پنجگور: (ویب ڈیسک) بلوچستان کے علاقے پنجگور میں بچوں نے سکیورٹی پر مامور جوان کے ساتھ والہانہ محبت کا اظہار کیا۔
بچوں کی جانب سے پاک فوج کے ساتھ اظہار محبت کا دلفریب منظر اس وقت دیکھنے کو ملا جب پنجگور میں ایک کم سن بچے نے اپنی جان ہتھیلی پر رکھ کر ہم وطنوں کی جان کی حفاظت کرنے والے پاک فوج کے جوان کے ہاتھ چومے۔
ننھے بچے کی پاک فوج کے جوان سے والہانہ محبت کا یہ منظر کیمرے کی آنکھ نے محفوظ کرلیا۔

اسلام آباد: (ویب ڈیسک) پاکستان مسلم لیگ (ن) کے رہنما اور سابق وزیراعظم شاہد خاقان عباسی نے کہا ہے کہ سابق حکومت نے سستی شہرت کیلئے غلط فیصلے کیے، عمران خان عوام پر بوجھ ڈال کر خود چلے گئے، اوگرا سفارشات کے مطابق پٹرول اور ڈیزل کی فی لٹر قیمت 200 روپے سے زیادہ بنتی ہے، روپے کی کمزوری کے باعث صورتحال یہاں تک پہنچی، کوئی شک نہیں آئی ایم ایف کے پاس جانا ہی پڑے گا۔
پٹرولیم مصنوعات کی دونوں سمریاں مسترد ہونے کے بعد پریس کانفرنس کرتے ہوئے شاہد خاقان عباسی نے کہا کہ پچھلی حکومت نے پٹرول کی قیمت 30 جون تک برقرار رکھنے کا فیصلہ کیا، کابینہ کی کوئی منظوری نہیں لی گئی، اس فیصلے پر پچھلے 15 دنوں میں 35 ارب روپے حکومت پاکستان نے ادا کئے، 30 جون تک قیمتیں برقرار رہیں تو 240 ارب روپے اپنی جیب سے دینا ہوگا، 2400 کروڑ روپے حکومت پاکستان اضافی لے کر اس فیصلے کی وجہ سے ادا کرے گی۔
انہوں نے مزید کہا کہ عالمی منڈی میں پٹرولیم مصنوعات کی قیمتیں بڑھ رہی ہیں، اوگرا کی سفارش کو مسترد کر دیا گیا، پٹرول پر فی لٹر 21 اور ڈیزل پر51 روپے حکومت خود ادا کرتی ہے ، یہ عمران خان کے شخصی فیصلے تھے، ہرماہ 200 ارب کا اضافی بوجھ پڑے گا، 200 ارب اضافی رقم کو ادا کرنے کے لیے اضافی قرض لینا پڑے گا، اتنی لاپرواہی، ملک دشمنی جیسے حالات پہلے نہیں دیکھے، تین ماہ میں پٹرول اور ڈیزل کی قیمتوں کی وجہ سے 240 ارب روپے حکومت کو ادا کرنا پڑیں گے، سستی شہرت حاصل کرنے کے لیے پچھلی حکومت نے پیٹرول اور ڈیزل کی قیمتیں اتنی رکھیں۔
سابق وزیراعظم کا کہنا تھا کہ اوگرا نے پٹرول کی نئی قیمت 171 روپے کرنے کی سفارش کی، وزیراعظم شہباز شریف نے اوگرا کی سفارش کو قبول نہیں کیا، ٹیکس ملا کر اوگرا کی سفارش مانی جائے، پٹرول 235 اور ڈیزل 264 کا ہونا چاہیے، پی ٹی آئی حکومت نے جان بوجھ کر پٹرولیم مصنوعات کی قیمتوں میں ابہام پیدا کیا، وزیراعظم نے کہا مسائل کے شکار عوام پر مزید بوجھ نہیں ڈالنا چاہتے، بدقسمتی سے سابقہ حکومت نے سستی شہرت کے لیے غلط فیصلے کئے، عمران خان کے شخصی فیصلوں نے ملک پر ماہانہ200 ارب روپے کا بوجھ ڈالاہے۔
انہوں نے کہا کہ آج کی پریس کانفرنس کو میثاق معیشت کا پہلا قدم سمجھیں، کوئی شک نہیں آئی ایم ایف سے ری انگیج کرنا پڑے گا۔

راولپنڈی: (ویب ڈیسک) آرمی چیف جنرل قمر جاوید باجوہ سے تیونس کے سفیر کی ملاقات، باہمی دلچسپی کے امور اور دو طرفہ تعاون کے فروغ سمیت مختلف امور پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمرجاوید باجوہ سے تیونس کے سفیر بورہین ال کامل نے ملاقات کی۔
آرمی چیف نے کہا کہ پاکستان تیونس کے ساتھ تعلقات کو قدر کی نگاہ سے دیکھتا ہے، مشترکہ مفادات کی بنیاد پر کثیر ڈومین تعلقات کو بڑھانےکیلئے پرامید ہیں۔
ملاقات میں تمام شعبوں میں دوطرفہ تعلقات کو مزید فروغ دینے کی خواہش کا اعادہ کیا گیا۔
آئی ایس پی آر کے مطابق ملاقات میں تیونس کے سفیر نےعلاقائی استحکام کے لیے پاکستان کی کوششوں کو سراہتے ہوئے پاکستان کیساتھ ہر سطح پر سفارتی تعاون میں مزید بہتری کیلئے کردار ادا کرنے کا عہد کیا۔

اسلام آباد: (ویب ڈیسک) سابق وزیراعظم عمران خان نے اوورسیز پاکستانیوں سے ’بیرون ملک سازش کے تحت حکومت کی تبدیلی کی سازش ناکام‘ بنانے اور ’پاکستان کی حقیقی آزادی‘ کی مہم کے لیے چندہ مانگ لیا۔
اپنے ویڈیو پیغام میں انہوں نے کہا کہ ہم نے ’نامنظور ڈاٹ کام‘ کی ایک ویب سائٹ بنائی ہے جس کا مقصد اوورسیز پاکستانیوں سے چندہ جمع کیا جائے سکے۔ پی ٹی آئی کے چیئرمین نے کہا کہ بیرون ملک سازش کے تحت ریجیم چینج کی سازش کی گئی اور پاکستان کے کرپٹ ترین لوگوں ہم پر مسلط کیا گیا۔
انہوں ںے کہا کہ یہ وہ لوگ ہیں جو ضمانت پر رہا ہیں یا وہ اربوں روپے کی کرپشن میں ملوث ہیں اور 30 سال سے چوری کررہے تھے۔
سابق وزیر اعظم نے بیرون ملک میں مقیم پاکستانیوں کو مخاطب کرکے کہا کہ جاگی ہوئی قوم کو اور جگا رہا ہوں، پوری کوشش ہے کہ اس سازش کو ناکام بنائیں اور پاکستان کو الیکشن کے لیے تیار کیا جائے، عوام الیکشن کے ذریعے فیصلے کریں۔
انہوں نے کہا کہ اوورسیزپاکستان کے فنڈز کی ضرورت ہے جس میں وہ بھرپورطریقے سے شرکت کریں، یہ پاکستان حقیقی آزادی کی مہم ہے۔

لاہور: (ویب ڈیسک) پنجاب کا نیا وزیر اعلیٰ کون ہو گا؟ فیصلہ کل ہو جائے گا، چودھری پرویز الہٰی اور حمزہ شہباز کے درمیان مقابلہ ہو گا، ڈپٹی اسپیکر سردار دوست مزاری پنجاب اسمبلی کے اجلاس کی صدارت کریں گے۔
پنجاب اسمبلی کے کل ساڑھے گیارہ بجے ہونے والے کے اجلاس کا ایجنڈا جاری کردیا گیا ہے، اجلاس میں وزیر اعلیٰ پنجاب کے لئے ووٹنگ ہو گی، آئین کے آرٹیکل 130 کے تحت قائد ایوان کا انتخاب ہو گا۔
نئے قائد ایوان کے انتخاب کے لئے پنجاب اسمبلی کا اجلاس کل ڈپٹی اسپیکر سردار دوست مزاری کی زیر صدارت ہو گا، اجلاس میں یک نکاتی ایجنڈ ے کے تحت وزیراعلیٰ کا انتخاب ہوگا، تحریک انصاف اور مسلم لیگ ق پر مشتمل حکومتی اتحاد کے وزیراعلیٰ کے لئے امیدوار چودھری پرویز ا لٰہی اور متحدہ اپوزیشن کے امیدوار حمزہ شہباز کے درمیان مقابلہ ہو گا۔
پنجاب اسمبلی میں تحریک انصاف کے 183 اور مسلم لیگ ق کے 10 ارکان ہیں، حکومتی اتحاد کو مسلم لیگ ن کے پانچ منحرف ارکان کی حمایت بھی حاصل ہے، حکومتی اتحاد کا دعویٰ ہے کہ انہیں 189 ارکان کی حمایت حاصل ہے۔
دوسری جانب تحریک انصاف کے 24 سے زائد ارکان پنجاب اسمبلی منحرف ہوکر اپوزیشن سے مل چکے ہیں، ترین گروپ،علیم خان اور اسد کھوکھر اپنے حامیوں کے ساتھ حمزہ شہباز کی حمایت کر چکے ہیں، تحریک انصاف منحرف ارکان کے خلاف اسپیکر کے پاس ریفرنس جمع کراچکی ہے۔
مسلم لیگ ن کے پنجاب اسمبلی میں 165 ارکان اور پیپلزپارٹی کے 7 ارکان ہیں، راہ حق پارٹی کا ایک رکن اور 4 آزاد ارکان بھی حمزہ شہباز کے حمایتی ہیں، مسلم لیگ ن کا دعویٰ ہے کہ اسے 202 ارکان کی حمایت حاصل ہے۔
کامیاب امیدوار کو کم از کم 186 ووٹ حاصل کرنا ہوں گے، اگر کوئی امیدوار 186 ووٹ حاصل نہ کرسکا تو سیکنڈ رن ہو گا، سیکنڈ رن میں سادہ اکثریت حاصل کرنے والا قائد ایوان ہو گا۔
پنجاب اسمبلی کے ایوان میں اوپن ووٹنگ سے فیصلہ ہوگا، منحرف ارکان کے ووٹنگ کے معاملے میں ہنگامہ آرائی کا بھی خدشہ ہے۔

اسلام آبار: (ویب ڈیسک) وزیراعظم شہباز شریف کی جانب سے پاکستان ڈیموکریٹک مومنٹ (پی ڈی ایم) کے رہنماؤں کے اعزاز میں افطار ڈنر کی اندرونی کہانی سامنے آگئی۔
ذرائع کے مطابق وزیر اعظم شہبازشریف نے اتحادیوں کا شکریہ ادا کیا اور ملکی کٹھن حالات کا مل کر مقابلہ کرنے کےعزم کا اظہار کیا۔
وزیراعظم شہباز شریف نے کہا کہ انہوں نے پیٹرولیم مصنوعات کی قیمتوں میں اضافے کی سمری مسترد کردی ہے، گزشتہ حکومت نے جان بوجھ کر پیٹرولیم مصنوعات کی قیمتیں نہیں بڑھائیں، پیٹرولیم مصنوعات پر کوئی درمیانی راستہ نکالیں گے۔
وزیر اعظم شہباز شریف نے مزید کہا کہ اتحادیوں کے ساتھ مل کر ملک کو مشکل حالات سے نکالیں گے۔
ذرائع کے مطابق اتحادیوں نے وزیراعظم شہبازشریف کی قیادت پراعتماد کا اظہار کیا اور کہا کہ آپ اچھے ایڈمنسٹریٹر ہیں، ملک کو مشکل حالات سے نکال لیں گے۔
وزیراعظم شہباز شریف نے مزید کہا کہ چینی کو باہر نہیں جانے دوں گا، عوام کو مہنگائی سے نجات دلانے کی ہر ممکن کوشش کریں گے، ذخیرہ اندوزوں کے خلاف کارروائی ہوگی۔
شہباز شریف نے مزید کہا کہ وفاقی کابینہ جلد حلف اٹھائے گی، پی ایم ہاؤس میں تمام صوبوں کے افسران ہوں گے، عوام کی فلاح کیلئے تمام اقدامات اٹھائیں گے، ہر سال رمضان پیکج میں آٹا سستا ملتا تھا، اس مرتبہ کسی کو پروانہیں۔