اسلام آباد: (ویب ڈیسک) مسلم لیگ قائد اعظم (ق) کے سربراہ و سابق وزیراعظم چوہدری شجاعت سابق صدر آصف علی زرداری سے ملاقات کیلئے زرداری ہاؤس جائیں گے۔
ذرائع ق لیگ کے مطابق چوہدری شجاعت اور آصف زرداری کی ملاقات زرداری ہاؤس میں ہوگی۔
ذرائع ق لیگ نے بتایا کہ چوہدری شجاعت اور آصف زرداری کی ملاقات کے وقت کا تعین کیا جا رہا ہے۔
خیال رہے کہ گزشتہ روز ق لیگ کے رہنما چوہدری پرویز الٰہی نے پنجاب کی وزارت اعلیٰ کی حکومتی پیشکش قبول کرتے ہوئے وزیراعظم عمران خان کی حمایت کا اعلان کیا ہے۔
اس اعلان کے بعد سے ق لیگ ٹوٹ پھوٹ کا شکار ہے اور طارق بشیر چیمہ نے عہدے سے مستعفی ہونے اور وزیراعظم کے خلاف ووڈ دینے کا اعلان کیا ہے۔

اسلام آباد: (ویب ڈیسک) گوادر سے آزاد رکن قومی اسمبلی اسلم بھوتانی حکومتی اتحاد سے علیحدگی کر کے اپوزیشن کا ساتھ دینے کا اعلان کر دیا۔
گوادر سے آزاد رکن قومی اسمبلی اسلم بھوتانی نے پاکستان پیپلز پارٹی کے چیئر مین بلاول بھٹو زرداری، سابق صدر آصف علی زرداری، پاکستان مسلم لیگ ن کے سینئر رہنما ایاز صادق، سردار اختر مینگل اور مولانا عبدالغفور حیدری کے ہمراہ پریس کانفرنس کے دوران اپوزیشن کا ساتھ دینے کا اعلان کرتے ہوئے کہا کہ گوادرسے آزاد حیثیت سے رکن منتخب ہوا تھا، الیکشن آرہا ہے اب ہماری الیکشن کی طرف نظرہے، آصف زرداری کے میرے اوپربہت احسانات ہیں۔ سابق صدر جہاں بھی جائیں گے ان کا ساتھ دوں گا۔ ان کا حکم تھا میں حاضر ہو گیا ہوں۔ بلاول کا عزت دینے پر شکرگزار ہوں۔ زرداری کے دور میں بلوچستان کا این ایف سی ایوارڈ بڑھا۔

اسلام آباد: (ویب ڈیسک) پاکستان پیپلز پارٹی کے صدر آصف علی زرداری کا کہنا ہے کہ پنجاب کے حوالے سے ہم مل کر فیصلہ کریں گے، اب پرویز الٰہی نے دیر کردی ہے۔
اسلام آباد میں پریس کانفرنس کرتے ہوئے سابق صدر مملکت آصف زرداری نے کہا کہ اب وزیراعلی پنجاب وہی ہوگا جس کا فیصلہ اپوزیشن کرے گی، نمبرز گیم صرف ہمارے پاس ہے۔
انہوں نے کہا کہ پرویز الہٰی وزیراعلیٰ پنجاب نہیں بن سکتے، نمبرز ہمارے پاس ہیں ،ان کے پاس نہیں، جسے اپوزیشن نامزد کرے گی وہی پنجاب کا وزیراعلیٰ بنے گا، پنجاب میں بھی تبدیلی لائیں گے۔
سابق صدر آصف زرداری نے کہا کہ ق لیگ والے رات بارہ بجے مبارکباد دینے آتے ہیں ، صبح کہیں اور چلے جاتے ہیں۔
آصف زرداری نے یہ دعویٰ بھی کیا کہ ایم کیو ایم سے متعلق اچھی خبرملے گی۔
خیال رہے کہ تحریک عدم اعتماد کے معاملے پر اتحادی جماعتوں کو اپنے ساتھ رکھنے کی غرض سے وزیراعظم عمران خان نے گزشتہ روز وزیر اعلیٰ پنجاب عثمان بزدار سے استعفیٰ لے کر ق لیگ کے رہنما چوہدری پرویز الٰہی کو وزیراعلیٰ پنجاب نامزد کردیا ہے۔
ق لیگ کے اس فیصلے پر اپوزیشن نے حیرانی کا اظہار کیا ہے کیوں کہ ان کے مطابق ق لیگ نے انہیں بھی حمایت کی یقین دہانی کرائی تھی اور اچانک وزارت اعلیٰ قبول کرلی۔
اس معاملے پر آصف زرداری جلد ق لیگ کی اعلیٰ قیادت سے ملاقات کریں گے۔
وزیراعظم عمران خان کیخلاف تحریک عدم اعتماد قومی اسمبلی میں پیش کی جاچکی ہے اور وزیر داخلہ شیخ رشید کے مطابق اس پر ووٹنگ 3 اپریل کو ہوگی۔

کراچی: (ویب ڈیسک) پاکستان پیپلز پارٹی (پی پی پی ) کے رکن قومی اسمبلی قادر پٹیل نے گرفتاری کے خدشے پر سندھ ہائی کورٹ سے رجوع کر لیا، عدالت نے قادر پٹیل کی حفاظتی ضمانت منظور کرنے سے انکار کر دیا ہے۔
عدالت کا کہنا تھا کہ گرفتاری کا خدشہ ہے تو اسلام آباد ہائی کورٹ سے ضمانت لیں، قادر پٹیل کے وکیل نے عدالت کو بتایا کہ سیاسی مصروفیات کے باعث قادر پٹیل اے ٹی سی میں پیش نہیں ہوسکے تھے، پٹیل اے ٹی سی میں پیش ہونا چاہتے ہیں گرفتار کرنے سے روکا جائے۔
اس موقع پر عدالت نے درخواست قابل سماعت ہونے پر قادر پٹیل کے وکیل سے دلائل طلب کر لئے، اے ٹی سی نے دہشتگردوں کے علاج کے مقدمے میں ناقابلِ ضمانت وارنٹ جاری کئے تھے، اے ٹی سی نے وارنٹ گرفتاری واپس لینے کی استدعا بھی مسترد کردی تھی۔

لکی مروت: (ویب ڈیسک) خیبر پختونخوا کے ضلع لکی مروت میں انٹیلی جنس بیسڈ آپریشن میں 4 دہشت گرد مارے گئے۔
پولیس کے مطابق لکی مروت کے علاقے فقیرانہ کلے میں دہشت گردوں کی موجودگی پر آپریشن کیا گیا جس میں پولیس کے علاوہ دیگر اداروں نے بھی حصہ لیا۔
آپریشن کے دوران بھاری ہتھیاروں کا استعمال کیا گیا، فائرنگ کے تبادلہ کے دوران چار انتہائی مطلوب دہشت گرد ہلاک ہوئے جبکہ ایک کو زخمی حالت میں گرفتار کیا گیا۔
دہشت گردوں سے مشین گنز، راکٹ ، ٹائم بم، دستی بم برآمد ہوئے، مارے جانیوالے دہشت گرد ٹارگٹ کلنگ، بھتہ خوری، پولیس، آرمی چیک پوسٹوں پرحملوں اور دھماکوں میں ملوث تھے۔