اسلام آباد: (ویب ڈیسک) سندھ حکومت نے گیس بندش اور پریشر کی کمی کے خلاف وفاقی وزیر توانائی حماد اظہر کو خط لکھ دیا۔ جس میں کہا گیا ہے کہ تین سالوں سے تسلسل کے ساتھ سندھ کی گیس پر ڈاکہ ڈالا جا رہا ہے۔
سندھ حکومت کے محکمہ توانائی کی جانب سے لکھے گئے خط میں صوبائی وزیر توانائی امتیاز شیخ کا کہنا تھا کہ وفاق کے پاس صلاحیت نہیں تو سوئی سدرن گیس کمپنی ہمارے حوالے کر دے، حماد اظہر صاحب ہم گیس کی پیداوار اور درست تقسیم کر کے دکھا سکتے ہیں، صوبے کو گیس پیدا کرنے کے باوجود حق سے محروم کیا جا رہا ہے۔
خط میں مزید کہا گیا ہے کہ نومبر سے سندھ میں گیس کی بندش اور لو پریشر سے شہری مشکلات میں ہیں، کراچی کے شہری ملازمتوں اور بچے بھوکے اسکول جانے پر مجبور ہوگئے ہیں، کراچی سمیت سندھ کے شہری لکڑی، کوئلے، سلنڈر استعمال کر رہے ہیں، دو ماہ سے سندھ کا سی این جی سیکٹر بند، لاکھوں مزدور بیروزگار ہوگئے، سی این جی بندش سے کراچی میں رکشہ، ٹیکسی اور پبلک ٹرانسپورٹ بند ہیں، سندھ کی گیس ضرورت 750 اور فراہمی 560 ایم ایم سی ایف ڈی ہے۔

اسلام آباد: (ویب ڈیسک) کورونا کے بڑھتے کیسز کے پیش نظر نیشنل کمانڈ اینڈ کنٹرول سنٹر (این سی او سی) نے دوران پرواز اور پبلک ٹرانسپورٹ میں 17 جنوری سے کھانے کی تقسیم پر پابندی عائد کر دی۔ سول ایوی ایشن کو دوران پرواز ماسک کا استعمال اور دیگر ایس او پیز پر عمل درآمد یقینی بنانے کی ہدایت کر دی۔
این سی او سی کا اجلاس ہوا، جس میں کورونا کی بڑھتی صورتحال اور اضافے کی صورت میں مجوزہ بندشوں پر تبادلہ خیال کیا گیا۔ اجلاس میں صوبوں خصوصا سندھ کے ساتھ بڑھتی وباء کے کنٹرول کے لیے رابطے بڑھانے کا فیصلہ کیا گیا۔ این سی او سی نے تعلیمی اداروں، عوامی اجتماعات اور شادی ہالز میں ایس او پیز کے حوالے سے 17 جنوری کو خصوصی اجلاس طلب کرلیا، جس میں صوبائی وزرائے تعلیم و صحت شرکت کریں گے۔ این سی او سی کی جانب سے تمام صوبوں کو ایس او پیز پر عمل درآمد کے لیے سخت اقدامات کی ہدایت کر دی۔

لاہور: (ویب ڈیسک) وزیراعلیٰ عثمان بزدار کا کہنا ہے کہ جنوبی پنجاب کیلئے ملتان نشتر ٹو اور ڈی جی خان میں کارڈیالوجی انسٹیٹیوٹ تیزی سے تکمیل کے مراحل طے کر رہا ہے۔
وزیراعلی پنجاب عثمان بزدار نے اپنے بیان میں کہا ہے کہ جنوبی پنجاب میں بڑا نشتر ہسپتال 1953ء میں بنایا گیا، راولپنڈی اور بہاولپور میں ڈینٹل کالج بھی بنائے جا رہے ہیں، پنجاب میں مجموعی طور پر 8 مدر اینڈ چائلڈ ہسپتال بنا رہے ہیں، چنیوٹ، حافظ آباد اور چکوال میں نئے ڈسٹرکٹ ہسپتالوں کیساتھ منڈی بہاؤالدین کے ڈی ایچ کیو ہسپتال کے نامکمل منصوبے کو پایہ تکمیل تک پہنچایا، مجموعی طور پر صوبہ بھر میں 158 ہسپتالوں اور مراکز صحت کو اپ گریڈ کیا جا رہا ہے۔
عثمان بزدارکا کہنا تھا کہ ڈسٹرکٹ ڈویلپمنٹ پیکیج میں ہیلتھ کے 91 نئے ترقیاتی منصوبے شامل کئے گئے، صوبہ بھر کے ہسپتالوں اور طبی مراکز میں مفت ادویات کے لئے مجموعی طور پر سوا 37 ارب روپے مختص کئے گئے، پنجاب میں 14 سوشل سیکورٹی ہسپتال تھے، ہم نے صرف تین سال میں 9 نئے ہسپتال بنائے۔

لاہور: (ویب ڈیسک) ایف آئی اے نے منی لانڈرنگ کو نجی بینکوں کی ناکامی قرار دے دیا۔ ایف آئی اے رپورٹ میں کہا گیا ہے کہ شہباز شریف اور حمزہ شہباز نے بے نامی بینک اکاؤنٹس سے ہی منی لانڈرنگ کی۔
شہباز شریف فیملی منی لانڈرنگ کیس میں ایف آئی اے کی تحقیقات سے متعلق نئی رپورٹ آگئی، جس میں کہا گیا ہے کہ منی لانڈرنگ کے ماسٹر مائنڈ مرکزی ملزمان ہیں۔ منی لانڈنگ کے لیے بے نامی اکاؤنٹس کا استعمال نہ روکنا بینکوں کی واضح ناکامی ہے، ایف آئی اے نے بے نامی اکاؤنٹس نہ پکڑنے پر اسٹیٹ بینک کو نجی بینکوں کے خلاف کارروائی کی درخواست بھی دے دی ہے۔

لاہور: (ویب ڈیسک)پنجاب پاور ڈیویلپمنٹ کمپنی میں خرد برد کے ریفرنس میں اہم پیشرفت، احتساب عدالت نے کیس میں شہباز شریف کی بیٹی رابعہ عمران اور داماد عمران علی یوسف کے شریک ملزمان کو بری کر دیا۔
ریفرنس میں عدالت شہباز شریف کی بیٹی رابعہ عمران اور داماد عمران علی یوسف کو اشتہاری قرار دے چکی ہے۔ احتساب عدالت نمبر 2 کے جج نسیم احمد ورک نے پی پی ڈی سی خرد برد کیس میں فیصلہ سنایا۔ عدالت نے ملزم رانا محمد عثمان خان، فرہاد اکرام، ثمینہ اکرام، احسن اکرام اور عمر شمشاد کو بری کیا۔ عدالت نے ملزمان کی جانب سے دائر بریت کی درخواستوں پر دونوں فریقين کے دلائل سننے کے بعد محفوظ فیصلہ سنایا۔
ملزمان پر ارتھ کوئیک ری کنسٹرکشن اینڈ ری ہیبلیٹیشن اتھارٹی سمیت دیگر محکموں میں خردبرد کا الزام تھا۔ عدالت نے ریفرنس میں ملوث پانچ ملزمان کو بری کرنے کا مختصر فیصلہ سنایا۔ عدالت ریفرنس میں شہباز شریف کی بیٹی رابعہ عمران اور داماد عمران علی یوسف کو اشتہاری قرار دے چکی ہے۔