دبئی : (ویب ڈیسک) ایشیاء کپ کے لیے بھارتی کرکٹ بورڈ نے اپنی ٹیم پاکستان بھیجنے سے ایک بار پھر انکار کر دیا ہے۔
بھارتی میڈیا رپورٹس کے مطابق بھارتی بورڈ نے ایک بار پھر واضح کیا ہے کہ بھارتی ٹیم کو پاکستان کے سفر کی اجازت نہیں ملے گی ، بھارتی بورڈ کے سیکریٹری اور ایشین کرکٹ کونسل (اے سی سی) کے صدر جے شاہ نے چیئرمین پی سی بی نجم سیٹھی کو اس حوالے سے بتا دیا ہے۔
جے شاہ نے بھارت کا مؤقف اے سی سی کے بحرین میں ہونے والے اجلاس میں دوبارہ دہراتے ہوئے کہا کہ بھارتی حکومت کی جانب سے پاکستان کے سفر کی اجازت نہیں ملے گی ۔
بھارتی میڈیا رپورٹس کے مطابق بھارت نے دوسرے بورڈز کو بھی صورتِ حال سمجھنے کا کہا ہے جس کے بعد تمام ممبران نے ایک ماہ انتظار کرنے پر اتفاق کیا ہے۔
بھارتی میڈیا کا کہنا ہے کہ ایشیاء کپ کی پاکستان کی میزبانی پر بھارت کو اعتراض نہیں ، ایونٹ متحدہ عرب امارات میں ہو گا جس کا میزبان پاکستان ہی ہو گا، ایشیاء کپ کے میچز کے 3 وینیو دبئی، شارجہ اور ابوظہبی میں ہوں گے۔
واضح رہے کہ گزشتہ روز ایشین کرکٹ کونسل (اے سی سی) کے اجلاس میں اس سال پاکستان کی میزبانی میں ہونے والے کرکٹ ایشیاء کپ کے وینیو پر حتمی فیصلہ نہ ہو سکا تھا، مارچ میں ہونے والے اجلاس میں دوبارہ وینیو پر بات ہو گی ۔
