اسلام آباد: (ویب ڈیسک) ملک بھر میں گزشتہ 24 گھنٹے کے دوران کورونا کے باعث 9 افراد انتقال کر گئے۔
قومی ادارہ برائے صحت (این آئی ایچ) کے مطابق ملک بھر میں گزشتہ 24 گھنٹے کے دوران کورونا کے مزید 806 کیسز رپورٹ ہوئے اور کورونا وائرس سے مزید9افراد انتقال کر گئے۔
این آئی ایچ کے مطابق گزشتہ 24 گھنٹے میں 20 ہزار 949 کورونا ٹیسٹ کیے گئے۔ کورونا کےمثبت کیسز کی شرح 3.85 فیصد رہی۔
عالمی وبا کورونا سے متاثرہ 160 مریضوں کی حالت تشویش ناک رہی۔

اسلام آباد: (ویب ڈیسک) پاکستان ڈیمو کریٹک موومنٹ (پی ڈی ایم) نے پاکستان تحریک انصاف (پی ٹی آئی) کے خلاف سیاسی اور قانونی محاذ پر سخت فیصلے لینے پر اتفاق کرلیا ہے۔
وزیر اعظم ہاؤس میں پی ڈی ایم کا سربراہی اجلاس ہوا، اجلاس میں وفاقی وزیر قانون اعظم نذیر تارڑ نے پی ٹی آئی ممنوعہ فنڈنگ کیس کے فیصلے پر بریفنگ دی۔
اجلاس میں سیاسی اور قانونی کمیٹیاں تشکیل دیدی گئیں، قانونی کمیٹی نے فوری طور پر کام شروع کر دیا، قانونی کمیٹی الیکشن کمیشن کے فیصلے کی روشنی میں پی ٹی آئی کیخلاف قانونی کارروائی تجویز کرے گی، کمیٹی میں تمام جماعتوں کے قانونی ماہرین شامل ہونگے۔
پی ڈی ایم کے اجلاس میں فیصلہ کیا گیا کہ سیاسی کمیٹی سیاسی محاذ پر اقدامات تجویز کرے گی، الیکشن کمیشن کے فیصلے پر قانونی کمیٹی کی رائے کی روشنی میں کابینہ سے کارروائی کی منظوری لی جائیگی۔
پاکستان ڈیمو کریٹک موومنٹ کا سربراہی اجلاس بدھ کو بھی ہوگا۔

اسلام آباد: (ویب ڈیسک) پاکستان تحریک انصاف (پی ٹی آئی) کے 4 ارکان کی قومی اسمبلی سے طویل غیر حاضری پر پاکستان پیپلز پارٹی (پی پی پی) کی شاہدہ رحمانی نے رکنیت ختم کرنے کیلئے قرارداد پیش کردی، سپیکر نے معاملے کو مؤخر کردیا۔
پیپلز پارٹی کی رکن قومی اسمبلی شاہدہ رحمانی نے پی ٹی آئی کے 4 غیر حاضر ارکان کا معاملہ ایوان میں قرارداد کی صورت میں اٹھا دیا، قرار داد میں کہا گیا کہ بغیر اطلاع 40 روز سے زائد غیر حاضر رہنے پر ان اراکین کی رکنیت ختم کی جائے۔
اس موقع پر سپیکر راجہ پرویز اشرف کا کہنا تھا کہ صالح محمد خان، غلام محمد لالی ، میاں محمد سومرو اور غلام بی بی بھروانہ 40 دن سے غیر حاضر ہیں، ان ارکان نے ایوان سے استعفیٰ دیا اور نہ ہی چھٹی کی درخواست دی ہے، اس قرارداد پر قانون اور آئین کے مطابق کارروائی ہوگی، فی الحال اس معاملے کو مؤخرکیا جاتا ہے۔
واضح رہے کہ گزشتہ دنوں سپیکر قومی اسمبلی راجہ پرویز اشرف نے پاکستان تحریک انصاف کے 11 ارکان کے استعفے قبول کرلیے تھے، قومی اسمبلی سیکرٹریٹ کی جانب سے استعفوں کی منظوری کا نوٹیفکیشن بھی جاری کردیا گیا۔

لاہور: (ویب ڈیسک) علامہ اقبال ایئرپورٹ سے دبئی جانے والے مسافر طیارے میں خوفناک آگ بھڑک اٹھی تاہم کوئی جانی نقصان نہیں ہوا۔
طیارے میں آتشزدگی کا واقعہ پنجاب کے دارالحکومت لاہور کے علامہ اقبال ایئرپورٹ سے اڑان بھرنے والے نجی ائیرلائن کے طیارے کیساتھ پیش آیا۔
جہاز کے انجن میں آگ بھڑکنے پر پائلٹ نے کمال مہارت سے طیارے 410 کی لاہور ایئرپورٹ پر ہنگامہ لینڈنگ کرائی، جس کے بعد مسافر طیارے سے بحفاظت نکلنے میں کامیاب رہے۔
ذرائع کا کہنا ہے کہ نجی ایئرلائن نے دوسرے طیارے کے ذریعے مسافروں کو اماراتی ریاست دبئی روانہ کردیا۔

اسلام آباد: (ویب ڈیسک) دفتر خارجہ کے ترجمان عاصم افتخار نے کہا ہے کہ پاکستان ہر قسم کی دہشت گردی کی مذمت کرتا ہے، دہشت گردی کے خلاف جنگ میں پاکستان کا کردار اور قربانیاں سب جانتے ہیں۔
دفتر خارجہ کے ترجمان نے اپنے بیان میں میڈیا کے سوالات کے جواب میں کہا کہ ہم نے امریکا کے سرکاری بیانات اور افغانستان میں امریکا کی طرف سے انسداد دہشت گردی کے آپریشن کے حوالے سے میڈیا رپورٹس دیکھی ہیں۔
ترجمان نے کہا کہ پاکستان ہر قسم کی دہشت گردی کی مذمت کرتا ہے اور دہشت گردی کے خلاف جنگ میں پاکستان کا کردار اور قربانیوں سے ہر کوئی آگاہ ہے، پاکستان بین الاقوامی قانون اور اقوام متحدہ کی متعلقہ قراردادوں کے مطابق دہشت گردی کا مقابلہ کرنے کے لئے کھڑا ہے۔

لندن: (ویب ڈیسک) پاکستان مسلم لیگ (ن) کے قائد اور سابق وزیراعظم نواز شریف نے پی ٹی آئی ممنوعہ فنڈنگ کیس فیصلے پر ردعمل دیتے ہوئے کہا کہ ملکی تاریخ کی سب سے بڑی چوری پکڑی گئی، عمران خان غیر ملکی ایجنڈے پر کام کر رہا تھا، یہ جانتا تھا اس نے پاکستان کی تاریخ کی سب سے بڑی چوری کی۔
اپنے بیان میں نواز شریف نے کہا کہ فارن فنڈنگ کے کیس کا فیصلہ 8 سالوں بعد آیا، ہمارے زمانے میں واٹس ایپ پر جے آئی ٹی بن گئی تھی، عمران خان غیر ملکی ایجنڈا نافذ کر رہا ہے، یہ شخص خارجی ایجنڈے کے تحت آیا ہے، یہ کہتا تھا ایماندار ہوں چوری نہیں کرتا، عمران خان جانتا تھا اس نے پاکستان کی تاریخ کی سب سے بڑی چوری کی، سابق وزیراعظم پاکستان کیلئے بہت خطرناک ہے، یہ فتنہ ہے اس کا شر پاکستان کی تباہی ہے۔
انہوں نے مزید کہا کہ غیر ملکیوں سے پیسے لیں گے تو انکا ایجنڈا ہی نافذ کرینگے، پاکستان میں دن بہ دن ترقی ہو رہی تھی،عمران خان نے سب تباہ کر دیا، مجھے بیٹے سے تنخواہ نہ لینے پر نا اہل کیا گیا، میری مرضی ہے میرا بیٹا ہے تنخواہ لوں یا نہ لوں، ثاقب نثار جیسے کے ساتھ ملکر عمران خان نے ملک پر ظلم ڈھائے، ثاقب نثار نے کہا ہم نے مریم نواز اور نواز شریف کو سزا دینی ہے،عمران خان کو لانا ہے، ثاقب نثار نے نیب کورٹ کو مقدمے نمٹانے کا حکم دیا، ججز نے عمران خان کو کہا کیس ہمارے پاس لے کر آؤ۔
سابق وزیراعظم کا کہنا تھا کہ اس فتنے اور شرانگیزی کو فوری طور پر ختم کیا جائے، اس نے پاکستانی معاشرے کو تباہ کر کے رکھ دیا ہے، میرے ساتھ ظلم و زیادتی کرتے ہوئے پاکستان کو ڈبو دیا، پاکستان کو وینٹیلیٹر پر لے آئے۔

اسلام آباد: (ویب ڈیسک) معروف مبلغ مولانا طارق جمیل نے کہا ہے کہ سیاستدانوں کو میرا پیغام ہے کہ وہ ملک کو کبڈی کا میدان نہ بنائیں اور پاکستان کی بھلائی کا سوچیں۔
مولانا طارق جمیل نے بنی گالہ میں پی ٹی آئی کے چیئرمین اور سابق وزیر اعظم عمران خان سے ملاقات کی، اس موقع پر دونوں نے مختلف امور پر تبادلۂ خیال کیا۔
ملاقات کے بعد میڈیا سے گفتگو کرتے ہوئے مولانا طارق جمیل نے کہا کہ عمران خان کی دعوت پر بنی گالہ اُن سے ملنے ایا ہوں، میری گزارش ہے کہ ملک کے ساتھ کھلواڑ نہ کریں اور پاکستان کی بھلائی کا سوچیں۔
انہوں نے کہا کہ سیاستدانوں کو پیغام ہے کہ ملک کو کبڈی کا میدان نہ بنائیں اور غریبوں کے بارے میں سوچیں۔ مولانا طارق جمیل کا کہنا تھا کہ حکومت معلوم نہیں کیا کر رہی ہے، قوم کو پیغام ہے کہ استغفار کریں، اللہ کہتا ہے کہ اپنے رب کی بارگاہ میں توبہ کرو۔