کراچی: (ویب ڈیسک) 6 روز جاری رہنے والی 8 ویں پاک بحریہ کی کثیرالملکی میری ٹائم مشق امن 2023ء اختتام پذیر ہو گئی۔
ترجمان پاک بحریہ کے مطابق مشق امن 2023ء کی اختتامی تقریب شمالی بحیرہ عرب میں منعقد کی گئی، وزیراعظم پاکستان میاں شہباز شریف تقریب کے مہمان خصوصی تھے، تقریب میں وفاقی وزیر تعلیم اور پیشہ ورانہ تربیت رانا تنویر، گورنر سندھ ، وزیر اعلیٰ سندھ و دیگر تقریب میں شریک تھے۔
پاک بحریہ کے ترجمان کے مطابق مشق امن 2023ء کی اختتامی تقریب میں چئیرمین جوائنٹ چیفس آف سٹاف ، سروسز چیفس نے بھی شرکت کی، بحیرہ عرب میں موجود پاک بحریہ کے جہاز پر آمد پر امیر البحر نے وزیر اعظم پاکستان کا استقبال کیا۔
وزیراعظم شہباز شریف کو امن مشقوں کے حوالے سے بریفنگ بھی دی گئی، مشق میں شریک ممالک کے بحری اور ہوائی جہازوں نے مہمان خصوصی کو سلامی پیش کی۔
خیال رہے کہ آٹھویں کثیر الملکی میری ٹائم مشق امن 6 روز تک جاری رہی، جس میں 50 سے زائد ممالک شریک تھے۔

اسلام آباد: (ویب ڈیسک) منی بجٹ پر آرڈیننس جاری کرنے کے معاملے پر صدر کے انکار کے بعد وفاقی حکومت سر جوڑ کر بیٹھ گئی۔
آرڈیننس کے معاملے پر حکمت عملی طے کرنے کے لیے وفاقی کابینہ کا اجلاس شروع ہو گیا، وزیر اعظم شہباز شریف کے زیر صدارت وفاقی کابینہ کے اجلاس میں 5 نکاتی ایجنڈے پر غور کیا جائے گا۔
وفاقی کابینہ کے اجلاس میں ملک میں بجلی کے حالیہ بریک ڈاؤن پر پاور ڈویژن رپورٹ پیش کرے گی، کرونا کے علاج میں استعمال ہونے والے سو ایم جی انجکشن کی قیمت میں اضافے پر فیصلہ ہو گا۔
اجلاس میں توشہ خانہ پر قانون سازی سے متعلق بین الوزارتی کمیٹی کی سفارشات پر غور ہو گا، اقتصادی رابطہ کمیٹی کے 10 فروری کے فیصلوں کی توثیق لی جائے گی، کابینہ کمیٹی برائے قانون سازی کے 9 فروری کے اجلاس کے فیصلوں کی توثیق بھی لی جائے گی۔

اسلام آباد: (ویب ڈیسک) پنجاب اسمبلی کے انتخابات کے معاملے پر گورنر پنجاب اور الیکشن کمیشن کی ملاقات کا اعلامیہ جاری کر دیا گیا۔
اعلامیے کے مطابق گورنر بلیغ الرحمان نے پنجاب اسمبلی کے انتخابات کی تاریخ دینے سے معذرت کر لی، گورنر پنجاب نے الیکشن کمیشن کو بتایا کہ وہ تاریخ دینے کے مجاز نہیں۔
الیکشن کمیشن کے مطابق گورنر پنجاب نے کہا کہ وہ ماورائے آئین اور قانون کوئی قدم نہیں اٹھانا چاہتے، عدالت عالیہ کا فیصلہ تشریح طلب ہے جس کیلئے قانونی راستہ اختیار کر رہے ہیں۔

اسلام آباد: (ویب ڈیسک) اسپیکر قومی اسمبلی راجہ پرویز اشرف نے پارلیمنٹ کے مشترکہ اجلاس میں وزرا کی عدم حاضری پر اظہار برہمی کرتے ہوئے اجلاس 28 فروری تک ملتوی کردیا۔
پارلیمنٹ کے مشترکہ اجلاس میں پی ٹی آئی کے منحرف رکن ریاض مزاری نے وزراء کی عدم حاضری کا معاملہ ایوان میں اٹھاتے ہوئے کہا کہ وزرا کو پارلیمنٹ کے اجلاس میں کوئی دلچسپی نہیں ہے، اگر یہاں بات نہیں سنا سکتے تو اسمبلی کو تحلیل کردیں، وزیروں کو کوئی دلچسپی نہیں ہے، جنوبی پنجاب کے سیلاب زدہ علاقوں میں پی ڈی ایم نے من پسند لوگوں کی امداد دی ہے، ہمارے مطالبے کو کوئی نہیں سنتا۔
اسپیکر راجہ پرویز اشرف نے وزرا کی عدم حاضری کی نشاندہی پر برہمی کا اظہار کرتے ہوئے کہا کہ وزرا کو یہاں ہونا چاہیے تھا اس ممبر کے سوالوں کا جواب کون دے گا، آٹھ وزراء کا ایوان میں ہونا ضروری ہے، جب تک وزراء ایوان میں نہیں آتے اجلاس موخر کر رہا ہوں۔
اسپیکر قومی اسمبلی نے وزراء کی عدم حاضری کے باعث اجلاس 28 فروری کی شام چار بجے تک ملتوی کردیا۔

اسلام آباد: (ویب ڈیسک) وفاقی وزیراطلاعات مریم اورنگزیب نے کہا ہے کہ آشیانہ کیس میں دھونس، دھمکیوں سے اسرارسعید کو وعدہ معاف گواہ بنایا گیا تھا، جھوٹے کیسز کے جواز کے لیے جھوٹے گواہ بھی بنائے گئے تھے۔
اسلام آباد میں نیوز کانفرنس کرتے ہوئے وفاقی وزیر اطلاعات نے کہا کہ اسرار سعید کے حلفیہ بیان کے بعد عمران خان، شہزاد اکبر، ڈی جی نیب کو عدالت بلایا جائے، عمران دور میں سیاسی مخالفین کے جھوٹے کیسز بنائے گئے۔
مریم اورنگزیب نے کہا کہ شہباز شریف کے خلاف بے بنیاد منی لانڈرنگ کیس بنایا گیا، آج جھوٹے گواہ کا بھانڈا پھوٹ گیا، عمران خان نے وزیراعظم کی کرسی کا استعمال کر کے مخالفین کو جیلوں میں ڈالا، عمران کی اصلیت آئے روز بے نقاب ہو رہی ہے۔
وفاقی وزیر اطلاعات نے کہا کہ آج سائفر والا پرچہ کدھرگیا؟ تم نےفارن پالیسی کے ساتھ کھیل کھیلا، پہلے کہا امریکہ، پھر باجوہ، پھر شہباز شریف اور محسن نقوی نے سازش کر دی، آج کہہ رہے ہو کسی نے سازش نہیں کی، کیا تم لوگوں کو پاگل سمجھتے ہو۔
مریم اورنگزیب نے کہا کہ آج عمران خود کہہ رہے ہیں امریکی سازش نہیں تھی، دوسروں کو چور کہنے والا خود چور ہے، پلستر کا بہانہ بنا کر نوجوانوں کو کہتے ہو جیلیں بھرو، آج شہزاد اکبر کدھر ہے جو ہر وقت پی آئی ڈی میں پریس کانفرنسز کرتےتھے۔
انہوں نے کہا کہ آئی ایم ایف معاہدہ تم نے کیا اور جواب ہم سے مانگتے ہو، ہر روز تمہارے چہرے سے نقاب اترتا ہے۔
مریم اورنگزیب کا کہنا تھا کہ آج سائفر کے معاملے پر سپریم کورٹ کو نوٹس لینا چاہیے، اس سے بڑا اہم ایشو اور کوئی نہیں ہو سکتا، عمران خان کو تمام کیسزمیں جواب دینے کے لیے کٹہرے میں لایا جائے۔