اسلام آباد: (ویب ڈیسک) وزیراعظم شہباز شریف نے کہا ہے کہ پاکستان تحریک انصاف (پی ٹی آئی) چیئرمین عمران خان کے کہنے پر نیب ہر حد تک گئی۔
وزیر اعظم شہباز شریف نے سماجی رابطے کی ویب سائٹ ٹوئٹر پر لکھا کہ مسلم لیگ ن اور اس کے رہنماؤں کو ناجائز قیدوبند میں رکھا گیا اور عمران خان کے کہنے پر نیب ہر حد تک گئی۔
انہوں نے کہا کہ احسن اقبال کی بریت سے دونوں حقائق ثابت ہو گئے۔ احسن اقبال کی جیسے شریف اور ایماندار شخص کی دیانت داری پوری قوت سے ثابت ہو گئی۔

اسلام آباد: (ویب ڈیسک) وفاقی وزیر منصوبہ بندی احسن اقبال نے کہا ہے کہ نیب نے تسلیم کیا ریفرنس میں کرپشن کا کوئی الزام نہیں، ہم نارووال سپورٹس سٹی کو مکمل بھی کریں گے۔
اسلام آباد ہائی کورٹ کے باہر میڈیا سے گفتگو کرتے ہوئے احسن اقبال نے کہا کہ عمران نیازی اور جسٹس جاوید اقبال نے مسلم لیگ(ن) کے خلاف کردار کشی کی جو مہم چلائی تھی، یہ کیس اسی سلسلے میں بنایا گیا تھا اور جس ریفرنس کی پاداش میں مجھے بھی اڈیالہ جیل میں سزائے موت کے قیدیوں کے سیل میں وقت گزارنا پڑا، آج اسلام آباد ہائی کورٹ کے بینچ نے تقریباً ایک گھنٹے لگاتار چیف جسٹس نے نیب سے درجنوں مرتبہ سوال کیا کہ ہمیں بتائیں کہ اس ریفرنس میں احسن اقبال کے خلاف کرپشن کا کیا ثبوت ہے۔
ان کا کہنا تھا کہ چیف جسٹس نے یہ بھی کہا کہ اگر کسی چیز میں کرپشن کا شائبہ بھی ہے تو وہ بھی بتائیں اور نیب یہ تسلیم کرنے پر مجبور ہوا کہ اس ریفرنس میں کرپشن کا کوئی الزام نہیں۔
انہوں نے کہا کہ آج میں پاکستانی قوم کو یہ کہنا چاہتا ہوں کہ وہ شخص جو پچھلے کئی سالوں سے اس قوم میں جھوٹ بول بول کر چور ڈاکو کی فلم چلا رہا ہے اور اس نے مسلم لیگ(ن) کی قیادت کے خلاف جھوٹے مقدمات بنائے جنہیں اس نے قوم کو گمراہ کرنے کے لیے جواز بنایا۔
مسلم لیگ(ن) کے رہنما نے کہا کہ میں عمران خان کو کہنا چاہتا ہوں کہ آ کر دیکھ لو کہ تمہارے جھوٹے الزاموں کی کیا حقیقت ہے، تم نے ہم پر جو بہتان لگائے، آج یہ اسی کا خمیازہ ہے کہ تم سڑکوں پر ذلیل و خوار ہوتے پھر رہے ہو، آج اسی کا نتیجہ ہے کہ تم ذہنی توازن کھو بیٹھے ہو۔
انہوں نے اعلان کیا کہ ہم نارووال سپورٹس سٹی کو مکمل بھی کریں گے، اس کو پاکستان میں نوجوانوں کے لیے کھیلوں کی بہترین اور جدید ترین سہولت بنائیں گے اور اسے مکمل کرنے میں جو اضافی اخراجات لگیں گے، اس کی ریکوری عمران نیازی اور نیب سے کی جائے گی۔
ان کا کہنا تھا کہ عمران خان نے جھوٹ کو سچ نہیں بنا سکا، منصوبے کا نقصان کیا، ہماری کردار کشی کی، ہمارے اہلخانہ اور دوستوں کو اذیت سے گزارا لیکن میں نارووال اور اپنے حلقوں کے عوام کا شکرگزار جنہوں نے اس کردار کشی کو مسترد کیا اور پہلے سے زیادہ یکجہتی کے ساتھ میرے ساتھ کھڑے رہے۔

پشاور: (ویب ڈیسک) پاکستان تحریک انصاف کو خیبرپختونخوا سے بڑی کامیابی ملی ہے، 20 سال تک اے این پی سے وابستہ رہنے والے سینئر رہنما نے پی ٹی آئی میں شمولیت اختیار کر لی ہے۔
خیبرپختونخوا میں پی ٹی آئی نے سیاسی میدان میں اہم کامیابی حاصل کرتے ہوئے اے این پی کی اہم وکٹ گرا دی ہے اور کرک سے اے این پی کے سینئر رہنما خورشید خان خٹک پی ٹی آئی میں شامل ہو گئے ہیں۔
واضح رہے کہ خورشید خان خٹک 2018ء کے عام انتخابات میں عوامی نیشنل پارٹی کے صوبائی اسمبلی کے امیدوار تھے جبکہ وہ اے این پی کے پارلیمانی بورڈ کے ممبر اور صوبائی ایڈیشنل جنرل سیکرٹری بھی رہ چکے ہیں۔
دوسری طرف وزیراعلیٰ محمود خان نے تحریک انصاف میں شمولیت پر خورشید خان کو مبارکباد پیش کرتے ہوئے کہا کہ آنے والے وقت میں کئی سیاسی شخصیات پی ٹی آئی میں شمولیت اختیار کریں گی۔ پاکستان تحریک انصاف ہی حقیقی معنوں میں عوام کی پسندیدہ سیاسی جماعت ہے اور پی ٹی آئی پر عوام کے اعتماد میں روز بروز اضافہ ہو رہا ہے۔
اس موقع پر خورشید خان نے کہا کہ اے این پی کے ساتھ 20 سال سے زائد کی رفاقت رہی مگر اب پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کے ساتھ چلنے کا فیصلہ کیا ہے۔

سکھر: (ویب ڈیسک) پاکستان ڈیمو کریٹک موومنٹ (پی ڈی ایم) کے سربراہ اور امیر جمعیت علمائے اسلام (ف) مولانا فضل الرحمان نے پاکستان تحریک انصاف کے چیئر مین اور سابق وزیراعظم عمران خان کو تنقید کا نشانہ بناتے ہو ئے کہا ہے کہ بین الاقوامی مجرم کی جانب سے اداروں کی بات کرنے پر تعجب ہے، قانونی کارروائی سے بچنے کے لیے اداروں پر تنقید کر رہا ہے ۔ آرمی چیف کی تعیناتی کے حوالے سے اگر پی ٹی آئی عدالت گئی تو عدالت آئین کے مطابق فیصلہ کرے گی۔
سکھر میں میڈیا سے گفتگو کرتے ہوئے امیر جمعیت علمائے اسلام (ف) کا کہنا تھا کہ سیلاب کی تبادہ کاریاں بلا حدود ہیں، تمام سماجی تنظیموں کو خدمات پیش کرنے پر خراج تحسین ہیش کرتا ہوں، متاثرہ افراد کی دادرسی اسلامی فریضہ بن جاتا ہے،سیلاب سے شاہرائوں کا مکمل انفراسٹرکچر تباہ ہو گیا ہے، جہاں راستے منقطع ہوئے ہیں انہیں بحال کیا جا رہا ہے، سڑکوں کی مکمل تعمیر میں وقت درکار ہو گا، ایک دم نہیں ہو سکیں گے۔
انہوں نے کہا کہ آزمائش کے ماحول پر کسی سیاسی پارٹی پر تنقید نہیں کروں گا، فضائی معائنے سے دیکھا کہیں بھی راستہ نہیں ہے ہر طرف پانی ہی پانی ہے، جس طرح رفاحی تنظیمیں دیانت سے امدادی سامان پہنچا رہی ہیں، اسی طرح حکومت کا بھی فرض ہے جو طیارے امدادی سامان لیکر آرہے ہیں وہ امدادی سامان پہنچائے، حکومت کو اپنی ذمہ داریاں پوری کرنا ہوں گی، ہم نے ملک کی معیشت کو معاہدے کر کے آئی ایم ایف کے حوالے کردیا ہے، جس پارٹی نے ایسا کیا وہ آج کہتی ہے ہم ملک کو آزاد کرائیں گے، حکومت کوشش میں ہے کس طرح مہنگائی پر کنٹرول کرسکیں۔
مولانا فضل الرحمان نے کہا کہ پی ٹی آئی حکومت کی طرح اس سیلاب میں بھی نااہل ثابت ہوئی ہے، عمران خان پر فرد جرم عائد ہونے والا ہے، وہ سیاسی شہید بننے کی کوشش کر رہا ہے، اسے کوئی سیاستدان تسلیم نہیں کرتا، وہ بلبلے کی سیاست کر رہا ہے۔ عمران خان بین الاقوامی مجرم اور امپورٹڈ چور ہے، کارروائی سے بچنا چاہتا ہے، لوگ جانتے ہیں عمران خان سیاستدان نہیں،عمران خان کے خلاف کارروائی مجرم کے خلاف کارروائی ہوگی، آرمی چیف کی تعیناتی کے حوالے سے اگر پی ٹی آئی عدالت گئی تو عدالت آئین کے مطابق فیصلہ کرے گی۔
پی ڈی ایم سربراہ کا کہنا تھا کہ ٹرانس جینڈر بل جے یوآئی کی نہیں پی ٹی آئی کی ضرورت ہے،حکومتوں کو کہوں گا امداد متاثرین تک پہنچتے ہوئے نظر ضرور آنی چاہئے، اس مشکل وقت میں انسانی فریضے کو اسلامی فریضہ سمجھا، سیلاب نے تباہی کی ہے،ابھی تو لوگوں کو ریسکیو کیا جارہا ہے، میں نے فضائی دورہ کیا ہے، ایک حکومت تو کیا کئی حکومتیں مل کر کام کریں تو بھی کم ہے۔

اسلام آباد: (ویب ڈیسک) وفاقی وزیر داخلہ رانا ثناء اللہ نےکہا ہے کہ پاکستان تحریک انصاف کے ممکنہ لانگ مارچ کے دوران اسلام آباد پر چڑھائی کے لیے جو صوبائی حکومتیں سپورٹ کریں گی، ان کے خلاف کارروائی ہو گی۔
سیمینار سے خطاب کرتے ہوئے انہوں نے کہا کہ توشہ خانہ کیس میں پاکستان تحریک انصاف کے چیئر مین اور سابق وزیراعظم عمران خان رنگے ہاتھوں پکڑا گیا، اس نے غیر قانونی حرکت کی ہے۔ یہ انسان قوم و نوجوان نسل کو بدتمیزی سکھا رہا۔اس نے 26 کروڑ کا فراڈ کیا، سونے کے قلم چرائے ہیں، شوکت خانم ہسپتال اور نمل یونیورسٹی کے اکاؤنٹس کی پڑتال کریں تو اس میں بھی اس کی چوری پکڑی جائے گی ۔
رانا ثنا اللہ نے تنقید کرتے ہوئے کہا کہ عمران خان نے توہین عدالت کی ہے جو ثابت ہے۔ اب وہ معافی مانگ لے گا تو وہ توہین عدالت ختم تو نہیں ہوگی جو صوبے عمران خان کے لانگ مارچ کی سپورٹ کریں گے وہ آئین کی صریحاً خلاف ورزی کریں گے اور ایسے میں وفاقی حکومت آئین کے مطابق اقدام اٹھائے گی ۔
انہوں نے کہا کہ عمران خان کے ساتھ بیٹھ بھی نہیں سکتے ، جس نے اس کی حمایت کی تھی آج وہ بھی کانوں کو ہاتھ لگا رہے ہیں ۔عمران خان کے شر سے کوئی بھی محفوظ نہیں ہے ۔قوم نہ سمجھی تو پھر ہمارا حال بھی اسی قوم کا ہوگا جس نے 50 سال غلامی کاٹی ہے۔
وزیر داخلہ کا مزید کہنا تھا کہ ہم مسلمان پہلے ہیں ،علماکرام اس میں رہنمائی کریں ٹرانس جینڈر سے متعلق ہمارا مذہب کیا کہتا ہے، جو دین کہتا ہے اس کے مطابق زندگیوں کو ریگولیٹ کرنا چاہیے۔
وزیر داخلہ نے کہا کہ توشہ خانہ ریفرنس میں عمران خان پر مقدمہ درج ہو یا نہ ہو ، الیکشن کمیشن سے نااہل ہوتا ہے یا نہیں لیکن اس معاملے میں جو بدنامی عمران خان نے کمائی ہے وہ ہمیشہ اس کے ساتھ رہے گی، عمران خان نے القادر یونیورسٹی بنائی تو ٹرسٹی میں اپنی اہلیہ کے علاوہ کسی کو ممبر نہیں بنایا ، بحریہ ٹائون والوں کو ہی ممبر بنا لیتے جنہوں نے پانچ ارب دیئے ہیں،یہ سب کچھ قوم کے سامنے ہے ،چہرہ بے نقاب ہوگیا ہے ۔
رانا ثناء نے کہا کہ عمران خان نے توہین عدالت کی ہے جو کہ ثابت ہے ،اب عمران خان معافی مانگ لے گا تو وہ توہین عدالت ختم تو نہیں ہوگی، اگر عمران خان کی طرح کا بیٹا ہو تو اس کے ساتھ ماں باپ بھی بات نہیں کرتے، جو قوم کو گمراہ کر رہا ہوں وہ کسی کا لاڈلا نہیں ہوسکتا۔
انہوں نے کہا کہ جو صوبے عمران خان کے لانگ مارچ کی سپورٹ کریں گے وہ آئین کی صریحا خلاف ورزی کریں گے اور ایسے میں وفاقی حکومت آئین کے مطابق اقدام اٹھائے گی، ہم مسلمان پہلے ہیں ،علما اکرام اس میں رہنمائی کریں کہ ٹرانس جینڈر بارے ہمار امذہب کیا کہتا ہے،جو دین کہتا ہے اس کے مطابق اپنی زندگیوں کو ریگولیٹ کرنا چاہیے ، اس کے بغیر زندگی گذاریں گے تو کسی طرف کے نہیں رہیں گے۔
ایک سوال کے جواب میں انہوں نے کہا کہ کسانوں کے احتجاج کی وجہ سے ریڈزون میں عام آمدورفت کو روکا گیا ہے، کسانوں سے اپیل ہے کہ وہ ڈی چوک کی ضد چھوڑ دیں، ان کی بات سننے کے لئے تیار ہیں، اجتجاج کسی کا بھی آئینی حق ہے ،جس نے احتجاج کرنا ہے وہ عدالت کے متعین کردہ مخصوص مقامات پر احتجاج کر سکتا ہے۔
انہوں نے کہا کہ عمران خان کے ساتھ بیٹھ بھی نہیں سکتے ، جس نے اس کی حمایت کی تھی آج وہ بھی کانوں کو ہاتھ لگا رہے ہیں ،عمران خان کے شر سے کوئی بھی محفوظ نہیں ہے ۔قوم نہ سمجھی تو پھر ہمارا حال بھی اسی قوم کا ہوگا جس نے 50 سال غلامی کاٹی ہے۔
وزیر داخلہ خان نے کہا کہ یو این ڈی پی کی مدد سے پاکستان میں انسانی سمگلنگ کی روک تھام کے لئے اقدامات اٹھائے گئے ہیں، سول سوسائٹی اور پیشہ وارانہ تنظمیوں کے ساتھ مل کر انسانی سمگلنگ کی روک تھام کے لئے آگاہی مہم کامیابی سے چلائی گئی۔
انہوں نے کہا کہ انسانی سمگلنگ کی روک تھام ایک ٹاسک ہے اس کے لئے بین الاقوامی اداروں کا تعاون بھی جاری رہتا ہے، ایف آئی اے نے انسانی سمکلنگ کی روک تھام کے لئے نیشنل ایکشن پلان ترتیب دیا اور اس پر عمل درآمد یقینی بنا رہا ہے جس کی مدد سے انسانی سمگلنگ کے واقعات نہ ہونے کے برابر ہے ۔
رانا ثناء نے کہا کہ انہوں نے مشاورتی ورکشاپ کے انعقاد پر ایف آئی اے، یو این ڈی پی ، یورپین یونین اور دیگر سٹیک ہولڈرز کا شکریہ ادا کیا ۔ انہوں نے کہا کہ پاکستان کا تحفظ ہم سب کی ذمہ داری ہے ، ہمیں جرائم کے خاتمے کے لئے مزید موثر اقدامات اٹھانے ہیں۔