لاہور : (ویب ڈیسک) یورپی یونین میں 2035 کے بعد پیٹرول اور ڈیزل انجن کی گاڑیوں کی فروخت پر پابندی کا قانون منظور کر لیا گیا ہے۔
نئے قانون کے مطابق کمپنیوں کو دھواں خارج کرنے والی گاڑیاں بنانا بند کرنا ہوگا، قانون کے مطابق 27 ممالک میں ڈیزل اور پیٹرول انجن گاڑیوں کی فروخت ممنوع ہوگی۔
یورپی یونین کی اسمبلی نے بدھ کے روز ووٹ دیا کہ گاڑیاں بنانے والوں سے اگلی دہائی کے وسط تک کاربن ڈائی آکسائیڈ کے اخراج میں 100 فیصد کمی کی جائے۔ مینڈیٹ پٹرول یا ڈیزل سے چلنے والی نئی کاروں کی 27 ملکی بلاک میں فروخت پر پابندی کے برابر ہوگا۔
تاہم کچھ قانون سازوں کی جانب سے 2035 تک کاربن ڈائی آکسائیڈ کے اخراج میں 90 فیصد کمی کے ہدف کو کمزور کرنے کی کوششوں کو مسترد کر دیا گیا۔
یورپی یونین کے قانون سازوں نے 2021 کے مقابلے میں 2030 میں گاڑیوں سے CO₂ میں 55 فیصد کمی کی توثیق بھی دی ہے۔
ماہرین ماحولیات کی جانب سے پارلیمنٹ کے فیصلوں کو سراہا گیا ہے۔ ٹرانسپورٹ اور ماحولیات، جو برسلز میں قائم اتحاد ہے، نے کہا ہے کہ ووٹ نے ماحولیاتی تبدیلیوں سے بچنے کا ایک بہترین موقع پیش کیا ہے۔
لیکن جرمنی کے آٹو انڈسٹری لابی گروپ وی ڈی اے نے ووٹ پر تنقید کرتے ہوئے کہا کہ اس نے یورپ میں چارجنگ انفراسٹرکچر کی کمی کو نظر انداز کیا ہے۔
یورپی یونین 2030 میں گرین ہاؤس گیسوں کو 1990 کے مقابلے میں 55 فیصد تک کم کرنے کا ارادہ رکھتی ہے۔

میری لینڈ: (ویب ڈیسک) امریکی ریاست میری لینڈ میں فائرنگ کے نیتجے میں 3 افراد ہلاک جبکہ متعدد زخمی ہو گئے ہیں۔
فائرنگ کا واقعہ میری لینڈ کی فیکٹری میں پیش آیا، حکام نے بتایا کہ ایک 23 سالہ شخص نے جمعرات کو مغربی میری لینڈ کے ایک مینوفیکچرنگ پلانٹ میں چار ساتھی کارکنوں کو گولی مار دی ، جس کے پولیس کے ساتھ فائرنگ کا تبادلہ ہوا اور بھاگ کھڑا ہوا۔
پولیس کا کہنا ہے کہ تحقیقات کا آغاز کر دیا گیا ہے لیکن ابھی تک یہ نہیں کہا جا سکتا ہے کہ حملہ آور کا مقصد کیا تھا۔
گن وائلنس ٹیم کے مطابق، یہ حملہ اس سال بڑے پیمانے پر ہونے والا فائرنگ کا 254 واں واقعہ ہے،یہ ایسے وقت میں سامنے آیا ہے جب امریکی ایوان نمائندگان نے بندوقوں میں اصلاحات کے لیے کئی بل منظور کیے ہیں، لیکن ان اقدامات کے سینیٹ میں پاس ہونے کے امکانات کم ہیں۔
یاد رہے امریکا میں 2022 میں گن وائلنس سے 18 ہزار سے زائد افراد ہلاک ہوئے۔ جبکہ گزشتہ ہفتے اسکول ، یونیورسٹی اور اسپتال میں فائرنگ سے 22 سے زائد افراد ہلاک ہو چکے ہیں۔
امریکہ کی ریاست ٹیکساس کے ایک پرائمری سکول میں فائرنگ کے واقعے میں 19 بچوں سمیت 21 افراد اس وقت ہلاک ہو گئے تھے جب ایک 18 سالہ مسلح لڑکا سکول کی عمارت میں داخل ہوا اور اندھا دھند فائرنگ کر دی۔

ابوظبی: (ویب ڈیسک) اسرائیلی وزیر اعظم نفتالی بینیٹ غیر اعلانیہ دورے پر متحدہ عرب امارات کے دورے کے لیے ابوظبی پہنچ گئے ہیں۔
جہاں انہوں نے صدر شیخ محمد بن زاید آل نھیان سے ملاقات کی۔ ابوظہبی کی صدارت سنبھالنے کے بعد شیخ محمد بن زاید آل نھیان سے اسرائیلی وزیر اعظم کی ابوظبی میں یہ پہلی ملاقات ہے۔
2020 میں اسرائیل اور متحدہ عرب امارات کے تعلقات کو باقاعدہ طور پر معمول پر لانے کے بعد سے یہ بینیٹ کا ابوظہبی کا دوسرا عوامی دورہ ہے۔
بینیٹ کے دفتر سے جاری ہونے والے ایک بیان میں کہا گیا ہے کہ اسرائیلی رہنما متحدہ عرب امارات کے صدر شیخ محمد بن زید النہیان سے ملاقات کریں گے اور دونوں “مختلف علاقائی مسائل” پر تبادلہ خیال کریں گے، جس میں ایران کے ایجنڈے میں سرفہرست ہونے کا امکان ہے۔
مئی 2022 کے آخر میں، اسرائیل نے متحدہ عرب امارات کے ساتھ ایک آزاد تجارتی معاہدے پر دستخط کیے تھے، جو کہ کسی عرب ریاست کے ساتھ اس کا پہلا بڑا تجارتی معاہدہ ہے اور ایک ایسا اقدام جس کا مقصد دونوں ممالک کے درمیان تجارت کو بڑھانا ہے۔