برطانیہ : (ویب ڈیسک) جنوبی افریقی شہریوں نے آئرش ائیر لائن ‘RYANAIR’ کا برطانیہ کیلئے اپنی پروازوں میں افریکانز زبان میں ٹیسٹ لینے کی مذمت کرتے ہوئے اسے امتیازی سلوک قرار دے دیا۔
برطانوی نشریاتی ادارے بی بی سی کے مطابق آئرش ائیر لائن RYANAIR نے برطانیہ کیلئے پروازوں میں جنوبی افریقی مسافروں سے افریکانز زبان میں جنوبی افریقا سے متعلق سوالات کے ذریعے ٹیسٹ لینے کا اعلان کیا۔
رپورٹس کے مطابق جنوبی افریقا میں 11 سرکاری زبانیں بولی جاتی ہیں تاہم بہت سے شہریوں کا کہنا ہے کہ وہ افریکانز زبان( جو سفید فام اقلیتوں کی حکمرانی کے دوران مسلط کی گئی تھی) کو نہیں سمجھ سکتے اس ٹیسٹ کی وجہ سے انہیں برطانیہ جانے میں مشکلات کا سامنا کرنا پڑ رہا ہے۔
دوسری جانب آئرش ائیر لائن نے ٹیسٹ کا دفاع کرتے ہوئے کہا کہ یہ فیصلہ جنوبی افریقا کے جعلی پاسپورٹ پر سفر کرنے والے مسافروں کی نشاندہی کرنے کیلئے کیا گیا ہے۔
ائیر لائن نے اپنے بیان میں کہا کہ جنوبی افریقا کے جعلی پاسپورٹ کے زیادہ استعمال کی وجہ سے ہم نے برطانیہ جانے والے مسافروں سے افریکانز زبان میں ایک سادہ سوالنامہ حل کروانے کا فیصلہ کیا۔
بیان میں مزید کہا گیا ہے کہ اگر مسافر اس سوالنامے کو مکمل کرنے سے قاصر ہیں تو انہیں سفر کرنے سے روک دیا جائے گا اور مکمل رقم واپس کردی جائے گی۔
واضح رہے کہ 2011 کی مردم شماری کے مطابق صرف 13 فیصد جنوبی افریقی شہری افریکانز زبان کو مادری زبان کے طور پر بولتے ہیں ، یہ Zulu اور IsiXhosa کے بعد ملک کی تیسری سب سے زیادہ بولی جانے والی زبان ہے۔

لاہور: (ویب ڈیسک) گورنر پنجاب محمد بلیغ الرحمن نے کہا ہے کہ 4 سال پہلے جب حکومت مسلم لیگ ن سے لی گئی تھی، آج بہت سارے مسائل کے ساتھ واپس ملی ہے۔ ہمارے سابق دور میں معیشت سمیت ترقی کے تمام اعشاریے بہتر تھے، معیشت بہتر تھی اور مہنگائی کی شرح کم تھی، تمام شعبوں میں جلد استحکام انا شروع ہو جائے گا۔
گورنر پنجاب محمد بلیغ الرحمان سے بہاولپور سے تعلق رکھنے والے ایم پی اے ظہیر اقبال چنڑ کی قیادت میں وفد نے ملاقات کی۔ وفد کے شرکاء نے گورنر پنجاب کو مبارکباد دی اور نیک خواہشات کا اظہار کیا۔ اس موقع پر گورنر پنجاب محمد بلیغ الرحمن نے کہا کہ 4 سال پہلے جب حکومت پی ایم ایل سے لی گئی تھی آج بہت سارے مسائل کے ساتھ واپس ملی ہے.مسلم لیگ کے سابق دور ملک میں سارے شعبوں میں مسلسل ترقی ہو رہی تھی.معیشت سمیت ترقی کے تمام اعشاریے بہتر تھے اور مہنگائی کی شرح کم تھی۔ انشاء اللہ تمام شعبوں میں جلد بہتری آنا شروع ہو جائے گی۔ اعلی سیاسی اقدار کو پروان چڑھائیں گے۔ اعلی تعلیم پہ فوکس ہمیشہ سے حکومت کی ترجیح ہے۔
انہوں نے کہا کہ مسلم لیگ ن نے ہمیشہ ہائر ایجوکیشن کے فنڈَز میں اضافہ کیا، اکیڈیمیہ اور انڈسٹری کے درمیان روابط مضبوط کرنے کی ضرورت ہے، اس حوالے سے جامعات کے وائس چانسلرز کو ہدایات دے دی ہیں۔

اسلام آباد: (ویب ڈیسک) جرمن وزیر خارجہ انالینا بیئربوک پاکستان کے سرکاری دورے پر اسلام آباد پہنچ گئیں، پاکستانی وزیرخارجہ بلاول بھٹونے ان کا استقبال کیا۔
جرمن وزیرخارجہ نے دفترخارجہ کے احاطے میں پودا بھی لگایا۔ دو روزہ دورے کے دوران بیئربوک وزیر اعظم شہباز شریف اور پاکستانی ہم منصب بلاول بھٹو زرداری کے علاوہ سول سوسائٹی کے ساتھ ساتھ دیگر حکومتی نمائندوں سے بھی بات چیت کریں گی۔

لاہور : (ویب ڈیسک) وزیراعلی پنجاب حمزہ شہباز نے کہا کہ عوام کو مشکل وقت میں ریلیف دینے کیلئے آٹے پر 200 ارب روپے سبسڈی دے رہے ہیں ۔چینی اورگھی کی قیمتوں میں کمی کے حوالے سے جلد خوشخبری دیں گے۔
تفصیلات کے مطابق وزیراعلیٰ پنجاب حمزہ شہباز سے لاہور کے سابق چیئرمینوں اوروائس چیئرمینوں نے ملاقات کی جس میں وزیر اعلی نے مسائل سنے اور ان کے حل کیلئے ہدایات دیں۔
ملاقات میں میاں مجتبیٰ شجاع الرحمن، توصیف شاہ، کبیر تاج، صبغت اللہ، دستگیر شاہ، احمد بٹ اور متعلقہ حکام بھی اس موقع پر موجود تھے۔
اس موقع پر وزیراعلی پنجاب حمزہ شہباز شریف نے کہا کہ عوام کو مشکل وقت میں ریلیف دینے کیلئے آٹے پر 200 ارب روپے سبسڈی دے رہے ہیں، چینی اورگھی کی قیمتوں میں کمی کے حوالے سے جلد خوشخبری دیں گے۔
انہوں نے کہا کہ اگلے ماہ سے منتخب ہسپتالوں میں کینسر اوردیگر ادویات مفت ملیں گی، اندرون لاہور میں بجلی کے لٹکتے ہوئے تار اورگیس کی عدم فراہمی کے مسائل حل کریں گے، پارکنگ کے مسائل کرنے کیلئے پارکنگ پلازے بنانے کا جائزہ لیں گے۔
وزیراعلی نے مزید کہا کہ کوٹ خواجہ سعید،سید مٹھا اوریکی گیٹ ہسپتالوں میں علاج معالجے کی سہولتوں کو بہتر بنایا جائے گا، عوام کے دکھوں کے مداواے اور مسائل کے حل کیلئے ہر چھوٹے بڑے شہر جاؤں گا، سیاست نہیں خدمت پر یقین رکھتا ہوں، واسا کو پانی کی فراہمی کیلئے ہدایات جاری کردی ہیں، لاہور بھر کے فلٹریشن پلانٹس کو بحال کیا جارہا ہے، طویل سیاسی جدوجہد کرنے والے اور ظلم برداشت کرنے والے پارٹی کارکنوں کوسلام پیش کرتا ہوں۔