آبنائے ہرمز میں آئل ٹینکر پر دھماکا، خوف و ہراس پھیل گیا

آبنائے ہرمز میں ایک آئل ٹینکر پر نامعلوم پروجیکٹائل سے حملے کے نتیجے میں جہاز میں آگ بھڑک اٹھی اور بجلی کی فراہمی معطل ہوگئی، جس کے بعد خطے میں بحری جہازوں کی سکیورٹی سے متعلق خدشات بڑھ گئے۔ برطانوی میری ٹائم ٹریڈ آپریشنز (UKMTO) کے مطابق واقعے میں عملے کے تمام ارکان محفوظ رہے اور آگ پر قابو پالیا گیا۔
UKMTO کے مطابق ٹینکر آبنائے ہرمز سے باہر نکلنے کے دوران نامعلوم پروجیکٹائل کا نشانہ بنا۔ جہاز پر معمولی آگ لگی اور بجلی کا نظام بند ہوگیا، تاہم عملے کو کسی جانی نقصان کی اطلاع نہیں ملی اور ٹینکر نے بعد میں اپنا سفر جاری رکھا۔
اسی دوران ایرانی سرکاری نشریاتی ادارے نے ایک الگ واقعے میں دعویٰ کیا کہ ایک آئل ٹینکر آبنائے ہرمز میں بارودی سرنگ سے ٹکرانے کے بعد دھماکے سے تباہ ہوگیا۔ ایرانی میڈیا کے مطابق جہاز مقررہ نیوی گیشن روٹ سے ہٹ گیا تھا اور اس کا ٹریکنگ سسٹم بھی بند تھا۔ تاہم اس دعوے کی آزادانہ طور پر تصدیق نہیں ہوسکی۔
برطانوی حکام نے آبنائے ہرمز میں حالیہ واقعات کے بعد بحری جہازوں کو محتاط رہنے اور کسی بھی مشتبہ سرگرمی کی فوری اطلاع دینے کی ہدایت کی ہے۔ آبنائے ہرمز عالمی سطح پر تیل اور ایل این جی کی ترسیل کا انتہائی اہم بحری راستہ ہے، اس لیے یہاں ہونے والے کسی بھی حملے یا حادثے سے عالمی توانائی منڈیوں میں تشویش پیدا ہوسکتی ہے۔