کوئٹہ : (ویب ڈیسک) کوئٹہ کے بگٹی اسٹیڈیم میں27سال بعدکرکٹ لوٹ آئی ، پی ایس ایل سے پہلے کوئٹہ میں کرکٹ کی واپسی پر شائقین پُرجوش نظر آرہے ہیں۔
کوئٹہ میں کرکٹ کا میدان پھر سے آباد ہوا، پی ایس ایل کا نمائشی میچ دیکھنے کیلئے بگٹی اسٹیڈیم تماشائیوں سے کھچاکھچ بھر گیا ، وزیراعلیٰ بلوچستان عبدالقدوس بزنجو ، وزیر تعلیم میر نصیب اللہ ، سابق کرکٹر جاویدمیانداد، محمد یوسف اوردیگر کے ساتھ میچ دیکھ رہے ہیں۔
بگٹی اسٹیڈیم میں کھیلےجانےوالا نمائشی میچ پشاور زلمی اور کوئٹہ گلیڈی ایٹرز کے درمیان جاری ہے ، سرفراز احمد کوئٹہ گلیڈیٹرز کی نمائندگی کررہےہیں جبکہ بابر اعظم پشاور زلمی کی قیادت کررہے ہیں ۔
پشاور زلمی نے کوئٹہ گلیڈی ایٹرز کے خلاف نمائشی میچ میں ٹاس جیت کر پہلے باؤلنگ کرنے کا فیصلہ کیا ، کوئٹہ گلیڈی ایٹرز نے پشاور زلمی کو جیت کے لیے 185رنز کا ہدف دیا ہے۔
افتخاراحمد نےکوئٹہ گلیڈی ایٹرز کی طرف سے 94 رنز کی جارحانہ اننگز کھیلی، افتخار احمد نے پشاور زلمی کے وہاب ریاض کے آخری اوور میں 6 چھکے لگائے ، پشاورزلمی کی جانب سے وہاب ریاض نے تین وکٹیں حاصل کیں۔
دوسری جانب کوئٹہ میں میچ کیلئے اسٹیڈیم اور اطراف میں سکیورٹی کے سخت انتظامات کیے گئے ہیں ، میچ کے دوران 4 ہزار سے زائد پولیس اور فرنٹئیرکور کے اہلکار سکیورٹی کے فرائض سرانجام دے رہے ہیں۔
