چین : (ویب ڈیسک) چین نے امریکی کی جانب سے مبینہ جاسوس غبارے کو مار گرانے پر ناراضگی کا اظہار کرتے ہوئے کہا ہے کہ امریکہ نےبین الاقوامی طریقہ کار کی خلاف ورزی کی ہے۔
چین کی وزارت خارجہ نے امریکہ کی جانب سے مبینہ جاسوس غبارہ مار گرانے کے بعد ایک جاری بیان میں کہا ہے کہ امریکہ کی جانب سے بغیر پائلٹ سویلین ہوائی جہاز کے خلاف طاقت کا استعمال کرنے پر چین نے شدید احتجاج کرتا ہے۔
بیان میں کہا گیا ہے کہ چین ضروری ردعمل کا حق رکھتا ہے۔ امریکہ سے درخواست کی تھی کہ اس تمام معاملے سے تحمل اور پیشہ وارانہ انداز میں نمٹے۔ تاہم امریکہ نے طاقت کے استعمال پر اصرار کیا اور شدید ردعمل دیتے ہوئے بین الاقوامی طریقہ کار کی خلاف ورزی کی۔
خیال رہے کہ امریکہ نے ریاست کیرولائنا کے ساحل کے قریب مشتبہ چینی جاسوس غبارے کو مار گرایا تھا۔امریکی حکام کے مطابق مشتبہ جاسوس غبارہ تقریباً 60 ہزار فٹ کی بلندی پر اڑ رہا تھا اور اس کا سائز تین سکول بسوں کے برابر تھا۔
واضح رہے کہ مبینہ جاسوس غبارے کے سامنے آنے کے بعد امریکی وزیر خارجہ انٹونی بلنکن نے اپنا بیجنگ کا دورہ منسوخ کر دیا تھا۔ اس دورے کا مقصد امریکہ اور چین کے درمیان کشیدگی کو کم کرنا تھا، تاہم چین نے اس دورے کا اعلان یکطرفہ قرار دیا تھا۔

تہران: (ویب ڈیسک) ایران نے بغیر حجاب گھر سے نکلنے والی خواتین پر نئی سزاؤں کا اعلان کر دیا۔
غیر ملکی خبر رساں ایجنسی کے مطابق ایرانی حکومت نے بغیر حجاب گھر سے باہر نکلنے والی خواتین کے لیے نئی سزاؤں کا تعین کر دیا جس کے مطابق جرمانہ ادا نہ کرنے پر تمام سماجی خدمات سے محروم کر دیا جائے گا۔
ایرانی حکومت نے اعلان کیا کہ بغیر حجاب گھروں سے باہر نکلنے والی خواتین کو گرفتار کرنے کے بجائے میسج بھیجا جائے گا اور اگر وہ پھر بھی حجاب نہ کرنے پر بضد رہیں گی تو پھر ان پر جرمانہ عائد کر دیا جائے گا۔
جرمانہ بھی ادا نہ کرنے والی خواتین کا شناختی کارڈ ضبط کر لیا جائے گا اور پھر جرمانے کی ادائیگی تک ان کے لیے حکومت کی تمام سماجی خدمات معطل رہیں گی۔
واضح رہے کہ ایران میں جلد ایک قانون متعارف کرایا جا رہا ہے جس کے تحت عوامی مقامات پر حجاب کرنا لازم ہو گا اور خلاف ورزی کرنے والی خواتین کی کڑی نگرانی کی جائے گی۔

واشنگٹن : (ویب ڈیسک) امریکا نے چین کے مشتبہ جاسوس غبارے کو مار گرایا ، پینٹاگون نے غبارے کو جنوبی کیرولینا کے ساحل پر نشانہ بنانے کی تصدیق کی ہے۔
غیرملکی میڈیا رپورٹس کے مطابق پینٹاگون کا کہنا ہے کہ جاسوس غبارہ چین کی ناقابل قبول خلاف ورزی ہے، امریکی صدر بائیڈن نے غبارہ مار گرانے پر امریکی فوج کو مبارکباد دی ہے۔
اس حوالےسے امریکی وزیر دفاع کاکہنا ہے کہ دانستہ اور قانون کے مطابق کی گئی یہ کارروائی ظاہر کرتی ہے کہ صدر بائیڈن اور ان کی قومی سلامتی کی ٹیم ہمیشہ امریکی عوام کی حفاظت اور سلامتی کو فوقیت دے گی۔
امریکی وزیر دفاع نے مزید کہا کہ چین کی جانب سے ہماری خودمختاری کی ناقابل قبول خلاف ورزی کا مؤثر جواب دیا جائے گا۔
امریکی میڈیا کے مطابق چینی غبارہ چند دنوں سے امریکا کے اوپر پرواز کررہا تھا اوراب واشنگٹن اور بیجنگ کے درمیان کشیدگی کا سبب بن گیا ہے ، ابتداء میں حفاظتی اقدامات کے پیش نظر اسے نشانہ نہیں بنایا گیا تھا۔
واضح رہے کہ جمعہ کے روز چین نے غبارے کی ملکیت کا اعتراف کرتے ہوئے کہا تھا کہ یہ موسم کی صورتحال جانچنے والا غبارہ تھا جو اپنے راستے سے بھٹک گیا تھا، چین نے کہا تھا کہ امریکی فضائی حدود میں غبارے کے غیر ارادی داخلے اور صورتحال پر افسوس ہے ، چین کسی بھی ملک کی سرزمین یا فضائی حدود کی خلاف ورزی کا ارادہ نہیں رکھتا۔
رواں ہفتے اس غبارے کے منظرعام پر آنے کے بعد امریکی وزیرخارجہ انٹونی بلنکن کا اتوار کو بیجنگ کا دورہ منسوخ کر دیا تھا ، اس کا مقصد امریکا اور چین کے درمیان کشیدگی کو کم کرناتھا۔
خیال رہے بیجنگ اور واشنگٹن کے درمیان حال ہی میں تائیوان پر اختلافات اور انسانی حقوق کے میدان میں چین کے ریکارڈ اور بحیرہ جنوبی چین میں اس کی فوجی سرگرمیوں کی روشنی میں کشیدگی میں اضافہ ہوا ہے۔