راولپنڈی: (ویب ڈیسک) پاکستانی تیراک مصطفیٰ علی کے قتل کا 3 ماہ بعد ڈراپ سین ہوگیا جبکہ قتل میں ملوث سگے چچا کو گرفتار کر لیا گیا ہے۔
اولمپکس میں پاکستان کی نمائندگی کرنے والے پاکستانی تیراک مصطفیٰ علی کے اندھے قتل کا معمہ 3 ماہ بعد حل ہو گیا ہے۔
پولیس نے مصطفیٰ علی کے قتل کے الزام میں ان کے سگے چچا کو گرفتار کرلیا ہے جس نے کھلاڑی کو قتل کرنے کے بعد اس کی لاش کو گھر کے باہر پھینک دیا تھا۔
راولپنڈی پولیس کے ترجمان کا کہنا ہے کہ جاتلی کے ایس ایچ او اور ان کی ٹیم نے کارروائی کرتے ہوئے 3 ماہ قبل قتل ہونے والے پاکستانی تیراک کے قاتل کو گرفتار کیا۔
پولیس کے مطابق مصطفیٰ علی کا قاتل اس کا سگا چچا خالد محمود ہے جس نے اپنے سگے بھتیجے کو قتل کرنے کے بعد اس کی لاش کو گھر سے باہر پھینک دیا تھا۔
یاد رہے کہ واقعہ کا مقدمہ مقتول کے بھائی کی مدعیت میں تھانہ جاتلی میں درج کیا گیا تھا جبکہ راولپنڈی پولیس نے ملزم کو پیشہ وارانہ تفتیش اور ہیومن انٹیلی جنس کی مدد سے ٹریس کر کے گرفتار کیا۔

لاہور : پاکستان اور  بین الاقوامی مالیاتی ادارے (آئی ایم ایف ) کے حکام کے درمیان مذاکرات بحال کرنےکا فیصلہ کر لیا گیا ہے۔

ذرائع کا کہنا ہے کہ کل واشنگٹن میں نئی حکومت کے حکام سے مذاکرات شروع ہوں گے جبکہ اسلام آباد سے اہم حکومتی شخصیات مذاکرات میں ورچوئل حصہ لیں گی۔

ذرائع کا بتانا ہے  مذاکرات  میں آئی ایم ایف پروگرام بحال ہونے کے اعلان کا بھی امکان ہے، مذاکرات کے دوران   آئی ایم ایف پاکستان کو ایک ارب ڈالر کی قسط دینے کا فیصلہ کرے گا۔

ذرائع کے مطابق مذاکرات میں آئی ایم ایف کی جانب سے نئی حکومت کے تحفظات پر گفتگو کے علاوہ سبسڈیز، ایمنسٹی اور نئی شرائط پر غور ہوگا۔

ذرائع وزارت خزانہ کا کہنا ہے کہ سابقہ حکومت نے آئی ایم ایف سے مذاکرات میں چھ ماہ کا عرصہ ضائع کیا تھا، موجودہ حکومت کی ترجیحات میں معاشی استحکام سر فہرست ہے۔

لاہور: (ویب ڈیسک) سیالکوٹ میں سری لنکن شہری قتل کیس کا فیصلے پیر کو سنایا جائے گا۔
سیالکوٹ میں سری لنکن شہری کو قتل کرنے کے کیس میں اہم پیش رفت ہوئی ہے۔ انسداد دہشت گردی عدالت (اے ٹی سی) نے سری لنکن شہری کے قتل کے مقدمے کا فیصلہ کل کوٹ لکھپت جیل میں سنانے کا فیصلہ کر لیا۔
قتل کیس میں گواہان کے بیانات قلمبند کرنے اور فریقین کے دلائل مکمل ہونے پر فیصلہ محفوظ کر لیا گیا ہے۔ سری لنکن شہری کو بچانے کی کوشش کرنے والے فیکٹری مینجر نے بھی اپنا بیان ریکارڈ کروا دیا۔
واضح رہے کہ انسداد دہشت گردی کی عدالت نے سیالکوٹ میں سری لنکن شہری پریانتھا کمارا کے قتل کیس میں 89 ملزمان پر فرد جرم عائد کی تھی جبکہ ایک ملزم عدنان کو جس نے اعتراف جرم کر لیا تھا سے تین ماہ قبل ایک سال کی قید اور 10 ہزار روپے جرمانے کی سزا سنائی گئی تھی۔ عدنان نے واقعے کی ویڈیو یوٹیوب پر اپ لوڈ کی تھی جس میں ملزمان کے کردار کو درست قرار دیا گیا تھا۔
سری لنکن شہری کو گزشتہ سال دسمبر میں قتل کیا گیا تھا۔

لاہور: (ویب ڈیسک) مسلم لیگ نے پنجاب اسمبلی میں ہنگامہ آرائی میں شامل اراکین کے خلاف کارروائی کا اعلان کر دیا۔
مسلم لیگ ن کے رہنما رانا مشہود کا کہنا ہے کہ پنجاب اسمبلی میں ہنگامہ آرائی کی فوٹیج ہم نے حاصل کی ہے۔جو اس میں ملوث ہوگا ان کیخلاف کارروائی ہوگی ۔ہم آئین اور قانون کے مطابق چلنا چاہتے ہیں۔ملک میں تمام فیصلے آئین کے مطابق ہوں گے۔
انہوں نے کہا ہے کہ پرویز الہٰی پنجاب اسمبلی میں اپنے غنڈے لےکر آئے تھے۔پرویز الہٰی نے مجھ پر حملہ کرنے کا الزام لگایا۔یہ کیسا حملہ تھا ، یہ کیسا بازو ٹوٹ گیا تھا جو2منٹ میں جڑ گیا۔
ان کا کہنا ہے کہ کل پرویز الہٰی اور پی ٹی آئی کا اصل چہرہ عوام نے دیکھ لیا ہے۔یہ اقتدار سے چمٹے رہنا چاہتے ہیں ان کو عوام سے غرض نہیں۔ماضی میں ہم نے بھی تو تمام نتائج کو تسلیم کیا تھا۔
انہوں نے کہا ہے کہ بدقسمتی سے پاکستان پر 2018میں ایک سلیکٹڈ مسلط کیا گیا ۔یہ کہتے ہیں ان کو اقتدار کی خواہش نہیں ہے۔ لیکن سپریم کورٹ کے فیصلے کے بعد قومی اسمبلی میں قانون کی دھجیاں بکھیر دیں۔تحریک انصاف نے عوام میں بدتمیزی کا کلچر دیا۔
مسلم لیگ ن کے رہنما رانا مشہود نے کہاہے کہ پنجاب اسمبلی میں غیر قانونی کاموں کی طرف جانا سکھایا گیا۔آپ اپنی مرضی سے عوام پر فیصلے نہیں ٹھونس سکتے۔پنجاب اسمبلی میں بدمعاش بھرتی کیے گئے۔
مسلم لیگ ن کے رہنما عطاتارڑ نے رانا مشہود کے ہمراہ پریس کانفرنس میں کہا ہے کہ پنجاب اسمبلی میں ہونےوالا واقعہ جمہوریت کیلئے سیاہ ترین دن تھا۔
اپنے نمبرگیم مکمل نہ ہونے پر اسمبلی اجلاس بار بار تاخیر کا شکار کیا گیا۔
ان کا کہنا ہے کہ کل پنجاب اسمبلی میں ہونے والا واقع افسوسناک ہے۔گجرات سے ذاتی گارڈز کو بلوایا گیا۔ڈپٹی اسپیکر پر حملہ کرنے والوں کا تعلق راواپنڈی اور لاہور سے ہے ۔ان لوگوں نے الیکشن روکنے کی کوشش کی۔جب ڈپٹی اسپیکر پر حملہ کیا ہم آگے نہیں گئے۔ہم صبح سے پرامن رہے۔
انہوں نے کہا ہے کہ 15دن سے صوبہ بغیر وزیراعلیٰ کے ہے۔پرویزالہٰی آپ الیکشن ہار چکے ہیں۔ ان سے درخواست ہے اب بس کر دیں۔پرویز الہٰی نے پنجاب کا وقار خاک میں ملا دیا۔
انکا کہنا ہے کہ آج تقریب حلف برداری 8بجے گورنر ہاؤس میں ہو گی۔اطلاعات ہے گورنر حلف نہیں لینا چاہتے ۔گورنر کو بنانا چاہتے آپ کی آئینی ذمہ داری ہے۔اسمبلی سیکریٹریٹ سے نوٹیفکیشن جاری ہو چکا ہے۔گورنر عمر چیمہ سے کہوں گا آئین کے منکر نہ بنیں۔

لاہور: (ویب ڈیسک) گورنر پنجاب عمر سرفراز چیمہ نے چودھری پرویز الہی سے ملاقات کے دوران ان کی خیریت دریافت کی، انہوں نے کہا کہ پنجاب اسمبلی میں وزیراعلی کے الیکشن کے دوران ہنگامہ آرائی کی سخت مذمت کرتے ہیں۔
گورنر پنجاب عمر سرفراز چیمہ آج چودھری پرویز الہٰی کی رہائش گاہ پہنچے اور ان کی خیریت دریافت کی۔ انہوں نے چودھری پرویز الہٰی پر حملے کی مذمت کی اور کہا کہ پنجاب اسمبلی میں ایوان کا تقدس پامال کرنا قابل مذمت ہے، ‏پارلیمان کا تقدس اور آئین کا تحفظ اسمبلی ممبران کی ذمہ داری ہے‏۔

صدر آزاد جموں و کشمیر نے قانون ساز اسمبلی کے قائد کے انتخاب کے لیے اجلاس 18 اپریل کو صبح ساڑھے 10 بجے طلب کر لیا ہے۔

ذرائع کے مطابق اسپیکر قانون ساز اسمبلی چوہدری انوار الحق وزارت عظمیٰ کا انتخابی عمل مکمل کرائیں گے۔

آزاد جموں و کشمیر قانون ساز اسمبلی میں وزیر اعظم کے انتخاب میں 53 اراکین اسمبلی ووٹ ڈالیں گے جبکہ کامیابی کے لیے 27 ووٹ درکار ہیں۔

آزاد کشمیر اسمبلی میں پی ٹی آئی کے 32، پپیپلز پارٹی کے 12، مسلم لیگ 7، جے کے پی پی اور مسلم کانفرنس کا ایک ایک ووٹ ہے۔

ذرائع کے مطابق چیئرمین تحریک انصاف عمران خان نے سردار تنویر الیاس کو وزارت عظمیٰ کا امیدوار نامزد کر دیا ہے جبکہ پیپلزپارٹی آزاد کشمیر اور مسلم لیگ ن کے مشترکہ امیدوار چوہدری یاسین ہوں گے۔

آزاد کشمیر کے آئین کے مطابق وزارت عظمیٰ کا انتخاب شو آف ہینڈ کے ذریعے ہو گا جبکہ وزارت عظمیٰ کی کامیابی کے لیے دونوں اطراف سےکامیابی کے دعوے کیے جا رہے ہیں۔

‏وزیراعظم شہبازشریف کا دیامیر بھاشا ڈیم کی تعمیراتی سائیٹ کا دورہ۔چلاس کے شہریوں کے لئے معیاری علاج اور دوائی کی فراہمی کے لئے ہسپتال کی تعمیر کی ہدایت تاکہ علاقے کے عوام کو علاج کے لئے اسلام آباد کا دور دراز سفر نہ کرنا پڑے دروازے کی دہلیز پر علاج کی بہترین سہولیات میسر آئیں
‏تمام سال ٹریفک کو رواں رکھنے کے لئے بابوسر ٹاپ ٹنل کے لئے احکامات جاری۔ اسی ہفتے میں فیزیبیلیٹی تیار کرنے کی ہدایت .دیامیر بھاشا ڈیم منصوبے کو 2029 کے بجائے 3 سال پہلے 2026 میں مکمل کرنے کی ہدایت –