اسلام آباد: (ویب ڈیسک) پاکستان سےدبئی اور شارجہ جانے والے مسافروں کے لئے کورونا پابندیوں میں نرمی کر دی گئی۔
سول ایوی ایشن اتھارٹی کے مطابق دبئی جانے والے مسافروں کے لیے ائیرپورٹس پر ریپڈ اینٹیجن ٹیسٹ کی شرط ختم کر دی گئی۔
سی اے اے کے مطابق ٹیسٹ ختم کرنے کا فیصلہ متحدہ عرب امارات کی حکومت کی جانب سے کیا گیا۔
تفصیلات کے مطابق مسافروں کو ائیرپورٹس پر 48 گھنٹے قبل لیئے گئے نیگیٹو پی سی آر ٹیسٹ پیش کرنا ہوگا۔ ٹیسٹ کا 48 گھنٹے کا وقت لیبارٹری کو دیئے گئے سیمپل کے وقت سے شروع ہوگا۔
ترجمان سی اے اے کا کہنا ہے کہ دبئی پہنچنے پر بھی مسافروں کا پی سی آر ٹیسٹ ہوگا۔مسافر ٹیسٹ کا نتیجہ آنے تک سیلف قرنطینہ کرنا ہوں گے۔
دبئی ٹرانزٹ کرنے والے تمام مسافروں کو پی سی آر نیگیٹو ٹیسٹ دکھانا لازمی نہیں ہوگا۔

اسلام آباد: (ویب ڈیسک) وزیر اعظم عمران خان نے کہا ہے کہ شجرکاری مہم آئندہ نسلوں کی حفاظت کے لیے کر رہے ہیں۔
وزیر اعظم عمران خان نے اسکاؤٹس کے عالمی دن کے موقع پر شجر کاری مہم کا افتتاح کرنے کے بعد تقریب سے خطاب کرتے ہوئے کہا کہ پاکستان کے اسکاوٹس کو عالمی دن پر مبارکباد پیش کرتا ہوں۔ یہ دن پاکستانیوں کو تحفظ دینے کے لیے چنا ہے۔
انہوں نے کہا کہ بدقسمتی سے پاکستان کو ماحولیاتی تبدیلی سے خطرہ ہے اور شجر کاری مہم آئندہ نسلوں کی حفاظت کے لیے کر رہے ہیں۔ کم از کم ایک خاندان کو 5 درخت لگانے چاہیئیں۔
عمران خان نے کہا کہ پاکستان ہر قسم کی نعمتوں سے مالامال ہے لیکن ماحولیاتی تبدیلی کی وجہ زمین پر انسانوں کی لاپرواہی ہے اسی لیے ہم نے 10 ارب درختوں کا ہدف رکھا ہے۔
انہوں نے کہا کہ ہم نے درختوں کا ہدف مکمل کر کے اپنے ملک کو بدلنا ہے جبکہ 10 ارب درخت لگانے کا منصوبہ دنیا بھر میں تسلیم کیا گیا اور سراہا گیا۔

لاہور: (ویب ڈیسک) پیکا ترمیمی آرڈیننس 2022 کو لاہور ہائیکورٹ میں چیلنج کر دیا گیا۔ چوہدری سعید ظفر ایڈوکیٹ نے صدر پاکستان کی جانب سے جاری پیکا ترمیمی آرڈیننس کو چیلنج کیا۔
درخواست میں وفاقی حکومت سمیت دیگر کو فریق بنایا گیا۔ درخواست گزار کی جانب سے موقف اپنایا گیا کہ پیکا ترمیمی آرڈیننس صحافیوں کی آواز دبانے کے لیے لایا گیا ہے، حکومت پیکا ترمیمی آرڈیننس لا کر اپنے مذموم مقاصد پورا کرنا چاہتی ہے، پارلیمنٹ کی موجودگی میں صدارتی آرڈیننس جاری کرنا غیر آئینی اور غیر قانونی ہے۔ استدعا ہے کہ عدالت پیکا ترمیمی آرڈیننس 2022 کو کالعدم قرار دے۔

اسلام آباد: (ویب ڈیسک) اسد عمر کا کہنا ہے کہ نواز اور زرداری سے بات اب بلاول اور مریم پر آچکی ہے، تاریخیں بہت دیکھ چکے یہ بھی دیکھ لیں گے۔
وفاقی وزیر منصوبہ بندی اسد عمر نے شماریات بیورو میں پہیلی ڈیجیٹل مردم شماری کی افتتاحی تقریب سے خطاب کرتے ہوئے کہا کہ چیف شماریات کو نیشنل مردم شماری کوآرڈی نیشن سنٹر پر مبارکباد دیتا ہوں، اچھی فیصلہ سازی کے لئے اچھے ڈیٹا کی دستیابی ضروری ہوتی ہے، ملک کے آئندہ کی منصوبہ بندی کے لئے مردم شماری ضروری ہوتی ہے، جدید ٹیکنالوجی کے باوجود مردم شماری کبھی دس کبھی پندرہ سال بعد ہوتی ہے۔
اسد عمر کا کہنا تھا کہ مردم شماری کے بعد الزام لگنا شروع ہوجاتے ہیں، اتنے اہم کام کے لئے ضروری ہے دنیا میں جدید ٹیکنالوجی کو استعمال کریں، این سی او سی میں جدید ٹیکنالوجی کے باعث فوری جلد انفارمیشن مل جاتی تھی، نیشنل کوارڈینیشن سنٹر میں وفاق اور صوبائی اکائیاں ایک جگہ بیٹھیں گی، جو انفارمیشن ہو اس کو میڈیا کے ساتھ شئیر کریں، کوئی چیز چھپائی نہ جائے، اعتماد کی فضا جتنی بہتر ہوگی ملک کے لئے اتنا زیادہ بہتر ہوگا، پارلیمان کو اس مردم شماری کے حوالے سے اعتماد میں لینا ہوگا۔
وفاقی وزیر نے مزید کہا کہ اس مردم شماری میں فوج کا کردار سیکورٹی کا ہوگا، تقریبا دس ارب لاگت کا سافٹ وئیر، ہارڈ وئیر خریدا جائے گا، اس سال مئی جون میں پائلٹ ٹیسٹ ہوگا، مردم شماری کے لئے شناختی کارڈ کی شرط نہیں ہوگی، آئی ٹی کے تمام ادارے اس مردم شماری کے عمل میں شامل ہیں، اس عمل میں ہیکنگ کا کوئی خطرہ نہیں، 98 فیصد ڈیجیٹل عمل ہوگا، مردم شماری کے عمل پر سنجیدہ اعتراضات اٹھائے گے تو اسکا جواب دیں گے، ہماری عوام کو گلہ ہوتا ہے دیوانی مقدمات میں فیصلہ نہیں ہوتا۔

اسلام آباد: (ویب ڈیسک) شیری رحمان نے کہا ہے کہ سب سے زیادہ فیک نیوز اور گالم گلوچ تحریک انصاف کی طرف سے آتی ہیں، حکومت پر تنقید ریاست پر تنقید نہیں ہوتی۔
پیپلزپارٹی کی مرکزی نائب صدر وسینیٹر شیری رحمان نے سماجی رابطے کی ویب سائٹ پر ٹویٹ کرتے ہوئے کہا کہ ‏تمام سیاسی جماعتوں، صحافتی اور انسانی حقوق کی تنظیموں نے پریوینشن آف الیکٹرانک کرائمز آرڈیننس کو مسترد کیا ہے لیکن عمران خان کی زیر صدارت اجلاس میں آرڈیننس پر تنقید کو بلا جواز قرار دیا گیا ہے۔
شیری رحمان نے کہا کہ اگر آرڈیننس فیک نیوز کو روکنے کے لئے ہے تو اس میں فیک نیوز کی تشریح کیوں نہیں کی گئی ؟ اس حکومت کا کاروبار آرڈیننس پر ہی چل رہا ہے، ساڈھے تین سال میں 70 سے زائد آرڈیننس جاری کئے گئے ہیں، اگر آپ کی نیت ٹھیک تھی تو ترامیم پارلیمان میں کیوں پیش نہیں کی گئی، پارلیمان کے اجلاس کیوں ملتوی کئے گئے، تحریک انصاف خود کو ریاست سمجھنا بند کرے، ہم اس قانون کو چیلنج کریں گے۔

پاک فوج کے سربراہ جنرل قمر جاوید باجوہ کا کہنا ہے کہ آپریشن ردالفساد کی کامیابیاں صرف شہداء کے خون اور عوام کے جذبے سے ممکن ہوئیں۔

آپریشن ردالفساد کو آج 5 سال مکمل ہونے کے موقع پر پاک فوج کے ترجمان میجر جنرل بابر افتخار نے سماجی رابطے کی ویب سائٹ ٹوئٹر پر جاری کیے گئے پیغام کے ذریعے آرمی چیف کا یہ بیان شیئر کیا ہے۔

آرمی چیف جنرل قمر جاوید باجوہ کا اپنے بیان میں یہ بھی کہنا ہے کہ ہم اپنے شہداء کی عظیم قربانیوں اور قوم کے جذبے کو سلام پیش کرتے ہیں۔

ڈی جی آئی ایس پی آر میجر جنرل بابر افتخار نے اپنے پیغام میں بتایا ہے کہ آپریشن رد الفساد کامیابی سے جاری ہے۔

ان کا یہ بھی کہنا ہے کہ اس آپریشن کا واحد مقصد پاکستان کے لوگوں کی حفاظت کرنا ہے، اب ملک غیر یقینی صورتِ حال سے امن کی طرف جا رہا ہے۔

ٹرانس ورلڈ سب میرین کیبل سسٹم میں ایک کیبل کٹ گئی جس کے باعث انٹرنیٹ سروسز میں کمی ہوسکتی ہے۔

ترجمان پی ٹی اے کا کہنا ہے کہ پاکستان کے سمندری ساحلوں سے تقریباً 400 کلومیٹر کے فاصلے پر کیبل کٹی ہے۔

رپورٹس کے مطابق کیبل کٹ جانے کی وجہ سے بین الاقوامی بینڈوتھ کی بندش کے ساتھ انٹرنیٹ سروسز میں بھی کمی کا خدشہ پیدا ہوگیا ہے۔

واضح رہے کہ گزشتہ ماہ بھی پاکستان میں سب میرین کیبل ایس ایم ڈبلیو 4 میں خرابی ہوئی تھی۔

اسلام آباد (نئیر وحید راوت سے) ذمہ دار ذرائع سے معلوم ہوا ہے کہ نادرا آرڈیننس 2000 کے سیکشن 7 میں کی گئی ترمیم جس کے تحت نادرا کو ڈیٹا فراہم نہ کرنا بےقاعدگی تصور کرتے ہوئے اداروں کے خلاف قانون کے تحت کارروائی کی جائے گی پر ابھی تک مکمل طور پر عملدرآمد نا ہونے پر نادرا نے تمام متعلقہ اداروں کو ریمائنڈر نوٹس دینے کا فیصلہ کیا ہے ذرائع کے مطابق اسمارٹ کارڈ کو اب تک بینک، ٹیکس کلیکشن، پراپرٹی رجسٹریشن اتھارٹی، ایمیگریشن ڈیپارٹمنٹ، اسلحہ اور ڈرائیونگ لائسنس جاری کرنے والی اتھارٹیز سمیت دیگرمتعلقہ محمکموں سے منسلک نہیں کیا گیانادراکے ایک ذرائع نے بتایا ہے کہ ماضی میں کئی بار وزارت داخلہ کو خط لکھا تاکہ اتھارٹی کو ایس این آئی سی نظام ذریعے دیگر اداروں سے منسلک ہونے کی اجازت دی جائے لیکن کبھی وزارت تذبذب کا شکار رہی تو کبھی متعلقہ محکموں نے نادراکو ڈیٹا فراہم کرنے کی حامی نہیں بھری۔ایس این آئی سی کا تعارف اکتوبر 2012 میں کروایا گیا تھا کہ لیکن پاکستان تحریک انصاف (پی ٹی آئی) کی حکومت کا ماننا ہے کہ سابقہ حکومت ایس این آئی سی نظام کو مکمل فعال اور مو¿ثر بنانے کے حوالے سےتذبذب کا شکار تھی کیونکہ یہ اشرفیہ کی بد عنوانیوں کو بے نقاب کر سکتا ہے، جس میں سیاستدان، اعلیٰ عہدوں پر فائز بیوروکریٹس شامل ہیں۔ذرائع کے مطابق اسمارٹ کارڈ کے زریعے بینک لین دین، ٹیکس چوری، اور جائیداد کی خریدو فروخت جیسے معاملات کا سراغ لگایا جاسکتا ہےایس این آئی سی کے حقیقی تصور کے مطابق اس میں سیکیورٹی کے35 فیچرز ہیں اور اسے قومی اور بین الاقوامی سطح پر اے ٹی ایم کارڈ کے طور پر اور بین الاقوامی ائیرپورٹ پر سیکنڈری شناختی کارڈ اور انشورنس کارڈ کے طور پر بھی استعمال کیا جاسکتا ہے۔تاہم پاکستان میں اب تک یہ ایک عام شناختی کارڈ کے طور پر استعمال کیا جارہا ہے ذرائع کا کہنا ہے کہ اسمارٹ کارڈ ٹیکنالوجی کا مقصد سیکیورٹی میں بہتری کرتے ہوئے جعل سازی کو روکنا ہے اس کے ذریعے جعل ساز نہ صرف آئی ڈی کے دونوں اطراف کا ڈیٹا پرنٹ کر نے میں ناکام رہیں گے بلکہ چپ کے ذریعے اس بات کو بھی یقینی بنایا جائے گاکہ کارڈ کے دونوں اطراف معلومات یکساں ہوں۔ چپ کے لیے ٹیکنیکل اقدامات کیے جائیں گے جسے تبدیل کرنا انتہائی مشکل ہوگااور یہ باآسانی سراغ لگانے کے قابل بھی ہوگا۔ حکومت کی جانب سے نادرا کے نیشنل آئیڈینٹیٹی سسٹم ( این آئی سی) کے ذریعے چلنے والا آلہ ہوسکتا ہے ایس این آئی سی حکومت کو پلیٹ فارم فراہم کرسکتا ہے کہ حادثاتی لائف انشورنس، صحت انشورنس، ایمرجنسی انشورنس، ریلیف، گھریلو ترسیلات، پینش کی ترسیل اور مستقبل میں ای ووٹنگ کے ذریعے ملک کو ایک فلاحی ریاست کی جانب لے کر جاسکے۔

لاہور: (ویب ڈیسک) موسم کا حال بتانے والوں نے بالائی خیبرپختونخوا، وسطی پنجاب میں بارش کی پیشگوئی کی ہے۔ کشمیر اور گلگت بلتستان میں بھی بارش اور پہاڑوں پر برفباری کا امکان ہے۔
محکمہ موسمیات نے آج لاہور، گوجرانوالہ، سیالکوٹ، فیصل آباد اور جنوبی پنجاب کے مختلف علاقوں میں بارش کی پیشگوئی کی ہے۔ خیبرپختونخوا میں پشاور، چترال، دیر اور سوات میں بادل برسنے کا امکان ہے، بلوچستان کے مختلف علاقوں اور اسلام آباد میں بھی آندھی اور گرج چمک کے ساتھ بارش کی توقع ہے۔