لاہور: (ویب ڈیسک) پاکستانی نژاد آسٹریلوی کرکٹر عثمان خواجہ 24 سال بعد دورہ پاکستان پر آنے والی آسٹریلوی ٹیم کے ساتھ راولپنڈی سٹیڈیم میں کھیلنے کے لیے پرجوش ہیں۔
واضح رہے کہ آسٹریلیا اور پاکستان کے درمیان پہلے ٹیسٹ میچ کا آغاز 4 مارچ سےراولپنڈی کرکٹ سٹیڈیم میں ہونے جارہا ہے۔
ایسے میں عثمان خواجہ نے 30 سال پہلے لی گئی اپنے بچپن کی تصویر کو انسٹاگرام اکاؤنٹ کی زینت بنایا۔
آسٹریلوی اوپنر کی یہ تصویر راولپنڈی کے پرانے کرکٹ سٹیڈیم میں لی گئی تھی۔
کرکٹر نے اپنی پوسٹ میں بتایا کہ یہ تصویر 30 سال قبل ہمارے آسٹریلیا منتقل ہونے سے دو ہفتے پہلے لی گئی تھی، جہاں شہر کے پرانے اسٹیڈیم میں، میں ایک شاٹ کھیل رہا ہوں۔ اس وقت کس نے یہ سوچا ہوگا کہ میں یوں پاکستان کے خلاف آسٹریلیا سے کھیلنے واپس آؤں گا۔
عثمان خواجہ نے بے حد خوشی اور بے صبری ظاہر کرتے ہوئے کہا کہ دوبارہ اسی اسٹیڈیم میں کھیلنے کا انتظار نہیں کرسکتا۔

کراچی: (ویب ڈیسک) قومی کرکٹ ٹیم کے سابق ٹیسٹ کپتان یونس خان بھی پاکستان میں بڑھتی ہوئی مہنگائی پر بول پڑے۔
ایک تقریب میں اظہار خیال کرتے ہوئے یونس خان کا کہنا تھا کہ وزیر اعظم عمران خان کی حکومت کے خلاف نہیں ہوں، لیکن حقیقت یہ ہے کہ ملک میں مہنگائی بہت بڑھ گئی ہے۔
انہوں نے کہا کہ مہنگائی کے اس دور میں گزارا بہت مشکل ہے۔ پیٹرول، تیل اور ٹماٹر سمیت ہر چیز مہنگی ہوگٸی ہے۔
سابق کرکٹر کا یہ بھی کہنا تھا کہ ملک میں پیٹرول ابھی سستا ہے، ہوسکتا ہے پھر مزید فی لیٹر 20 روپے بڑھ جائے، آٹا بھی بہت مہنگا ہو چکا ہے، مہنگائی سے عوام کے لیے مشکلات پیدا ہوگئی ہیں۔
خیال رہے کہ ملک میں بڑھتی ہوئی مہنگائی کے سبب عام شہری پریشان ہیں، وزیراعظم نے حالیہ دنوں عوام کو ریلیف دینے کے لیے پیٹرول کی فی لیٹر قیمت میں 10 روپے جبکہ بجلی کے نرخوں میں 5 روپے کمی کی۔

راولپنڈی: (ویب ڈیسک) آسٹریلیا کے خلاف ٹیسٹ سیریز کے آغاز سے قبل قومی کرکٹ ٹیم کے کپتان بابراعظم نے انکشاف کیا ہے کہ لیگ اسپنر یاسر شاہ تاحال مکمل فٹ نہیں ہیں انہیں ابھی بھی فٹنس مسائل کا سامنا ہے۔
میڈیا سے ورچوئل پریس کانفرنس کرتے ہوئے قومی کرکٹ ٹیم کے کپتان بابراعظم نے کہا کہ لیگ اسپنر یاسر شاہ آسٹریلیا کے خلاف سیریز میں کلیدی کردار ادا کرینگے تاہم وہ مکمل فٹ نہیں ہیں اور انکی انجری بھی مکمل صحیح نہیں ہوئی ہے۔
بابراعظم نے کہا کہ یاسر شاہ ریزرو کھلاڑی کی حثیت سے اسکواڈ کا حصہ ہیں لیکن گزشتہ دو ماہ سے انہوں نے کوئی میچ نہیں کھیلا ہے جس کے لیے وہ کافی محنت کررہے ہیں۔
قومی کرکٹ ٹیم کے کپتان نے مزید کہا کہ یاسر شاہ کسی بھی ٹیم کے خلاف پاکستان کا اہم ہتھیار ہیں اور ہم ہوم سیریز میں آسٹریلیا کے خلاف انہیں بھرپور طریقے سے استعمال کرنا چاہتے ہیں۔
واضح رہے کہ پاکستان اور آسٹریلیا کے مابین تاریخی ٹیسٹ سیریز کا آغاز کل (بروز جمعرات) سے راولپنڈی کرکٹ اسٹیڈیم میں شروع ہوگا۔

راولپنڈی: (ویب ڈیسک) پاکستان اور آسٹریلیا کے مابین ٹیسٹ سیریز کے لئے خصوصی ٹریفک پلان تشکیل دے دیا گیا ہے۔
راولپنڈی ٹریفک پولیس کے مطابق ٹیسٹ کرکٹ میچ 4 مارچ سے 8 مارچ تک کھیلا جائے گا، میچز کے دوران ٹریفک پولیس کے 350 اہلکار سپیشل ڈیوٹی کے فرائض سر انجام دیں گے، شائقین کرکٹ کے لئے 3 جگہ پارکنگ کی سہولت مختص کی گئی ہے، کار پارکنگ سول ایویشن گراﺅنڈ راول روڈ اور گریجویٹ کالج سیٹلائیٹ ٹاﺅن میں کروائی جائے گی۔
ٹریفک پولیس کے مطابق گریجویٹ کالج سیٹیلائیٹ ٹاﺅن کی پارکنگ کا داخلہ ففتھ روڈ مین گیٹ سے ہوگا، موٹر سائیکل پارکنگ کے لئے راول پارک کے اندر نزد شاہین چوک اور ایویشن گراﺅنڈ مختص کی گئی ہے، پارکنگ سے سٹیڈیم تک کی رسائی کےلئے شٹل سروس کی سہولت فراہم کی جائے گی، دوران میچ سٹیڈیم روڈ نائنتھ ایونیو چوک سے ڈبل روڈ تک مکمل طور پر بندہو گی، اسلام آباد سے آنے والی ٹریفک فیض آباد سے ایکسپریس وے اور مری روڈ استعمال کر ے گی، نائنتھ ایونیو آنے والی ٹریفک براستہ آئی جے پی روڈ، پنڈورہ چونگی، کٹاریاں، کیرج فیکٹری، پیرودھائی موڑ، چک مدد سے راولپنڈی میں داخل ہو سکے گی۔
ٹریفک پولیس کی جانب سے مزید بتایا گیا کہ راولپنڈی سے نائنتھ ایونیو اسلام آباد جانے والی ٹریفک براستہ فیض آباد اسلام آباد داخل ہو سکے گی، کرکٹ ٹیموں کی روانگی اور واپسی کے وقت مری روڈ کو فیض آباد سے ڈبل روڈ تک مکمل طور پر بند کیا جائے گا، دوران موومنٹ اسلام آباد سے آنے والی ٹریفک کو فیض آباد سے ایکسپریس وے کی جانب ڈائیورٹ کیا جائے گا، راولپنڈی سے اسلام آباد جانے والی ٹریفک کو سکستھ روڈ سے سید پور روڈ کی طرف موڑا جائے گا، غوثیہ چوک سے آنے والی ٹریفک کو براستہ فاروق اعظم روڈ، کری روڈ کی طرف موڑا جائے گا جبکہ متبادل راستوں پر ٹریفک کو رواں دواں رکھنے کے لئے اضافی اہلکار تعینات کیے گئے ہیں۔