سرکاری ادارے لاہور الیکٹرک سپلائی کمپنی (لیسکو) کے 14 ارب 12 کروڑ 50 لاکھ روپے کے نادہندہ نکلے۔

لاہور الیکٹرک سپلائی کمپنی نے نادہندہ سرکاری محکموں کی فہرست جاری کر دی جس کے مطابق سب سے زیادہ تحصیل میونسپل ایڈمنسٹریشن (ٹی ایم ایز) 6929 ملین روپے کی نادہندہ ہے۔

فہرست کے مطابق واسا لاہور 2363 ملین روپے، وزارت ریلویز 796 ملین روپے، پنجاب پولیس 777 ملین روپے، پنجاب ایری گیشن اینڈ پاؤر 707 ملین روپے اور لاہور کی ضلعی حکومت 469 ملین روپے کی نادہندہ ہے۔

ڈسٹرکٹ اینڈ تحصیل ہیڈ کوارٹر اسپتال لاہور 388 ملین روپے، قصور کی ضلعی حکومت 368 ملین روپے، گنگا رام اسپتال 266 ملین روپے، جیل خانہ جات 266 ملین روپے اور پارکس اینڈ ہارٹی کلچرل اتھارٹی 245 ملین روپے کی نادہندہ ہے۔

لاہور رنگ روڈ اتھارٹی لیسکو کی 235 ملین روپے، ایل ڈی اے 229 ملین روپے، پنجاب بلڈنگز 191 ملین روپے اور ڈسٹرکٹ اینڈ تحصیل ہیڈ کوارٹر اسپتال قصور 162 ملین روپے کا نادہندہ ہے۔

بجلی کی تقسیم کار کمپنیوں کی کارکردگی

دوسری جانب، ترجمان پاور ڈویژن کے مطابق گزشتہ مالی سال 2023-24 میں بجلی کی تقسیم کار کمپنیوں نے لائن لاسز اور بلوں کی عدم وصولی کی مد میں 591 ارب روپے کا نقصان کیا تھا لیکن رواں مالی سال ستمبر 2024 تک پہلے تین ماہ کے نتائج پچھلے سال سے کافی بہتر ہیں۔

رواں مالی سال کی پہلی سہ ماہی رپورٹ کے مطابق تقسیم کار کمپنیوں نے تین ماہ میں پچھلے سال کے 308 ارب روپے کے مقابلے میں اس سال 239 ارب روپے کا نقصان کیا ہے جو کہ 69 ارب روپے کی بہتری ہے۔

تقسیم کار کمپنیوں کی وصولی پہلے تین ماہ میں پچھلے سال 84 فیصد کے مقابلے میں اس سال 91فیصد رہی ہے جس میں واضح بہتری دیکھی جا سکتی ہے۔

پچھلے سال پہلے چار ماہ یعنی جولائی تا اکتوبر گردشی قرضے میں 301 ارب روپے کا اضافہ ہوا تھا جبکہ اس سال پہلے چار ماہ گردشی قرضے کا اضافہ صرف 11 ارب روپے ہے جو کہ بہتر کارکردگی کا عکاس ہے۔

سندھ حکومت نے ترکیہ اور سوئیدن کو صوبے میں سرمایہ کاری کی دعوت دے دی۔

ترجمان وزیراعلیٰ سندھ کے مطابق وزیراعلیٰ سندھ سید مراد علی شاہ سے ترکیہ، سوئیڈن کے سفیروں اور عمان کے قونصل جنرل نے وزیراعلیٰ ہاؤس میں الگ الگ ملاقاتیں کیں جس میں باہمی دلچسپی کے امور، دو طرفہ تعلقات پر بات چیت کی گئی۔

وزیراعلیٰ سندھ سید مراد علی شاہ نے ملاقات کے دوران ترکیہ کے نئے سفیر عرفان نیزیروگلو کو پاکستان میں خوش آمدید کہتے ہوئے کہا کہ آپ پاکستان کو اپنا گھر سمجھیں کیونکہ ترکیہ کے ساتھ ہمارے خصوصی تعلقات ہیں۔

ترک سفیر نے کہا کہ ترکی کی ٹاپ کمپنیاں آئیڈیاز نمائش 2024 میں شرکت کے لیے پاکستان آئی ہیں، پاکستان ترک عوام اور حکومت کے لیے بہت اہم ہے۔

مراد علی شاہ نے ترکش کمپنیز کو انرجی، کول مائننگ ودیگر منصوبوں میں سرمایہ کاری کی دعوت دیتے ہوئے کہا کہ سندھ میں گیس، پیٹرول، کوئلہ اور قدرت کی لازوال نعمتیں بڑی مقدار میں موجود ہیں۔

مراد علی شاہ نے کہا کہ ہماری حکومت پی پی پی موڈ پر بھی ترکش کمپنیز کے ساتھ کام کرسکتی ہے۔ ملاقات میں طے ہوا کہ وزیراعلیٰ کے معان خصوصی قاسم نوید ترکش سفیر کے ساتھ رابطہ کریں گے۔

دریں اثنا وزیراعلیٰ سندھ سید مراد علی شاہ سے سویڈن کی سفیر مس الیگزینڈرا برگ وون لِنڈے نے ملاقات کی، سوئڈش سفیر کا پاکستان تعیناتی کے بعد یہ کراچی کا پہلا دورہ ہے۔

سوئیڈش سفیر نے کہا کہ پاکستان اور سوئیڈن کے سفارتی تعلقات کو 75 برس مکمل ہوگئے ہیں، کراچی دورے کا مقصد سرمایہ کاری کے مواقع کی تشخیص کرنا ہے، انہوں نے وزیراعلیٰ سندھ کو پنک بس چلانے پر مبارکباد دی۔

وزیراعلی سندھ نے کہا کہ سوئیڈن اور پاکستان کے درمیان تجارت کم ہوتی جارہی ہے جسے فروغ دینے کیلئے سوئیڈش سفیر اپنا کردار ادا کریں۔

مراد علی شاہ نے کہا کہ کچھ سوئیڈش کمپینز پاکستان میں کام کر رہی ہیں، وزیراعلیٰ سندھ نے مزید سوئیڈش کمپنیز کو سندھ میں سرمایہ کاری کی دعوت دی۔

وزیراعلیٰ سندھ کو آگاہ کیا گیا کہ سوئیڈش کمپنیاں ونڈ انرجی ، سولر انرجی اور واٹر مینجمنٹ پروجیکٹس میں دلچسپی رکھتی ہیں۔ مراد علی شاہ نے کہا کہ سندھ حکومت کی ترجیح ہے کہ عوام کو پینے کا صاف پانی اور سستی بجلی مہیا کریں۔

وزیراعلیٰ سندھ سے عمان کے قونصل جنرل انجنیئر سمیع عبداللہ الخنجاری نے بھی ملاقات کی اور وزیراعلیٰ کو عمان کے قومی دن کے پروگرام کی دعوت دی۔

مراد علی شاہ نے کہا کہ عمان نہ صرف ہمارا برادر ملک ہے بلکہ جغرافیائی طور پر قریبی سلطنت ہے، وزیراعلیٰ نے قونصل جنرل کو عمان کے قومی دن کی پیشگی مبارکباد دی۔

لاہور(ڈیلی پاکستان آن لائن)ہائی کورٹ نے عمران خان کے خلاف درج مقدمات میں عبوری ضمانت کی استدعا خارج کردی۔

نجی ٹی وی چینل ایکسپریس نیوز کے مطابق بانی پی ٹی آئی کے خلاف درج مقدمات کی تفصیلات کے لیے دائر درخواست پر سماعت  لاہور ہائی کورٹ میں ہوئی، جس میں عدالت نے عمران خان کے خلاف درج مقدمات میں عبوری ضمانت استدعا خارج کر دی ۔

دورانِ سماعت محکمہ داخلہ پنجاب اور وفاقی حکومت کی جانب سے بانی پی ٹی آئی  پر درج مقدمات کی رپورٹس عدالت میں پیش  کی گئیں۔

رپورٹ کے مطابق محکمہ داخلہ پنجاب کی جانب سے بانی پی ٹی آئی کے خلاف کوئی بھی مقدمہ درج نہیں ہے۔  وفاق حکومت کے وکیل نے عدالت میں بتایا کہ بانی پی ٹی آئی کے خلاف اسلام آباد پولیس نے 62 کیسز درج کر رکھے ہیں۔

عمران خان کی بہن نورین نیازی کی درخواست پر سماعت جسٹس فاروق حیدر نے کی، جس میں درخواست گزار کے وکیل نے مؤقف اختیار کیا کہ بانی پی ٹی آئی کو تمام  مقدمات میں عبوری ضمانت فراہم کی جائے۔

جسٹس فاروق حیدر نے ریمارکس دیئے  کہ میرا نقطہ نظر یہ نہیں ہے، میں ضمانت نہیں دے سکتا۔ میرے نزدیک ملزم کا ضمانت قبل از گرفتاری میں عدالت کے روبرو پیش ہونا ضروری ہے۔ اگر مقدمات چھپائے گئے ہوئے تو متعلقہ ڈی پی او کے خلاف توہین عدالت کی کارروائی کریں گے۔بعد ازاں عدالت نے تمام رپورٹس کی روشنی میں درخواست نمٹا دی۔

اے این ایف نے قطر جانے والے مسافر کے بیگ سے بھاری مقدار میں منشیات برآمد کرلی۔

ترجمان کے مطابق اینٹی نارکوٹکس فورس کا تعلیمی اداروں اور ملک کے مختلف شہروں میں منشیات اسمگلنگ کے خلاف کریک ڈاؤن جاری جاری ہے، اس سلسلے میں  6 مختلف کارروائیوں میں 7 ملزمان کو گرفتار کرکے ایک کروڑ روپے سے زائد مالیت کی 83.3 کلو گرام منشیات برآمد کرلی گئی۔

تعلیمی اداروں میں کارروائیاں
اے این ایف حکام نے ہری پور میں کے کے ایچ روڈ پر ملزم سے 1.200 کلوچرس برآمد کرلی، جس میں ملزم نے تعلیمی اداروں کے طلبہ کو منشیات فروخت کرنے کا اعتراف بھی کرلیا۔

دیگر کارروائیاں
پشاور انٹرنیشنل ایئرپورٹ پر دوحا جانے والے مسافر کے ٹرالی بیگ سے 2 کلو ہیروئن اور ایک کلو آئس برآمد کرلی گئی۔ اسی طرح راوی ٹول پلازہ لاہور کے قریب گاڑی کے خفیہ خانوں میں چھپائی گئی 43.200 کلو چرس اور 16.800 کلو افیون برآمد کرکے  ملزم کو گرفتار کرلیا گیا۔

اُدھر کوٹ مومن سرگودھا کے قریب ملزم کے قبضے سے 13.200 کلو چرس برآمد ہوئی۔ علاوہ ازیں ایم ون موٹر وے اسلام آباد پر 2 ملزمان سے مجموعی طور پر 4.600 کلو چرس برآمد  کرلی گئی۔ ڈیرہ غازی خان میں سخی سرور روڈ پر ملزم سے 1.300 کلو آئس برآمد ہوئی ہے۔

تمام کارروائیوں میں گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

کراچی؛ رہائشی علاقے میں 2 بندروں نے ہلچل مچادی، جنہیں پکڑنے کےلیے سرکاری ادارہ بھی حرکت میں آ گیا۔

شہر قائد کے علاقے سولجر بازار میں البیلا چوک کے قریب رہائشی علاقے میں 2 بندروں کی موجودگی کا پتا چلا، جس کے بعد ان کی تلاش شروع کردی گئی۔ سلمان نامی شہری نے علی الصبح معصوم شاہ مسجد سولجر بازار کے قریب 2 بندر دیکھنے کی اطلاع دی۔

شہری کی جانب سے ملنے والی اطلاع کو معتبر جانتے ہوئے محکمہ جنگلات کی ٹیم کو بندر پکڑنے کے لیے طلب کیا گیا۔ واقعے کے بعد محکمہ جنگلات کی ٹیم نے چڑیاگھر انتظامیہ سے بھی موجود بندروں کی تعداد وغیرہ سے متعلق معلومات حاصل  کیں۔

واضح رہے کہ 4 روز قبل بھی سولجر بازار ہی کے ایک رہائشی علاقے میں بندر کے گھومنے کی ویڈیو سوشل میڈیا پر وائرل ہوئی تھی۔

بندر کو پکڑنے کے لیے سندھ وائلڈ لائف کی ٹیم انسپکٹر اعجاز نوندانی کی قیادت میں سولجر بازار کے علاقے میں پہنچی۔

آئینی بینچ نے تمام کرپٹ سرکاری عہدیداران کو برطرف کرنے سے متعلق درخواست ناقابل سماعت قرار دیتے ہوئے خارج کر دی۔

جسٹس عائشہ ملک نے ریمارکس میں کہا کہ آپ کی درخواست میں استدعا ہے کہ تمام سرکاری ملازمین کام نہیں کرتے انہیں فارغ کریں، آپ ان سرکاری افسروں کی نشاندہی کریں اور متعلقہ اداروں سے رجوع کریں۔

جسٹس محمد علی مظہر نے کہا کہ آپ نے اپنی درخواست میں کسی سرکاری آفیسر کا نام تک نہیں لکھا۔

جسٹس جمال مندوخیل نے ریمارکس دیے کہ آپ کا کونسا کام نہیں ہوا عدالت کو بتائیں! اس کا کیا مطلب ہے ہم صدر، وزیر اعظم، اسپیکر اور پارلیمنٹیرینز سب کو نکال دیں۔

لاہور ہائیکورٹ میں ججز کی سینیارٹی سے متعلق درخواست

جسٹس امین الدین خان کی سربراہی میں سات رکنی آئینی بینچ نے لاہور ہائیکورٹ میں ججز کی سینیارٹی کے حوالے سے جسٹس فرخ عرفان خان کی درخواست پر سماعت کی۔

آئینی بینچ نے نظر ثانی درخواست غیر مؤثر ہونے کی بنیاد پر نمٹاتے ہوئے ریمارکس دیے کہ مستقبل میں کسی اور مقدمے میں سینیارٹی کے اصول کا معاملہ طے کریں گے۔

جسٹس عائشہ ملک نے وکیل حامد خان سے استفسار کیا کہ کیا آپ یہ کیس چلانا چاہتے ہیں؟ چار ججز کے حوالے سے ایشو تھا یہاں تو ججز ریٹائر بھی ہو چکے ہیں۔

جسٹس محمد علی مظہر نے کہا کہ پانچ لوگوں نے ایک ساتھ حلف لیا تو عمر کے حساب سے سینیارٹی طے ہوگی۔ جسٹس عائشہ ملک نے کہ کہ آپ عدالت کو اکیڈمک ایکسر سائز کرنے کا کہہ رہے ہیں۔

وکیل حامد خان نے دلائل میں کہا کہ ججز کا نوٹیفکیشن ساتھ ہونے کے بعد اگر حلف ایک دن تاخیر سے بھی لیں تو سینیارٹی برابر ہی ہوگی، جسٹس فرخ عرفان نے امریکا ہونے کے سبب چیف جسٹس کو آگاہ کر کے حلف ایک دن بعد اٹھایا۔

جسٹس محمد علی مظہر نے کہا کہ جج جب تک حلف نہیں اٹھاتا تب تک وہ جج نہیں ہوسکتا ہے۔

جسٹس جمال مندوخیل نے ریمارکس دیے کہ آپ نظرثانی میں آئے ہیں فیصلے میں غلطی کیا ہے وہ بتائیں، اگر کوئی شخص نوٹفکیشن کے ایک ماہ تک حلف نہیں لیتا اور بعد میں وہ انکار کر دے تو کیا ہوگا؟

جسٹس محمد علی مظہر نے ریمارکس میں کہا کہ بہتر ہے اس معاملے کو اوپن رکھیں کسی اور کیس میں طے کر لیں گے۔

خیبر پختونخوا میں خناق خطرناک صورت اختیار کرگیا، جس سے متاثرہ 26 بچے جاں بحق ہو گئے۔

صوبائی محکمہ صحت کے مطابق خیبرپختونخوا میں خناق خطرناک حد تک پھیلاؤ اختیار کر چکا ہے، جس سے اب تک 26 بچے جاں بحق ہو گئے ہیں۔ جب کہ صوبے میں رواں سال 380 بچے خناق سےمتاثر ہوئے ۔

حکام کا کہنا ہے کہ مرض خناق میں پشاور سرفہرست ہے، جہاں سب سے زیادہ 12 بچے موت کے منہ میں چلے گئے۔ نوشہرہ اور چارسدہ میں 3،۔ 3 جب کہ ضلع مہمند میں 2 بچے جاں بحق ہوئے۔

جان کی بازی ہارنے والے بچوں میں زیادہ تر کی عمریں 5 سال سے زیادہ ہیں۔ خناق سے خیبرپختونخوا کے 27 اضلاع کی 228 یونین کونسلیں متاثر ہیں۔ حکام کا کہنا ہے کہ متاثرہ بچوں نے پیدائشی حفاظتی ٹیکہ جات کے کورس مکمل نہیں کیے۔