All posts by Khabrain News

اہم خبریں, پاکستان

معاشی مشکلات کے باوجود ترکیہ، شامی بہن، بھائیوں کی مدد جاری رکھیں گے: وزیر اعظم

اسلام آباد: (ویب ڈیسک) وزیر اعظم شہباز شریف نے کہا ہے کہ پورا پاکستان اپنے ترک اور شامی بھائیوں کے ساتھ ہے۔
ترکیہ اور شام کے زلزلے سے متاثرہ علاقوں میں سرچ اینڈ ریسکیو کارروائیوں میں حصہ لینے کارکنوں کے اعزاز میں تقریب سے خطاب کرتے ہوئے وزیر اعظم شہباز شریف نے کہا کہ ترکیہ، شام میں زلزلے سے بہت تباہی ہوئی، امدادی سرگرمیوں میں حصہ لینے والوں کو خراج تحسین پیش اور ان کا شکریہ بھی ادا کرتا ہوں۔
وزیر اعظم شہباز شریف نے کہا ریسکیو ٹیموں نے ترکیہ میں بغیر وقت ضائع کیے اپنی خدمات سرانجام دیں، ترکیہ کی عوام پاکستان کی طرف دیکھ رہی ہے، پاکستانی ریسکیو ٹیم نے ترک بہن، بھائیوں کے دلوں میں جگہ بنالی ہے، ترکیہ کے ساتھ پاکستان کا رشتہ بہت مضبوط ہے، آج کی محفل ریسیکیو ٹیموں کی خدمات کو سراہنے کیلئے سجائی، ریسکیو ٹیموں میں حصہ لینے والے پوری قوم کے ہیرو ہیں۔
انہوں نے مزید کہا کہ پاکستان کو آج معاشی چیلنجز اور مشکلات کا سامنا ہے، ترکیہ کی عوام کیلئے جو کچھ ہوا کریں گے، ترکیہ، شام میں بے شمار امدادی سامان روانہ کیا جا چکا ہے، کفایت شعاری مہم کے تحت اب بسکٹ چائے پیش کرتے ہیں، صرف ریسکیو ٹیموں کیلئے آج بندوبست کیا ہے، این ڈی ایم اے نے امدادی کاموں میں بہترین کام کیا، پاکستان ایئرفورس، نیول چیف کا بھی شکر گزار ہوں۔
شہباز شریف نے کہا کہ پاکستان اور ترکیہ یک جان دو قالب ہیں، پاکستان اور ترکیہ کے مسلمانوں کے تعلقات صدیوں پرانے ہیں، پاکستان اپنے ترک اور شامی بہن، بھائیوں کی ہر ممکن مدد جاری رکھے گا، کابینہ نے ایک ماہ کی تنخواہ زلزلہ متاثرین کو دینے کا اعلان کیا ہے، وزیر خزانہ نے اپنی جیب سے دو کروڑ کا عطیہ دیا، مخیر حضرات بھی بڑھ چڑھ کر حصہ لے رہے ہیں۔
وزیر اعظم شہباز شریف نے مزید کہا کہ معاشی مشکلات کے باوجود برادر ملکوں کے ساتھ تعاون جاری رکھیں گے، کل شام بھی ایک بحری جہاز امدادی سامان لیکر ترکیہ اور شام کیلئے روانہ ہوا ہے، امدادی سامان میں ترکیہ اور شام کیلئے سردی سے بچاؤ کے خیمے شامل ہیں۔

انٹر نیشنل

امریکا اور چین کا ایک دوسرے پر کورونا کو لیبارٹری میں تیار کرنے کا الزام

واشنگٹن / بیجنگ: (ویب ڈیسک) امریکی ادارے ایف بی آئی نے الزام عائد کیا ہے کہ کورونا وائرس چین کی ووہان لیبارٹری میں تیار ہوا جس کے جواب میں چین نے مہلک وائرس کی جائے پیدائش امریکا کی فوجی ریسرچ لیب کو قرار دیدیا۔
امریکی ادارے ’’ایف بی آئی‘‘ کے ڈائریکٹر کرسٹوفر رے نے فاکس نیوز کو انٹرویو میں انکشاف کیا کہ ہم نے یہ اندازہ لگایا ہے کہ کورونا وائرس چین کے شہر ووہان کی ایک لیبارٹری میں کسی تجربے کے دوران بنا اور وہی سے پوری دنیا میں پھیلا تھا۔
ڈائریکٹر ایف بی آئی کا یہ بیان اس وقت سامنے آیا ہے جب چند روز قبل ہی امریکی محکمہ توانائی کی ایک تفتیشی رپورٹ سامنے آئی تھی جس میں دعویٰ کیا گیا تھا کہ تحقیقات میں کورونا کے چینی لیب سے لیک ہونے کا امکان سامنے آیا ہے۔
محکمہ توانائی کی اس تحقیق میں دیگر قومی لیبارٹریوں بشمول جدید حیاتیاتی تحقیق کے نیٹ ورک نے بھی کام کیا تھا جس سے اس رپورٹ کے درست ہونے کا قوی امکان ہے۔
تاہم اب بھی مختلف امریکی انٹیلی جنس ایجنسیوں کا خیال ہے کہ یہ وائرس قدرتی طور پر دنیا میں ابھرا۔
خیال رہے کہ ووہان چین کا وہ شہر ہے جہاں دنیا میں سب سے پہلے کورونا کی موجودگی کی تصدیق ہوئی جس کی وجہ سے مغربی ممالک کورونا کے بننے اور اس کے پھیلاؤ کا ذمہ دار چین کو ٹھہراتے ہیں۔
عالمی اداروں نے اس بات کی تحقیق بھی کی تھی کہ کورونا ووہان کی لیب میں بنا تھا تاہم اس کے ٹھوس شواہد نہیں ملے تھے تاہم اس کے باجود گاہے بہ گاہے یہ معاملہ زیربحث رہتا ہے۔
امریکی ایف آئی اے کے ڈائریکٹر کے کورونا کے ووہان لیبارٹری میں پیدائش کے بیان نے یہ معاملہ پھر اُٹھادیا ہے جس پر چین نے امریکی دعوے کی سختی سے تردید کرتے ہوئے کہا ہے کہ یہ ہمارے خلاف امریکا کی ایک گندی مہم ہے۔
چینی حکام نے اپنے شدید ردعمل میں مزید کہا کہ ان بے بنیاد دعووں سے چین کی نہیں بلکہ خود امریکا کی ساکھ کو نقصان پہنچا ہے۔ چین کو بدنام کی سازشیں کبھی کامیاب نہیں ہوں گی۔
چینی وزارت خارجہ کے ترجمان نے کہا کہ کورونا میری لینڈ میں امریکی فوجی ریسرچ لیب میں بنا اور دنیا بھر میں پھیلا جس پر امریکا کو عالمی ادارہ صحت کے ساتھ تعاون کرتے ہوئے بین الااقوامی ماہرین کو ریسرچ کا دورہ کرنے کی اجازت دینی چاہیے۔
ترجمان کا مزید کہنا تھا کہ امریکا سائنس پر مکمل بھروسہ رکھے اور بین الااقوامی ماہرین کی اپنے لیب میں ہونے والی تحقیق سے پوری کو دنیا کو آگاہ بھی کرنا چاہیے۔

اہم خبریں, پاکستان

الیکشن کمیشن کا صوبائی انتخابات کیلئے صدر اور گورنر خیبرپختونخوا سے مشاورت کا فیصلہ

اسلام آباد: (ویب ڈیسک) پنجاب اور خیبرپختونخوا میں عام انتخابات کے معاملے پر الیکشن کمیشن نے صدر مملکت اور گورنر خیبرپختونخوا کو مشاورت کیلئے خط لکھنے کا فیصلہ کر لیا۔
صدر مملکت اور گورنر خیبرپختونخوا کو خط لکھنے کا حتمی فیصلہ کل ہونے والے اجلاس میں ہو گا، الیکشن کمیشن سپریم کورٹ کے فیصلے پر عمل درآمد کیلئے تیار ہے، انتخابی شیڈول 54 دن پر محیط ہوگا، اداروں کے عدم تعاون پر آرٹیکل 220 کا سہارا لیا جائے گا۔
ذرائع کے مطابق الیکشن کمیشن نے انتخابات کیلئے متعلقہ ونگز کو تیاریاں تیز کرنے کی ہدایت کر دی، اس کے علاوہ سیاسی جماعتوں سے انتخابی نشان الاٹ کرنے کیلئے الیکشن ایکٹ 2017 کے سیکشن 216 کے تحت 8 مارچ تک درخواستیں طلب کر لی گئی ہیں۔
الیکشن کمیشن کے مطابق درخواستیں 8 مارچ تک سیکرٹری الیکشن کمیشن کو بھیجی جا سکتی ہیں، تاخیر سے بھیجی گئی درخواستوں پر غور نہیں کیا جائے گا، درخواستوں کے ساتھ بیان حلفی بھی جمع کرانا ہوگا۔

اہم خبریں, پاکستان

امریکی منتخب نمائندگان کے وفد کی زمان پارک میں عمران خان سے ملاقات

لاہور: (ویب ڈیسک) چیئرمین تحریک انصاف عمران خان سے امریکی منتخب نمائندگان کے وفد نے زمان پارک میں ملاقات کی۔
وفد کی قیادت پاکستانی نژاد امریکی ڈیموکریٹ رہنما ڈاکٹر آصف محمود کر رہے تھے، 12 رکنی وفد میں کیلیفورنیا قانون ساز اسمبلی کی Appropriations کمیٹی کے سربراہ کرس آر ہولڈن، فاروق ارشد، ارشاد چیمہ، خالد نذیر بھی شامل تھے۔
ملاقات میں پاک امریکہ تعلقات پر بات چیت ہوئی، کیلی فورنیا اسمبلی کے 4 ممبران مسز ڈی لوائس گومز، مائیک اے گپسن، مسز وینڈی کیریلو بھی وفد کا حصہ تھے، میلینی کلڈویل ہولڈن، کرسٹوفر ریئس ،مسز اینا گوڈارڈوِلی آرمسٹرانگ، مائیکل میکس، ایڈریل یانگ بھی وفد میں شامل تھے۔
واضح رہے کہ وفد کے ارکان اس سے پہلے نگران وزیراعلیٰ محسن نقوی، گورنر پنجاب بلیغ الرحمان اور سابق وزیراعلیٰ چودھری پرویزالٰہی سے ملاقات کر چکے ہیں۔

بزنس

ملک میں سونے کی فی تولہ قیمت میں سیکڑوں روپے کا اضافہ

کراچی: (ویب ڈیسک) ملک میں سونے کی فی تولہ قیمت میں آج سیکڑوں روپے کا اضافہ ہوا ہے۔
آل پاکستان جیمز اینڈ جیولرز ایسوسی ایشن کے مطابق فی تولہ سونا 2700 روپے مہنگا ہوگیا ہے۔
ایک تولہ سونا ایک لاکھ 97 ہزار 100 روپے کا ہوگیا ہے جبکہ 10 گرام سونے کا بھاؤ 2315 روپے بڑھ کر ایک لاکھ 68 ہزار 981 روپے ہوگیا ہے۔
عالمی بازار میں سونے کا بھاؤ 27 ڈالر اضافے سے 1837 ڈالر فی اونس ہے۔

کھیل

ثانیہ مرزا نے انسپریشنل آئیکون ایوارڈ جیت لیا

ممبئی: (ویب ڈیسک) بین الاقوامی شہرت یافتہ بھارتی ٹینس سٹار ثانیہ مرزا نے ” اسپورٹس اسٹار ایسز انسپریشنل آئیکون ایوارڈ ” جیت لیا ۔
ثانیہ مرزا نے ٹینس میں اپنی شاندار صلاحیتوں اور ناقابل یقین فتوحات کے ذریعے بین الاقوامی سطح پر ہزاروں لوگوں کو متاثر کیا ہے حال ہی میں ثانیہ مرزا نے فوٹو اینڈ ویڈیو شیئرنگ ایپ انسٹاگرام پر اپنی چند نئی تصاویر اور ایک ویڈیو مداحوں سے شیئر کی ہے ۔
تصاویر میں ثانیہ مرزا سابق بھارتی کرکٹر سنیل گواسکر سے “اسپورٹس اسٹار ایسز انسپائریشنل آئیکون ایوارڈ ” وصول کرتے ہوئے نظر آرہی ہیں ، ممبئی میں منعقدہ ایوارڈز کی اس تقریب میں ٹینس سٹار کے 20 سالہ کیریئر سے کچھ یاد گار جھلکیاں دکھا کر اُنہیں خراجِ تحسین بھی پیش کیا گیا۔
ثانیہ مرزا نے پوسٹ کے عنوان میں ایوارڈز کی تقریب کے منتظمین اور تمام شرکاء کا شکریہ ادا کرتے ہوئے کہا کہ اس 20 سال کے طویل سفر کے دوران ہر کوئی اچھے اور برے وقت میں میرے ساتھ رہا ہے لیکن یہ بھی حقیقت ہے کہ اچھی چیزیں بھی ہمیشہ کے لیے زندگی میں نہیں رہتی ہیں۔
اُن کا کہنا تھا کہ میں مشکور ہوں کہ میں اپنے ملک، اپنی فیملی اور اپنے لیے کھیلنے کے قابل بنی ، زندگی کے اس نئے دور کے آغاز پر اس ایوارڈ سے بہتر کوئی تحفہ نہیں ہوسکتا تھا اور اسے سنیل گواسکر سے وصول کرنا اور بھی اعزاز کی بات ہے۔

اہم خبریں, پاکستان

وزیراعظم نے مردم شماری سے متعلق ایم کیو ایم کے تمام مطالبات منظور کرلیے

اسلام آباد: (ویب ڈیسک) وزیراعظم شہباز شریف اور متحدہ قومی موومنٹ (ایم کیو ایم) پاکستان کے درمیان کی ملاقات کی اندرونی کہانی سامنے آگئی۔
اسلام آباد میں وزیر اعظم شہباز شریف سے کنوینر ایم کیوایم ڈاکٹر خالد مقبول صدیقی کی قیادت میں وفد نے ملاقات کی۔
ذرائع کے مطابق متحدہ کے وفد میں سینیئر ڈپٹی کنوینر مصطفیٰ کمال، رؤف صدیقی اور صادق افتخار بھی شامل تھے۔
ذرائع نے بتایا کہ ملاقات میں ایم کیو ایم پاکستان کے رہنماؤں نے پیپلزپارٹی سے کیے گئے معاہدے پر اب تک عملدرآمد نہ ہونے کا شکوہ کیا جبکہ حلقہ بندیوں کے حوالے سے یقین دہانی کرانے کے باوجود سندھ حکومت کی جانب سے کوئی پیش رفت نہ ہونے پر بھی تشویش کا اظہار کیا گیا۔
ملاقات میں متحدہ رہنماؤں کی جانب سے ڈیجیٹل مردم شماری کے حوالے سے آن لائن رجسٹریشن کے دنوں میں اضافے کے مطالبے کو تسلیم کیا گیا، ملاقات میں ایم کیو ایم پاکستان نے خانہ شماری جو تین روز تک ہونی ہے اس میں بھی 10 دن کے اضافے کا مطالبہ کیا تھا۔
ملاقات میں کثیرالمنزلہ عمارتوں کے صدر دروازے کے بجائے ہر فلیٹ پر م اور ش لکھنے کا مطالبہ کیا جو کہ منظور کرلیا گیا۔

اہم خبریں, پاکستان

الیکشن کمیشن نے نگران حکومت خیبرپختونخوا کو ٹرانسفر پوسٹنگ کی اجازت دے دی

اسلام آباد: (ویب ڈیسک) الیکشن کمیشن آف پاکستان نے خیبرپختونخوا کی نگراں حکومت کو ٹرانسفر پوسٹنگ کی اجازات دے دی۔
الیکشن کمیشن نے کہا ہے کہ خبیرپختوانخوا کی نگران حکومت گریڈ 16 تک پوسٹنگ اینڈ ٹرانسفر کر سکتی ہے، نگراں حکومت نے پوسٹنگ ٹرانسفر سے متعلق اجازات مانگی تھی، الیکشن کمیشن نے اپنے فیصلے سے صوبائی نگران حکومت کو آگاہ کر دیا ہے۔
واضح رہے سپریم کورٹ نے الیکشن کمیشن کو اسمبلیاں تحلیل ہونے کے 90 روز کے اندر انتخابات کروانے کا حکم دیا ہے جس کے بعد خیبرپختونخوا کو ٹرانسفر پوسٹنگ کرنے کا فیصلہ کیا گیا ہے۔

سائنس و ٹیکنالوجی

انار کولیسٹرول گھٹانے اور دل کو تقویت دینے میں انتہائی مفید قرار

لاہور: (ویب ڈیسک) ماہرین کا خیال ہے انار جیسی نعمت کو ناشتے کا لازمی جزو ہونا چاہیئے کیونکہ اس میں بے شمارمفید کیمیائی اجزا، الیکٹرولائٹس، فلے وینولز اور معدنیات موجود ہیں۔ جو بڑھاپے کو روکنے سے لے کر دل کو تقویت پہنچاتے ہیں۔
اینٹی آکسیڈنٹس کی بنا پر اسے ’سپرفوڈ‘ کا نام دیا گیا ہے۔ اس میں سبزچائے کے مقابلے میں تین گنا اینٹی آکسیڈنٹس پائے جاتے ہیں۔ اس میں موجود ایک کیمیکل پیونی کیلگن جسم میں فری ریڈیکلز روکتے ہیں۔ دلچسپ بات یہ ہے کہ یہی اجزا دل کی دھڑکن کو باقاعدہ رکھنے میں مدد دیتے ہیں۔ اینٹی آکسیڈنٹس جلد پر جھریوں کے عمل کو روکتے ہیں اور بڑھاپے کو بریک لگاتے ہیں۔
انار کا دوسرا فائدہ یہ ہےکہ یہ ہیموگلوبن بڑھاتا ہے جو خون میں رہتے ہوئے ہرعضوتک آکسیجن پہنچاتےہیں۔ اس کا مطب یہ ہے کہ ہر عضو تک آکسیجن پہنچنے سے تمام اعضا کو فائدہ ہوگا اور اس کے افعال بہتر ہوں گے۔ جامعہ واشنگٹن نے حال ہی میں انار میں ’یورولائتھن‘ دریافت کیا ہے جو بڑھاپے کو روکنے اور جلد کو لچکدار بنانے میں اپنا ثانی نہیں رکھتا۔ پھر اس کی مزید تصدیق 2021 میں تھائی لینڈ کے سائنسدانوں نے بھی کی ہے۔
سپرفوڈ انار میں دل کےپٹھے مضبوط بنانے والے اجزا بکثرت موجود ہیں جن مین الیکٹرولائٹس بھی شامل ہیں۔ اس کے علاوہ یہ ایل ڈی ایل کولیسٹرول گھٹاتا ہے اور دل کی شریانوں کی تنگی روکتا ہے۔ بدن کی چربی گھٹانے میں اس کا کوئی ثانی نہیں کہ یہ توند کم کرسکتا ہے۔ پھر اس میں موجود پوٹاشیئم اور میگنیشیئم نہ صرف بلڈ پریشر قابو میں رکھتے ہیں بلکہ خون کی روانی بہتر بناتے ہیں۔
2017 میں سینکڑوں افراد کو انار کا رس باقاعدگی سے پلایا گیا تو ان کے بلڈ پریشر میں بھی نمایاں کمی دیکھی گئی۔ دوسری جانب یہ وزن کم کرنے میں بھی بہت معاون ثابت ہوا ہے۔ انار میں موجود کئی اہم اجزا ٹائپ ٹو ذیابیطس کو قابو کرنے میں نہایت معاون ثابت ہوچکے ہیں۔
انار کے لاتعداد خواص میں سے ایک حل پذیر اجزا کی طویل فہرست ہے جو فوری طور پر بدن کا جزو بن کر جسم کے قدرتی دفاعی نظام کو مضبوط بناکر ہمیں امنیاتی طور پر طاقتور بناتے ہیں۔ ان میں فولیٹ، فولاد، کئی طرح کے وٹامن اور معدنی اجزا بھی شامل ہیں۔ پھر وٹامن سی کی بھرپور مقدار ہمیں کئی امراض سے بچاتی ہے۔

دلچسپ و عجیب

دنیا کا سب سے بڑا لیپ ٹاپ، 43 انچ اسکرین اور وزن 100 پونڈ

نارتھ کیرولینا: (ویب ڈیسک) اگرچہ یہ باضابطہ طور پر کسی کمپنی نہیں بنایا لیکن اسے دنیا کا سب بڑا اور سب سے وزنی ایسا لیپ ٹاپ قرار دیا جاسکتا ہے جو کسی بھی عام لیپ ٹاپ کی طرح کام کرتا ہے۔
اسے یوٹیوبر جوڑے ایوان اور کیٹلِن نے تیار کیا ہے جو ٹیکنالوجی کی دلچسپ اشیا بناتے رہتے ہیں۔ یہ لیپ ٹاپ لگ بھگ 100 پونڈ (45 کلوگرام) ہے اور اسکرین لگ بھگ 43 انچ وسیع ہے۔ تاہم اسے مضبوط بنانے کے لیے بھاری دھاتی پلیٹیں استعمال کی گئی ہیں جو اس کے وزن کو ہولناک بنادیتی ہے۔ تاہم کئی ماہ کی محنت کے بعد اِیوان اور کیٹلِن نے یہ ثابت کردکھایا ہے کہ ایسا لیپ ٹاپ بنایا جاسکتا ہے۔
اس کا زیریں تختہ پلائی کی لکڑی سے تراشا گیا ہے اور اس میں دھاتی لیور لگا کر لیپ ٹاپ کا اسکرین گھمانےکی سہولت دی گئی ہے۔ تاہم اطراف کی مضبوطی کے لیے فولادی پٹیاں لگائی گئی ہیں۔ کی بورڈ بھی جناتی بنایا گیا ہے جسے ری ڈریگن کے 605 مشینی کی بورڈ کا نام دیا گیا ہے۔ ماؤس پیڈ کی جگہ ٹیبلٹ کی جسامت کا ایک ایک ٹچ پیڈ نصب کیا گیا ہے جو اس کی جدت میں اضافہ کرتا ہے۔
اگرچہ یہ عام کمپیوٹر کی طرح چلتا ہے لیکن اسے گیمزر نے سراہا ہے جو بڑی اسکرین پر گیم کا لطف اٹھانا چاہتے ہیں۔ اگرچہ اس میں عام لیپ ٹاپ کا سرکٹ ہی ہے لیکن اسکرین کے لیے غیرمعمولی بجلی درکار تھی۔ اس کے لیے 150 واٹ بیٹری کا ایک جوڑا لگایا گیا ہے جبکہ ایک تیسری بیٹری سے ایل ای ڈی لائٹ روشن کی گئی ہیں۔
اس کا نام گنیز بک آف ورلڈ ریکارڈ کے لیے بھجوادیا گیا ہے تاہم اب ان کے جواب کا انتظار ہے۔