ممبئی: (ویب ڈیسک) فلم ’’گلی بوائے‘‘ کے معروف گلوکار دھرمیش پرمار 24 برس کی عمر میں چل بسے۔
بھارتی میڈیا میں کہاجارہا ہے کہ دھرمیش پرمار المعروف ریپر ایم سی توڑ فوڑ کی ہلاکت کار حادثے میں ہوئی ہے۔ تاہم ابھی تک ان کی موت کی وجہ کی تصدیق نہیں کی جاسکی ہے۔
گلوکار کی موت نے ان کے مداحوں کو صدمے میں مبتلا کردیا ہے۔ جب کہ اداکار رنویر سنگھ اور سدھانت چترویدی نے بھی دھرمیش پرمار کی موت پر افسوس کا اظہار کیا ہے۔
گلوکار دھرمیش پرمار نے فلم ’’گلی بوائے‘‘ کے ساؤنڈ ٹریک ’’انڈیا91‘‘ کے لیے اپنی آواز دی تھی اس کے علاوہ وہ ایک میوزک بینڈ ’’سوادیسی‘‘ کا بھی حصہ تھے۔ فلم ’’گلی بوائے‘‘ 2019 کی کامیاب فلم تھی جس میں اداکار رنویر سنگھ اور سدھانت چترویدی نے ریپر گلوکار کے کردار نبھائے تھے۔
رپورٹ کے مطابق گلوکاردھرمیش پرمار کی موت کی وجہ جاننے کے لیے تحقیقات کی جارہی ہیں۔ ایک میوزک پورٹل کے مطابق ریپر توڑ فوڑ کے گانوں کا بنیادی موضوع ’’کرپٹ اداروں‘‘ کے خلاف کھڑا ہونا تھا۔ اور وہ اپنی موسیقی سے ماحولیاتی اور انسانی حقوق کے لیے آواز اٹھاتے تھے۔
ریپر توڑ فوڑ کا ایک ساؤنڈ ٹریک ’’دی وارلی ریوولٹ‘‘ جس کے لیے انہوں نے ایک سماجی کارکن پرکاش کے ساتھ اشتراک کیا تھا یہ گانا ممبئی کے آرے جنگل میں درختوں کی کٹائی کے خلاف تھا۔
ایک بیان میں ریپر توڑ فوڑ نے کہا تھا کہ ’’گلی ریپ وہی ہے جو میں کرتا ہوں۔ اور میں گلی ریپ کرتا رہوں گا۔ لیکن میں اس کے ساتھ اور بہت کچھ کرنے جا رہا ہوں۔‘‘

کراچی: (ویب ڈیسک) معروف موسیقار نثار بزمی کو دنیا سے رخصت ہوئے 15 برس بیت گئے لیکن ان کی تخلیق کی گئیں لازوال دھنیں آج بھی سننے والوں کے کانوں میں رس گھولتی ہیں۔
نثار بزمی 1924 میں بھارتی ریاست مہاراشٹرا کے علاقے خاندیش کے قصبے میں پیدا ہوئے۔ انہوں نے اپنے فنی سفر کا آغاز آل انڈیا ریڈیو سے کیا اور کچھ ہی عرصے بعد بمبئی میں فلموں کی موسیقی دینا شروع کردی۔ بمبئی میں ان کا ستارہ اس قدر عروج پر تھا کہ لکشمی کانت پیارے لال جیسے موسیقار اُن کی معاونت میں کام کر چُکے تھے لیکن پاکستان فلم انڈسٹری کے معمار فضل احمد فضلی کے بلاوے پر انہوں نے بھارت چھوڑ کر پاکستان میں سکونت اختیار کرلی۔
نثار بزمی کی بطور موسیقار پاکستان میں پہلی فلم ’’ایسا بھی ہوتا ہے‘‘ تھی جس میں ان کے گیت’’محبت میں تیرے سر کی قسم ایسا بھی ہوتا ہے‘‘ پر احمد رشدی اور میڈم نور جہاں نے اپنی مدھر آوازوں کے جادو جگائے۔ جس کے بعد انہوں نے ’صاعقہ‘، ’انجمن‘، ’میری زندگی ہے نغمہ‘، ’خاک اور خون‘ اور ’ہم ایک ہیں‘ جیسی فلموں کی موسیقی تخلیق کی۔
نثاربزمی کو ان کی فنی خدمات کے باعث پرائیڈ آف پرفارمنس سمیت کئی دیگر ایوارڈز سے بھی نوازا گیا۔ عظیم موسیقار 22 مارچ 2007 کو اس دارفانی سے کوچ کر گئے لیکن ان کی تخلیق کردہ موسیقی آج بھی کروڑوں لوگوں کو مسحورکردیتی ہے۔

کراچی: (ویب ڈیسک) اداکارہ سجل علی نے سوشل میڈیا پر اپنے نام کے ساتھ لگا احد رضامیر کا نام ہٹادیا۔
سجل علی اور احد رضامیر کی جوڑی پاکستانیوں کی اس وقت سے پسندیدہ جوڑی بن گئی تھی جب انہوں نے پہلی بار ایک ساتھ کام کیا تھا۔ بعد ازاں دونوں متعدد پراجیکٹس میں ساتھ نظر آئے اور پھر دونوں نے اپنی آن اسکرین محبت کو حقیقی زندگی میں بدلتے ہوئے شادی کرلی۔
احد رضامیر اور سجل علی کی شادی کی خبر سن کر ان کے مداح بھی بے حد خوش تھے۔ تاہم گزشتہ کچھ عرصے سے دونوں کے درمیان اختلافات کی خبریں منظر عام پر آرہی ہیں۔ یہاں تک کہ سوشل میڈیا پر دونوں کی علیحدگی کی خبریں بھی وائرل ہیں۔
لیکن ابھی تک سجل علی اور احد رضامیر یا پھر ان کے گھر والوں کی طرف سے ان دونوں کی علیحدگی کی تصدیق نہیں کی گئی تھی۔ تاہم اب سجل علی نے سوشل میڈیا پر اپنے نام کے ساتھ لگا احد رضامیر کا نام ہٹا دیا ہے۔
شادی کے بعد سجل علی نے انسٹاگرام پر اپنے نام کے ساتھ اپنے شوہر احد رضامیر کے نام کا اضافہ کرلیا تھا۔ لیکن اب انسٹاگرام پر ان کے نام کے ساتھ لگا شوہر کا نام ہٹ چکا ہے اور صرف سجل علی لکھا ہوا نظر آرہا ہے۔ جس سے بظاہر یہ معلوم ہوتا ہے کہ سجل اور احد کے درمیان علیحدگی ہوچکی ہے۔ تاہم ابھی دونوں کی جانب سے علیحدگی کا باضابطہ بیان جاری نہیں ہوا ہے۔

دبئی: (ویب ڈیسک) اداکار منیب بٹ نے اپنی اہلیہ ایمن خان کے ساتھ فلم دیکھنے کے لیے پورا سینما ہی بک کرالیا۔
اداکار منیب بٹ ان دنوں اپنی بیوی اداکارہ ایمن خان اور بیٹی امل منیب کے ہمراہ دبئی میں چھٹیوں سے لطف اندوز ہورہے ہیں اور وہاں سے مداحوں کے لیے سوشل میڈیا پر تصاویر بھی شیئر کررہے ہیں۔
گزشتہ روز منیب بٹ نے انسٹااسٹوری پر ایک مختصر ویڈیو شیئر کی، جس میں وہ اور ان کی اہلیہ تھیٹر میں موجود ہیں جہاں اسکرین پر عالیہ بھٹ کی حال ہی میں ریلیز ہوئی فلم ’’گنگو بائی کاٹھیاواڑی‘‘ چل رہی ہے۔
ویڈیو میں منیب بٹ ایمن خان کو بول رہے ہیں ’’ایمن تمہارے لیے پورا سینما بک کیا ہے، اب اگر گنکو بائی فلم اچھی نہیں ہوئی تو پھر یہ نا تھی ہماری قسمت کی آخری قسط دیکھیں گے‘‘۔ ویڈیو کے ساتھ کیپشن میں منیب نے لکھا ’’پرائیوٹ شو گنگو بائی‘‘۔