ہے اور مونس الٰہی کی قیادت میں لانگ مارچ میں شرکت کٰلئے جارہا ہوں۔
ان کا کہنا تھاکہ عمران خان اور پرویز الٰہی کے ساتھ کھڑے ہیں اور کھڑے رہیں گے۔
خیال رہے کہ رکن پنجاب اسمبلی خرم لغاری نے آج صبح تحریک انصاف چھوڑنے کا اعلان کیا تھا اور دعویٰ کیا تھا کہ پی ٹی آئی کے4 دیگرایم پی ایز بھی پارٹی چھوڑ رہے ہیں۔
یاد رہے کہ خرم لغاری ماضی میں بھی پارٹی پالیسیوں پر تحفظات کا اظہار کر چکے ہیں اور جب سابق وزیراعلیٰ عثمان بزدار کے خلاف گروپ بنا تھا تو وہ اس میں بھی شامل تھے۔