اسلام آباد: (ویب ڈیسک) وزیراعظم شہباز شریف کا عربی زبان میں ٹوئٹر اکاؤنٹ فعال کردیا گیا۔
وزیراعظم کے فوکل پرسن برائے ڈیجیٹل میڈیا ابو بکر عمر کے مطابق وزیراعظم پاکستان کا عربی زبان میں ٹوئٹر اکاؤنٹ فعال کرنے کا مقصد عرب عوام اور ممالک کے ساتھ تعلقات اور روابط کو مضبوط بنانا ہے۔
خیال رہے کہ وزیراعظم شہباز شریف اپنی آفیشل اکاؤنٹ سے عربی زبان میں ٹوئٹ کرتے رہے ہیں۔

اسلام آباد: (ویب ڈیسک) وزیراعظم شہباز شریف سے جمعیت علمائے اسلام (ف) کے سربراہ مولانا فضل الرحمان کی ملاقات ہوئی ہے جس میں ملکی سیاسی صورتحال اور آئندہ کی حکمت عملی پر مشاورت کی گئی۔
ذرائع کے مطابق ملاقات میں وفاقی بجٹ ، ترقیاتی منصوبوں،قانون سازی اور دیگر امور پر بھی بات چیت کی گئی۔
اس موقع پر وزیراعظم نے مولانا فضل الرحمان کو عمرے کی ادائیگی پر مبارکباد بھی دی۔
یاد رہے کہ گزشتہ روز مولانا فضل الرحمان نے مہنگائی کو کنٹرول کرنے سے متعلق حکومت کو تجاویز پیش کی تھیں۔
پی ڈی ایم کے سربراہ مولانا فضل الرحمان نے تجاویز دیتے ہوئے کہا تھا کہ وفاقی، صوبائی وزرا، مشیر، معاونین اور سرکاری افسران کو مراعات میں 50 فیصد کمی کرنی ہو گی اور اس کے علاوہ گریڈ 19 سے اوپر کے بیوروکریٹس کو بھی مراعات میں 50 فیصد کمی کرنی ہو گی۔
انہوں نے کہا کہ موجودہ صوتحال گزشتہ حکومت کے غلط فیصلوں کا نتیجہ ہے، اسی لیے ججز، جرنیل اور سینیٹ کی قائمہ کمیٹیوں سمیت ہر طبقہ فکر کو قربانی دینی ہو گی۔
مولانا فضل الرحمان نے کہا کہ عوام پر مہنگائی کا بوجھ ڈالا جا چکا ہے اب حکومت کو اپنی ذمہ داری ادا کرنی ہو گی اور ملک کو دیوالیہ ہونے سے بچانے کے لیے سخت فیصلے کرنا مجبوری ہے۔

کراچی: (ویب ڈیسک) شہر قائد علاقے موچکو حب ریور روڈ سے منشیات کی کروڑوں روپے مالیت کی بڑی کھیپ پکڑی گئی۔
ایس ایس پی کیماڑی فدا حسین جانوری کے مطابق منشیات ٹرک میں کوئٹہ اور کلات کے راستے کراچی لائی جارہی تھی، منشیات 109 کلو سے زائد ہے جسے کراچی کے مختلف ڈیلرز اور ڈانس پارٹیز میں فروخت کرنا تھا۔
کارروائی کے دوران ایک اہم ڈیلر احسان کو گرفتار کیا گیا ہے جبکہ ٹرک ڈرائیور فرار ہوگیا، جس کی تلاش جاری ہے۔

اسلام آباد: (ویب ڈیسک) چیئرمین تحریک انصاف عمران خان نے پارٹی قیادت کو ممکنہ گرفتاری پر اعتماد میں لیتے ہوئے اس عزم کا اعادہ کیا ہے کہ کسی صورت امپورٹڈ حکومت کے سامنے نہیں جھکیں گے اور ڈٹ کر مقابلہ کریں گے۔
ذرائع کے مطابق کورکمیٹی اجلاس میں عمران خان نے کہا کہ حکومت نے مجھےگرفتار کرنے کا پلان بنایا ہے اطلاع ملی اسلام آباد پہنچنے پر گرفتارکیا جائے گا امپورٹڈحکومت سمجھتی ہےمیں ایسےڈرجاؤں گا اب کسی صورت پیچھے نہیں ہٹوں گا۔
اجلاس میں عمران خان کی ممکنہ گرفتاری کی صورت میں ملک بھر میں فوری ردعمل دینے کا فیصلہ کیا گیا۔ ارکان نے اظہار خیال کرتے ہوئے کہا کہ مقبول سیاسی جماعت کےلیڈرکی گرفتاری حکومت کی بڑی بیوقوفی ہو گی معاشی طور پرتباہی کی طرف جاتی حکومت مزیدتباہی کرےگی گرفتارکیاگیاتوملک مزیدمعاشی بدحالی کی طرف جائے گا۔
کورکمیٹی اجلاس کے بعد ملک بھر کی تنظیموں کو متحرک کر دیا گیا اسلام آباد:تمام تنظیمی کمیٹیاں کسی بھی کال کیلئے الرٹ پررہیں گی اور 7 دن کے اندر تنظیموں کی رپورٹ عمران خان کودی جائےگی۔
کور کمیٹی نے پنجاب کی 20 نشستوں پر الیکشن میں بھرپور تیاری سےلڑنے کا فیصلہ کرتے ہوئے کہا ہے کہ حکومت کامقابلہ میدان میں کریں گے۔

اسلام آباد: (ویب ڈیسک) صدر مملکت ڈاکٹر عارف علوی نے قومی بچت کی درخواست پر فیصلے میں کہا ہے کہ بیرونی امداد کے عدم استعمال پر وزارت تعلیم مجرمانہ ضیاع اور نااہلی کا ذمہ دار ہے، رقم 6 سال تک غیر منافع بخش اکاؤنٹ میں پڑی رہی، کسی نے اس کی پروا نہیں کی۔
صدر عارف علوی نے وفاقی محتسب کے فیصلے کے خلاف مرکزی ڈائریکٹوریٹ براۓ قومی بچت کی درخواست پر فیصلے میں مزید کہا ہے کہ رقم کے عدم استعمال سے ایک کروڑ 74 لاکھ روپے کا نقصان ہوا، اصل رقم ایک کروڑ 37 لاکھ تھی،جرمنی کی حکومت نے 94-1993 میں ایک کروڑ 37 لاکھ روپے سے زائد کی رقم امداد کے طور پر دی تھی30 سال قبل سستی نصابی کتابوں کی طباعت کے لیے کاغذ کی خریداری کے لیے دی گئی رقم استعمال ہی نہیں کی گئی۔
انہوں نے کہا ہے کہ حکومت اپنی فوری ضروریات پورا کرنے کے لیے بین الاقوامی سطح پر گرانٹس اور قرضے مانگ رہی ہے، وزارت تعلیم معاملے کی انکوائری کرے، ذمے داروں کا تعین کرے اور ان کے خلاف قانون کے مطابق کارروائی کرے،ریٹائرڈ اور فوت شدہ افراد پر ایسی انکوائریوں کا بوجھ ڈالنے سے باز رہتے ہوئے 45 دنوں کے اندر تعمیلی رپورٹ وفاقی محتسب کو جمع کرائی جائے۔
صدر پاکستان مزید کہا ہے کہ اگر آڈٹ میں نقصان کی نشاندہی نہ کی جاتی تو یہ نقصان اس سے بھی زیادہ ہوسکتا تھا، آڈٹ اعتراض کے جواب میں وزارت نے رقم واپس لی تو زکوٰۃ اور ود ہولڈنگ ٹیکس کی کٹوتی کا معاملہ سامنے آیا، مجرمانہ غفلت کی وجہ سے پاکستانی عوام منافع سے محروم ہو گئے، رقم کے صحیح استعمال سے منافع کمایا جاسکتا تھا۔
صدر مملکت نے وفاقی وزارت تعلیم کو استثنٰی سرٹیفکیٹ حاصل کرنے کے لیے ایف بی آر اور محکمہ زکوٰۃ سے رجوع کرنے کی ہدایت کی ہے۔