پنجاب میں گندم کٹائی سیزن کے آغاز کے باوجود آٹے کی قیمت میں ہوشربا اضافہ

پنجاب میں گندم کٹائی سیزن کے آغاز کے باوجود آٹے کی قیمت میں ہوشربا اضافہ ہو گیا، نجی کمپنیاں برانڈ کے نام پر مہنگے داموں آٹافروخت کرنے لگیں۔

ذرائع کے مطابق رواں سیزن میں حکومت کی جانب سے گندم کی سرکاری قیمت 3500 روپے فی من مقرر کی گئی ہے  تاہم اوپن مارکیٹ میں گندم کی قیمت تقریباً 88 روپے فی کلوگرام تک پہنچ گئی ہے۔

دوسری جانب نجی کمپنیوں کی جانب سے تیار کردہ آٹا 180 روپے فی کلوگرام تک فروخت کیا جا رہا ہے  جبکہ فی من آٹے کی قیمت تقریباً 7200 روپے تک بتائی جا رہی ہے۔

مقامی سطح پر گندم کی پسائی پر 400 سے 500 روپے فی من لاگت آتی ہے، جس کے بعد ایک من آٹے کی مجموعی قیمت تقریباً 4000 روپے بنتی ہے  تاہم مقامی منڈی میں پسائی کے بعد تیار ہونے والا آٹا 98 سے 108 روپے فی کلوگرام کے حساب سے دستیاب ہوتا ہے، اس کے باوجود نجی شعبہ اسی آٹے کو 180 روپے فی کلوگرام تک فروخت کر رہا ہے۔