لندن: (ویب ڈیسک) پاکستان تحریک انصاف (پی ٹی آئی) رہنما جہانگیر ترین کی لندن میں ن لیگ کے رہنما اسحاق ڈار سے ملاقات ہوئی ہے۔
ذرائع کے مطابق دونوں رہنماؤں کی ملاقات سینٹرل لندن میں پارک لین پر واقع ایک ریسٹورنٹ میں ہوئی۔
ذرائع کے مطابق اسحاق ڈار اور جہانگیر ترین کی ملاقات تقریباً دو گھنٹے سے زائد وقت تک جاری رہی، دونوں رہنماؤں میں سیاسی امور پر تفصیلی بات چیت کی گئی۔
ذرائع کے مطابق دونوں رہنماؤں کی ملاقات میں مستقبل میں مل کرکام کرنے کے آپشنز پر غور کیاگیا۔

اسلام آباد: (ویب ڈیسک) وفاقی وزیر اطلاعات فواد چودھری نے کہا ہے کہ چیف آف آرمی اسٹاف جنرل قمر جاوید باجوہ اور وزیر اعظم عمران خان کے تعلقات مثالی ہیں۔
اپنی ٹوئٹ میں انہوں نے کہا کہ مسلسل ایک مہم چلائی جا رہی ہے کہ حکومت اور فوج کو علیحدہ دکھایا جائے، کسی بھی صورت میں ان تعلقات پر آنچ نہیں آئے گی۔
ان کا کہنا تھا کہ عمران خان واضع کر چکے ہیں افواج پاکستان ملک کی سلامتی اور تحفظ کی علامت ہے۔
خیال رہے کہ آج ایک انٹرویو میں وزیراعظم عمران خان نے کہا کہ میں کبھی ایسا کام نہیں کروں گا جس سے فوج کمزور ہو، نوازشریف پاکستان کے بھی دشمن ہیں اور فوج کے بھی، آرمی چیف کو ڈی نوٹیفائی کرنے کی بات ن لیگ کی ڈس انفارمیشن مہم تھی، آرمی سے تعلقات اچھے ہیں، یہ فوج کو پنجاب پولیس بنانا چاہتے ہیں۔
ایک سوال کے جواب میں عمران خان نے کہا کہ استعفیٰ میں دوں گا نہیں البتہ الیکشن سب سے بہتر طریقہ ہے۔ اس کے بعد عوام سے کہوں گا مجھے بھاری اکثریت سےکامیاب کرائیں۔

کراچی: (ویب ڈیسک) سندھ حکومت نے کچرے سے بجلی بنانے کے منصوبے کا نجی کمپنی سے معاہدہ کرلیا۔
کراچی کے نجی ہوٹل میں مفاہمتی یادداشت پر دستخط کی تقریب منعقد کی گئی، تقریب میں صوبائی وزیر توانائی امتیاز شیخ اور ایڈمنسٹریٹر کراچی مرتضیٰ وہاب اور دیگر شریک ہوئے۔
تقریب سے خطاب کرتے ہوئے امتیاز شیخ نے کہا کہ منصوبے کے تحت کراچی میں کچرے سے بجلی پیدا کی جائے گی، سندھ پاکستان کا پہلا صوبہ ہے جس نے کچرے سےبجلی پیدا کر نے کا منصوبہ بنایا، اس منصوبے سے 600 ملین ڈالر کی براہ راست سرمایہ کاری آئے گی، جس سے صوبے میں معاشی ترقی ہوگی۔
اس موقع پر ایڈمنسٹریٹر کراچی مرتضیٰ وہاب نے کہا کہ انرجی محکمہ کی کاوشوں کو سراہتاہوں، سندھ سالڈ ویسٹ مینجمنٹ بورڈ کی کارکردگی میں بہت بہتری آئی ہے، پیپلز پارٹی کی قیادت نے ہمیشہ ہرے بھرے پاکستان کا خواب دیکھا ہے۔

کیچ: (ویب ڈیسک) بلوچستان کے ضلع کیچ میں کار اور موٹر سائکل میں تصادم سے حادثے سے 7 افراد جاں بحق اور 3 زخمی ہوگئے۔
ڈپٹی کمشنر کیچ حسین جان کے مطابق حادثہ کیچ کے علاقے سامی میں پیش آیا، تیز رفتار کار سامنے سے آنیوالے موٹر سائکل سے ٹکرا گئی، حادثے کے بعد کار بے قابو ہو کر الٹ گئی جسکے نتیجے میں 7 افراد جاں بحق اور تین زخمی ہوئے۔
حسین جان کے مطابق حادثے کے بعد جاں بحق افراد کی لاشیں اور زخمیوں کو قریبی ہسپتال منتقل کیا گیا، زخمیوں میں ایک کی حالت تشویشناک بتائی جا رہی ہے۔

اسلام آباد: (ویب ڈیسک) اسلام آباد ہائیکورٹ نے پاکستان تحریک انصاف کے ممنوعہ فارن فنڈنگ کیس میں الیکشن کمیشن کے فیصلے کے خلاف پی ٹی آئی کی درخواست مسترد کردی۔
اسلام آباد ہائیکورٹ کے جسٹس محسن اختر کیانی نے درخواست مسترد کرنے کا فیصلہ سنایا۔ اس کے علاوہ اکبر ایس بابر کو کیس کی کارروائی سے الگ کرنے اور کمیٹی رپورٹ پر پی ٹی آئی کا جواب اکبر ایس بابر کو نہ دینے کی درخواستیں بھی مسترد کردی گئیں۔
تحریک انصاف نے الیکشن کمیشن سے 25 جنوری اور 31 جنوری کو دائر درخواستیں مسترد کرنے کا فیصلہ چیلنج کیا تھا۔
فارن فنڈنگ کیس کے خلاف اسلام آباد ہائیکورٹ میں اس سے پہلے دائر درخواست نمٹا دی گئی تھی اور جسٹس محسن اختر کیانی نے 29 جنوری 2018 کو معاملہ واپس الیکشن کمیشن کو بھجوایا تھا۔
خیال رہے کہ ممنوعہ فارن فنڈنگ کیس نومبر 2014 سے الیکشن کمیشن میں زیر سماعت ہے۔

کراچی: (ویب ڈیسک) پاکستان پیپلز پارٹی کے بانی اور سابق وزیراعظم ذوالفقار علی بھٹو کی برسی کے موقع پر سندھ حکومت نے 4 اپریل بروز پیر عام تعطیل کا اعلان کر دیا ہے۔
حکومت سندھ کی جانب سے جاری کردہ اعلامیے کے مطابق 4 اپریل کو کراچی سمیت صوبہ بھر میں چھٹی ہوگی، اس روز تمام نجی ، سرکاری دفاتر، سکولز اور کالجز بند رہیں گے۔
خیال رہے کہ پاکستان پیپلز پارٹی کے بانی چیئرمین اور سابق وزیراعظم ذوالفقار علی بھٹو کی برسی ہر سال 4 اپریل کو منائی جاتی ہے، سندھ حکومت اور پی پی پی اس روز صوبے سمیت ملک بھر میں خصوصی تقریبات کا اہتمام کریگی۔