لاہور: پنجاب فوڈ اتھارٹی (PFA) نے پنجاب موٹروے سروس ایریا پر قائم KFC اور ہارڈیز کے آؤٹ لیٹس کو فوڈ سیفٹی اور صفائی کے سنگین اصولوں کی خلاف ورزی پر سیل کر دیا۔
ترجمان پنجاب فوڈ اتھارٹی کے مطابق اچانک کیے گئے معائنے کے دوران دونوں ریسٹورنٹس میں سڑی ہوئی سبزیاں، زائد المیعاد کیچپ اور دیگر ساسز استعمال کے لیے موجود پائی گئیں۔ اس کے علاوہ کچن میں صفائی کے ناقص انتظامات، گندگی، خراب فرش، خوراک کی تیاری کے غیر معیاری طریقہ کار اور پانی کی فلٹریشن کے ناکافی انتظامات بھی سامنے آئے۔
کارروائی کی نگرانی پنجاب فوڈ اتھارٹی کی ڈائریکٹر جنرل سلمیٰ بٹ نے کی۔ انہوں نے موقع پر ہی زائد المیعاد اشیائے خورونوش کے استعمال پر سخت برہمی کا اظہار کرتے ہوئے فوری طور پر ان کا استعمال بند کرنے کی ہدایت دی۔ ان کا کہنا تھا کہ موٹروے استعمال کرنے والے مسافروں کی جانب سے ان ریسٹورنٹس کے کھانے کے معیار اور صفائی سے متعلق متعدد شکایات موصول ہوئی تھیں۔
پنجاب فوڈ اتھارٹی نے دونوں آؤٹ لیٹس کو فوری طور پر سیل کرتے ہوئے ہدایت جاری کی ہے کہ تمام خامیاں دور کیے بغیر انہیں دوبارہ کھولنے کی اجازت نہیں دی جائے گی۔ اتھارٹی نے واضح کیا کہ عوام کو محفوظ اور معیاری خوراک کی فراہمی یقینی بنانے کے لیے فوڈ سیفٹی قوانین کی خلاف ورزی کرنے والے کسی بھی ریسٹورنٹ یا فوڈ آؤٹ لیٹ کے خلاف سخت کارروائی جاری رہے گی۔
