لاہور: (ویب ڈیسک) وفاقی وزیر اطلاعات مریم اورنگزیب نے کہا ہے کہ کان کھول کرسن لیں ،الیکشن تب ہوں گے جب حکومت چاہے گی۔
لاہور میں پریس کانفرنس کرتے ہوئے وفاقی وزیر اطلاعات مریم اورنگزیب نے کہا ہے کہ عمران خان اقتدار بچانے کیلئے حکومتی اداروں پر حملہ آور ہوئے، یہ فارن فنڈنگ کیس سے بچنے کیلئے الیکشن کمیشن کو ٹارگٹ کررہےہیں، ادارے چیئرمین پی ٹی آئی کے خلاف قانون کے مطابق کارروائی کریں۔
انہوں نے کہا کہ عمران خان ملک میں انتشار اور افراتفری چاہتے ہیں اور اداروں کو تباہ کرنا چاہتے ہیں، عمران خان فارن فنڈنگ اور منی لانڈرنگ کرتے ہوئے پکڑے گئے ہیں، عمران خان نے اقتدار کی کرسی پر بیٹھ کر معاشی لینڈ مائنز بچھائیں، اداروں کو مفلوج کیا، اداروں کو کمزور کیا، اداروں کو استعمال کر کے سیاسی انتقام کا نشانہ بنایا۔
وفاقی وزیر کا مزید کہنا تھا کہ عمران خان چاہتے تھے کہ وہ تمام 20 سیٹیں جیت جائیں، ایسا نہیں ہوا تو وہ الیکشن کمیشن پر حملہ آور ہو گئے، تحریک عدم اعتماد کا مقابلہ کرنے کے بجائے بھی عمران خان آئین پر حملہ آور ہوئے۔
مریم اورنگزیب نے کہا کہ عمران خان نے چور دروازے سے چیف الیکشن کمشنر سے ملاقات کی کوشش کی جس طرح وہ جاوید اقبال سے کرتے تھے اور ڈی جی ایف آئی اے سے کرتے تھے، جب چیف الیکشن کمشنر نے ملنے سے انکار کیا تو پھر یہ ان کے خلاف ہو گئے۔

اسلام آباد: (ویب ڈیسک) سپریم کورٹ نے پی ٹی آئی کی درخواست پر نیب ترامیم خلاف آئین ہونے پر حکومت سے جواب مانگ لیا۔
سپریم کورٹ میں نیب ترامیم کیخلاف درخواست پر چیف جسٹس کی سربراہی میں تین رکنی بینچ نے سماعت کی، بینچ میں جسٹس اعجاز الااحسن اور جسٹس منصور علی شاہ بھی شامل تھے۔چیف جسٹس نے استفسار کیا کہ وزیر قانون کا کہنا ہے ہر ترمیم کی سپورٹ میں عدالتی فیصلے ہیں۔ کیا ایسا ہی ہے۔ عمران خان کے وکیل خواجہ حارث نے کہا کہ نہیں ایسا نہیں ہے، ترامیم سپریم کورٹ کے فیصلوں متصادم تو ہیں لیکن انکے مطابق نہیں، بہت سے ترامیم کو جلد بازی میں منظور کیا گیا ہے۔ ترامیم کے بعد کسی کو فائدہ پہنچانے پر کیس نہیں بنے گا۔
چیف جسٹس نے ریمارکس دیئے کہ مخصوص فرد کیلئے بنے قانون کو عدالت کالعدم کر سکتی ہے، سرکار کا کام آگے بڑھنا چاہیے اور فیصلہ سازی ہونی چاہیے، نیب قانون کی وجہ سے سرکاری افسران فیصلہ کرنے سے ڈرتے ہیں، جو ترامیم بنیادی حقوق کیخلاف نہیں، انہیں الگ رکھنا ہوگا۔ کرپشن کرنے والے کو سزا ہونی چاہیے نہ کہ اس کا کیا گیا کوئی ضروری فیصلہ ہی واپس ہوجائے۔
عدالت نے سماعت 29 جولائی تک ملتوی کرتے ہوئے نیب ترامیم کے خلاف آئین ہونے پر حکومت سے جواب طلب کر لیا۔

لاہور: (ویب ڈیسک) الیکشن کمیشن نے پنجاب اسمبلی کے حلقہ پی پی 167 لاہور میں بدامنی کیس کا فیصلہ محفوظ کر لیا۔ تحریک انصاف کے امیدوار شبیر گجر کی معاون وکیل نے رپورٹ پراعتراض اٹھا دیا۔ مسلم لیگ ن کے امیدوار نذیر چوہان کے وکیل نے حلقہ کے نتائج کو امتناع میں رکھنے اور تحقیقات کی استدعا کر دی۔
پنجاب اسمبلی کے حلقہ پی پی167 میں مسلح تصادم اورفائرنگ کیس کی سماعت چیف الیکشن کمشنرسکندر سلطان راجہ کی سربراہی میں تین رکنی بینچ نے کی۔ تحریک انصاف کے امیدوار شبیر گجر، انکوائری کمیٹی اور سی سی پی او لاہور رپورٹ کے ہمراہ پیش ہوئے۔ نذیر چوہان کے وکیل خالد اسحاق نے دلائل دیئے کہ اگرغیر قانونی کام ہوا ہے، وہ صرف الیکشن کے دن یا پولنگ اسٹیشن تک محدود نہیں۔ حلقہ کے نتائج کو امتناع میں رکھتے ہوئے مزید تحقیقات کی جائیں۔ جو بھی مجرم ہے اسے قانون کے کٹہرے میں لایا جائے۔
شبیر گجر کی معاون وکیل کاشفہ نیاز نے رپورٹ پراعتراض اٹھاتے ہوئے کہا کہ یہ رپورٹ پولیس نے تیار کی جو پنجاب حکومت کے ساتھ ہے۔ چیف الیکشن کمشنر کے استفسار پر شبیر گجر نے بتایا کہ الیکشن عمل ٹھیک ہوا، میرے ساتھ زیادتی ہوئی، آراونے ہمیں ریلیف دیا، آپ سے بھی ریلیف کی استدعا ہے۔ دلائل سننے کے بعد الیکشن کمیشن نے پی پی 167 لاہور بدامنی کیس کا فیصلہ محفوظ کر لیا۔

کوئٹہ: (ویب ڈیسک) بلوچستان میں مون سون بارشوں اور سیلابی ریلوں سے 17 اضلاع میں وبائی مرض پھیل گئی ہے۔ ڈائریا اور ہیضہ سے 11 افراد جاں بحق ہو گئے۔
بلوچستان میں مون سون بارشوں کے بعد مختلف علاقوں میں پیٹ اور آنتوں کی بیماریاں پھیل گئی ہے۔ بارشوں کے بعد بلوچستان کے 17 اضلاع میں وبائی مرض پھیل گیا ہے ۔ یہ مرض ڈائریا اور ہیضہ کی صورت اختیار کر چکا ہے۔ دس دن کے اندر 11 افراد زندگی کی باری ہار گئے۔ ژوب میں 9 افراد ڈائریا سے جبکہ 2 خضدار میں ہضہ سے جاں بحق ہوئے۔
صوبے کے کئی اضلاع میں دست اور اسہال کی بیماری ڈائریا اور اس کی خطرناک شکل کالرا ہیضہ پہلے سے پھیلی ہوئی تھی تاہم بارشوں اور سیلاب کے بعد ان بیماریوں کے پھیلاؤ میں اضافہ ہوا ہے۔متاثرہ علاقوں میں کوئٹہ، کیچ ، ہرنائی ، چمن ، لورالائی ، ژوب ، خضدار، مستونگ اور گوادر شامل ہیں۔
ایک ماہ میں 6312 کیسز رپورٹ ہوئے یعنی ماہانہ 70 فیصد اضافہ ہوا ہے۔ دیگر اضلاع میں لیبارٹری نہ ہونے کی وجہ سے سارا بوجھ بی ایم سی ہسپتال میں بنائے ایک ہی ٹیسٹ لیبارٹری ہی برداشت کر رہا ہے۔

لاہور: (ویب ڈیسک) پی ٹی آئی رہنما فرخ حبیب کا کہنا ہے کہ الیکشن کمیشن ن لیگ اور پیپلز پارٹی ممنوعہ فنڈنگ کا فیصلہ بھی پی ٹی آئی ممنوعہ فنڈنگ کیس کےساتھ کرے۔
رہنما پی ٹی آئی فرخ حبیب نےوزیراعظم شہباز شریف کے بیان پر ردعمل دیتے ہوئے کہاہے کہ وزیراعظم کوکہناچاہتے ہیں کہ یہ فارن نہیں ممنوعہ فنڈنگ کیس ہے۔ضمنی الیکشن میں شکست ہو گئی تو الیکشن کمیشن کو کیسے فیصلے کا حکم دے رہے ہیں؟
پی ٹی آئی سیکریٹری اطلاعات فرخ حبیب کا کہنا ہے کہ الیکشن کمیشن ن لیگ اور پیپلز پارٹی ممنوعہ فنڈنگ کا فیصلہ بھی ساتھ کرے۔ن لیگ اور پیپلز پارٹی کی ا سکروٹنی مکمل ہوچکی ہے۔
انہوں نے کہاہے کہ دونوں جماعتوں نےالیکشن کمیشن سے بینک اکاؤنٹس چھپائے ہیں۔پیپلز پارٹی 36 کروڑاور ن لیگ نے 66کروڑروپے کا حساب نہیں دیا۔
انہوں نے کہا ہے کہ فوری انکی رپورٹ الیکشن کمیشن میں جمع کرواکر روزانہ کی بنیاد پر سماعت کرکے فیصلہ دیا جائے۔ ن لیگ اور پیپلز پارٹی کو لاڈلہ نہ بنایا جائے۔
واضح رہے کہ اس سے قبلوزیر اعظم شہباز شریف نے سوشل میڈیا پلیٹ فارم ٹوئٹر پر ایک پیغام میں کہا ہے کہ میں الیکشن کمیشن سے درخواست کرتا ہوں کہ طویل عرصے سے التوا کے شکار پی ٹی آئی غیر ملکی فنڈنگ ​​کیس پر فیصلہ سنائے۔
انہوں نے اپنی ٹویٹ میں کہا ہے کہ ریاستی اداروں پر بار بار شرمناک حملوں کے باوجود عمران نیازی کو کھلی چھٹی دی جارہی ہے۔عمران نیازی کو دیئے گئے استثنیٰ نے ملک کو نقصان پہنچایا ہے۔

اسلام آباد: (ویب ڈیسک) سابق وزیراعظم و رہنما مسلم لیگ ن شاہد خاقان عباسی نے کہا ہے کہ ضمنی الیکشن کا عام انتخابات سے کوئی تعلق نہیں، چار سال جھوٹے احتساب کا ڈرامہ چلتا رہا، نیب کا سرکس ابھی تک چل رہا ہے، ان کو ایک ایک ظلم کا حساب دینا ہوگا۔
اسلام آباد میں نیب عدالت کے باہر میڈیا سے گفتگو کرتے ہوئے شاہد خاقان عباسی نے کہا ہے کہ نیب کا سرکس ابھی تک چل رہا ہے، نیب کا چیئرمین تو گھر چلا گیا اس سے کوئی پوچھ گچھ کرے تو مختلف بہانے سے جان بچانے کی کوشش کرتا ہے لیکن جان بچے گی نہیں ، شاہد خاقان عباسی جو ظلم ان لوگوں نے کیے ہیں ان کو جواب دینا پڑے گا۔
انہوں نے کہا کہ آج ہم نے عدالت سے پوچھا کہ یہ بتائیں ہمارا جرم کیا ہے، یہ پراسیکیوشن بھی بتانے سے قاصر ہے اور عدالت بھی بتانے سے قاصر ہے، ہر دوسرا لفظ منی لانڈرنگ کے لیے استعمال ہوتا ہے۔
شاہد خاقان نے کہا میں نے عدالت سے پوچھا کہ کیا کسی جرم کے بغیر منی لانڈرنگ ہوسکتی ہے، جس پیسے پر ٹیکس دیا ہو کیا اس پر منی لانڈرنگ ہو سکتی ہے، اسکا جواب نہ نیب کے پاس ہے نہ عدالت کے پاس ہے۔
ان کا مزید کہنا تھا کہ ہم پنجاب میں ہار گئے تو پی ٹی آئی کی طرح اٹھ کر بھاگیں گے نہیں، یہ 20 سیٹیں پی ٹی آئی کی تھیں اب انھوں نے 15 جیتیں ، لوڈشیڈنگ کم ہو رہی ہے، مزید کم ہو گی۔

اسلام آباد: (ویب ڈیسک) فیصل واوڈا نااہلی کیس میں چیف جسٹس سپریم کورٹ عمر عطا بندیال نے کہا ہے کہ آرٹیکل 62 ون ایف کا اطلاق ایک سنجیدہ معاملہ ہے فریقین تیاری کرکے آئیں، سماعت ستمبر تک ملتوی کر دی گئی۔
چیف جسٹس عمر عطا بندیال کی سربراہی میں تین رکنی بینچ نے فیصل واوڈا نا اہلی کیس کی سماعت کی، چیف جسٹس نے ریمارکس میں کہا کہ عدالت کے سامنے اہم سوال آرٹیکل 62 ون ایف کا ہے، دیکھنا ہے کیا الیکشن کمیشن آرٹیکل 62 ون ایف لگا سکتا ہے، آرٹیکل 62 ون ایف کا اطلاق بڑا سیریس ایشو ہے۔
عدالت نے فیصل واوڈا کے وکیل کی اپیل پر جلد سماعت کی استدعا مسترد کرتے ہوئے سماعت ستمبر تک ملتوی کر دی۔