کراچی: (ویب ڈیسک) ملک میں فی تولہ سونے کی قیمت میں اضافہ ہوگیا۔
سونے کی فی تولہ قیمت میں 400 روپے کا اضافہ ہوا اور فی تولہ قیمت ایک لاکھ 55 ہزار 100 روپے ہوگئی۔
10 گرام سونے کا بھاؤ 343 روپے اضافے سے ایک لاکھ 32ہزار 973 روپے ہے جبکہ عالمی صرافہ میں سونے کی قدر 7 ڈالرز اضافے سے 1669 ڈالرز فی اونس ہے
اسلام آباد: (ویب ڈیسک) پاکستان تحریک انصاف کے متوقع لانگ مارچ اور دھرنے سے نمٹنے کے لیے تیاریاں شروع کر دی گئیں۔
ذرائع کے مطابق متوقع لانگ مارچ کے دوران مظاہرین پر آنسو گیس کے شیل ڈرون کے ذریعے پھینکنے کے لیے خصوصی انتظامات کر لیے گئے ہیں، صوبوں سے ایف سی کے 3 ہزار اہلکار اسلام آباد پہنچ گئے، وفاقی پولیس نے صوبوں سے پولیس، رینجرز اور ایف سی کے 30 ہزار اہلکار مانگے، پنجاب سے 20ہزار٫،خیبر پختونخوا سے 4 ہزار جبکہ 6 ہزار نفری رینجرز مانگی گئی ہے۔
ذرائع کے مطابق پولیس، ایف سی اور رینجرز کے علاوہ سینکڑوں کینٹرز بھی لگائے جائیں گے، داخلی راستوں پر کینٹرز کے ساتھ خندقیں بھی کھودی جائیں گی، پنجاب اور خیبر پختونخوا نے ابھی تک نفری دینے کا فیصلہ نہیں کیا۔
کراچی: (ویب ڈیسک) قومی کرکٹ ٹیم کے لیفٹ ہینڈ بیٹر شان مسعود آج ٹی ٹوئنٹی انٹرنیشنل کرکٹ میں اپنا ڈیبیو کریں گے۔
شان مسعود ٹی ٹوئنٹی انٹرنیشنل کرکٹ میں پاکستان کی جانب سے ڈیبیو کرنے والے 97 ویں کھلاڑی ہوں گے۔ اس سے قبل وہ 25 ٹیسٹ اور 5 ون ڈے انٹرنیشنل میچزمیں پاکستان کی نمائندگی کر چکے ہیں۔
اپنے ویڈیو بیان پر شان مسعود نے کہا کہ کسی بھی فارمیٹ میں پاکستان کی نمائندگی کرنا اعزاز ہوتا ہے، تینوں فارمیٹ میں مستقل جگہ قائم رکھنا اب میرا ہدف ہوگا۔
ان کا کہنا تھا کہ ریڈ بال سے کھیل کی بنیاد مضبوط ہوتی ہے،وائٹ بال کرکٹ میں بہترین کارکردگی کا مظاہرہ کرنے کی کوشش کروں گا۔
کراچی: (ویب ڈیسک) آسٹریلیا، انگلینڈ کے بعد باری ہے نیوزی لینڈ کی،.مہمان کرکٹ ٹیم دسمبر میں پاکستان کا دورہ کرے گی، کیویز دو ٹیسٹ اور تین ون ڈے میچز کھیلنے آئیں گے۔
پہلا ٹیسٹ میچ ملتان اور دوسرا کراچی میں ہوگا، جبکہ تینوں ایک روزہ میچز کی میزبانی بھی شہر قائد ہی کرے گا
نیوزی لینڈ ٹیم نے 2021 میں دورہ منسوخ کرنے کا ہرجانہ بھی ادا کرنے کی رضامندی بھی ظاہر کردی۔
مہمان ٹیم پاکستان سپر لیگ کے بعد اپریل میں 5 ون ڈے اور پانچ ٹی ٹوئنٹی میچز کھیلنے دوبارہ پاکستان آئے گی۔
دوسری جانب انگلینڈ نے بھی ورلڈ کپ کے بعد دورہ تین ٹیسٹ میچز کھیلنے پاکستان آنا ہے
پاک نیوزی لینڈ میچز کی تاریخوں کا اعلان مہمان بورڈ اور پی سی بی کے مشاورت کے بعد کیا جائے گا۔
اسلام آباد: (ویب ڈیسک) الیکشن کمیشن آف پاکستان نے انتخابی قوانین کی خلاف ورزی پر پیش نہ ہونے پر سابق وزیراعظم اور پاکستان تحریک انصاف کے چیئر مین عمران خان کو نوٹس جاری کر دیا۔
واضح رہے کہ الیکشن کمیشن نے ضابطہ اخلاق کی خلاف ورزی کرتے ہوئے چارسدہ جلسے میں شرکت پر تحریک اںصاف کے چیئرمین عمران خان اور وزیراعلیٰ خیبر پختونخوا محمود خان کو طلب کیا تھا۔
طلبی کے باوجود عمران خان پیش نہ ہوئے تاہم وزیراعلیٰ کے پی محمود خان کے وکیل الیکشن کمیشن کے سامنے پیش ہوگئے اور انہوں نے کمیشن سے پیشی کے لیے وقت مانگ لیا جس پر الیکشن کمیشن نے انہیں بھی 23 ستمبر کو دوبارہ طلب کرلیا۔
الیکشن کمیشن کی طرف سے جاری کردہ نوٹس کے مطابق سابق وزیراعظم کو نوٹس چارسدہ میں جلسہ کرنے پر کیا گیا، نوٹس الیکشن کمیشن میں پیش نہ ہونے پر دیا گیا پشاور:عمران خان 23 سےستمبرکو الیکشن کمیشن کے سامنے پیش ہوں۔ پیش نہ ہونے کی صورت میں قانون کے مطابق کاروائی کی جائے گی۔
کراچی: (ویب ڈیسک) وفاقی وزیر داخلہ رانا ثنا اللہ نے کہا ہے کہ ہو سکتا ہے کہ عمران خان کو اٹھا کر تھر سے باہر کردیا جائے، امید ہے ایم کیو ایم قیادت ہم پر اعتماد رکھے گی۔
انہوں نے یہ بات ایم کیو ایم پاکستان کے کنوینر ڈاکٹر خالد مقبول صدیقی سمیت دیگر مرکزی رہنماؤں سے ملاقات کے بعد پریس کانفرنس سے خطاب کرتے ہوئے کہی۔
پاکستان مسلم لیگ (ن) کے مرکزی رہنما رانا ثنا اللہ نے ایک سوال کے جواب میں کہا کہ ہم تیار ہیں، وہ کریں گے کہ پھر اسلام آباد نہیں آئیں گے، تصادم کے راستے کے بجائے افہام و تفہیم سے معاملے کو ااگے بڑھائیں گے۔
ن لیگ کے مرکزی رہنما اور وفاقی وزیر سردار ایاز صادق کے ہمراہ ایم کیو ایم پاکستان کی مرکزی قیادت سے ملاقات کے لیے کراچی پہنچنے والے وفاقی وزیر داخلہ رانا ثنا اللہ نے کہا کہ ادارے ملک کا امن تبا ہ کرنے والوں کو جہنم واصل کریں گے۔
انہوں نے کہا لاپتہ افراد کے معاملے پر وزیراعظم سے ملاقات کی تھی، لوگوں کا تحفظ ریاست کی ذمہ داری ہے، ایم
کیوایم کے لاپتہ لوگوں پر ان کی وفد نے بھی وزیراعظم سے ملاقات کی تھی، وزیراعظم سے ملاقات میں یہ طے ہوا تھا کہ ایم کیوایم قیادت سے تعزیت کریں گے۔
وفاقی وزیر داخلہ رانا ثنا اللہ نے کہا کہ لاپتہ افراد کا تعلق جس صوبے سے بھی ہو ان کی بازیابی کے لیے ہرممکن کوشش کریں گے، حکومت کی یقین دہانی پر کوئٹہ میں لاپتہ افراد کے لواحقین نے دھرنا ختم کیا، یقین دلاتا ہوں متاثرہ خاندانوں کی دادرسی کریں گے۔
انہوں نے واضح طور پر کہا کہ سوات میں دہشت گردوں کی آمد کی باتیں افواہیں ہیں، سوات میں سیکیورٹی ادارے پوری طرح الرٹ ہیں، عمران خان اگر حوصلہ رکھتے ہیں تو ان کو نام بھی لینا چاہیے۔
وفاقی وزیرداخلہ رانا ثنااللہ نے ایک سوال کے جواب میں واضح کیا کہ گمشدہ اور لاپتہ کرنے کے خلاف ہیں، ایسا نہیں ہونا چاہیے۔
واشنگٹن: (ویب ڈیسک) امریکی عدالت نے ایک پوڈ کاسٹ سیریل میں بتائے گئے حقائق کی روشنی میں 22 سال سے گرل فرینڈ کو قتل کرنے کے الزام میں عمر قید کاٹنے والے پاکستانی نژاد عدنان سید کی سزا ختم کردی۔
عالمی خبر رساں ادارے کے مطابق امریکی نژاد پاکستانی عدنان سید کو 2000ء میں اپنی سابق گرل فرینڈ کے قتل کے الزام میں عمر قید کی سزا سنائی گئی تھی تاہم اب 23 سال جیل میں سزا کاٹنے کے بعد ڈرامائی انداز میں ان کی سزا ختم کردی گئی۔
عدنان سید کی گرل فرینڈ ہائی من لی کی لاش فروری 1999 میں بالٹی مور کے جنگل میں ایک قبر سے ملی تھی۔ فرانزک رپورٹ کے مطابق 18 سالہ لڑکی کو گلا گھونٹ کر قتل کیا گیا تھا۔
چونکہ عدنان سید مقتولہ سے پیار کرتے تھے اور اسکول میں یہ بات مشہور بھی تھی لیکن ہائی من لی کسی اور سے محبت کرتی تھی اس لیے قتل پر پہلا شک پاکستانی نوجوان پر ہی گیا اور بدقسمتی سے ان کی موبائل لوکیشن بھی قتل گاہ پر پائی گئی تھی۔
عدنان سید 2000ء میں صرف 19 سال کے تھے جب انھیں حسد اور جلن کے باعث گرل فرینڈ کو قتل کرنے کے الزام میں صرف موبائل لوکیشن ہونے کی وجہ سے عمر قید کی سزا سنائی گئی تھی حالانکہ اس زمانے میں موبائل ڈیٹا اتنا قابل اعتماد نہیں ہوا کرتا تھا۔
عدنان سید نے کبھی جرم کا اعتراف نہیں کیا تھا بلکہ ہمیشہ اپنی بے گناہی پر ثابت قدم رہے تاہم سزا کے بعد کی گئی تمام اپیلیں کو مسترد کر دی گئیں۔ عدنان سید نے اپنی بے گناہی ثابت کرنے کے لیے 2019 میں سپریم کورٹ سے رجوع کیا لیکن عدالت عظمیٰ نے بھی سماعت سے انکار کردیا۔
اس دوران عدنان سید کی خاندان کی دوست رابعہ چوہدری رحمت کا فرشتہ بن کر آئیں جنھوں نے سارہ کینیگ نامی ایک امریکی صحافی کو ای میل کی اور اُن سے نوجوان لڑکی کے قتل کی دوبارہ تحقیقات کی اپیل کی۔
صحافی سارہ کینینگ نے پوڈ کاسٹ کی پہلی قسط میں یہ بات جاننے سے آغاز کیا کہ قتل کے وقت عدنان سید نے کہاں وقت گزارا تھا جس کے لیے صحافی نے اس وقت کے طلبا سے انٹرویو کیے یہ طلبا اب بڑے ہوچکے تھے۔
2014 کے اس کامیاب ترین پوڈ کاسٹ سیریل کی بدولت اس کیس نے نہ صرف دنیا بھر میں توجہ حاصل کی بلکہ عدالت بھی متوجہ ہوئی اور کیس پر ماہر جاسوس، تفتیش کاروں اور سابق پولیس افسران نے بھی رائے پیش کیں۔
12 اقساط پر مشتمل ہفتہ وار پوڈ کاسٹ میں اب یہ بات واضح ہوگئی کہ گرل فرینڈ قتل کیس میں پولیس نے ایک بڑے ثبوت کو نظر انداز کیا جو لاش پر سے عدنان سید کا ڈی این اے نہ ملنا تھا۔ اگر قتل اور پھر لاش کو دفن ملزم نے کیا تھا تو لاش پر ان کا ڈی این اے ہونا چاہیئے تھا۔
سنسنی خیز پوڈ کاسٹ کی اقساط عدالتی ججوں کی نظر سے بھی گزریں جس پر میری لینڈ کے شہر بالٹی مور کے سٹی سرکٹ کورٹ کی جج میلیسا فن نے عدنان سید کی سزا ختم کرکے پولیس کو ہتھکڑی کھول کر ملزم کو رہا کرنے کا حکم دیا۔
رہائی کا حکم سنتے ہی کمرۂ عدالت میں عدنان سید، ان کے اہل خانہ اور دوستوں میں خوشی کی لہر دوڑ گئی۔ اب عدنان سید 42 سال کے باریش ادھیڑ عمر شخص تھے جن کے بال میں سفیدی آگئی تھی اور سر پر ٹوپی بھی پہن رکھی تھی۔
پوڈ کاسٹ میں ہونے والی تحقیقات کے نتیجے میں اس کیس میں اب دو مشتبہ افراد کے حوالے سے بھی نئی معلومات سامنے آئی ہیں۔ اس حوالے سے تحقیقات مکمل ہونے اور ڈی این اے رپورٹ آنے تک عدنان سید کو گھر میں ہی نظر بند رکھا جائے گا۔
مقتولہ کے بھائی نے عدالتی فیصلے پر مایوسی کا اظہار کرتے ہوئے اسے غیر متوقع قرار دیا۔
تہران: (ویب ڈیسک) تہران کے پولیس چیف نے حجاب قانون کی خلاف ورزی پر حراست میں لی گئی لڑکی مھسا امینی کی دوران حراست موت کو ’بدقسمتی‘ قرار دے دیا۔
غیر ملکی میڈیا کے مطابق ایرانی دارالحکومت تہران میں 22 سالہ لڑکی مھسا امینی کی دوران حراست موت کے بعد ایران کے مختلف شہروں میں مظاہرے پھوٹ پڑے ہیں جو تین روز گزرنے کے باوجود بھی جاری ہیں۔
ایران کے مغربی صوبے اور دارالحکومت میں احتجاج کے دوران مظاہرین اور پولیس کے درمیان جھڑپوں کے دوران دو افراد ہلاک ہوچکے ہیں۔
ایران میں مظاہروں کی ویڈیوز سوشل میڈیا پر وائرل ہورہی ہیں جس میں مظاہرین کو پولیس اہلکاروں پر پتھراؤ کرتے دیکھا جاسکتا ہے۔
عینی شاہدین نے مھسا امینی کی موت کی وجہ ایران کی اخلاقی پولیس کا تشدد قرار دیا ہے تاہم پولیس کے بریگیڈئیر جنرل حسین رحیمی نے الزامات کو مسترد کیا اور ’بزدلانہ‘ قرار دیا۔
مظاہرین کی جانب سے احتجاج کے دوران ’برگ بر ڈکیٹیر‘ کے نعرے بھی لگائے جارہے ہیں، عالمی میڈیا کے مطابق یہ نعرہ ایران کے سپریم لیڈر آیت اللہ خامنہ ای کے خلاف لگایا جاتا ہے۔
راولپنڈی: (ویب ڈیسک) امن دشمنوں کیخلاف لڑتے ہوئے پاک فوج ایک اور جوان وطن پر قربان ہو گیا۔ افغانستان کی طرف سے دہشتگردوں کی فائرنگ سے 34 سالہ سپاہی شہید ہو گیا۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق شمالی وزیرستان کے علاقے دوتوئی کے علاقے میں افغانستان سے دہشتگردوں نے سکیورٹی فورسز پر فائرنگ کی، اس فائرنگ کا سکیورٹی فورسز نے بھرپور جواب دیا ۔
آئی ایس پی آر کے مطابق سکیورٹی فورسز کی بھرپور کارروائی کے بعد دہشتگردوں کو بھاری جانی نقصان اٹھانا پڑا، تاہم فائرنگ کے تبادلے کے دوران سپاہی نذر محمد شہید ہو گیا، 34 سالہ سپاہی کا تعلق جعفر آباد سے ہے۔
بیان کے مطابق پاکستان دہشتگردوں کی جانب سے پاکستان کیخلاف سرگرمیوں کےل یے افغان سر زمین کے استعمال کی شدید الفاظ میں مذمت کرتا ہے، اور امید کرتا ہے کہ افغان عبوری حکومت مستقبل میں ایسی سرگرمیوں کی اجازت نہیں دے گی۔ پاک فوج دہشت گردی کی لعنت کے خلاف ملکی سرحدوں کے دفاع کے لیے پرعزم ہے اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
لاہور: (ویب ڈیسک) گزشتہ دنوں دریا میں پلاسٹک کی تھیلیاں پھینکنے کی وجہ سے تنقید کا نشانہ بننے کے بعد پاکستانی شوبز انڈسٹری کی معروف اداکارہ ریشم نے سڑکوں کی صاف صفائی شروع کردی۔
اداکارہ ریشم نے اپنے انسٹاگرام اکاؤنٹ پر ایک ویڈیو شیئر کی ہے جس میں وہ سڑک کنارے پڑے گندگی کے ڈھیر کی صفائی کرتی ہوئی نظر آ رہی ہیں۔
ویڈیو کے کیپشن میں ریشم نے لکھا کہ ’پچھلے دنوں میں نے بہت کچھ سیکھا جس کے لیے میں ہر ایک کا شکریہ ادا کرنا چاہتی ہوں، خاص طور پر اپنے خیر خواہوں کا جنہوں نے میری رہنمائی کرنے اور میری اصلاح کرنے کی کوشش کی، پاکستان ہمارا گھر ہے اور ہمیں اسے صاف ستھرا رکھنا چاہیے‘۔
اداکارہ نے مزید لکھا کہ’ میں نے گلی محلوں میں پھیلے کوڑے کی صفائی کرنے میں پہل کی ہے، میرا خیال ہے کہ مجھ سے ملنے والی تکلیف کے بعد میرا یہ عمل سب کو راحت دے گا، آئیے پاکستان کو صاف ستھرا بنائیں، یہ میرے لیے اور ہم سب کے لیے ایک نئی شروعات ہے‘۔
اداکار احسن خان نے ریشم کے اس اقدام کو سراہتے ہوئے یہ ویڈیو اپنی انسٹا اسٹوری میں شیئر کی اور ساتھ ہی لکھا کہ ’یاد رہے یہ کچرا ریشم نے نہیں پھینکا‘۔
ریشم کے مداح اور سوشل میڈیا صارفین کی جانب سے اداکارہ ریشم کے اس عمل کو خوب سراہا جا رہا ہے اور صارفین اداکارہ کی تعریف کرتے دکھائی دے رہے ہیں۔
یاد رہے کہ گزشتہ دنوں ریشم سیلاب زدگان کی مدد کے لئے اندرون ِ پنجاب دورے پر گئی ہوئیں تھیں جہاں انہوں نے دریا میں مچھلیوں کو کھانا ڈالتے ہوئے ساتھ پلاسٹک کی تھیلیاں بھی دریا میں پھینک دی تھیں۔
جس پر سوشل میڈیا صارفین سمیت شنیرا اکرم نے انہیں کڑی تنقید کا نشانہ بنایا تھا تاہم ریشم نے بعد میں اس پر سب سے معافی مانگ لی تھی۔
