اسلام آباد: (ویب ڈیسک) چیف جسٹس آف پاکستان جسٹس عمر عطاء بندیال نے کہا ہے کہ پولیس اور پراسیکیوشن کی ٹریننگ کی ضرورت ہے، ٹریننگ سے مقدمات کو نمٹانے میں تیزی آئے گی۔
عالمی عدالتی کانفرنس سے خطاب کرتے ہوئے چیف جسٹس آف پاکستان نے کہا ہے کہ کانفرنس کے کامیاب انعقاد پرمنتظمین کی کاوشیں لائق تحسین ہیں، جوڈیشل کانفرنس میں مندوبین کی شرکت کوسراہتے ہیں، انٹرنیشنل جوڈیشل کانفرنس سے بہت کچھ سیکھنے کوملا، انصاف کے نظام کودرپیش چیلنجزاورحل پربات کی گئی۔
انہوں نے کہا کہ کانفرنس میں دیگر ممالک کے چیف جسٹس اور ججز نے بھی شرکت کی، کانفرنس میں جسٹس سسٹم میں بہتری کی آئیڈیا سامنے آئے، تنازعات کے جلد حل کیلئے الٹرنیٹ ڈیپیوٹ ریزولیشن کے آئیڈیا کو فروغ دینے کی بات ہوئی۔
جسٹس عمر عطاء بندیال نے کہا کہ سپریم کورٹ نے ویڈیو لنک ٹیکنالوجی کی مدد سے ہزاروں مقدمات کا فیصلہ کیا، ویڈیو لنک ٹیکنالوجی کی وجہ سے مقدمے پر اٹھنے والے اخراجات میں کمی آئے، پولیس اور پراسیکیوشن کی ٹریننگ کی ضرورت ہے، پولیس اور پراسیکیوشن کی ٹریننگ سے مقدمات کو نمٹانے میں تیزی آئے گی۔

نیویارک: (ویب ڈیسک) وفاقی وزیر خارجہ بلاول بھٹو زرداری کی سوشل میڈیا پر ویڈیو وائرل ہو رہی ہے جس میں وہ کہتے ہیں میرا شادی کرنے کا ارادہ ہے۔
بلاول بھٹو زرداری جوکہ 34 برس کے ہوگئے ہیں لیکن اب تک اُنہوں نے شادی نہیں کی، اس لیے اکثر پاکستانیوں کو یہ جاننے کا کافی تجسس ہے کہ وہ کب شادی کریں گے۔ بلاول بھٹو کو اقوام متحدہ کی جنرل اسمبلی کے 77ویں اجلاس کے موقع پر بھی اسی سوال کا سامنا کرنا پڑا۔
عرب نیوز کی سماجی رابطے کی ویب سئٹ ٹویٹر پر ویڈیو میں غیر ملکی صحافی کو وزیرخارجہ سے سوال پوچھتے ہوئے سنا جاسکتا ہے کہ میرے پاکستانی دوست پوچھ رہے ہیں کیا آپ کا شادی کرنے کا کوئی ارادہ ہے؟
بلاول بھٹو زرداری اس سوال کے جواب میں ہنستے ہوئے کہتے ہیں کہ بالکل، میرا شادی کرنے کا ارادہ ہے۔
بلاول یہ مختصر جواب دینے کے بعد صحافی کے شادی کرنے کے وقت سے متعلق سوال کا جواب دیے بغیر ہی فوراَ وہاں سے آگے بڑھ گئے۔
لہٰذا بلاول بھٹو نے اپنی شادی سے متعلق سب سے زیادہ پوچھے جانے والے سوال کا جواب اس بار بھی نہیں دیا۔
البتہ پیپلز پارٹی کے ایک رہنما منظور وسان، جو سیاسی پیشگوئیاں کرنے کے لیے مشہور ہیں، اُنہوں نے اس حوالے سے بھی اپنی پیشگوئی کردی ہے۔
منظور وسان نے دسمبر 2019ء میں کہا تھا کہ بلاول پاکستان کے وزیر اعظم بننے کے بعد 2023 میں شادی کے بندھن میں بندھ جائیں گے۔
واضح رہے کہ بلاول بھٹو نے اپنی ہونے والی دلہن کے حوالے سے پوچھے گئے سوال کے جواب میں 2016 میں کہا تھا کہ میری شادی اس لڑکی سے ہوگی جو سب سے پہلے میری بہنوں کا دل جیتے، مجھے اس حوالے سے بہنوں کو اعتماد میں لینا ہوگا۔

حیدرآباد: (ویب ڈیسک) وزیر تعلیم سندھ سردار شاہ کا کہنا ہےکہ سیلاب کے باعث صوبے میں 28 لاکھ بچوں کی تعلیم متاثر ہو رہی ہے،کورونا سے پہلے ہی بہت نقصان ہوا ہے۔
حیدرآباد میں میڈیا سےگفتگو کرتے ہوئے سردار شاہ کا کہنا تھا کہ سیلاب کے باعث اسکول ریلیف کیمپوں میں تبدیل کیےگئے ہیں ،17 ہزار اسکولوں کی ایسی حالت نہیں کہ بچوں کو بٹھا سکیں، اسکولوں کو ٹھیک کرنے کے لیے فنڈز نہیں ہیں۔
سردار شاہ کا کہنا تھا کہ کافی اضلاع میں اسکول پانی میں ڈوبے ہوئے ہیں، 28 لاکھ بچوں کی تعلیم متاثر ہورہی ہے،کورونا سے پہلے ہی بہت نقصان ہوا، ضلعی انتظامیہ کو خط لکھا ہےکہ جلد متاثرین کو متبادل جگہوں پر بھیجیں۔
صوبائی وزیر تعلیم کا کہنا تھا کہ متاثرین کے لیے ریلیف کیمپ اسکولوں میں نہیں بنانے چاہیے تھے۔

نیویارک: (ویب ڈیسک) وزیراعظم شہباز شریف نے کہا ہے کہ عالمی برادری مدد کرے تاکہ سیلاب متاثرین کی بحالی یقین بنائی جا سکے۔
وزیر اعظم شہباز شریف نے امریکی خبر رساں ایجنسی کے دیئے گئے انٹرویو میں کہا ہے کہ موسمیاتی تغیرات کے باعث آج پاکستان کو سیلاب کا سامنا ہے اور سیلاب کے باعث 3 کروڑ سے زائد آبادی بے گھر ہو چکی ہے جبکہ 40 لاکھ ایکڑ سے زائڈ رقبے پر کھڑی فصلیں تباہ ہوئیں اور بچوں سمیت ایک ہزار 600 سے زائد افراد جاں بحق ہوئے۔
انہوں نے کہا کہ ہزاروں کلو میٹر سڑکوں سمیت انفراسٹرکچر شدید متاثر ہوا اور ابتدائی تخمینے کے مطابق سیلاب سے 30 ارب ڈالرز کا نقصان ہوا ہے۔ پاکستان کو سیلاب متاثرین کے ذریعہ معاش کے لیے فنڈز کی ضرورت ہے۔
شہباز شریف نے کہا کہ پاکستان کو دوسرے ممالک کی وجہ سے موسمیاتی تبدیلیوں کا سامنا ہے اور اگر موسمیاتی تبدیلیوں سے نہ نمٹا گیا تو کل کسی اور ملک کو بھی آفت کا سامنا کرنا پڑ سکتا ہے۔ عالمی برادری مدد کرے تاکہ سیلاب متاثرین کی بحالی یقینی بنائی جا سکے۔
انہوں نے کہا کہ روس یوکرین جنگ کی وجہ سے دنیا میں تیل اور اناج کا بحران پیدا ہوا جبکہ افغانستان میں پرامن حالات پاکستان میں بھی امن کی ضمانت ہیں۔ طالبان کو خواتین کے بنیادی حقوق کی پاسداری یقینی بنانا ہو گی اور خواتین کو تعلیم اور ملازمت کے یکساں مواقع فراہم کرنے چاہئیں۔
وزیر اعظم نے کہا کہ افغانستان کے منجمد اثاثوں کو فوری بحال کیا جانا چاہئے اور اقوام متحدہ مسئلہ فلسطین کے حل کے لیے بھی اپنا کردار ادا کرے۔ نائن الیون کے بعد پاکستان اور امریکہ انتہا پسندی کے خلاف اتحادی رہے ہیں۔
انہوں نے کہا کہ گزشتہ حکومت نے جو کچھ کیا وہ پاکستان کے مفادات کے لیے نقصان دہ تھا اور ہماری حکومت امریکہ کے ساتھ مضبوط تعلقات کی خواہاں ہے۔

اسلام آباد: (ویب ڈیسک) صدر سپریم کورٹ بار احسن بھون نے کہا ہے کہ کوئی شہری اگر جنسی طور پر خود کو ٹھیک نہیں سمجھتا تو وہ اپنا علاج کروا سکتا ہے اور یہ ہر شہری کا حق ہے۔
صدر سپریم کورٹ بار احسن بھون نے میڈیا سے گفتگو کرتے ہوئے کہا ہے کہ ٹرانسجینڈر بل کی ہر مکتبہ فکر اپنی اپنی تشریح کررہا ہے۔
انہوں نے کہا کہ ہماری اسمبلی کوئی ایسا غیر اخلاقی بل پاس نہیں کرسکتی اور قانون کو اسی طرح دیکھنا چاہیے جس طرح سامنے نظر آرہا ہے۔
احسن بھون کا مزید کہنا تھا کہ چیف جسٹس صاحب نے خواجہ سراؤں کے شناحتی کارڈ بنانے کا حکم دیا جو صحت مند سوسائٹی کے لیے اچھا اقدام تھا۔

سیالکوٹ: (ویب ڈیسک) وزیراعلیٰ پنجاب چودھری پرویز الٰہی نے کہا ہے کہ پنجاب حکومت گرانا مسلم لیگ ن کی خواہش ہی رہے گی، ہماری حکومت گرانے والے اپنی فکرمنائیں، یہ صوبائی حکومت کا کچھ نہیں بگاڑ سکتے۔
سیالکوٹ میں تقریب سے خطاب کرتے ہوئے وزیراعلیٰ پنجاب کا کہنا تھا کہ صوبے میں بچیوں کی تعلیم کےحوالے سےخصوصی توجہ دے رہے ہیں، مجھے دکھ ہوا شہبازشریف نے بیرون ممالک سے ملنے والی امداد کا ایک پیسہ نہیں دیا، عمران خان کی ٹیلی تھون سے ملنے والی امداد ہم ہرصوبے کودے رہے ہیں۔ وزیراعظم بیرون ملک جاکرکہتا ہے پیسے مانگنے نہیں آئے،مجھے ڈرہے یہ کسی ملک کو یہ نہ کہہ دیں مجھے واپسی کی ٹکٹ بھی دیں،یہ بڑا جھوٹا خاندان ہے۔
انہوں نے کہا کہ شہبازشریف نے ریسکیو 1122 پروگرام کو برباد کرنے کی پوری کوشش کی، پنجاب حکومت گرانا مسلم لیگ ن کی خواہش ہی رہے گی،ہماری ترجیح عام آدمی کو ریلیف دینا ہے،پنجاب حکومت گرانے والے اپنی فکرمنائیں یہ پنجاب حکومت کا کچھ نہیں بگاڑ سکتے، انہوں نے حکومت کے لالچ میں ملک کا بیڑہ غرق کر دیا ہے۔ بڑا ٹوپی ڈرامہ کرتے تھے شہبازشریف آئے گا توسب کچھ ٹھیک کر دے گا، شریف خاندان بری طرح ایکسپوزہوگیا ہے،یہ بھائی کوملنے چلا گیا اس کوکسی نے آنے نہیں دینا،نوازشریف جیسے ہی واپس آئے گا پکڑا جائے گا۔
اپنی بات کو جاری رکھتے ہوئے پرویز الٰہی کا کہنا تھا کہ بجلی کے بلوں میں اضافے سے عام آدمی کا برا حال ہے،تمام اسپتالوں کی ایمرجینسی ادویات کوفری اورڈاکٹروں کی تنخواہیں بھی بڑھائیں گے۔ ٹریفک وارڈن،پٹرولنگ پولیس فورس کوبھی بہترین تنخواہ ملے گی۔ ہمارا لیڈرقائد عمران خان نیک آدمی اورعوام کی خدمت کرنے کا جذبہ ہے، عمران خان کی قیادت میں پاکستان کا نقشہ بدلیں گے، شریف خاندان کو تکبر کی مار پڑی، مسلم لیگ ن کومشورہ ہے اب اپنی ٹکٹ گھرمیں ہی رکھیں، کسی نے نہیں لینی، الیکشن میں صرف ایک ہی ٹکٹ عمران خان کی ہوگی۔
وزیراعلیٰ پنجاب نے شہروں کے اندرسستی سٹی بس سروس شروع کرنے کا اعلان کرتے ہوئے کہا کہ کسانوں کے لیے بھی بہت بڑا پروگرام لارہے ہیں۔

اسلام آباد: (ویب ڈیسک) پاکستان انٹرنیشنل ایئر لائن (پی آئی اے) کے بیڑے میں نئے طیاروں کی آمد کا سلسلہ جاری، ہفتہ کو مزید ایک ایئر بس 320 طیارہ بیڑے میں شامل ہو گیا۔
پی آئی اے کے ترجمان کی طرف سے جاری بیان کے مطابق رواں سال پی آئی اے نے 4 عدد A320 طیارے حاصل کئے جس سلسلے کا تیسرا طیارہ شارجہ سے اسلام آباد پہنچ گیا ہے۔
ترجمان نے کہا کہ بہتر كبین کا حامل جدید ساختہ طیارہ پی آئی اے کے بیڑے میں شامل ہوکر مسافروں کو بہتر سفر ی سہولیات فراہم کرے گا۔ اس سلسلے کا چوتھا اور آخری طیارہ آئندہ چند روز میں وطن پہنچ جائے گا جس سے پی آئی اے کے بیڑے میں A320 ساختہ طیاروں کی تعداد 14 ہو جائے گی ۔