اسلام آباد: (ویب ڈیسک) پاکستان ڈیمو کریٹک موومنٹ (پی ڈی ایم) اور جمعیت علمائے اسلام (ف) کے سربراہ مولانا فضل الرحمان نے کہا ہے کہ آج کے الیکشن کمیشن کے فیصلے نے میرے 2010 سے اپنائے گئے موقف پر مہرِ تصدیق ثبت کردی، عمران خان یہود سمیت عالمی قوتوں کا ایجنٹ ہے۔
جے یو آئی کے سربراہ مولانا فضل الرحمان نے کہا ہے کہ آج ثابت ہوگیا کہ عمران خان یہود سمیت عالمی قوتوں کا ایجنٹ ہے۔
ممنوعہ فنڈنگ کیس فیصلے پر جے یو آئی (ف) کے سربراہ نے رد عمل دیتے ہوئے کہا ہے کہ عمران خان اور اسکی پارٹی غیر ملکی طاقتوں کے ایجنڈے پر ہے، پی ٹی آئی غیر ملکی فنڈز پر پاکستان کے مفادات کے خلاف کام کر رہی ہے۔
مولانا فضل الرحمان نے کہا کہ الیکشن کمیشن نے آج عمران خان کو عالمی چور، منی لانڈر، جھوٹا، بد دیانت اور پاکستان کے مفادات کے خلاف کام کرنے والا ثابت کردیا ہے، حکومت کو فوری طور پر اسکی تاحیات نااہلی اور اسکی پارٹی کو بین کرنے کی کارروائی شروع کرنی چاہیے۔
بلوچستان میں آرمی ہیلی کاپٹر واقعے پر فوجی جوانوں کی شہادت پر جے یو آئی سربراہ مولانا فضل الرحمان نے افسوس کا اظہار کرتے ہوئے کہا کہ فوجی جوانوں کی شہادت پر دل رنجیدہ ہوا، لیفٹیننٹ جنرل سرفراز علی، بریگیڈیئر امجد حنیف سمیت جہاز میں سوار تمام 6 افسران و سپاہیوں کی شہادت قومی سانحہ ہے ۔
انہوں نے مزید کہا کہ پوری قوم پاک فوج کے شھداء کے لواحقین کے ساتھ غم میں شریک ہے، پاک فوج کے افسران نے قوم کی خدمت کے لئے اپنی جانوں کا نذرانہ پیش کیا، خراج تحسین پیش کرتے ہیں، حالیہ سیلابی صورتحال می ملک بھر میں پاک فوج کے جوانوں کی امدادی کارروائیوں میں خدمات قابل تحسین ہیں، اللہ تعالیٰ شہداء کے درجات کو بلند فرمائے اور لواحقین کو صبر جمیل عطا فرمائے۔

اسلام آباد: (ویب ڈیسک) وزیراعظم شہباز شریف کی سربراہی میں حکومتی اتحادی جماعتوں کا اجلاس ہوا، وزیرخارجہ بلاول بھٹو، مریم نواز، مولانا فضل الرحمان سمیت دیگر رہنماؤں نے شرکت کی اور الیکشن کمیشن کے فیصلے پر تبادلہ خیال کیا گیا۔
وزیراعظم ہاؤس میں حکومت کی اتحادی اور پی ڈی ایم جماعتوں کا سربراہی اجلاس ہوا، شہباز شریف، پی ڈی ایم کے سربراہ مولانا فضل الرحمان، پی پی پی کے چیئرمین بلاول بھٹو زرداری ، مریم نواز، ایم کیو ایم، پاکستان مسلم لیگ (ق)، اے این پی، بی این پی، باپ سمیت دیگر اتحادی جماعتوں کے قائدین بھی شریک ہوئے۔
اجلاس میں لیفٹیننٹ جنرل سرفراز علی سمیت آرمی ایوی ایشن کے ہیلی کاپٹر کے حادثے میں 6 افسران کی شہادت پر گہرے رنج و غم اور افسوس کا اظہار کیا گیا، شہدا کے درجات کی بلندی کے لئے فاتحہ خوانی اور اہل خانہ کے لئے صبر جمیل کی دعا کی گئی۔
اجلاس میں کہا گیا کہ سیلاب زدگان کی مدد کرتے ہوئے قوم کے بیٹوں نے شہادت کا عظیم رتبہ پایا ہے جس پر پوری قوم انہیں خراج عقیدت پیش کرتی ہے۔

اسلام آباد: (ویب ڈیسک) پاکستان کی 75 ویں یوم آزادی کی تقریبات کیلئے قومی اسمبلی کا ایوان دینےکی قرارداد متفقہ طور پر منظور کرلی گئی۔
قرارداد وفاقی وزیر برائے انسانی حقوق ریاض پیرزادہ نے پیش کی۔ پاکستان کی 75ویں سالگرہ شایان شان انداز میں منانے کیلئے پارلیمانی شیڈول تیار کرلیا گیا۔
11سے 14 اگست تک پارلیمان میں مختلف تقاریب ہوں گی، پہلی بار اقلیتوں اور بچوں کے نمائندوں کو قومی اسمبلی کے ایوان میں حصہ دار بننے کا موقع ملے گا۔
پاکستان کی پرانی اسمبلیوں کے موجود معمر ممبران کو بھی مدعو کیا جائے گا، تمام ارکان اپنے تجربات، جذبات، کامیابیاں اور ناکامیاں کیا اور کیوں رہیں پر بات کریں گے۔
ایک روز اقلیتوں کا کنونشن ہوگا، بچوں کی پارلیمنٹ بھی منعقد ہوگی۔ اسپیکر، قائد ایوان اور قائد حزب اختلاف بچے ہی ہوں گے۔ بچوں کی پارلیمان میں ایک روز کیلئے موجودہ ارکان قومی اسمبلی اور حکومت جواب دہ ہوں گے۔
بچے موجودہ حکومت اور ایوان کے قائدین سے سوالات بھی پوچھیں گے۔ 13 اور 14 اگست کی درمیانی شب رات 12 بجے قومی اسمبلی کا خصوصی اجلاس بھی ہوگا۔

لاہور: (ویب ڈیسک) پاکستان تحریک انصاف چیئرمین اور سابق وزیراعظم عمران خان نے پنجاب کی 18 رکنی کابینہ کی منظوری دیدی، سابق وزیراعلیٰ عثمان بزدار کو صوبائی اسمبلی میں پی ٹی آئی کا پارلیمانی لیڈر نامزد کر دیا گیا ہے۔
ذرائع کے مطابق پنجاب کی 18 رکنی کابینہ میں صرف تحریک انصاف کے ارکان اسمبلی کو شامل کیا گیا، پہلے مرحلے میں مسلم لیگ قائد اعظم کا کابینہ میں ایک رکن بھی شامل نہیں، عمران خان کی جانب سے سے گزشتہ رات کابینہ کی لسٹ پنجاب قیادت کو موصول ہوئی۔
اس حوالے سے ذرائع نے مزید بتایا کہ عثمان بزدار کابینہ میں مسلم لیگ ق کے پاس دو وزارتیں تھیں ، نئی کابینہ میں کوئی نہیں، مسلم لیگ ق کے 10 ارکان اسمبلی میں تشویش کی لہر دوڑ گئی، چودھری شجاعت کیمپ نے ق لیگ کے ارکان اسمبلی سے دوبارہ رابطہ کرلیا، عمران خان کا ساتھ دیکر دیکھ لیا، شجاعت کیمپ کا ق لیگ کے ارکان کو پیغام۔
ذرائع کے شجاعت کیمپ کی ارکان سے پیغام رسانی کی گئی کہ پہلے بھی کہتے تھے کہ عمران خان قابل اعتماد نہیں ، اب بھی وقت ہے کہ عمران خان کا ساتھ چھوڑ کر واپس آجائیں، دس ارکان اسمبلی واپسی کا اشارہ دیں تو دوبارہ معاملات کو ٹھیک کیا جاسکتا ہے، آصف زرداری اور مسلم لیگ ن کے ساتھ دوبارہ بیٹھا جاسکتا ہے۔
میاں محمود الرشید بلدیات ،یاسمین صحت، میاں اسلم اقبال کو ہاؤسنگ، مراد راس تعلیم ، راجہ بشارت پارلیمانی امور، ہاشم جواں خزانہ، خرم ورک کو قانون، راجہ یاسر ہمایوں ہائیر ایجوکیشن، ہاشم ڈوگر محکمہ داخلہ، علی افضل ساہی، لطیف نذر گجر، محسن لغاری، فیاض الحسن چوہان کو بھی وزیر بنانے کا امکان ہے۔

اسلام آباد: (ویب ڈیسک) وفاقی وزیر دفاع خواجہ محمد آصف نے کہا ہے کہ عمران خان موجودہ ملکی حالات کے ذمہ دار ہیں۔ الیکشن کمیشن نے عمران خان کا اصلی چہرہ دکھا دیا۔
وزیر دفاع خواجہ محمد آصف نے قومی اسمبلی میں اظہار خیال کرتے ہوئے کہا کہ آج صبح الیکشن کمیشن نے 8 سال کے بعد ایک فیصلہ سنایا ہے، پاکستان کی سیاسی تاریخ میں اتنے زیادہ اختلافی مسئلے کے اوپر فیصلے کی مثال نہیں ملتی۔ نواز شریف کے اوپر ایک مقدمہ بنا جس میں بیٹے سے 10 ہزار تنخواہ نہ لینے پر نااہل کر دیا گیا تھا۔
انہوں نے کہا کہ آج ایک شخص کے خلاف فیصلہ آیا ہے جس کو سپریم کورٹ نے صادق و امین قرار دیا لیکن آج الیکش کمیشن کے فیصلے کے بعد وہ شخص فارن فنڈڈ ایجنٹ ہو چکا ہے۔
خواجہ آصف نے کہا کہ وہ شخص ہمارے ملک کے موجودہ حالات کا ذمہ دار ہے، عمران خان کا پروفائل بنانے کے لیے یہودی لابی نے اس کو لانچ کرنے کا پلان بنایا اور یہودی سمجھتے تھے کہ ایٹمی پروگرام والا ملک ایسے کنٹرول نہیں ہو گا، کرکٹ کے بعد باقاعدہ اس کی لانچنگ کی گئی اور اس سے بڑا خیراتی اسپتال بنوایا گیا۔
انہوں نے کہا کہ الزام ہم پر امریکہ کا لگاتا ہے لیکن مال یہ اسرائیل امریکہ سے پکڑتا ہے اور اس نے اپنی جیبیں خالی نہیں رکھیں بلکہ اس نے دوسروں کی جیبیں خالی کی ہیں، جس نے اپنے بچوں کو خرچ دینے کی بجائے برطانیہ پر چھوڑ دیا ہے۔ آج الیکشن کمیشن نے ہمیں اس کا اصلی چہرہ دکھا دیا۔
وزیر دفاع نے کہا کہ اگر عمران خان سچا ہے تو فنانشنل ٹائمز کے خلاف کیس کرے، میں نے ایک کیس اس پر کیا ہوا ہے 10 سال ہو گئے اور ہمارا ملک ساڑھے 3 سال اس نوسر باز کے ہاتھ چڑھا ہوا تھا، استعفے قبول کرنے کے لیے دیئے جاتے ہیں فریم میں لگانے کے لیے نہیں ہوتے۔
انہوں نے کہا کہ یہ آج بھی سرکاری گاڑیاں اور پارلیمنٹ لاجز استعمال کر رہے ہیں، میں نے ماضی میں کہا تھا کوئی شرم ہوتی ہے کوئی حیا ہوتی ہے تو وہ درست ثابت ہوا۔ انہوں نے ثابت کیا کہ یہ بے شرم ہیں، یہاں مقصود چپڑاسی کے نعرے لگاتے تھے خود مقصود چپڑاسیوں کی فوج نکلے۔

اسلام آباد: (ویب ڈیسک) ممنوعہ فنڈنگ کیس فیصلہ کے بعد چیئرمین پاکستان تحریک انصاف (پی ٹی آئی) عمران خان کی نا اہلی کے لیے الیکشن کمیشن میں درخواست دائر کردی گئی۔
امن ترقی پارٹی کے چیئرمین فائق شاہ کی جانب سے الیکشن کمیشن میں درخواست دائر کی گئی، درخواست میں استدعا کی گئی کہ جھوٹا بیان حلفی جمع کروانے پر عمران خان کو 62 ون ایف کے تحت نا اہل کیا جائے، عمران خان سے بطور ایم این اے اور وزیراعظم حاصل کی گئیں تمام مراعات اور سہولیات واپس لی جائیں۔
درخواست میں مزید استدعا کی گئی کہ فیصل واوڈا کے کیس میں بھی جھوٹ بیان حلفی جمع کروانے پر انکو نا اہل کیا گیا، نا اہلی کے ساتھ فیصل واوڈا کو تمام مراعات قومی خزانے میں جمع کروانے کا حکم دیا گیا تھا۔
فائق شاہ کی جانب سے جمع کرائی گئی درخواست میں عمران خان کو پارٹی چئیرمین شپ سے بھی ہٹانے کی استدعا کی گئی ہے۔

اسلام آباد: (ویب ڈیسک) پی ٹی آئی رہنما اسد عمر نے کہا کہ یہ ہماری فنڈنگ کا راستہ روک کر ہماری سیاست کو ختم کرنا چاہتے ہیں۔
سابق وفاقی وزیر اور پاکستان تحریک انصاف (پی ٹی آئی) کے رہنما اسد عمر نے پریس کانفرنس کرتے ہوئے کہا کہ پاکستان کے عوام کو سمجھنے کی ضرورت ہے کہ یہ ہو کیا رہا ہے۔ الیکشن خریدے جاتے ہیں اور بند کمروں میں بیٹھ کر ڈیلیں کی جاتی ہیں۔
انہوں نے کہا کہ اب پاکستان میں ایسا لیڈر آگیا ہے جو کہتا ہے کہ میں نے سیاست عوام کے زور پر کرنی ہے اور پچھلے 4 مہینوں میں دیکھا گیا کہ مینڈیٹ چھیننے کی کوشش کی گئی لیکن عمران خان کھڑے ہو گئے۔
اسد عمر نے کہا کہ پاکستان کے عوام باہر کی طاقتوں کے سامنے سرجھکانے اور غلامی کو تیار نہیں ہیں جبکہ عوام کی طاقت اور سیاست کے لیے پیسہ بھی چاہیے اور وہ کہتا ہے کہ میں پیسہ عوام اور کسی سے نہیں لوں گا۔
انہوں نے کہا کہ بیرون ملک کے پیسوں کی ترسیل سے ہی تو ملک کی معیشت کھڑی ہے، پیسے کے بغیر سیاست ہو نہیں سکتی کینکہ بینرز، جھنڈے لگانے کے لیے پیسے چاہیئے ہوتے ہیں۔
پی ٹی آئی رہنما نے کہا کہ عمران خان نے 3 شوکت خانم اسپتال بنائے اور نمل یونیورسٹی بنائی۔ عمران خان اور عوام نے مل کر اس نظام کو خطرے میں ڈال دیا ہے اور عوام کے پیسے پر پارٹیاں چل رہی ہیں۔ پاکستان میں بدقسمتی سے چند خاندانوں نے حکومت کی ہے۔
انہوں نے کہا کہ عمران خان نے پاکستان کی تاریخ میں سب سے زیادہ خیرات اکٹھی کی جبکہ پاکستان تحریک انصاف کو اندرون و بیرون ملک سے لوگ پیسے بھیجتے ہیں لیکن اب یہ چاہتے ہیں کہ ہماری فنڈنگ کا راستہ روک کر یہ ہماری سیاست کو ختم کریں۔