اسلام آباد: (ویب ڈیسک) ادارہ شماریات نے ہفتہ وار مہنگائی کے اعدادوشمار جاری کردیے۔
ادارہ شماریات کے مطابق ایک ہفتے میں مہنگائی میں مزید 1.31 فیصد اضافے کے بعد مجموعی شرح 45.50 فیصد ہوگئی۔
ادارہ شماریات نے بتایا کہ ایک ہفتے میں 31 اشیا کی قیمتوں میں اضافہ ہوا، پیاز 51 روپے 52 پیسے، ٹماٹر 20 روپے 87 پیسے اور دال مونگ کی قیمت میں 17 روپے 21 پیسے فی کلو اضافہ ہوا۔
ادارہ شماریات کا کہنا ہے کہ ایل پی جی کا گھریلو سلنڈر 118 روپے 63 پیسے، آلو 4 روپے 55 پیسے، انڈے فی درجن 8 روپے 39 پیسے مہنگے ہوئے، 20 کلو آٹے کا تھیلا 18 روپے 33 پیسے اور مرغی کی قیمت میں فی کلو 8 روپے 91 پیسے اضافہ ہوا۔
ادارہ شماریات کے مطابق دال ماش، روٹی، دودھ، دہی، چینی اور مٹن کی قیمتوں میں بھی اضافہ ہوا، ماچس، چاول، جلانے کی لکڑی، کیلے اور لہسن بھی مہنگے ہوئے۔
ادارہ شماریات نے بتایا کہ حالیہ ہفتے میں 3 اشیا کی قیمتوں میں کمی اور 17 اشیا کی قیمتوں میں استحکام رہا۔

کراچی: (ویب ڈیسک) بین الاقوامی بلین مارکیٹ میں فی اونس سونے کی قیمت 3ڈالر کے اضافے سے 1705 ڈالر کی سطح پر پہنچنے کے باعث مقامی صرافہ مارکیٹوں میں بھی جمعہ کو فی تولہ اور دس گرام سونے کی قیمتوں میں بالترتیب 3000 روپے اور 2572روپے کا اضافہ ہوگیا۔
اضافے کے نتیجے میں کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد، پشاور اور کوئٹہ کی صرافہ مارکیٹوں میں فی تولہ سونے کی قیمت بڑھ کر 144000 روپے اور فی دس گرام سونے کی قیمت بھی بڑھ کر 123457 روپے کی سطح پر آگئی۔
اسی طرح فی تولہ چاندی کی قیمت 10روپے کے اضافے سے 1480 روپے اور دس گرام چاندی کی قیمت 8.58روپے کے اضافے سے 1268.86روپے کی سطح پر آگئی۔

کراچی: (ویب ڈیسک) پاکستان اسٹاک ایکسچینج میں آج کاروبار کا منفی دن رہا، 100 انڈیکس 150 پوائنٹس کمی سے 42309 پر بند ہوا۔
کاروباری دن میں 100 انڈیکس 333 پوائنٹس کے بینڈ میں رہا، بازار میں 16 کروڑ شیئرز کے سودے ہوئے، شیئرز بازار کے کاروبار کی مالیت 4 ارب 63 کروڑ روپے رہی۔
مارکیٹ کیپٹلائزیشن 21 ارب روپے کم ہو کر7023 ارب روپے ہے۔

گوجرانوالہ: (ویب ڈیسک) ملک کے دیگر شہروں کی طرح گوجرانوالہ میں بھی سبزیوں کی قیمتوں میں ہوشربا اضافہ ہو گیا ہے جس نے مہنگائی سے پہلے ہی پریشان شہریوں کو مزید مالی مشکلات سے دوچار کردیا ہے۔
مارکیٹ میں اس وقت ہری مرچ 400 روپے فی کلو، لیموں 400 روپے فی کلو، ادرک 450 روپے فی کلو اور لہسن 400 روپے فی کلو میں فروخت ہو رہا ہے۔
مارکیٹ سروے کے مطابق شملہ مرچ 500 روپے فی کلو، مٹر 400 روپے فی کلو، پھلیاں 500 روپے فی کلو، کھیرا 200 روپے فی کلو میں فروخت کیا جا رہا ہے۔
گوجرانوالہ کی مارکیٹ میں ایک کلو ٹماٹر کی قیمت 250 روپے ہے جب کہ کریلا 300 روپے فی کلو، بھنڈی 200 روپے فی کلو، بند گوبھی 300 روپے فی کلو، پیاز 200 روپے فی کلو اور آلو 80 روپے کلو میں دستیاب ہے۔
واضح رہے کہ شدید بارشوں اور سیلاب کے بعد ملک کے بیشتر علاقوں میں سبزیوں کی قیمتوں میں نا قابل یقین حد تک اضافہ ہوا ہے جس کے بعد وفاقی وزارت تجارت نے ایران اور افغانستان سے سبزیاں و پھل منگوانے کی منظوری دی ہے۔