چمن: (ویب ڈیسک) چمن میں لیول کراس لیویز چیک پوسٹ کےقریب دھماکا ہوا جس کے نتیجے میں دو لیویز اہلکاروں سمیت 6 افراد زخمی ہوگئے۔
لیویز حکام کا کہناہے کہ لیویز چیک پوسٹ پر دستی بم سے حملہ کیاگیا۔ وزیراعلیٰ بلوچستان میر عبدالقدوس بزنجو نے لیویز چیک پوسٹ پر بم حملےکی مذمت کی ہے۔
لیویز حکام کے مطابق دھماکے سے لیویز پوسٹ کو نقصان پہنچاہے ، جائے وقوع سے شواہد اکھٹے کیےجارہےہیں۔ دھماکے کے نتیجے میں بچے سمیت 6افراد زخمی ہوئے۔
زخمیوں میں دو لیویز اہلکار بھی شامل ہیں، زخمیوں کو ڈسٹرکٹ ہیڈ کوارٹر اسپتال منتقل کردیا گیاہے۔
دھماکے کے بعد شہر میں ہائی الرٹ کردیا گیاہے۔ وزیر اعلیٰ بلوچستان کا کہنا ہے کہ صوبائی حکومت عوام کے جان و مال اور روزگار کے تحفظ کو یقینی بنائے گی۔

اسلام آباد: (ویب ڈیسک) دفتر خارجہ کے ترجمان عاصم افتخار احمد نے بھارتی وزیراعظم نریندر مودی کے دورہِ پاکستان کے بارے لاعلمی کا اظہار کرتے ہوئے کہا ہے کہ بلوچستان میں انسانی حقوق کی خلاف وزیوں کے حوالے سے بھارتی الزام بے بنیاد ہے۔
ہفتہ وار پریس بریفنگ کے دوران انہوں نے کہا کہ بلوچستان میں دہشتگردوں کو بھارتی معاونت کی خبریں آئی ہیں، بلوچستان میں دہشتگردی کے واقعات پر سول اور عسکری قیادت نے ردعمل دیا ہے۔ عاصم افتخار احمد نے کہا کہ بھارتی وزیراعظم کے دورہِ پاکستان سے متعلق کوئی علم نہیں ہے۔
علاوہ ازیں انہوں نے واضح کیا کہ بلوچستان میں انسانی حقوق کی خلاف ورزیوں کے حوالے سے بھارتی پروپیگنڈا بے بنیاد اور من گھڑت ہے، نئی دہلی نے کشمیر سے توجہ ہٹانے کیلیے بے بنیاد الزام عائد کیے ہیں۔
ترجمان دفتر خارجہ نے بتایا کہ افغانستان کراس بارڈر دہشتگردی کے خطرات موجود ہیں، ہم اس حوالے سے مسلسل افغان حکام کے ساتھ معاملہ اٹھا رہے ہیں جبکہ افغانستان کے لیے او آئی فنڈز کا قیام رواں ماہ کے آخر تک ہو جائے گا۔
عاصم افتخار احمد نے بتایا کہ سردار مسودخان کے امریکا میں بطور سفیر تعیناتی کا عمل جاری ہے۔
دفتر خارجہ کے ترجمان عاصم افتخار احمد نے کہا کہ پاکستان مقبوضہ کشمیر میں انسانی حقوق اور سیکیورٹی کی سنگین صورت حال پر تشویش کا اظہار کرتا چلا آرہا ہے مقبوضہ کشمیر میں کشمیریوں کا فوجی اور پولیس کا معاصرہ جاری ہے جبکہ معصوم اور بے گناہ کشمیریوں کو ماورائے عدالت قتل کیا جارہا ہے۔
انہوں نے کہا کہ کشمیریوں کو منصفانہ استصواب رائے کا حق اقوام متحدہ نے دیا ہے 5 فروری کو پاکستان، کشمیر اور دنیا بھر میں کشمیریوں کے ساتھ اظہار یکجہتی کا دن منایا جائے گا، وزیر خارجہ نے اقوام متحدہ کی سیکیورٹی کونسل، یواین جنرل سیکریٹری کو کشمیر کے حوالے سے لکھے گئے مراسلے میں کشمیر کی سنگین صورت حال سے آگاہ کیا ہے۔
دفتر خارجہ کے ترجمان کا کہنا تھا کہ وزیر اعظم عمران خان اعلیٰ سطح کے وفد کے ہمراہ چین کے دورے پر بیجنگ پہنچے ہیں جہاں وہ سی پیک سمیت سرمایہ کاری کے مختلف معاہدوں پر دستخط متوقع ہیں۔
انہوں نے بتایا کہ لندن میں بھارتی آرمی چیف اور وزیر داخلہ سمیت 6 لوگوں کے خلاف مقدمہ درج کروایا گیا ہے۔
داعش لیڈر کے شام میں مارے جانے کی خبروں پر اظہار خیال کرتے ہوئے انہوں نے کہا کہ پاکستان نے دہشتگردی کے خلاف فرنٹ لائن ملک کا کردار ادا کیا ہے، ہم ہر قسم کی دہشت گردی کے خلاف ہیں۔

بیجنگ: (ویب ڈیسک) چین میں 24ویں ونٹر اولمپکس کامیلہ سج گیا۔ انتظامات دیکھ کر وزیراعظم عمران خان بھی گرویدہ ہو گئے۔
افتتاحی تقریب میں وزیراعظم عمران خان کے ساتھ ساتھ وزیر خارجہ شاہ محمود قریشی، وزیر منصوبہ بندی اسد عمر، وزیر اطلاعات فواد چودھری اور دیگر بھی شریک تھے۔
اسی دوران سوشل میڈیا پر ایک ویڈیو وائرل ہو رہی ہے جس میں دیکھا جا سکتا ہے کہ وفاقی وزیر فواد چودھری نے وزیراعظم کو بتایا کہ ’ کتنا خوبصورت سٹیڈیم بنایا ہے چین نے‘
اس پر جواب دیتے ہوئے وزیراعظم عمران خان نے جواب دیا کہ ’یہ لیول ہی اور ہے‘۔
وفاقی وزیر فواد چودھری نے ٹویٹر پر لکھا کہ جب پاکستان کی ٹیم پاکستان کا جھنڈا لہراتے ہوئے سٹیڈیم میں داخل ہوئ تو وزیر اعظم پاکستان نے تعظیماً نشست پر کھڑے ہو کر ٹیم کیلئے تالیاں بجائیں۔

اسلام آباد: (ویب ڈیسک) اپوزیشن جماعتوں کے سیاسی اتحاد پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ چاہتے ہیں کہ حکومت سندھ عدالتی فیصلے پر عمل درآمد کرے۔ انہوں نے واضح کیا کہ کسی صوبائی حکومت کو یہ حق نہیں کہ وہ آئین سے متصادم قانون سازی کرے۔
انہوں نے یہ بات ایم کیو ایم پاکستان کے اعلیٰ سطحی وفد سے اپنی رہائش گاہ پر ملاقات کے بعد ذرائع ابلاغ سے بات چیت کرتے ہوئے کہی۔
امیر جمعیت العلمائے اسلام (ف) مولانا فضل الرحمان نے کہا کہ ہمیں بلدیاتی الیکشن کی مہم شروع کرنی چاہیے۔ ان کا کہنا تھا کہ ہمیں پوری ہمت کے ساتھ عوام میں جانا چاہیے۔ ان کا کہنا تھا کہ ان کے عزائم کو شکست دینے کے لیے عوام میں جانا ضروری ہے۔
سینئر سیاستدان مولانا فضل الرحمان نے واضح کیا کہ سیاست خواہشات کی بنیاد پر نہیں ہو سکتی۔ ان کا کہنا تھا کہ ملک میں جو کچھ ہو رہا ہے وہ پاکستان کے مفاد میں نہیں ہے۔
مولانا فضل الرحمان نے الزام عائد کیا کہ ملک کو گروی رکھ دیا گیا ہے۔ انہوں نے کہا کہ ہر بات خواہشات کے تابع نہیں ہوا کرتی۔ انہوں نے کہا کہ آئین ہمارے بلدیاتی اداروں کو حقوق دیتا ہے۔ ان کا کہنا تھا کہ اختیارات نچلی سطح پر منتقل کرنے کی بات کررہے ہیں۔
مولانا فضل الرحمان نے میڈیا سے بات چیت کرتے ہوئے کہا کہ آئین کے اندر رہتے ہوئے ملکی نظام چلانا ہے۔ ان کا کہنا تھا کہ گزشتہ چار سالوں سے ملک پیچھے کی طرف جا رہا ہے۔