اسلام آباد: (ویب ڈیسک) قومی اسمبلی میں الیکشن ایکٹ 2017ء میں ترمیم کا بل منظور کر لیا گیا جس کے تحت الیکشن کمیشن نیا شیڈول، عام انتخابات کی تاریخ کااعلان اور الیکشن پروگرام میں ترمیم کر سکے گا۔
قومی اسمبلی کے اجلاس میں اسحاق ڈار نے الیکشن ایکٹ ترمیمی بل میں مزید ترامیم پیش کیں، ایوان نے بل اتفاق رائے سے منظور کرلیا، ایوان کی جانب سے الیکشن ایکٹ کے سیکشن ستاون میں ترمیم کی گئی ہے۔
آئین میں جس جرم کی سزا کی مدت کا تعین نہیں کیا گیا وہاں نااہلی 5 سال سے زیادہ نہیں ہوگی، سپریم کورٹ، ہائیکورٹ یا کسی بھی عدالتی فیصلے، آرڈر یا حکم کے تحت سزا یافتہ شخص فیصلے کے دن سے 5 سال کیلئے نااہل ہو سکے گا۔
بل کے مطابق آئین کے آرٹیکل 62 کی کلاز ون ایف کے تحت 5 سال سے زیادہ کی نااہلی کی سزا نہیں ہو گی، متعلقہ شخص پارلیمنٹ یا صوبائی اسمبلی کا رکن بننے کا بھی اہل ہوگا۔

رحیم یار خان : (ویب ڈیسک) پنجاب کے ضلع رحیم یار خان میں کینال کالونی کے علاقے میں زیرِ تعمیر 3 منزلہ عمارت گرنے سے ایک مزدور جاں بحق اور ایک زخمی ہوگیا۔
ریسکیو ذرائع کے مطابق 2 مزدور ملبے تلے دب گئے تھے جس کے بعد ریسکیونے آپریشن کر کے ایک مزدور کی لاش نکال لی جبکہ زخمی کو ہسپتال منتقل کردیا گیا ۔
ریسکیو ذرائع کے مطابق جائے حادثہ پر ریسکیو آپریشن جاری ہے ، واقعے کی تحقیقات کے لیے ڈپٹی کمشنر نے انکوائری کمیٹی قائم کر دی ہے۔

کوئٹہ: (ویب ڈیسک) بلوچستان حکومت نے سکیورٹی اداروں کو صوبے میں قومی شاہراہوں پر قائم چیک پوسٹیں فوری طور پر ختم کرنے کی ہدایت کر دی۔
وزیراعلیٰ بلوچستان میر عبدالقدوس بزنجو کی زیر صدارت صوبائی کابینہ کے خصوصی اجلاس میں صوبے میں امن و امان کی صورتحال کا تفصیلی جائزہ لیا گیا۔
اجلاس میں سکیورٹی چیکنگ کیلئے قائم چیک پوسٹوں پر شدید ردعمل کا اظہار کیا گیا، کابینہ نے تمام متعلقہ وفاقی اور صوبائی سکیورٹی اداروں کو شاہراہوں پر قائم چیک پوسٹیں فوری طور پر ختم کرنے کی ہدایت کر دی۔
اجلاس میں فیصلہ ہوا کہ آئندہ کوئی بھی ادارہ صوبائی حکومت کی اجازت کے بغیر شاہراہوں پر چیک پوسٹ قائم نہیں کرے گا، چیک پوسٹ کا قیام محکمہ داخلہ کی اجازت سے مشروط ہوگا۔

لاہور: (ویب ڈیسک) نگران وزیراعلیٰ پنجاب محسن نقوی نے لائیو سٹاک اور ڈیری ڈویلپمنٹ میں بہتری کا پلان طلب کر لیا۔
نگران وزیراعلیٰ پنجاب محسن نقوی کی زیر صدارت لائیو سٹاک اور ڈیری ڈویلپمنٹ کے حوالے سے خصوصی اجلاس ہوا جس میں گوشت اور پولٹری انڈسٹری کے فروغ کیلئے ہنگامی بنیادوں پر اقدامات کا فیصلہ کیا گیا، وزیراعلیٰ نے میٹ ایکسپورٹ کے حوالے سے جامع پالیسی مرتب کرنے کی ہدایت کی۔
اجلاس میں فیصلہ کیا گیا کہ بیف، مٹن اور پولٹری انڈسٹری کے فروغ میں رکاوٹیں دور کی جائیں گی اور بہاولپور ڈویژن کو میٹ ڈویژن قرار دیا جائے گا، اجلاس میں فواد مختار، نوید اقبال، پروفیسر طلعت نصیر پاشا نے بریفنگ دی اور تجاویز پیش کیں۔
اجلاس کے شرکاء کو بریفنگ میں بتایا گیا کہ پنجاب میں گوشت اور پولٹری کی ایکسپورٹ سے اربوں ڈالر زرمبادلہ حاصل کیا جا سکتا ہے، سیمن پروٹیکشن، فارم مینجمنٹ اور ویکسی نیشن کے جدید طریقہ کار اپنانے ضروری ہیں، ایکسپورٹ کیلئے لائیوسٹاک پروڈکشن کی حلال سرٹیفکیشن اور ٹریس ایبلٹی لازمی امر ہے۔
بریفنگ میں مزید بتایا گیا کہ پنجاب سعودی عرب اور چین کو اربوں ڈالر کی لائیو سٹاک اورڈیری پروڈکٹس ایکسپورٹ کرنے کی صلاحیت رکھتا ہے، پولٹری انڈسٹری کو میکانائزیشن کی طرف لے جانا ہوگا۔
صوبائی وزیر ابراہیم حسن مراد، چیف سیکرٹری، چیئرمین پلاننگ اینڈ ڈویلپمنٹ، سیکرٹری لوکل گورنمنٹ، سیکرٹری خزانہ اور متعلقہ حکام اجلاس میں شریک تھے، معروف بزنس مین سید یاور علی ویڈیو لنک کے ذریعے اجلاس میں شریک ہوئے۔

اسلام آباد: (ویب ڈیسک) علامہ اقبال اوپن یونیورسٹی نے وائس چانسلر پروفیسر ڈاکٹر ناصر محمود کی ہدایت پرداخلوں سے متعلق طلبہ کی سہولت و راہنمائی کے لئے سمسٹر خزاں 2023ء کے داخلوں کا شیڈول جاری کردیا ہے۔
علامہ اقبال اوپن یونیورسٹی کے شعبہ تعلقات عامہ کی جانب سے جاری تفصیلات کے مطابق ٹائم فریم کے تحت سمسٹرخزاں 2023ء کے پہلے مرحلے کے داخلے ملک کے چاروں صوبوں، آزاد کشمیر اور گلگت بلتستان میں ایک ساتھ 15جولائی سے شروع ہوں گے جبکہ دوسرے مرحلے کے داخلے یکم ستمبرسے شروع ہونگے۔
پہلے مرحلے میں پیش کئے جانے والے پروگراموں میں میٹرک(جنرل)، میٹرک درس نظامی (ثانویہ عامہ)، میٹرک (اوپن کورسز)، ایف اے(جنرل)، آئی کام، ایف اے درس نظامی(ثانویہ خاصہ)، ایف اے(اوپن کورسز)، مڈل ٹیک اور سرٹیفیکیٹ کورسز کے علاوہ بی ایس، ایم بی اے، ایم فل/ ایم ایس اور پی ایچ ڈی پروگرامز شامل ہونگے۔
یاد رہے کہ بی ایس، ایم بی اے، ایم فل/ ایم ایس اور پی ایچ ڈی فیس ٹو فیس اور میرٹ بیسڈ پروگرامز ہیں ، تمام پروگراموں کے داخلہ فارم اور پراسپکٹس یونیورسٹی کی ویب سائٹ پر15جولائی سے آن لائن دستیاب ہونگے، میٹرک اور ایف اے پروگراموں کے داخلہ فارم اور پراسپکٹس یونیورسٹی کے مین کیمپس، علاقائی دفاتر اور سیل پوائنٹس سے بھی حاصل کئے جاسکیں گے۔
واضح رہے کہ یونیورسٹی کی داخلہ پالیسی کے مطابق بی ایس/ایم ایس سی/ایم فل اور پی ایچ ڈی پروگراموں میں داخلہ حاصل کرنے کے لئے آن لائن اپلائی کرنا لازمی ہے جبکہ میٹرک اور ایف اے پروگراموں میں داخلہ فارم مینول اور آن لائن دونوں طریقوں سے جمع کیا جاسکے گا، فارم آن لائن جمع کرانے کی صورت میں داخلہ فارم پرنٹ کرکے یونیورسٹی کو بھجوانے کی ضرورت نہیں ہوگی۔
طلبہ کو آسانیاں فراہم کرنے کی منصوبہ بندی کے تحت یونیورسٹی کے مین کیمپس سمیت تما م علاقائی دفاتر میں طلبہ کو داخلوں سے متعلق معلومات کی فراہمی کے لئے معلوماتی کاؤنٹرز قائم کئے جائیں گے۔
وائس چانسلر کی خصوصی ہدایت پر طلبہ کی راہنمائی کے لئے علاقائی دفاتر میں سہولت مراکز کو بھی فعال کیا جارہا ہے، طلبہ کو رہائش گاہوں کے قریب ترین مقامات پر سہولت پہنچانے کے لئے ملک بھر میں سیل پوائنٹس برائے پراسپکٹس و داخلہ فارم’قائم کرنے کی بھی منظوری دے دی گئی ہے۔

کراچی: (ویب ڈیسک) پی ٹی آئی سندھ کے صدر حلیم عادل شیخ نے میئر کراچی کے الیکشن میں پارٹی ہدایات پر عمل نہ کرنیوالے بلدیاتی نمائندوں کو پارٹی سے نکالنے کا نوٹیفکیشن جاری کر دیا ہے۔
اس حوالے سے جاری ہونے والے نوٹیفکیشن کے مطابق نکالے گئے نمائندوں میں صدر ٹاؤن کے علی رضا، کورنگی ٹاؤن کے سلمان خان، صدر ٹاؤن یوسی ون کے چیئرمین عمران پروانی اور مورو میر بحر ٹاؤن کے عبدالمجید شامل ہیں۔
اورنگی ٹاؤن یوسی 5 کے چیئرمین ملک اختر اور یوسی 7 مومن آباد کے محمد ادریس کو بھی پارٹی سے نکال دیا گیا ہے۔
حلیم عادل شیخ کا کہنا ہے کہ جوابات اطمینان بخش نہیں اور ایک جیسے اسٹیریو ٹائپ ہیں۔
واضح رہے کہ گزشتہ روز بھی پی ٹی آئی نے میئر کراچی کے الیکشن میں پارٹی ہدایت پرعمل نہ کرنے پر 11 بلدیاتی نمائندوں کو پارٹی سے نکالا تھا۔

راولپنڈی: (ویب ڈیسک) سربراہ عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ مودی اور جوبائیڈن کا اعلامیہ پاکستانی خارجہ پالیسی کی ناکامی ہے۔
سماجی رابطے کی ویب سائٹ ٹوئٹر پر شیخ رشید نے اپنے پیغام میں کہا کہ امریکہ بھارت اعلامیہ کے اگلے روز ہی 2 پاکستانی سویلین کو بارڈر پر شہید کیا گیا، پاکستان کو بھرپور جواب دینا چاہیے، ہمارےفوجی جوان دہشتگردوں کے خلاف روز جام شہادت نوش کر رہے ہیں اور امریکہ انڈیا اعلامیہ میں ہمیں دہشتگردی کا مرتکب ٹھہرایا گیا ہے۔
سابق وفاقی وزیر کا کہنا تھا کہ ہتھکڑیاں چادر چاردیواری کی تباہی خواتین کی تضحیک یہ ہے شریفوں کی جمہوریت، خود سیر و تفریح موج میلے پر ہیں، غریب پر 215 ارب روپے کا مزید ٹیکس لگایا جا رہا ہے، 10 روپے پٹرول پر مزید لگ رہے ہیں۔
انہوں نے کہا کہ مہنگائی، بیروزگاری، لوڈشیڈ نگ، اجناس کی قلت غریب کا مقدر ہے، ساری دنیا کو معلوم ہے یہ کرپٹ غیر مقبول اور چور دروازے سے لایا گیا قبضہ گروپ ہے، غیر مقبول حکمران جب صرف تقریروں اور تصویروں کیلئے لائے جاتے ہیں تو اقتصادی داخلہ اور خارجہ پالیسیاں تباہ و برباد ہو جاتی ہیں۔
شیخ رشید احمد کا کہنا تھا کہ یہ الیکشن میں جانے کی پوزیشن میں نہیں، عوام انہیں مانتی ہے نہ ہی دنیا انہیں تسلیم کرتی ہے، یہ عوام کے سہارےنہیں بیساکھیوں کےسہارے چل رہے ہیں، حکمرانوں کے اپنے اثاثے اپنی دولت اپنی اولاد ملک سے باہر ہیں اگر یہ اپنےاثاثےملک کے اندر لے آئیں تو ملک کےآدھے مسئلے حل اور آئی ایم ایف کا دباؤ کم ہو جائے۔
سربراہ عوامی مسلم لیگ نے مزید کہا کہ 13 مردہ پارٹیوں نے ملک کو غریب کا قبرستان بنا دیا ہے، زرداری کو میثاق معیشت سے پہلے کرپشن کا حساب دینا ہوگا، نواز شریف کے آنے یا نہ آنے سے اب سیاست میں کوئی فرق نہیں پڑے گا۔

ملتان : (ویب ڈیسک) وائس چیئرمین پاکستان تحریک انصاف شاہ محمود قریشی نے کہا ہے کہ آئی ایم ایف کو اسحاق ڈار پر اعتماد نہیں، انہیں فی الفور مستعفی ہونا چاہیے۔
ملتان میں میڈیا سے گفتگو کرتے ہوئے شاہ محمود قریشی کا کہنا تھا کہ آئی ایم ایف نے بجٹ کو مسترد کر دیا ہے، 215 ارب روپے کے مزید ٹیکسز کی نوید قوم کو سنائی گئی ہے، جس بجٹ پر ووٹنگ ہوگی وہ نیا فنانس بل ہوگا، جو پہلے ٹیکس لگے وہ اپنی جگہ موجود ہیں، اب مزید 215 ارب روپے کے ٹیکسز لگے ہیں۔
انہوں نے کہا کہ آئی ایم ایف کا اسحاق ڈار پر اعتماد نہیں ہے، وزیراعظم نے بھی ایم ڈی آئی ایم ایف کے ساتھ بات کی، مزید 215 ارب روپے کا بوجھ پاکستانیوں پر ڈالا ہے، آئی ایم ایف ریونیو ٹارگٹ سے مطمئن نہیں ہے، جو باتیں کی جا رہی ہیں وہ حقائق پر مبنی نہیں ہیں، وقتی طور پر لوگوں کا منہ بند کیا جا رہا ہے لیکن حقائق پر پردہ نہیں ڈال سکیں گے۔
رہنما پی ٹی آئی کا کہنا تھا کہ فنانس بل کو ریوائز کیا جا رہا ہے، شہروں میں 12، 12 گھنٹے کی لوڈشیڈنگ ہو رہی ہے، یہ بجٹ قوم، تاجر، کسان اور صنعتکار مسترد کر چکے ہیں، اب آئی ایم ایف نے بھی بجٹ مسترد کر دیا ہے، میری گزارش ہے اسحاق ڈار صاحب مستعفی ہوں اور کسی اور کو ذمہ داری سنبھالنے دیں۔
شاہ محمود قریشی نے کہا کہ یونان کشتی حادثہ پر بہت تکلیف ہوئی، دیکھنا چاہیے لوگ مجبور ہو کر گھر کیوں چھوڑ رہے ہیں، تیس تیس لاکھ دے کر موت کوئی خریدنے نہیں جاتا، جہاز میں پانی تک نہیں ملا، لوگ پیاسے مر گئے، اس کا تدارک ہونا چاہیے۔
وائس چیئرمین پی ٹی آئی کا مزید کہنا تھا کہ یہ کوئی نئی بلا نہیں، انسانی سمگلنگ عرصہ دراز سے ہو رہی ہے، اس کی بیخ کنی ہونی چاہیے، میں عہدوں اور ٹکٹوں کی سیاست سے بالا ہوگیا ہوں، میں اس وقت نظریے کی سیاست کر رہا ہوں اور نظریے پر قائم ہوں۔