اسلام آباد: (ویب ڈیسک) پاکستان تحریک انصاف کو اپنے ممکنہ لانگ مارچ سے قبل ہی سندھ سے بڑی کامیابی ملنا شروع ہو گئی، سندھ سے بڑی سیاسی شخصیات نے پی ٹی آئی میں شمولیت کا اعلان کر دیا۔
تفصیلات کے مطابق سندھ سے سیاسی شخصیات نے پاکستان تحریک انصاف (پی ٹی آئی) کے چیئر مین اور سابق وزیراعظم عمران خان سے ملاقات کی، ملاقات کرنے والوں میں مخدوم فضل ممبر کور کمیٹی (جی ڈی اے)، مخدوم محسن ممبر کور کمیٹی (جی ڈی اے)، مخدوم عمار، مخدوم حسنین اور شعیب خان ترین شامل تھے۔
ملاقات کے دوران پاکستان تحریک انصاف کے مرکزی سیکرٹری جنرل اسد عمر، شبلی فراز، فواد حسین اور سابق گورنر سندھ عمران اسماعیل بھی موجود تھے۔
ملاقات کے دوران تمام سیاسی رہنماؤں نے پی ٹی آئی میں شمولیت کا اعلان کر دیا اور عمران خان کی قیادت پر مکمل اعتماد کا اظہار کیا۔
یاد رہے کہ گرینڈ ڈیمو کریٹک الائنس کے رہنما مخدوم فضل ممبر نے این اے 223 میں الیکشن میں حصہ لیا تھا اور 50 ہزار سے زائد ووٹ حاصل کیے تھے۔ اس حلقے میں پاکستان پیپلز پارٹی کے امیدوار مخدوم جمیل الزمان نے فتح حاصل کی تھی۔

کراچی: (ویب ڈیسک) شہر قائد کے علاقے صدر میں نامعلوم افراد کی فائرنگ سے غیر ملکی شخص ہلاک ہو گیا۔
پولیس کے مطابق صدر ایمپریس مارکیٹ میں فائرنگ کا واقعہ پیش آیا اور ہلاک ہونے والا شخص چینی باشندہ ہے۔ فائرنگ ڈینٹل کلینک پر کی گئی اور واقعہ کی اطلاع کے بعد پولیس کی بھاری نفری موقع پر پہنچ گئی۔
فائرنگ کے واقعہ میں خاتون سمیت دو افراد زخمی بھی ہوئے جنہیں فوری طور پر قریبی اسپتال منتقل کر دیا گیا۔
پولیس نے جائے وقوعہ کو گھیرے میں لے لیا اور لاش کو پوسٹ مارٹم کے لیے اسپتال منتقل کر دیا گیا۔
پولیس کا کہنا ہے کہ واقعے کی تحقیقات شروع کر دی گئی ہے اور جلد ملزمان کو گرفتار کر لیں گے۔ کلینک سے نائن ایم ایم کے 7 خول ملے ہیں۔
وزیر اعلیٰ سندھ سید مراد علی شاہ نے کراچی میں غیرملکی باشندے کے قتل کا نوٹس لیتے ہوئے ایڈیشنل آئی جی کراچی سے تفصیلی رپورٹ طلب کر لی۔ وزیر اعلیٰ سندھ نے قاتلوں کو فوری گرفتار کر کے رپورٹ پیش کرنے کی ہدایت کرتے ہوئے کہا کہ اس قسم کے واقعات ناقابل برداشت ہیں۔

اسلام آباد: (ویب ڈیسک) وزیر داخلہ نے کہا ہے کہ عمران خان کو قوم کا مزید نقصان نہیں کرنے دیں گے۔
رانا ثناء اللّٰہ نے اسلام آباد میں پریس کانفرنس کرتے ہوئے کہا کہ عمران خان غیر ملکی ایجنڈے پر ہے، اس کی آڈیو لیک سے چیزیں واضح ہو گئی ہیں، عمران خان کا قومی مفادات کے ساتھ گند باہر آچکا ہے۔
انہوں نے کہا کہ عمران خان احمق اور فتنہ گر ہے اس کو قوم کا مزید نقصان نہیں کرنے دیں گے، اگر فتنے اور فساد کو نہ روکا گیاتو یہ ملک کو بڑے سانحے سے دوچار کرے گا، عمران خان کی حکومت آئینی طریقہ کار سے ہٹایا گیا ہے، اس نے ملک کو بے پناہ نقصان پہنچایا ہے۔
راناثنااللہ نے کہا کہ وزیراعظم اور سیکرٹری کی آڈیو لیک ہوئی ہے اس کی اپنی اہمیت ہے اور اس میں جو مواد ہے اس کی الگ اہمیت ہے، جس نے ریکارڈنگ غیر قانونی طور پر کی ہے تو اس کے خلاف کارروائی ہونی چاہیے، مگر ایسا نہیں ہوسکتا کہ کوئی قومی مفاد کے خلاف بات کرے ریکارڈ پر آجائے تو کہے کہ میرے خلاف کارروائی نہ کی جائے۔

اسلام آباد: (ویب ڈیسک) پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا کہ اچھا ہوا آڈیولیکس سامنے آ گئیں، چیف الیکشن کمشنر کی آڈیو آنے کے بعد یہ استعفیٰ دے، اب سائفر کو قوم کے سامنے لایا جائے، شہبازشریف آفس سے پتا چلاعمران خان،اعظم خان کی بات چیت ریلیز کر دی، یہ آفیشل سیکرٹ ایکٹ کیخلاف ہے، سوچ رہا ہوں اسے عدالت لیکرجاؤں۔ ڈونلڈ لو نے جو بھی باتیں کیں سائفر کو پوری قوم کے سامنے لایا جائے۔
معیشت، خارجہ پالیسی ، انسانی حقوق اور دہشتگردی کے موضوع پر کنونشن سے خطاب کرتے ہوئے پاکستان تحریک انصاف کے چیئر مین کا کہنا تھا کہ مدینہ کی ریاست میں پہلے فکری انقلاب آیا تھا،عمران خان علامہ اقبال شاعری کے ذریعے لوگوں کوجگارہے تھے، ہمیں اپنی غلامی کی زنجیروں کوتوڑنا ہوگا، آزادی کے بغیرمعاشرہ اونچی پروازنہیں کرسکتا، اللہ ہمیں قرآن میں حکم دے رہا ہے اپنے نبیﷺ کے راستے پر چلو، میں نے رحمت اللعامین اتھارٹی بنائی، ہمیں اپنے بچوں کو نبی ﷺ کی سیرت پڑھانا ہو گی، اس حکومت نے آکررحمت اللعامین اتھارٹی بند کردی، مدینہ کی ریاست کی بنیاد عدل اور انصاف تھی، انصاف انسان کوحقوق دیتا ہے، آزاد قوم اپنے حقوق کی حفاظت کرتی ہے۔
سابق وزیراعظم نے کہا کہ افسوس پاکستان ابھی تک فلاحی ریاست نہیں بن سکا، برطانیہ میں فلاحی ریاست کے اصول دیکھے، برطانیہ میں جب یہ دیکھا تو میں نے فیصلہ کیا اللہ نےموقع دیا تو مدینہ کی ریاست کے اصولوں پر چلیں گے، ہیلتھ کارڈ غریب گھرانے کے لیے بہت بڑی نعمت ہے، بیماری کی وجہ سے لوگ مقروض ہو جاتے ہیں، ان کی بے حسی دیکھیں مریم کہہ رہی ہیں ہیلتھ کارڈ کو بند کر دو، شہباز شریف، مریم کو کہتا ہے ہاں ہیلتھ کارڈ کوبند کردیتے ہیں، 1960میں پاکستان مثالی ترقی کررہا تھا،غلط فیصلوں کی وجہ سے پاکستان اپنے پاؤں پر کھڑا نہیں ہوسکا، امداد پر انحصارپاکستان کی غلطی تھی، مسلم لیگ ن کی حکومت میں گزشتہ 5 سال میں ایکسپورٹ نہیں بڑھی تھی، جس نے بیڑہ غرق کیا اسی کو اب وزیر خزانہ لگا دیا۔
انہوں نے کہا کہ عمران خان آج ملک کی انڈسٹریز بند ہو رہی ہے، جب تک ایکسپورٹ نہیں بڑھائیں گے ملک کیسے ترقی کرے گا، یہ کرپٹ مافیا ہے ان کی کوشش ملک کا پیسہ چوری کرنا ہے، بنانا ری پبلک میں بھی ایسے مذاق نہیں ہوتے، مشرف دور میں جب نواز شریف پکڑا جانے لگا تو این آر او لیکر بھاگ گیا، مجھے توسمجھ نہیں آتی یہ جوملک کے محافظ ہیں کیا ان کو نظرنہیں آ رہا کہ ملک کے ساتھ ہو رہا ہے؟ نوازشریف، زرداری خود اربوں پتی بن گئے ملک کو مقروض کر دیا، جو بھی ان لوگوں کو مسلط کررہے ہیں اس سے بڑی ملک کے ساتھ غداری نہیں ہوسکتی۔
عمران خان کا کہنا تھا کہ اس ملک کی اخلاقیات کو تباہ کیا جا رہا ہے، مولانا رومیؒ نے کہا جب قوم اچھے برے کی تمیزختم کردے تو ختم ہوجاتی ہے، نامور ڈاکوؤں کو رجیم چینج کے بعد مسلط کر دیا گیا، انہوں نے اقتدارمیں آتے ہی 1100 ارب معاف کرائے، مریم نواز کو شرم نہیں آئی، داماد کے لیے بھارت سے مشینری منگوا رہی ہے، شرم نہیں آتی شہبازشریف کو کہتا ہے قوم کے خرچ پر گرڈ اسٹیشن بنا دیں گے، یہ ملک کے ساتھ مذاق ہورہا ہے، مسلم لیگ(ن)کی حکومت20ارب ڈالرکا بیرونی خسارہ چھوڑکرگئی تھی، ہماری حکومت20ارب ڈالرکے خسارے کو 16ارب ڈالرتک لیکرآئی۔
انہوں نے کہا کہ چین کے ساتھ ہمارے بڑے اچھے تعلقات تھے، کورونا کی وجہ سے چین دوسال تک مکمل بند رہا، ہماری حکومت نے کورونا ویکسین کا خرچہ بھی برداشت کیا، پانچ ماہ کے دوران جو انہوں نے پاکستان کے ساتھ کیا دشمن بھی ایسا نہیں کرسکتا تھا۔ شہبازشریف کا خاتون اینکر کو انٹرویو اس سے زیادہ شرمناک بات نہیں ہو سکتی، شہباز شریف خاتون اینکر کو ترس دلا رہا ہے کہ ہم لُٹ گئے، مارے گئے، شہباز شریف اینکر کو جوبائیڈن سمجھ کر امداد مانگ رہا تھا، قوم ارادہ کرلے ہم اپنے پاؤں پر کھڑا ہو سکتے ہیں، کورونا کے باوجود ہمارے دور میں پاکستان ترقی کر رہا تھا، عالمی اداروں نے ہماری کورونا کی پالیسی کو سراہا، بارودی سرنگیں ن لیگ ہمارے لیے چھوڑ کر گئیں تھی، ملک کی معیشت کے ساتھ اخلاقیات کو بھی تباہ کیا جا رہا ہے۔
پی ٹی آئی چیئر مین کا کہنا تھا کہ شہبازشریف چاہتا ہے دنیا کے پاؤں پکڑو اور جوتے پالش کرو، امریکا کی جنگ میں شرکت اور جوتے پالش کر کے ہم نے پاکستان کو ذلیل کیا، ریمنڈ ڈیوس نے دن دیہاڑے قتل کیے کسی نے نہیں پکڑا، پاکستان اتحادی تھا اور ہمارے اوپر ہی ڈرون حملے ہو رہے تھے، ہم نے جوتے پالش کیے اس لیے نیویارک میں جا کر بھکاریوں کی طرح بھیک مانگ رہے ہیں، دنیا کی تاریخ میں کبھی کوئی قوم اس طرح نہیں بنتی، ہم نے ایک خوددار پالیسی بنانے کی کوشش کی۔ روس تو پاکستان کے مفاد کے لیے گیا تھا، برطانوی اینکرنے کہا آپ کے روس جانے پر برطانیہ بھی ناراض ہے، برطانوی اینکر کو کہا مجھے 22 کروڑعوام نے منتخب کیا ہے، میری ترجیح تو غریب عوام کو ریلیف دینا تھا، میں نے برطانیہ سے کہا ایک لاکھ کشمیری شہید ہو چکے، کبھی آپ لوگوں نے ان کا سوچا، بدقسمتی سے یہاں پرغلام ذہنیت ہے انہیں ان چیزوں کی سمجھ نہیں۔
سابق وزیراعظم کا کہنا تھا کہ پاکستان میں رجیم چینج کا فیصلہ ہوا، حیرت ہوتی ہے ایجنسیزہمیں دشمن سمجھنا شروع ہوگئی ہے، پاکستان کے سنیئرز صحافی جنہوں نے لفافے نہیں لیے ان کو دشمنوں کی طرح ٹریٹ کیا جارہا ہے، ایک قبضہ گروپ ہے اس نے چینل لے لیا ہے، حیرت ہے ایجنسیز چوروں کے ساتھ کھڑی ہو گئی ہے، شہباز گل کو برہنہ کر کے مارا گیا، کون سے ملک میں ایسا مذاق ہوتا ہے، قوم سے کہتا ہوں جو نامعلوم کالز کر کے ڈرائے اسے آپ بھی ڈرائیں، قوم کو اپنے حقوق کی حفاظت کرنا ہو گی، قوم نے اپنے حقوق کے لیے کھڑا ہونا ہے، نامعلوم نمبرز والے ناؤنسز تم ہو کون ہمارے ہی ٹیکسوں پر چلنے والا ہمیں ہی دھمکیاں دے رہا ہے، جب قوم فیصلہ کر لے تو پھر کوئی اس کے سامنے کھڑا نہیں ہو سکتا۔
آڈیولیک پر انہوں نے کہا کہ اچھا ہوا آڈیوسامنے آگئی، اب سائفرکوقوم کے سامنے لے آؤ، ڈونلڈ لو نے جو بھی باتیں کیں سائفر کو پوری قوم کے سامنے لایا جائے۔ شہبازشریف آفس سے پتا چلاعمران خان،اعظم خان کی بات چیت ریلیز کر دی، یہ آفیشل سیکرٹ ایکٹ کیخلاف ہے، سوچ رہا ہوں اسے عدالت لیکرجاؤں۔
عمران خان کا کہنا تھا کہ یہ پاکستان کی تاریخ کا فیصلہ کن وقت ہے، جتنا گھٹیا چیف الیکشن کمشنر ہے اس سے زیادہ گھٹیا نہیں دیکھا، چیف الیکشن کمشنر بھگوڑے، سزا یافتہ چور سے آرڈر لے رہا ہے، کس دن استعفے منظور کرنے ہیں، ثابت ہوگیا ہے چیف الیکشن کمشنر شریف خاندان کا نوکر ہے، آڈیولیکس کے بعد چیف الیکشن کمشنرمیں شرم نہیں استعفیٰ دے، ہمارے پاس دوراستے ہیں ایک راستہ ان کے پھٹے ہوئے چور بچوں کے ساتھ یا حقیقی آزادی کا راستہ اپنانا ہے۔

اسلام آباد: (ویب ڈیسک) وزیر اعظم شہباز شریف نے کہا ہے کہ ہمیں اس بات کا افسوس ہے کہ ہم نے مہنگائی کا بہت بڑا بوجھ عوام کے کندھوں پر ڈالا حالانکہ ہم اس کے ذمہ دار نہیں تھے۔
وفاقی کابینہ کے اجلاس میں وزیر اعظم نے خطاب کرتے ہوئے کہا کہ خزانہ اسحاق ڈار نے وزارت خزانہ کا قلمدان سنبھالا ہے، میں اپنی اور تمام کابینہ اراکین کی جانب سے اسحاق ڈار کو مبارکباد پیش کرتا ہوں۔ وہ ایک تجربہ کار اور منجھے ہوئے سیاستدان ہیں، ہم سب ان کی کامیابی کے لیے دعاگو ہیں، انہوں نے ماضی میں بھی وزارت خزانہ کا قلمدان کامیابی سے سنبھالا ہے، ہم سب کی دعا ہے اللہ انہیں کامیابی عطا فرمائے اور اس مخلوط حکومت کو اسحٰق ڈار کی شمولیت سے مدد ملے۔
اپنی بات کو جاری رکھتے ہوئے انہوں نے کہا کہ مفتاح اسماعیل نے بہت محنت اور عرق ریزی سے کام کیا اور پاکستان کو دیوالیہ ہونے سے بچایا، ہمیں افسوس ہے مہنگائی کا بہت بڑا بوجھ ہم نے عوام کے کندھوں پر ڈالا حالانکہ ہم اس کے ذمہ دار نہیں تھے۔ کابینہ کے تعاون اور مفتاح اسماعیل کی بھرپور محنت کے ساتھ آئی ایم ایف کے ساتھ معاہدے کو بحال کیا گیا اور منطقی انجام تک پہچایا، کابینہ کے تمام اراکین کو مفتاح کی خدمات کا اعتراف کرنا چاہیے۔
شہباز شریف نے کہا کہ سمرقند کے شنگھائی تعاون تنظیم (ایس سی او) اجلاس میں ہم نے شرکت کی، یہ ایک کامیاب دورہ تھا جہاں تمام عالمی رہنماؤں سے ہم نے بالمشافہ بھی ملاقات کی، کانفرنس میں بھی پاکستان کی بہترین نمائندگی ہوئی۔ اس دورے میں پاکستان میں آنے والے سیلاب کے حوالے سے تفصیلی گفتگو ہوئی، دیگر ممالک کی جانب سے بھی اپنی تقاریر میں پاکستان کے لیے بھرپور تعاون کا اظہار کیا گیا۔
وزیراعظم نے کہا کہ میں بلاول بھٹو کا شکر گزار ہوں، انہوں نے بہت محنت کی اور بھرپور ہوم ورک کیا، حنا ربانی کھر نے بھی بھرپور کردار ادا کیا، شیری رحمٰن وہاں موجود نہیں تھیں لیکن انہوں نے بھی اپنا کردار ادا کیا، دفتر خارجہ کے عملے کا بھی میں شکر گزار ہوں۔
شہباز شریف نے کہا کہ سابق حکومت کی بدترین غفلت اور ناقص کارکردگی کا بوجھ ہم نے اٹھایا، ہمیں تکلیف ہے کہ عوام کو مہنگائی کا بوجھ اٹھانا پڑا لیکن ہم اس صورتحال کے ذمہ دار نہیں تھے، سابق حکومت نے پٹرولیم مصنوعات کی قیمت ایک دم کم کر دیں جبکہ دنیا میں قیمتیں آسمانوں سے باتیں کررہی تھیں لیکن بجٹ میں سبسڈی کیلئے کوئی رقم مختص نہیں کی، سابق حکومت نے معاہدوں کی دھجیاں اڑائیں جس کے باعث پاکستان قرضوں میں جکڑا گیا اور آئی ایم ایف کی شرائط مزید سخت ہو گئیں، ریاست پاکستان پر عالمی برادری کا اعتماد مجروح ہوا، سابق حکومت نے اپنے ہی کئے ہوئے معاہدوں کی پاسداری نہیں کی جس کے باعث ہمیں دنیا میں شرمندگی کا سامنا کرنا پڑا کہ ہم جو وعدے کرتے ہیں وہ پورے نہیں کرتے۔