کراچی: (ویب ڈیسک) کراچی کے مختلف علاقوں میں تیز ہواؤں کے ساتھ بارش کا سلسلہ شروع ہوگیا۔
کراچی میں بحریہ ٹاؤن، ائیرپورٹ اور ملیر کے اطراف تیز بارش ہوئی جبکہ سعدی ٹاؤن اور گلشن حدید میں بھی کالے بادل چھاگئے۔
اس کے علاوہ سہراب گوٹھ، سبزی منڈی اور سپر ہائی وے کے اطراف میں بھی بارش شروع ہوگئی ہے۔ گلستان جوہر میں بھی تیز ہواؤں کے ساتھ بارش کا سلسلہ شروع ہوگیا ہے۔
محکمہ موسمیات کا کہنا ہے کہ کراچی کے شمال مغرب میں بادل موجود ہیں۔

کراچی: (ویب ڈیسک) الیکشن کمیشن نے این اے 245 کے ضمنی انتخاب کے لیے پاک فوج کی سیکیورٹی مانگ لی
الیکشن کمیشن نے سیکرٹری وزارت دفاع کو مراسلہ ارسال کردی جس میں کہا گیا کہ پاک فوج کے جوان پولنگ اسٹیشنز کے باہر تعینات کیے جائیں گے۔
مراسلے مٰں بتایا گیا کہ این اے 245 کراچی میں ضمنی انتخاب 27 جولائی کو ہوگا جبکہ پاک فوج کے جوان 26 تا 28جولائی اسٹینڈ بائی رکھیں جائیں۔ مراسلے میں فوج کی سیکیورٹی سے متعلق کہا گیا کہ پرامن، شفاف انتخاب، کسی بھی صورتحال سے نمٹنے کے لیے فوجی جوان تعینات ہوں گے۔
انہوں نے کہا کہ الیکشن کمیشن نے پاک فوج کی سکیورٹی آئین کے آرٹیکل 220 کے تحت طلب کی ہے۔

کراچی: (ویب ڈیسک) شہر قائد کے علاقے گلستان جوہر میں وکیل نے فائرنگ کر کے ساس، سسر سمیت بیوی کو زخمی کردیا، وکیل نے بعد میں خود کو گولی مار کر خودکشی کرلی۔
پولیس حکام کے مطابق وکیل منصور نے گھر والوں کو زخمی کرنے کے بعد خود کو گولی مار لی، وکیل منصور کو زخمی حالت میں نجی اسپتال منتقل کیا گیا جہاں وہ دوران علاج دم توڑ گیا، وکیل منصور کا اپنی بیوی سے خلع کے معاملے پر تنازعہ چل رہا تھا جس پر بات چیت کرنے گھر آیا تھا کہ اچانک جھگڑا ہو ااور وکیل نے فائرنگ کردی۔
پولیس نے واقعہ کی تحقیقات شروع کردی ہیں، فائرنگ میں استعمال ہونے والا اسلحہ بھی تحویل میں لے لیا گیا ہے۔

لاہور: (ویب ڈیسک) سپیکر پنجاب اسمبلی چودھری پرویز الٰہی نے کہا ہے کہ پنجاب میں دو نمبر حکومت قائم ہے، آئی ایم ایف کی تمام شرائط کے ساتھ یکطرفہ معاہدے خود کر رہے ہیں آئی ایم ایف کی طرف سے کچھ نہیں اور نام عمران خان کا لگاتے ہیں۔
سپیکر پنجاب اسمبلی سے صدر پاکستان مسلم لیگ ضلع خوشاب اور ٹکٹ ہولڈر چودھری رضوان مختار رندھاوا نے وفد کے ہمراہ یہاں ان کی رہائش گاہ پر ملاقات کی۔ وفد میں سبطین شیرازی جنرل سیکرٹری ضلع خوشاب، شازیہ کوثر صدر خواتین ونگ خوشاب، چودھری احمد سعید صدر یوتھ ونگ خوشاب، ملک انور صدر ہیومین رائٹس اور ملک احسن عمران انفارمیشن سیکرٹری کلچرل ونگ شامل تھے۔
انہوں نے کہا کہ پنجاب میں دو نمبر حکومت قائم ہے، جعلی حکمرانوں کو عوام کی حمایت حاصل نہیں، روز بروز بڑھتی ہوئی مہنگائی اور پٹرول کی قیمتوں میں اضافے سے عام آدمی کا جینا مشکل ہو گیا ہے، جعلی حکمرانوں نے ملکی معیشت کو تباہ کر دیا ہے، آئی ایم ایف کی تمام شرائط کے ساتھ یکطرفہ معاہدے یہ خود کر رہے ہیں جبکہ آئی ایم ایف کی طرف سے کچھ نہیں اور نام عمران خان کا لگا رہے ہیں۔
چودھری پرویزالٰہی نے ضمنی الیکشن کے حوالے سے پنجاب بھر کے تمام اضلاع کے پارٹی عہدیداروں اور کارکنوں کو ہدایات جاری کرتے ہوئے کہا کہ ضمنی الیکشن میں ہم تحریک انصاف کی بھرپور سپورٹ کریں گے، تحریک انصاف کے امیدواروں کے ساتھ مل کر ان کی الیکشن مہم چلائی جائے، ڈور ٹو ڈور رابطہ عوام مہم شروع کی جائے، کارنر میٹنگ اور جلسوں کا انعقاد کیا جائے۔
انہوں نے کہا کہ پارٹی ورکر الیکشن مہم میں ایسے شرکت کریں جیسے وہ خود الیکشن لڑ رہے ہیں، ضمنی الیکشن میں تحریک انصاف کے امیدوار کھڑے ہیں اس لیے جاندار مہم چلا کر تحریک انصاف کو سیٹیں جتوائی جائیں۔

اسلام آباد: (ویب ڈیسک) پاکستان کے دو صوبوں پنجاب اور سندھ میں تیل اور گیس کے نئے ذخائر دریافت ہوئے ہیں۔
او جی ڈی سی ایل تیل وگیس کی تلاش و پیداوار کی کامیابیوں کی راہ پر گامزن ہے، کمپنی کے ماہرین نے صوبہ سندھ اور پنجاب میں تیل و گیس کی دریافت کے حوالے سے دوبڑی کامیابیاں حاصل کیں۔
ترجمان کے مطابق پہلی کامیابی سندھ کے ضلع ٹنڈو الہ یار نم بلاک میں ملی، جہاں نم کنویں ایسٹ-1 سے یومیہ 1400 بیرل تیل جبکہ 5.02ملین مکعب کیوبک فٹ (MMSCFD) کے ذخائر دریافت ہوئے۔
علاوہ ازیں او جی ڈی سی ایل کو کلچاس بلاک صوبہ پنجاب میں کلیر شم 1 پر گیس دریافت کی دوسری بڑی کامیابی ملی۔ ترجمان کے مطابق کچلاس ایکسپلوریٹری لا ئسنس کے تحت اوجی ڈی سی ایل اور ایم پی سی ایل 50،50 فیصد کے جوائنٹ وینچر شراکت دار ہیں۔
کلچاس بلاک کلیری شم کنویں-1 سے 1.24ملین مکعب کیوبک فٹ یومیہ گیس کا ذخیرہ دریافت ہوا، جسے مقامی وسائل پر انحصار کے حوالے اہم پیشرفت قرار دیا جارہا ہے۔
او جی ڈی سی ترجمان کے مطابق نئی دریافت سے اوجی ڈی سی ایل اور ملکی تیل و گیس کے ذخائر میں خاطر خواہ اضافہ ہوگا، اضافی پیداوار سے ملکی توانائی کی طلب و رسد کے فرق کو کم کرنے میں مدد ملے گی۔

کراچی: (ویب ڈیسک) وفاقی وزیر ریلوے و ہوابازی خواجہ سعد رفیق نے کراچی ائیرپورٹ اور سول ایوی ایشن ہیڈ کوارٹر کا دورہ کیا ہے۔
سعد رفیق نے کراچی ائیرپورٹ کے آپریشن میں توسیع اور سہولیات کی اپ گریڈیشن کا جائزہ لیا جبکہ مسافروں کی سہولت کی خاطر تمام اداروں کو یکساں چیکنگ کرنے کی ہدایات جاری کیں۔
وفاقی وزیر نے سکھر ائیرپورٹ کو بین القوامی پروازوں کے موافق اپ گریڈ کرنے کی ہدایات بھی جاری کیں۔
انہوں نے پی آئی اے کو کراچی تا سکھر اور اسلام آباد کے شیڈول کو مسافروں کی سہولت کی خاطر تبدیل کرنے کی ہدایات بھی کیں۔
وزیر ہوا بازی خواجہ سعد رفیق نے تمام ائیرپورٹ پراجیکٹس کو صریح کمرشل بنیادوں پر تیار و مکمل کرنے کی بھی ہدایات جاری کیں۔

اسلام آباد: (ویب ڈیسک)حکومت پاکستان نے زلزلے سے بری طرح متاثر ہونے والے پڑوسی ملک افغانستان میں فوری امدادی سامان بھیجنے کا اعلان کردیا۔
وزیر اطلاعات مریم اورنگزیب نے اپنے بیان میں کہا کہ وزیراعظم شہباز شریف کی ہدایت پر افغانستان کے زلزلہ متاثرین کیلئے فوری امدادی سامان بھجوایا جا رہا ہے، ہنگامی امدادی سامان میں خوراک،خیمے، کمبل اور دیگر ضروری اشیاء شامل ہیں۔
انہوں نے بتایا کہ وزیراعظم کی ہدایت پر ‘این ڈی ایم اے’ نے دیگر اسٹیک ہولڈرز کے ساتھ مل کر امدادی سامان کا انتظام کیا۔
واضح رہے کہ وزیراعظم نے بدھ کو افغانستان میں زلزلے سے ہونے والے جانی ومالی نقصانات پر امداد بھجوانے کا اعلان کیا تھا۔