ممبئی: (ویب ڈیسک) بالی ووڈ کے نئے ابھرتے سُپر اسٹار کارتک آریان کو اب (بالی ووڈ کے) کِنگ کا خطاب دیا جا رہا ہے۔
بھول بھولیا 2 کے ہیرو کارتک آریان کا موازنہ شاہ رخ خان سے کیا جارہا ہے اور اس پر انہیں کنگ قرار دیا جارہا ہے۔ اپنی فلم بھول بھولیا 2 کی زبردست کامیابی کے بعد تمام محبت اور شہرت سے لطف اندوز ہونے والے اداکار نے شاہ رخ خان کے ساتھ موازنہ کیے جانے پر حال ہی میں تبصرہ کیا ہے۔
ایک شو میں میزبان سدھارتھ کنن کے ساتھ بات چیت میں کارتک آریان سے بالی ووڈ کا نیا کنگ کہلائے جانے پر سوال کیا گیا جس پر انہوں نے کہا کہ جب بھی مجھے یہ خطابات ملتے ہیں یقیناً مجھے اچھا لگتا ہے لیکن مجھے نہیں لگتا کہ میں بادشاہ کی اصطلاح کو قبول کرنا چاہوں گا۔ مجھے ابھی بہت طویل سفر طے کرنا ہے، اس لیے ایسا کہنا قبل از وقت ہے۔
اداکار نے اس خطاب کا مذاق اڑاتے ہوئے کہا کہ شاید میں (بالی ووڈ کے) شہزادے کا خطاب قبول کرلوں۔ میں تمام محبتوں سے خوش ہوں۔ جب ہجوم ان کی ایک جھلک دیکھنے کے لیے منتظر ہوتا ہے تو وہ بہت خوش قسمت محسوس کرتے ہیں اور یہ احساس کسی بھی خطاب سے بڑھ کر ہے۔
