اسلام آباد: (ویب ڈیسک) وزیر اعظم شہباز شریف نے ترک صدر رجب طیب اردوان کو فون کر کے زلزلے سے ہونے والی تباہی پر اظہار افسوس کیا۔
وزیر اعظم شہباز شریف نے اپنی گفتگو میں کہا قیمتی انسانی جانوں کے ضیاع پر بے حد رنجیدہ ہیں، غمزدہ خاندانوں سے دلی ہمدردی اور تعزیت کرتے ہیں، آزمائش کی گھڑی میں پاکستان اپنے بھائی ترکیہ اور اسکے عوام کے ساتھ ہے۔
وزیر اعظم نے مزید کہا کہ زلزلے کی تباہی سے نمٹنے میں پاکستان ترکیہ کی حکومت اور عوام کے ساتھ بھرپور تعاون کرے گا، موسمیاتی تبدیلیوں کی تباہی کی شدت بڑھ رہی ہے، قدرتی آفات اور موسمیاتی تباہی کسی سرحد، خطے اور مخصوص قوم تک محدود نہیں۔
گفتگو کے دوران شہباز شریف نے جاں بحق افراد کی مغفرت ، اہل خانہ کیلئے صبر جمیل اور زخمیوں کی جلد صحت یابی کی دعا کی، صدر رجب طیب اردوان نے حمایت پر وزیراعظم شہبازشریف کا شکریہ ادا کیا اور کہا آپ کے اور پاکستانی عوام کے جذبات کی قدر کرتا ہوں۔

لاہور: (ویب ڈیسک) نگران وزیراعلیٰ پنجاب محسن نقوی نے کہا ہے کہ پولیو کے خلاف جنگ قوم کے نونہالوں کے مستقبل کی جنگ ہے، مشترکہ کاوشوں سے پولیو کے مرض کا خاتمہ کریں گے۔
ذرائع کے مطابق نگران وزیراعلیٰ پنجاب محسن نقوی کی زیر صدارت انسداد پولیو اقدامات کے حوالے سے جائزہ اجلاس ہوا، اجلاس میں صوبائی وزیر سپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم،صوبائی وزیر اطلاعات عامر میر، سیکرٹری اور ایڈیشنل سیکرٹری پرائمری اینڈ سیکنڈری ہیلتھ، سیکرٹری اطلاعات، ڈی جی ہیلتھ سروسز اور متعلقہ حکام کی شریک ہوئے، سیکرٹری پرائمری اینڈ سیکنڈری ہیلتھ نے انسداد پولیو پر اقدامات اورمہم کے بارے میں بریفنگ دی۔
نگران وزیراعلیٰ پنجاب محسن نقوی نے پولیو فری پنجاب کے لئے تمام ممکنہ اقدامات کرنے کی ہدایت کردی، انہوں نے انسداد پولیو مہم کیلئے وضع کردہ پلان پر 100 فیصد عملدرآمد یقینی بنانے کی بھی ہدایت کی۔
وزیراعلیٰ محسن نقوی کا کہنا تھا کہ 13سے 16فروری تک پنجاب کے 13اضلاع میں انسداد پولیومہم شروع کی جارہی ہے ، مہم کے دوران 2کروڑ 20لاکھ بچوں کوانسداد پولیو ویکسین کے قطرے پلائے جائیں گے، ویکسینیشن مہم کے دوران مانیٹرنگ کا فول پروف نظام وضع کیاجائے۔
انہوں نے مزید کہا کہ یہ ہمارا قومی مسئلہ ہے اور اس سے نمٹنے کیلئے سب کو مل کر کام کرنا ہوگا۔

لاہور : (ویب ڈیسک) مسلم لیگ ن کی سینئر نائب صدر اور چیف آرگنائزر مریم نواز نے کہا ہے کہ آزادی کے حصول کیلئے کشمیریوں کی لازوال جدوجہد کو سلام پیش کرتے ہیں۔
مسلم لیگ ن کی سینئر نائب صدر اور چیف آرگنائزر مریم نواز نے سماجی رابطے کی ویب سائٹ ٹویٹر پرجاری پیغام میں کہا کہ زمین پر بھارت قابض لیکن کشمیریوں کے دل پاکستان کے ساتھ ہیں ، بہادر کشمیری اقوام متحدہ کے منشور پر عمل درآمد کی جنگ لڑ رہے ہیں ، کشمیری سلامتی کونسل کی قرار دادوں کیساتھ کھڑے ہیں۔
مریم نواز کا مزید کہنا تھا کہ بھارت کشمیر میں ظلم کی ہر حد پار چکا ، لیکن آزادی کی آوازیں دبنے کی بجائے مزید بلند ہو رہی ہیں، بھارت کی اس سے بڑی ہار کیا ہو گی کہ ہر ظلم کے باوجود ناکامی اس کا مقدر ہے، خواتین و بچوں سمیت کشمیریوں کی آزادی کے لیے آزادی کے لیے عظیم قربانیاں بے مثال ہیں۔
انہوں نے کہا کہ آزادی کے حصول تک کشمیریوں کا ساتھ دینا ایمان کا حصہ ہے، اللہ تعالی شہداءکے درجات بلند، کشمیریوں کو آزادی کی نعمت عطا فرمائے۔
مریم نواز نے ایک اور ٹویٹ میں کشمیریوں سے اظہار یکجہتی کرتے ہوئے کشمیری پرچم کو چومتے ہوئے لی گئی تصویر بھی شیئر کی ہے ۔
واضح رہے کہ آج کئی دہائیوں سے بھارتی مظالم کا سامنے کرتے نہتے کشمیریوں کے شانہ بشانہ کھڑے ہونے کا عزم لیے قوم آج یوم یکجہتی کشمیر منا رہی ہے۔

مظفر آباد: (ویب ڈیسک) وزیر اعظم شہباز شریف کا کہنا ہے کہ مقبوضہ کشمیر میں 75 سال سے لاکھوں مسلمانوں کو ظلم کا نشانہ بنایا جارہا ہے، بھارت کا یہ ظلم اب زیادہ دیر تک نہیں چل سکے گا، کشمیر پالیسی میں مزید جدت اور طاقت پیدا کرنا ہوگی۔
یوم یکجہتی کشمیر کی مناسبت سے آزاد کشمیر قانون ساز اسمبلی کے خصوصی اجلاس سے خطاب کے دوران وزیر اعظم کا کہنا تھا کہ قائداعظم نے فرمایا تھا کشمیر پاکستان کی شہ رگ ہے، آج ہمارے معاشرے میں تقسیم در تقسیم پیدا ہوچکی ہے، معاشرے میں تقسیم درتقسیم افسوسناک ہے، جب کسی قوم میں اتفاق و اتحاد پیدا ہوتا تو وہ اپنے اہداف آسانی سے حاصل کرتے ہیں۔
انہوں نے کہا کہ کشمیرکی وادی بے گناہ مسلمانوں کےخون سے سرخ ہوگئی، 75سال میں کشمیر میں لاکھوں لوگوں کو ظلم کا نشانہ بنایا گیا، بھارت نےمقبوضہ کشمیر کو جیل میں تبدیل کررکھا ہے، مودی نے 2019 میں مقبوضہ کشمیر کی خصوصی حیثیت تبدیل کی، کشمیر پالیسی میں مزید جدت اور طاقت پیدا کرنا ہوگی۔
وزیراعظم کا کہنا تھا کہ آج تمام جماعتوں کا اتحاد دیکھ کر یقیناً بھارت پریشان ہوگا، پاکستانیوں نے ہمیشہ اپنے کشمیریوں بھائیوں کو یاد رکھا اور ان کی اخلاقی امداد جاری رکھی ہے، کشمیریوں کی آزادی کی جدوجہد ضرور رنگ لائی گی، لیکن ہمیں باتیں یا نعرے نہیں کشمیر کاز کے لئے عملی اقدام کرنا ہوں گے۔
شہباز شریف نے کہا کہ ہم ایٹمی طاقت ہیں بھارت ہماری طرف میلی آنکھ سے نہیں دیکھ سکتا، کشمیر کو آزادی دلانی ہے تو معاشی طاقت کو بھی ساتھ ملانا ہوگا، ہمیں معاشی اورسیاسی استحکام لے کر آنا ہوگا۔
عالمی برادری کی مذہبی بنیادوں پر جانبداری کا ذکر کرتے ہوئے وزیر اعظم کا کہنا تھا کہ بظاہر لگ رہا ہے کہ کشمیر کا مسئلہ دب گیا ہے، مذہبی بنیادوں پر عالمی طاقتوں نے سوڈان کو تقسیم کیا، لیکن جب کشمیر کی بات آتی ہے تو جس کی لاٹھی اس کی بھینس کا محاورہ سچ ثابت ہوجاتا ہے۔

مظفر آباد: (ویب ڈیسک) وزیرِ اعظم محمد شہباز شریف نے کہا ہے کہ علیحدہ علیحدہ سیاسی وابستگیوں کے باوجود ملک بھر کی سیاسی قیادت کا مظفر آباد میں کشمیر کاز کیلئے اکٹھے ہونا خوش آئند ہے، 7 دہائیوں سے بھارت کشمیر میں مظالم کی داستان رقم کر رہا ہے لیکن وہ کشمیریوں کےجذبہ حقِ خود ارادیت کو ماند نہیں کرسکا ہے۔
وزیرِ اعظم محمد شہباز شریف سے یومِ یکجہتیِ کشمیر کے موقع پر مظفرآباد میں آزاد کشمیر کی سیاسی قیادت نے ملاقات کی۔
ملاقات میں وزیرِ اعظم آزاد کشمیر سردار تنویر الیاس، صدر پیپلز پارٹی آزاد کشمیر چودھری محمد یاسین، صدر مسلم لیگ (ن) آزاد کشمیر شاہ غلام قادر، صدر جموں کشمیر پیپلز پارٹی سردار حسن ابراہیم خان شریک ہوئے، وفاقی وزراءخواجہ سعد رفیق، رانا تنویر حسین، مریم اورنگزیب، مرتضی جاوید عباسی اور مشیرِ وزیرِ اعظم قمر الزماں کائرہ بھی اس موقع پر موجود تھے۔
اس موقع پر وزیرِ اعظم نے کہا کہ مسئلہ کشمیر اور آزاد کشمیر کے تمام مسائل کا حل ہم بیٹھ کر نکالیں گے، پاکستان آپ کے ساتھ ہے اور ہمیشہ کشمیریوں کے ساتھ ان کی جدوجہد میں شانہ بشانہ رہے گا، اگر ہم اسی طرح سیاست کو بالائے طاق رکھتے ہوئے اتحاد سے قومی ایشوز پر اکھٹے چلیں تو وہ وقت دور نہیں کہ ہمارے تمام مسائل حل ہو جائیں گے۔
سپیکر آزاد کشمیر قانون ساز اسمبلی اور وزیرِ اعظم آزاد کشمیر نے وزیرِ اعظم کی 5 فروری یومِ یکجہتی کشمیر پر مظفر آباد آمد کو کشمیر کاز کیلئے کلیدی قرار دیتے ہوئے اس کا خیرمقدم کیا۔
اجلاس کے شرکاء نے کہا کہ وزیرِ اعظم پاکستان کی اس دن بذاتِ خود کشمیریوں کے درمیان موجودگی کشمیریوں کے دلوں میں آزادی کیلئے موجود جذبے کو مزید بلند کرتی ہے، اس سے مقبوضہ جموں و کشمیر، بھارت، پاکستان اور پوری دنیا میں پاکستان کی کشمیریوں کی جدوجہد میں یکجہتی کا پیغام پہنچا ہے۔
انہوں نے کہا کہ پاکستان نے ہمیشہ کشمیریوں کے حقِ خود ارادیت کی جدوجہد میں ان کا ساتھ دیا ہے اور کشمیریوں کو پاکستانی شہریوں کی طرح تحفظ اور سہولیات کی فراہمی یقینی بنائی ہے، بالخصوص موجودہ حکومت میں وزیرِ اعظم محمد شہباز شریف کی قیادت میں اس امر کو یقینی بنانے کیلئے ذاتی دلچسپی پر کشمیری عوام وزیرِ اعظم کو خراجِ تحسین پیش کرتے ہیں۔

لاہور : (ویب ڈیسک) سابق صدرپرویز مشرف کے انتقال پرسیاسی اور عسکری قیادت کی جانب سے اظہار افسوس کیا گیا ہے۔
پاک فوج کے شعبہ تعلقات عامہ کی جانب سے جاری ہونے والے بیان کے مطابق چیئرمین جوائنٹ چیفس آف اسٹاف کمیٹی اور آرمی چیف نے پرویز مشرف کے انتقال پر افسوس کا اظہار کیا ہے۔
آئی ایس پی آر نے اپنے بیان میں کہا کہ پرویز مشرف سابق صدر، سابق جوائنٹ چیفس اور آرمی چیف رہے، اللہ مرحوم جنرل ریٹائرڈ پرویزمشرف کو غریق رحمت کرے اور اللہ جنرل ریٹائرڈ پرویز مشرف کے پسماندگان کو صبر و ہمت دے۔
سابق وزیر اعلیٰ پنجاب چوہدری پرویز الہٰی نے پرویز مشرف کے انتقال پر گہرے دکھ و رنج کا اظہار کیا ہے۔۔ ان کا کہنا ہے کہ پاکستان آرمی اور ملک کے لیے پرویز مشرف کی خدمات کو فراموش نہیں کیا جا سکتا۔اپنے بیان میں پرویز الہٰی نے کہا کہ سابق صدر و آرمی چیف جنرل پرویز مشرف کے انتقال پر ان کے خاندان کے غم میں برابر کے شریک ہیں۔
پی ٹی آئی رہنما فواد چودھری کہتے ہیں کہ سابق صدر پرویز مشرف کے اتقال کی افسوسناک خبر ملی ۔ میری پرویز مشرف کے ساتھ طویل رفاقت تھی ۔ انہوں نے مجھے ہمیشہ خاندان کا فرد سمجھا ۔ انہوں نے پاکستان میں آزاد میڈیا دیا ۔ پرویز مشرف نے مشکل حالات میں پاکستان لیڈ کیا ۔ پر ویز مشرف بڑے انسان تھے انکے دوست چھوٹے نکلے۔
خالد مقبول صدیقی کا پرویز مشرف کے انتقال پر اظہارِ تعزیت، کہا، جنرل پرویز مشرف پروفیشنل سولجر اور ملک و قوم کے سچے ہمدرد تھے، انہوں نے ملکی دفاع، افواج اور پاکستان کیلئے گراں قدر خدمات انجام دیں، پوری پاکستانی قوم ان کی خدمات پر انہیں خراج عقیدت پیش کرتی ہے۔

تہران: (ویب ڈیسک) حکومت نے عمران خان کو جیل بھرو تحریک چلانے کا چیلنج دے دیا۔
حکومت نے عمران خان کو جیل بھرو تحریک چلانے کا چیلنج دے دیا۔ وزیراطلاعات نے کہا جن کی دو دن جیل میں رہ کر آنکھیں بھر جائیں وہ جیلیں نہیں بھرا کرتے۔
ان کا کہنا ہے کہ آپ کو جیل بھرو نہیں ڈوب مرو تحریک شروع کرنی چاہیے۔ عدالتوں میں اپنے اعمال اور کیسز کا حساب دیں، جیلیں خود بھر جائیں گی۔
مریم اورنگزیب نے کہا اپوزیشن اور میڈیا کو جیلوں میں ڈالنے والا آج جیل بھرو تحریک کا اعلان کر رہا ہے۔ جیل بھرو تحریک کا اعلان وہ کر رہا ہے جو ٹانگ پر پلستر باندھ کر بکتربند زمان پارک میں بیٹھا ہے۔
انہوں نے کہا ہے کہ جیل بھرو تحریک میں قیادت گرفتاری دیتی ہے، گھر میں چھپ کر نہیں بیٹھتی۔ اگر جیل بھرو تحریک میں سنجیدہ ہیں تو زمان پارک سے عورتوں اور بچوں کو ہٹائیں، راستے کھولیں۔