دادو: (ویب ڈیسک) وزیراعظم شہباز شریف نے کہا ہے کہ مصیبت کی اس گھڑی میں دکھی قوم کے سر پر دست شفقت رکھنے کے بجائے جلسے جلوسوں کے ذریعے سیاست کی جائے تو اس سے بڑا ظلم اور کیا ہوگا۔
یہ بات انہوں نے سیلاب سے متاثرہ ضلع دادو کے دورے میں میڈیا سے گفتگو کرتے ہوئے کہی۔ ان کے ہمراہ وزیر اعلیٰ سندھ مراد علی شاہ اور دیگر حکام بھی موجود تھے۔
وزیراعظم سیلاب سے متاثرہ دادو کے علاقے جھاکرو گئے جہاں خیمہ بستے کے دورے میں انہوں ںے سیلاب متاثرین سے ملاقاتیں کیں۔ انہوں ںے سیلاب متاثرین سے اظہار ہمدردی کیا اور امدادی کاموں کا جائزہ لیا۔
وزیراعظم کو بتایا گیا کہ صرف دادو میں سیلاب سے 37 افراد جاں بحق ہوئے، ضلع دادو کے تمام علاقے سیلاب سے متاثر ہوئے، وہاں کھڑی تمام فصلیں تباہ ہوگئیں، متاثرین کو ٹینٹ اور دیگر اشیا کی ضرورت ہے۔
شہباز شریف نے کہا کہ سیلاب متاثرین کی مدد کرنے والوں کا شکر گزار ہوں جو اپنے بھائیوں کی مدد کررہے ہیں، صوبائی حکومتیں سیلاب زدگان کے لیے بھرپور کام کررہی ہیں، سندھ میں مراد علی شاہ فعال ہیں، خیمے لگے ہوئے ہیں، ادویات تقسیم کی جارہی ہیں، فورسز کے جوان بھی امدادی کاموں میں مصروف ہیں۔
انہوں نے کہا کہ اس مصیبت کے وقت میں اگر کوئی خرابی آئے تو اسے آگے بڑھ کر ٹھیک کرنا چاہیے نہ کہ اسے سیاسی رنگ دیا جائے، سیلاب سے تین کروڑ 30 لاکھ متاثر ہوئے، سیلاب کے بعد اب بحالی کا مشکل مرحلہ موجود ہے، ہزاروں کلومیٹر طویل سڑکیں تباہ ہوگئی ہیں، انفرا اسٹرکچر تباہ ہوگیا ہے، ہمیں حوصلے کے ساتھ مل کر کام کرنا ہے۔
وزیراعظم کا کہنا تھا کہ مصبیت کے وقت تمام شعبہ جات کے افراد مل کر کام کرتے ہیں، ہمیں سیاست سے گریز کرنا چاہیے، سیاسی گیم میں نمبرز اسکورنگ سے گریز کرتے ہوئے دکھی قوم کے سر پر دست شفقت رکھا جائے نہ کہ جلسے جلوسوں کے ذریعے سیاست کی جائے اور دکھی لوگوں کو نہ پوچھا جائے تو اس سے بڑا ظلم کیا ہوگا۔
شہباز شریف کا کہنا تھا کہ سمرقند میں شنگھائی کانفرنس میں سیلاب کے معاملے پر میں نے اور وزیر خارجہ بلاول نے بھرپور آواز بلند کی، کئی ممالک کے سربراہان نے پاکستان کے ساتھ تعاون پر یقین دہانی کرائی، ان کے شکر گزار ہیں تاہم مدد کرنے والوں کو مزید آگے آنا ہوگا، دنیا کو ہمارے ساتھ کھڑا ہونا ہوگا۔
انہوں ںے کہا کہ سیلاب کے سبب پاکستان میں 1600 افراد جاں بحق ہوگئے اور 30 ارب ڈالر کا نقصان ہوا، یہ جو آفت آئی ہے یہ انسان کی اپنی پیدا کردہ ہے، بعض ممالک فضا میں کاربن کے اخراج میں سب سے آگے ہیں ان کی وجہ سے یہ زیادہ بارشیں ہوئیں جب کہ پاکستان فضا میں کاربن خارج کرنے کی شرح میں ایک فیصد سے بھی کم ہے، ہمارا کوئی قصور نہیں ہم دوسروں کی سزا بھگت رہے ہیں۔
انہوں نے بتایا کہ وفاقی حکومت کی جانب سے پچیس ہزار روپیہ فی خاندان دیا جارہا ہے اب تک 42 ارب روپیہ دیا جاچکا ہے، اس کمیپ میں اب تک یہ رقم تقسیم نہیں ہوا میں نے یہاں بھی تقسیم کی ہدایت کردی ہے۔

اسلام آباد: (ویب ڈیسک) پاکستان مسلم لیگ ن کے سینئر رہنما مفتاح اسماعیل نے وزیر خزانہ کے عہدے سے استعفیٰ دیدیا جسے وزیراعظم شہباز شریف نے منظور کر لیا۔
شہباز شریف سے مفتاح اسماعیل کی ملاقات ہوئی جس میں مفتاح اپنے عہدے سے مستعفی ہوگئے، انہوں نے استعفی وزیراعظم کو پیش کردیا۔
ملاقات کے دوران وزیراعظم شہباز شریف نے مفتاح اسماعیل کا استعفیٰ منظور کر لیا۔
اس موقع پر مفتاح اسماعیل نے کہا کہ آپ کی قیادت میں کام کرنا میرے لیے باعث فخر ہے۔

کراچی: (ویب ڈیسک) شہر قائد میں سی ٹی ڈی شعبہ تفتیش نے بڑی کارروائی کرتے ہوئے کالعدم لشکر جھنگوی بلوچستان کے مفرور ملزم کو گرفتار کرلیا۔
کاؤنٹر ٹیررازم ڈیپارٹمنٹ شعبہ تفتیش نے نیو کراچی انڈسٹریل ایریا میں بڑی کارروائی کی، سی ٹی ڈی حکام کے مطابق ملزم میرعلی حیدرتھانہ دشت ضلع مستونگ بلوچستان میں مفرور ہے، ملزم جرائم پیشہ خاندان سے تعلق رکھتا ہے، 2011 میں کیری روڈ مستونگ بلوچستان میں پولیس مقابلہ ہوا تھا جس میں ملزم فرار ہوگیا تھا جبکہ بھائی جمال گولی لگنے سے ہلاک ہوا تھا، 2015 کوئٹہ بلوچستان میں دوسرا بھائی مبشر بھی پولیس مقابلے میں مارا گیا تھا، تیسرا بھائی یاسین لشکر جھنگوی کا اہم کارکن ہے، گرفتار ملزم کے دیگر بھائی ایران میں روپوش ہیں۔
ملزم دو ہزار پندرہ میں بلوچستان پولیس کو متعدد سنگین وارداتوں میں مطلوب تھا، ملزم گرفتاری کے خوف سے بلوچستان سے فرار ہو کر کراچی میں روپوش ہوگیا تھا۔

اسلام آباد: (ویب ڈیسک) نامزد وزیر خزانہ اسحاق ڈار نے بطور سینیٹر حلف اٹھالیا اس موقع پر اپوزیشن نے چور چور کے نعرے بازی لگائے اور احتجاج کیا۔
سینیٹ کا اجلاس چیئرمین سینیٹ صادق سنجرانی کی زیرصدارت جاری ہے۔ اسحاق ڈار اجلاس میں شرکت کے لیے وفاقی وزرا رانا ثنااللہ، خواجہ سعد رفیق اور اعظم نزیر تارڑ کے ہمراہ وزرا کے نذیر تارڑ کے چیمبر میں پہنچے جہاں ان کا گرم جوشی کے ساتھ استقبال کیا گیا اور گلے میں پھولوں کا ہار پہنایا گیا۔
بعدازاں اسحاق ڈار ایوان میں پہنچے توحکومتی اراکین نے ڈیسک بجا کر ان کا استقبال کیا۔ چیئرمین سینیٹ نے اسحاق ڈار کو سینیٹ کی رکنیت کا حلف اٹھانے کے لیے مدعو کیا تو اپوزیشن میں شامل تحریک انصاف اور دیگر جماعتوں نے شور شرابا کیا۔
اپوزیشن ارکان نے چورچور کے نعرے لگائے، تحریک انصاف کے ارکان نے چیئرمین کی ڈائس کا گھیراؤ کرلیا اور اسی شور شرابے میں اسحاق ڈار نے حلف اٹھایا۔ اپوزیشن ارکان نے پلے کارڈز بھی اٹھا رکھے تھے ساتھ ہی انہوں ںے شیم شیم کی نعرے بازی بھی کی۔ اس دوران چیئرمین سینیٹ ارکان کو چپ کراتے رہے مگر کسی نے ایک نہ سنی۔

اسلام آباد: (ویب ڈیسک) مسلم لیگ ن کے رہنما عطا تارڑ نے کہا ہے کہ مریم اورنگزیب کے ساتھ لندن میں جو ہوا وہ قابل قبول نہیں۔
مسلم لیگ ن کے رہنما عطا تارڑ نے پریس کانفرنس کرتے ہوئے کہا کہ وزیر اعظم نے عالمی سطح پر پاکستان کا مقدمہ رکھا جبکہ ان کا دورہ امریکہ کامیاب رہا۔ لندن میں وفاقی وزیر اطلاعات مریم اورنگزیب کو ہراساں کیا گیا جو قابل قبول نہیں۔
انہوں نے کہا کہ مریم اورنگزیب کے ساتھ بدتمیزی کرنے والوں کے خلاف درخواست تیار کی ہے جس میں برطانوی وزارت داخلہ کو تصاویر کے ساتھ تحفظات کا اظہار کیا جائے گا اور ذمہ داران کے خلاف کیریکٹر سرٹیفکیٹ اور نائیکوپ منسوخ کرنے کی استدعا کی جائے گی۔
عطا تارڑ نے کہا کہ پنجاب حکومت کی طرف سے صوبائی اسمبلی کا اجلاس بلایا گیا کیونکہ پرویز الہٰی کو خدشہ ہے کہ پنجاب اسمبلی کا اجلاس ختم ہوتے ہی عدم اعتماد کی تحریک نہ آ جائے۔ پنجاب اسمبلی کے جاری اجلاس کا مقصد ہی عدم اعتماد کی تحریک سے بچنا ہے۔
انہوں ںے کہا کہ اسمبلی کے ایک دن میں اجلاس کے اخراجات ایک کروڑ روپے روزانہ آتے ہیں۔ وزیر اعلیٰ پنجاب نے وسائل کا رخ گجرات اور منڈی بہاوالدین کی طرف موڑ دیا ہے۔
رہنما مسلم لیگ نے کہا کہ پرویز الہٰی کو 186 ارکان کی حمایت حاصل ہے اور کچھ ارکان ادھر ادھر ہیں کئی ان سے متفق بھی نہیں۔

دادو: (ویب ڈیسک) وزیر اعظم شہباز شریف نے کہا ہے کہ وقت ضائع کیے بغیر ملک کی ترقی کے لیے کام کرنا چاہیے۔ بےنظیر انکم سپورٹ پروگرام کے تحت سیلاب متاثرہ خاندان کو 25 ہزار روپے دیئے جائیں گے۔
وزیر اعظم شہباز شریف نے سندھ کے ضلع دادو میں سیلاب متاثرہ علاقوں کے دورے کے موقع پر کہا کہ سیلاب سے سب سے زیادہ سندھ اور اس کے بعد بلوچستان میں نقصان ہوا جبکہ سیلاب سے پاکستان کو 30 ارب ڈالر کا نقصان ہوا ہے اور مشکل کی اس گھڑی میں متاثرین کی مدد کرنے والوں کا مشکور ہوں۔
انہوں نے کہا کہ لوگ متاثرین کے لیے دل کھول کر امداد دے رہے ہیں اور متاثرین کی بحالی کے لیے ریسکیو اور ریلیف کا کام جاری ہے۔ مشکل وقت میں صوبوں اور وفاق کو مل کر کام کرنا چاہیے اور سیاست کے بجائے اس وقت متاثرین کی مدد کے لیے کام کرنا چاہیے۔
شہباز شریف نے کہا کہ وزیر خارجہ سمیت ہمارے ساتھیوں نے سیلاب کی صورتحال پر بھرپور آواز اٹھائی اور دنیا پاکستان میں سیلاب کی صورتحال سے آگاہ ہے۔ اقوام متحدہ میں تقریر میں سیلاب اور پاکستان کے حوالے سے بات کی ہے۔
انہوں نے کہا کہ نیشنل ڈیزاسٹر مینجمنٹ اتھارٹی (این ڈی ایم اے)، حکومت اور انتظامیہ نے متاثرین کی خدمت کی ہے اور اب بھی ہمیں مزید کام کرنا ہے، سب نے مل کر مشکل سے نکلنا ہو گا۔
وزیر اعظم نے کہا کہ وقت کو ضائع کیے بغیر ملک کی ترقی کے لیے کام کرنا چاہیے، مشکلات ضرور ہیں جس کا حل تلاش کریں گے۔ بےنظیر انکم سپورٹ پروگرام کے تحت متاثرین کے فی خاندان 25 ہزار روپے دیئے جائیں گے۔