اسلام آباد: (ویب ڈیسک) وفاقی حکومت نے وزیراعظم عمران خان کی طرف سے دکھائے گئے دھمکی آمیز خط کے بعد پارلیمنٹ کا ان کیمرہ اجلاس بلانے کا فیصلہ کر لیا ہے۔
خیال رہے کہ 27 مارچ کو اسلام آباد میں پریڈ گراؤنڈ میں جلسے سے خطاب کرتے ہوئے وزیراعظم عمران خان نے حکومت کے خلاف پیش کی گئی تحریک عدم اعتماد پر اپوزیشن پر الزام عائد کیا تھا کہ باہر سے پیسے لے کر حکومت گرانے کی کوشش کی جارہی ہے، ہمیں لکھ کر دھمکی دی گئی اور حکومت بدلنے کی کوشش باہر سے کی جارہی ہے۔
ذرائع کے مطابق وزیراعظم عمران خان کی زیر صدارت وفاقی کابینہ کا اجلاس ہوا، اجلاس میں اتحادی جماعت مسلم لیگ ق کے وفاقی وزیر مونس الٰہی، بی اے پی کی وفاقی وزیر زبیدہ جلال نے بھی شرکت کی۔ اجلاس کے دوران خفیہ خط کے معاملے پر ارکان کو اعتماد میں لیا گیا۔
اُدھر وفاقی کابینہ کے خصوصی اجلاس کی اندرونی کہانی سامنے آ گئی ہے، کابینہ اراکین کوخفیہ مراسلہ ٹیلی پرامپٹر پر دکھایا گیا، خفیہ مراسلہ قومی سلامتی کمیٹی اجلاس میں پیش کرنے کا فیصلہ کیا گیا ہے، قومی اسمبلی کے اِن کیمرہ اجلاس میں وزیرخارجہ مراسلہ پر بریفنگ دیں گے، وزیراعظم قومی سلامتی کمیٹی اجلاس بلائیں گے، اجلاس میں عسکری قیادت کو خفیہ مراسلہ دکھایاجائےگا۔
مزید برآں خط کے معاملے پر وفاقی حکومت نے پارلیمنٹ کا ان کیمرہ اجلاس بلانے کا فیصلہ کر لیا ہے۔ خط پارلیمنٹ کے ان کیمرہ اجلاس میں لایا جائے گا۔
اُدھر سپیکر قومی اسمبلی اسد قیصر نے سماجی رابطے کی ویب سائٹ ٹویٹر پر لکھا کہ دھمکی آمیز خط سے متعلق اگر پارلیمنٹ میں حکومت اور اپوزیشن کے پارلیمانی لیڈرز متفق ہوتے ہیں تو پارلیمانی کمیٹی برائے قومی سلامتی کے ان کیمرہ اجلاس میں بات ہو سکتی ہے۔
میڈیا سے گفتگو کے دوران وفاقی وزیر اطلاعات فواد چودھری نے کہا کہ وفاقی کابینہ اجلاس میں خط رکھا گیا تھا، خط کے مندرجات صحافیوں کے ساتھ شیئر کیے گئے ہیں، خط کو پارلیمان میں ان کیمرہ اجلاس میں لائیں گے، خط کل پارلیمان میں رکھیں گے۔

لاہور: (ویب ڈیسک) پاکستان مسلم لیگ (ن) کے منحرف اراکین پنجاب اسمبلی نے چودھری پرویز الٰہی کی حمایت کا اعلان کر دیا ہے۔
تفصیلات کے مطابق مسلم لیگ ن کے منحرف ارکان پنجاب اسمبلی کی سپیکر پنجاب اسمبلی چودھری پرویزالٰہی سے ملاقات ہوئی، ملاقات میں مولانا غیا ث الدین، فیصل نیازی، اشرف انصاری نے شرکت کی۔
چودھری پرویز الٰہی سے ہونے والی ملاقات میں پاکستان تحریک انصاف (پی ٹی آئی) کے رہنما یونس انصاری، چیف وہپ سید عباس علی شاہ، ایم این اے حسین الٰہی، صوبائی وزیرحافظ عمار بھی موجود تھے۔
اس موقع پر اراکین پنجاب اسمبلی نے کہا کہ چودھری پرویزالٰہی نے ہمیشہ شرافت اور وضع داری کی سیاست کی ہے، آپ کے ساتھ چلیں گے، ماضی میں بھی پرویزالٰہی نے وزارت اعلیٰ کے منصب پر صوبے کے عوام کی خدمت کی ہے۔
مسلم لیگ ن کے ارکان پنجاب اسمبلی کا مزید کہنا تھا کہ ہمارے ساتھ ن لیگ کے 16 ایم پی اے بھی چودھری پرویزالٰہی کے ساتھ چلیں گے۔
مولانا غیاث الدین نے کہا کہ چودھری پرویزالٰہی کیلئے دعا گو ہیں کہ اللہ انہیں کامیابی عطا فرمائے، پاکستان باالخصوص صوبہ پنجاب کی خدمت کرنا ان کی اور ان کے خاندان کی روایت ہے، ہمارے گروپ کے تمام ارکان اسمبلی پرویزالٰہی کو کندھے سے کندھا ملا کر کامیاب کرائیں گے، سپیکر پنجاب اسمبلی نے جس طرح پہلے صوبہ کی خدمت کی وہ اب بھی اسی طرح خدمت کریں گے۔
یونس انصاری کا کہنا تھا کہ ہمارا پورا گروپ چودھری پرویزالٰہی کی مکمل حمایت کرے گا، کسی قربانی کی ضرورت ہو وہ بھی انشاء اللہ پیش کریں گے۔

لاہور: (ویب ڈیسک) وزیراعظم عمران خان کی طرف سے وزیراعلیٰ پنجاب سردار عثمان بزدار سے لیے گئے استعفی کو کل منظور کیے جانے کا امکان ہے۔
وزیراعلی پنجاب کا استعفیٰ گورنرہاؤس کو موصول ہو گیا ہے، عثمان بزدار کا استعفی کل منظور کیے جانے کاامکان ہے، کل گورنرپنجاب چودھری محمد سرور استعفے کی منظوری کے حوالے سے اسمبلی سیکرٹریٹ کو آگاہ کردیں گے۔
گورنر پنجاب سے استعفے کی منظوری کے بعد اسمبلی سیکرٹریٹ نئے قائد ایوان کے انتخاب کے لئے اقدامات کرے گا، استعفے کی منظوری کے بعد اسمبلی اجلاس طلب کرنے اور انتخاب کا شیڈول جاری کیاجائے گا۔
خیال رہے کہ چند روز قبل وزیراعظم عمران خان کے ساتھ سپیکر پنجاب اسمبلی اور مسلم لیگ ق کے رہنما چودھری پرویز الٰہی بنی گالہ میں ملاقات ہوئی تھی جس میں انہیں وزارتِ اعلیٰ کی پیشکش کی گئی تھی جو انہوں نے قبول کر لی تھی۔
دوسری طرف پنجاب میں حکومت سازی کے چیلنج کے پیش نظر سپیکر چودھری پرویز الٰہی نے لاہور پہنچتے ہی جوڑ توڑ کا محاذ سنھبال لیا، صوبائی وزرا کے اجلاس میں مشاورت کی گئی۔
سپیکر چودھری پرویز الٰہی کی زیر صدارت پنجاب حکومت کے سینئر صوبائی وزرا کا اہم مشاورتی اجلاس ہوا جس میں صوبائی وزراء محمد بشارت راجہ، میاں اسلم اقبال، میاں محمود الرشید، ظہیرالدین، راجہ راشد حفیظ، سبطین خان، مراد راس اور رکن اسمبلی وسیم خان بادوزئی نے شرکت کی۔
پنجاب میں حکومت سازی اور ارکان اسمبلی سے رابطوں بارے مشاورت کی گئی پنجاب میں جوڑ توڑ اوررابطوں بارے وزراء کو ٹاسک سونپ دئے گئے ہیں۔