لاہور : (ویب ڈیسک) انٹرنیشنل کرکٹ کونسل نے ورلڈ ٹیسٹ چمپئن شپ 2023 اور 2025 کے فائنل کیلیے وینیوز کا اعلان کردیا.
آئی سی سی ورلڈ ٹیسٹ چمپئن شپ 2023 کا فائنل انگلینڈ کے اوول کرکٹ گراونڈ میں کھیلا جائے گا۔ جبکہ ٹیسٹ چمپئن شپ 2025 کا فائنل لارڈز کرکٹ گراونڈ میں کھیلا جائے گا۔
آئی سی سی کے مطابق ورلڈ ٹیسٹ چمپئن شپ 2023 کا فائنل جون میں شیڈول کیا گیا ہے۔ فائنل کی حتمی تاریخ کا اعلان بعد میں کیا جائے گا۔

اسلام آباد: (ویب ڈیسک) عدالت نے نیب کے اپنے ہی افسران کے خلاف بنایا ریفرنس خارج کر دیا۔
اسلام آباد ہائی کورٹ میں نیب کے اپنے ہی افسران کے خلاف بنائے گئے ریفرنس کی سماعت ہوئی۔ ہائی کورٹ نے ریفرنس خارج کرتے ہوئے مرزا شفیق، صبح صادق اور خورشید انور بھنڈر کے خلاف ریفرنس کو کالعدم قرار دے دیا۔
چیف جسٹس اسلام آباد ہائیکورٹ اطہر من اللہ نے استفسار کیا کہ عدالت کو مطمئن کریں کہ یہ کیس بنتا کیسے تھا؟ کیونکہ ملزمان پر یہ الزام ہے کہ انہوں نے ادارے کے افسران ہوتے ہوئے کوئی غلط کام کیا۔
انہوں نے کہا کہ ان کے خلاف مس کنڈکٹ کا کیس بنتا تھا نیب قانون کے تحت جرم پھر بھی نہیں بنتا اور اختیار کا غلط استعمال از خود کوئی جرم نہیں ہے۔ بہت بڑا نقصان بھی ہو گیا ہو اگر کرپشن نہیں ہے تو جرم نہیں بنتا۔
چیف جسٹس نے استفسار کیا کہ افسران پر کرپشن کا کوئی الزام نہیں تو پھر ان پر ریفرنس کیسے بنتا ہے؟ اور کیس میں تو نقصان کا الزام بھی نہیں، صرف مس کنڈکٹ کا کیس ہے۔
جسٹس اطہر من اللہ نے کہا کہ کیا نیب کے پاس اختیار ہے کہ اپنے آرڈیننس کو چھوڑ کر لوگوں کو خوار کرتا رہے؟ اور کیا سپریم کورٹ نے نیب کا اپنے اختیار سے نکل کر ریفرنس دائر کرنے کا کہا تھا؟ ان کیسز کے تحت اتنی مشکل کا سامنا کرنے والوں کا ازالہ کیا ہے؟
عدالت نے ریمارکس دیئے کہ جس چیئرمین نے ریفرنسز کی منظوری دی تھی اس پر ہرجانے کا دعوی کرنا چاہیے۔

اسلام آباد: (ویب ڈیسک) سابق وزیرخزانہ شوکت ترین آڈیو لیک معاملے میں ایف آئی اے میں طلبی پر پیش نہ ہوئے۔
سابق وزیرخزانہ شوکت ترین ایف آئی اے میں پیش نہیں ہوئے۔ ایف آئی اے نے شوکت ترین کو طلبی کا ایک اور نوٹس جاری کردیا۔
شوکت ترین کو کل صبح 11 بجے ایف آئی اے سائبر کرائم سرکل میں پیش ہونے کی ہدایت کی گئی ہے۔
ایف آئی اے کی جانب سے تنبیہہ کی گئی ہے کہ عدم پیشی پر شوکت ترین کے خلاف دفعہ 174 کے تحت کارروائی کی جائے گی۔
وفاقی تحقیقاتی ایجنسی نے پاکستان تحریک انصاف کے سینیٹر اور سابق وزیر خزانہ شوکت ترین کو وزیرخزانہ کے پی تیمور سلیم جھگڑا کو وفاق سے تعاون نہ کرنےکی کال کرنے کے معاملے پر طلب کیا تھا۔
واضح رہے کہ شوکت ترین کی آئی ایم ایف کی ڈیل ناکام بنانے کی مبینہ کوشش سے متعلق آڈیو لیک ہوئی تھی۔ آڈیو لیک میں شوکت ترین نے تیمورجھگڑا کو کال کرکےکہا تھا کہ وفاقی حکومت کو خط لکھ کر بجٹ کی اضافی رقم واپس نہ کرنے کا کہہ دیں۔
شوکت ترین نے وزیر خزانہ تیمور جھگڑا کو ہدایت دیتے ہوئے کہا تھا کہ خط میں سب سے بڑا اور پہلا پوائنٹ ہوگا کہ جو سیلاب آیا ہے اس نے خیبرپختونخوا بیڑا غرق کردیا ہے، ہمیں سیلاب متاثرہ علاقوں میں بحالی کے لیے بہت پیسا چاہیے۔

پشاور: (ویب ڈیسک) خیبرپختونخوا میں قدرتی آفات اور پولیس آپریشنز کے دوران ڈرون کیمرے استعمال کرنے کا فیصلہ کیا گیا ہے۔
صوبے میں ڈرون کیمرے پولیس، زراعت، معدنیات اور محکمہ ریسکیو کے لیے استعمال کیے جائیں گے۔ وزیر اعلیٰ خیبر پختونخوا محمود خان نے منصوبے پر عملدرآمد کی منظوری دے دی۔
وزیر اعلیٰ خیبر پختونخوا محمود خان نے کہا کہ ڈرون ٹیکنالوجی سے پولیس کی آپریشنل اور تفتیشی صلاحیتوں میں بہتری آئے گی جبکہ ڈرونز کے ذریعے پٹرولنگ سے پولیس اہلکاروں کی جانوں کو محفوظ کیا جا سکے گا۔
انہوں نے کہا کہ ڈرونز کے ذریعے ریسکیو آپریشنز میں بھی خاطر خواہ بہتری ممکن ہو گی اور منصوبہ مؤثر پولیسنگ کی طرف اہم سنگ میل ثابت ہو گا۔
وزیر اعلیٰ خیبر پختونخوا نے پہلے مرحلے میں محکمہ پولیس اور پی ڈی ایم اے میں ڈرون ٹیکنالوجی کے استعمال کی ہدایت کرتے ہوئے کہا کہ دوسرے مرحلے میں منصوبے کو معدنیات، زراعت اور دیگر شعبوں تک توسیع دی جائے۔
وزیر اعلیٰ کو دی گئی بریفنگ میں بتایا گیا کہ ڈرون منصوبے کا ابتدائی تخمینہ لاگت 500 ملین روپے ہے اور پہلے مرحلے میں ڈویژنل ہیڈکوارٹرز سے منصوبے کا اجرا کیا جائے گا۔

اسلام آباد: (ویب ڈیسک) وفاقی وزیر داخلہ رانا ثناءاللہ کا کہنا ہے کہ ریاست کے دارلخلافہ پر چڑھائی کے لیے جو صوبے لانگ مارچ کو سپورٹ کرینگے اس کے خلاف کاروائی کا اختیار آئین پاکستان وفاقی حکومت کو دیتا ہے۔
پاکستان تحریک انصاف کے متوقع احتجاج پر ردعمل ظاہر کرتے ہوئے وفاقی وزیر داخلہ نے کہا کہ احتجاج تحریک انصاف کا آئینی حق ہے لیکن وہ سپریم کورٹ کی مختص کی گئی جگہ پر احتجاج کریں تو ہم ان کو سیکورٹی فراہم کریں گے، لیکن اگر وہ ڈی چوک کی طرف آئینگے تو پھر ان کو دھونی دی جائے گئی۔
وزیر داخلہ نے تحریک انصاف کے لانگ مارچ پر صوبوں کے حوالے سے موقف اختیار کیا کہ ریاست کے دارلخلافہ پر چڑھائی کے لیے جو صوبے لانگ مارچ کو سپورٹ کرینگے اس کے خلاف کاروائی کا اختیار آئین پاکستان وفاقی حکومت کو دیتا ہے۔ یہ معاملہ وفاقی کابینہ اور وزیر کے ساتھ ڈسکس کرکے اختیار کو استعمال کیا جائےگا۔
اگر یہ لوگ ڈی چوک کا رخ کریں گے تو پھر ان کو دھونی دی جائے گئی، جس میں کرنٹ آجائے ہوگا اور یہ بھاگ جائیں گے، عمران خان جیسے احمق اور پاگل شخص کے ساتھ کوئی کوئی مزاکرات نہیں ہوسکتے۔
انہوں نے مزید کہا کہ جن لوگوں نے اس کی حمایت کی تھی وہ بھی کانوں کو ہاتھ لگارہیں ہیں، اب اس شخص سے کوئی محفوظ نہیں۔

اسلام آباد: (ویب ڈیسک) وزیراعظم محمد شہبازشریف نے کہا ہے کہ میں نے عالمی رہنماؤں کو پاکستان میں سیلاب سے ہونے والی تباہ کاریوں سے آگاہ کرتے ہوئے موسمیاتی تبدیلیوں سے نمٹنے کے لئے اجتماعی کوششوں اور اقدامات کی ضرورت کو اجاگر کیا ہے۔
سماجی رابطے کی ویب سائٹ ٹوئٹر پر اپنا پیغام جاری کوتے ہوئے وزیراعظم شہبازشریف نے کہا ہے کہ اقوام متحدہ کی جنرل اسمبلی کے 77ویں اجلاس کے موقع پر میں نے دنیا کے مختلف ممالک کے سربراہان سے ملاقاتیں کی ہیں جن میں انہیں بتایا کہ پاکستان تجارت اور معیشت کے لئے اشتراک کار کاخواہاں ہے۔
وزیراعظم نواز شریف نے تجارت اور معیشت سے متعلق دیگر ممالک کے ساتھ تعلقات کو مضبوط بنانے کے پاکستان کے ارادے کو اجاگر کیا ہے۔
انہوں نے کہا کہ میں نے عالمی رہنماؤں کو یہ بھی بتایا ہے کہ پاکستان تجارت اور معیشت کے شعبوں میں شراکت داری قائم کرنے کا خواہشمند ہے۔

لاہور : (ویب ڈیسک) لاہور ہائیکورٹ راولپنڈی بینچ نے عمران خان اور فواد چودھری کے خلاف توہین الیکشن کمیشن کے شوکاز نوٹس معطل کردیے۔
لاہور ہائیکورٹ راولپنڈی بینچ میں عمران خان اور فواد چودھری کی درخواست پر سماعت ہوئی۔عمران خان اورفوادچودھری کی طرف سے بابراعوان اورفیصل چودھری عدالت میں پیش ہوئے ۔
لاہورہائیکورٹ راولپنڈی بینچ نے عمران خان اور فواد چودھری کو جاری کیے گئے توہین الیکشن کمیشن کے شوکاز نوٹس معطل کردیئے۔
عمران خان اورفوادچودھری سے متعلق شوکاز نوٹس کے معاملے پر 29 ستمبر کو لارجر بینچ سماعت کرے گا۔
واضح رہے کہ الیکشن کمیشن نے عمران خان اور فواد چودھری کے خلاف توہینِ الیکشن کمیشن کے شوکاز نوٹسز جاری کیے تھے۔ نوٹس کے متن میں کہا گیا تھا کہ عمران خان نے عوام سے خطاب میں چیف الیکشن کمشنر پر الزامات لگائے اور توہین آمیز ریمارکس دیے۔
عمران خان اور فواد چودھری نے الیکشن کمیشن کے شوکاز نوٹسز لاہور ہائی کورٹ راولپنڈی بینچ میں چیلنج کیے تھے۔
عمران خان اور فواد چودھری نے درخواست میں مؤقف اختیار کیا ہے کہ الیکشن کمیشن کو توہین عدالت کا اختیار حاصل نہیں، آئین کے مطابق عدالتی اختیارات انتظامی اداروں کو تفویض نہیں کیے جاسکتے۔
درخواست کے متن کے مطابق الیکشن کمیشن کے شوکاز نوٹسز آئین و قانون کے خلاف ہیں، الیکشن کمیشن کے ممبر سندھ اپنے خلاف مبینہ توہین کے مقدمے کے خود جج ہیں۔