لندن: (ویب ڈیسک) وفاقی وزیر برائے سرمایہ کاری بورڈ و سابق وزیراعظم چوہدری شجاعت حسین کے صاحبزادے چوہدری سالک حسین نے سابق وزیراعظم و مسلم لیگ (ن) کے قائد نواز شریف سے لندن میں ملاقات کی ہے۔
لندن میں ہونے والی ملاقات میں مریم نواز، حسین نواز اور حسن نواز بھی موجود تھے۔ چوہدری سالک حسین نے نوازشریف کی خیریت دریافت کی اور چوہدری شجاعت کا پیغام پہنچایا۔
ملاقات میں موجودہ ملکی سیاسی و معاشی صورتحال پر تبادلہ خیال کیا گیا۔ ملاقات میں ملک کو درپیش مشکلات سے نکالنے کیلئےمستقبل میں بھی ساتھ چلتے رہنے کا فیصلہ کیا گیا۔

ٹھٹہ: (ویب ڈیسک) وزیراعلیٰ سندھ مراد علی شاہ کا کہنا ہے کہ سندھ کی تقسیم کی بات کرنے والوں کو جینے نہیں دیں گے، 15 جنوری کو بلدیاتی الیکشن کے لیے تیار ہیں، انتظامی امور کے لیے الیکشن کمیشن کے پاس جائیں گے۔
ٹھٹہ میں تقریب سے خطاب کرتے ہوئے وزیراعلیٰ سندھ مراد علی شاہ کا کہنا تھا کہ الیکشن کمیشن نے بلدیاتی انتخابات کے لیے 15 جنوری کی تاریخ دی ہے، بلدیاتی الیکشن کے لیے ہم ہمیشہ تیار ہیں، بلدیاتی الیکشن میں امن و امان قائم رکھنا مشکل ہوتا ہے، ہم انتظامی امور کے لیے الیکشن کمیشن کے پاس جائیں گے۔
مراد علی شاہ کا کہنا تھا کہ سندھ میں سیلاب سے متاثرہوئے اکیس لاکھ گھر اب بھی تباہ حال ہیں ، متاثرین ٹینٹوں میں رہ رہے ہیں، متاثرین کو دوبارہ آباد کرنے میں کوشاں ہیں۔
وزیراعلیٰ سندھ کا کہنا تھا کہ مرتضیٰ وہاب نے کراچی کی بہتری کے لیےکام کیا ہے، سیاسی آدمی ہٹانےکے مطالبے کی وجہ سے ایڈمنسٹریٹر کراچی کے عہدے پرسرکاری افسر لگایا ہے۔
پی ٹی آئی پر تنقیدکرتے ہوئے ان کا کہنا تھا کہ اسمبلیاں اپنی مدت پوری کریں گی، یہ صرف اپنی خواہش پوری کرنے کے لیے سب کر رہےہیں، لوگوں سے ووٹ لیتے ہیں پھر اسمبلی توڑنے کی بات کرتے ہیں، تنخواہیں لے رہے ہیں لیکن قومی اسمبلی میں نہیں جاتے۔

لندن: (ویب ڈیسک) سابق وزیراعظم چوہدری شجاعت کے بیٹے و وفاقی وزیر برائے سرمایہ کاری چوہدری سالک حسین نے کہا ہے کہ چوہدری شجاعت کو یہ کہہ کر پارٹی کی صدارت سے ہٹایا گیاکہ ان کادماغی توازن ٹھیک نہیں، ان کو پارٹی کی صدارت سے ہٹانے والے آج بھی ان سے رابطے کرتے ہیں۔
لندن میں میڈیا سے گفتگو میں چوہدری سالک کا کہنا تھاکہ جو فیصلے تمام جماعتوں کے ساتھ مل کرکیے تھے، آج بھی اس پر اسٹینڈ کرتے ہیں، مقصد یہی ہے کہ سب مل کر ملک کیلئے کام کریں،کوئی ذاتی مقصدنہیں۔
ان کا کہناتھاکہ ہمیشہ اپوزیشن کی یہی کوشش ہوتی ہےکہ حکومت کو گرایا جائے اورغیرمستحکم کیاجائے، اصل میں حکومت نہیں ملک غیر مستحکم ہورہا ہوتاہے۔
انہوں نے کہا کہ ہمیں الیکشن کا انتظار کرنا چاہیے، جس کو عوام مینڈیٹ دے وہ آئے اور حکومت بنائے، اپوزیشن کو حکومت کےساتھ سپورٹنگ کردار رکھنا چاہیے، ملک اور معیشت کی بات پر اپوزیشن کو حکومت کو سپورٹ کرنا چاہیے۔
ان کا کہنا تھاکہ میرا خیال ہے سیٹ اپ نہیں، لوگوں کی نیتیں تبدیل ہورہی ہیں، سیٹ اپ تبدیل نہ ہو تو بھی فرق نہیں پڑے گا۔
چوہدری سالک کا کہنا تھاکہ چوہدری شجاعت کو یہ کہہ کر پارٹی کی صدارت سے ہٹایا گیاکہ ان کادماغی توازن ٹھیک نہیں، گھٹیا حرکت ہے، ان کو پارٹی کی صدارت سے ہٹانے والے آج بھی ان سے رابطے کرتے ہیں، شام کو ساتھ بیٹھے ہوتے ہیں، ان لوگوں تھوڑی سی شرم آنی چاہیے۔
انہوں نے کہا کہ چوہدری شجاعت کا اتنا بڑا دل ہےکہ وہ انہی لوگوں کے ٹیلی فون سن رہےہوتےہیں اور ملاقاتیں کررہےہوتےہیں۔

لاہور: (ویب ڈیسک) مسلم لیگ ق کے رہنما اور سابق وفاقی وزیر مونس الہیٰ نے تصدیق کی ہے کہ چوہدری برادران کے رابطے بحال ہوگئے ہیں، اسمبلی تحلیل کے معاملے پر عمران خان کا جو حکم ہوگا اُس پر عمل کیا جائے گا۔
سابق وفاقی وزیر مونس الہیٰ نے وزیراعلیٰ ہاؤس میں وی لاگرز سے ملاقات میں پنجاب اسمبلی کی تحلیل سے متعلق تمام ابہام دور کرتے ہوئے کہا کہ یہ اٹل اور دوٹوک فیصلہ ہے عمران خان اسمبلی تحلیل کے حوالے سے جو کہیں گے وہ ہوگا اور نئے انتخابات کے معاملے پر کوئی سمجھوتہ نہیں کیا جائے گا۔
انہوں نے کہا کہ موجودہ سیاسی صورتحال میں الیکشن ہی واحد حل ہے، مستقبل میں تحریک انصاف کے ساتھ رہنا چاہتے ہیں البتہ کچھ لوگ شاید نہیں چاہتے کہ پی ٹی آئی اور ق لیگ ساتھ چلیں۔
مونس الہیٰ نے کہا کہ نیشنل ہاکی اسٹیڈیم کے جلسے کے بعد والد کو تبدیل پایا، وہ عمران خان کے ساتھ دیرپا اتحاد چاہتے ہیں، والد چوہدری پرویز الہی، حسین الہی اور میں مشاورت سے فیصلے کرتے ہیں۔
اُن کا کہنا تھا کہ کبھی کوئی ایسا عمل نہیں کیا جس سے عمران خان کی سیاست اور عزت پر فرق آئے، چیئرمین پی ٹی آئی ہمارے محسن ہیں اور ہمارا خاندان محسن کش نہیں ہے۔
انہوں نے کہا کہ ماموں شجاعت حسین سے اس دن سے نہیں ملا جس دن اسمبلی سے ملاقات کے لیے روانہ ہوا تھا البتہ اب چوہدری شجاعت اور پرویز الہی کے رابطے بحال ہوگئے ہیں۔

اسلام آباد: (ویب ڈیسک) سابق وفاقی و رہنما تحریک انصاف فواد چودھری نے کہا کہ پاکستان میں کرپشن اور فراڈ کا موجد بلاشبہ شریف خاندان ہے
رہنما پاکستان تحریک انصاف نے نواز شریف کی گفتگو پر ردعمل کا اظہار کرتے ہوئے کہا کہ نواز شریف اور اسکے حواریوں نے ملک کو دونوں ہاتھوں سے لُوٹا اور عدالتوں سے جھوٹ بول کر فرار ہو گئے۔ڈیلی میل معاملے کے تمام حقائق برطانوی صحافی پہلے ہی عیاں کر چکے ہیں۔
انہوں نے کہا کہ نواز شریف کے کیسز میں بھی احتساب کے عمل کا کھلا تماشا لگایا گیا،سابق مشیر برائے احتساب وامور داخلہ بیرسٹر شہزاد اکبر نے شہباز شریف پر جو کیس بنایا اس پر عدالتی کاروائی ہوئی ہی نہیں۔
سابق وفاقی وزیر کا کہنا تھا کہ بلین ٹری منصوبہ تحریک انصاف کی بڑی کامیابیوں میں سے ایک ہے جس کو بین الاقوامی سطح پر بھی پذیرائی ملی، شہزاد اکبر نے شہباز شریف پر جو کیس بنایا اس پر عدالتی کارروائی ہی نہیں ہوئی۔خیبرپختونخوا کے عوام نے عوامی خدمت کے پیش نظر تحریک انصاف کو بار بار اقتدار سونپا۔

اسلام آباد: (ویب ڈیسک) وزیرخارجہ بلاول بھٹو جی 77 ممالک کی کانفرنس میں شرکت کیلئے 12 دسمبر کو امریکا روانہ ہوں گے۔
اپنے دورہ امریکہ کے موقع پر وزیر خارجہ بلاول بھٹو امریکی حکام سے بھی ملاقات کریں گے جس میں پاکستان کیلئے تجارت میں مزید سہولیات کے حوالے سے گفتگو ہوگی۔
ذرائع کے مطابق بلاول بھٹو کے دورے کے دوران عالمی مالیاتی اداروں کے ساتھ مختلف مالی امور سے متعلق امریکہ کے اثررورسوخ پر بات ہوگی اس کے علاوہ افغانستان کی صورتحال بھی زیر غور آئے گی۔