راولپنڈی: (ویب ڈیسک) باجوڑ میں امن دشمنوں کی سکیورٹی فورسز پر فائرنگ سے 2 جوان اور 3 معصوم شہری شہید، جوابی کارروائی میں 4 دہشتگرد ہلاک ہوگئے۔
پاک فوج کے شعبہ تعلقات عامہ (آئی ایس پی آر) کے مطابق باجوڑ میں دہشتگردوں کی سکیورٹی فورسز پر فائرنگ سے نائب صوبیدار اشتیاق اور سپاہی کامران وطن پر قربان ہوگئے، 44 سالہ نائب صوبیدار اشتیاق کا تعلق نوشہرہ، 21 سالہ سپاہی کامران کا تعلق ضلع اورکزئی سے ہے جبکہ شہریوں میں عصمت، الہام اور بہادر شامل ہیں۔
سکیورٹی فورسز کی فائرنگ سے 4 دہشتگرد جہنم واصل ہوگئے، مارے جانے والے دہشتگردوں سے اسلحہ و گولہ باردو برآمد کر لیا گیا، دہشتگرد سکیورٹی فورسز کے خلاف کارروائیوں میں ملوث تھے۔
آئی ایس پی آر کے مطابق پاک فوج دہشتگردی کی لعنت کے خاتمے کے لیے پرعزم ہے، ہمارے بہادر جوانوں، معصوم شہریوں کی قربانیاں ہمارا عزم مزید مضبوط کرتی ہیں۔

اسلام آباد: (ویب ڈیسک) وزیراعظم عمران خان سے آذربائیجان کے وزیر دفاع ذاکر حسنوف، مصر، تاجکستان کے وزیر خارجہ اور اسلامی ترقیاتی بینک کے چیئرمین نے ملاقات کی۔
وزیراعظم عمران خان سے آذربائیجان کے وزیر دفاع ذاکر حسنوف نے ملاقات کی جس میں پاکستان اور آذربائیجان کے درمیان مضبوط دفاعی تعلقات پر گفتگو ہوئی جبکہ وزیراعظم نے دوطرفہ تجارت، سیاحتی رابطوں کے فروغ کے عزم کا اعادہ کیا۔
وزیراعظم آفس اسلام آباد سے جاری اعلامیہ کے مطابق وزیراعظم نے آذربائیجان سے برادرانہ تعلقات کو مزید وسعت دینے کی خواہش کا اظہارکیا۔
وزیراعظم نے او آئی سی میں آذربائیجان کے تعاون کی تعریف کی، امن اور خوشحالی کے مقصد کے حصول میں آذربائیجان کی کوششوں کو سراہا۔
وزیر دفاع حسنوف نے آذربائیجان کے صدر کی طرف سے وزیر اعظم کو مبارکباد پیش کی۔
واضح رہے کہ آذربائیجان کی مسلح افواج کا دستہ 23 مارچ 2022 کو پاکستان کے قومی دن کی پریڈ میں شرکت کرے گا۔
بعدازاں وزیراعظم عمران خان سے مصر کے وزیر خارجہ نے ملاقات کی، ملاقات میں باہمی دلچسپی کے مختلف امور پر تبادلہ خیال کیا گیا، وزیراعظم نے پاکستان اور مصر کے درمیان تاریخی اور گہرے برادرانہ تعلقات کو دہرایا اور اقتصادی، تجارتی شعبوں میں دوطرفہ سیاسی تعلقات کو مزید وسعت دینے کی اہمیت پر زور دیا۔
وزیراعظم نے صدر عبدالفتاح السیسی کے ساتھ اپنی ملاقاتوں کا ذکر بھی کیا اور کہا کہ دونوں ممالک کے درمیان باہمی طور پر فائدہ مند روابط بڑھانے کی بڑی گنجائش اور امکانات موجود ہیں۔
وزیراعظم نے مصری وزیر خارجہ سے مختلف علاقائی اور عالمی امور پر تبادلہ خیال کیا کرتے ہوئے بھارت کی جموں و کشمیر میں انسانی حقوق کی سنگین خلاف ورزیوں اور خطے کو لاحق خطرات پر روشنی ڈالی، اقوام متحدہ کے 15 مارچ کو اسلامو فوبیا سے نمٹنے کے لیے عالمی دن قرار دینے کو سراہا، او آئی سی پلیٹ فارم کو دنیا بھر میں مسلمانوں کے لیے انصاف کے مقصد کو آگے بڑھانے کی ضرورت پر زور دیا۔
ادھر وزیراعظم عمران خان سے تاجکستان کے وزیر خارجہ نے بھی ملاقات کی، وزیراعظم نے پاکستان اور تاجکستان کے درمیان سفارتی تعلقات کے قیام کی 30ویں سالگرہ پر وزیر خارجہ کو مبارکباد دیتے ہوئے تجارتی اور اقتصادی روابط کو بڑھانے کے لیے ٹرانزٹ ٹریڈ معاہدے کو جلد مکمل کرنے کی اہمیت پر زور دیا، افغانستان میں پائیدار امن اور انسانی امداد کی فراہمی کے لیے پاکستان کی مسلسل حمایت پر شکریہ ادا کیا اور کہا کہ پرامن، مستحکم اور خوشحال افغانستان سب کے مفاد میں ہے۔
قبل ازیں او آئی سی کی وزرائے خارجہ کونسل کے 48ویں اجلاس میں شرکت کے لیے دورہ پاکستان پر موجود اسلامی ترقیاتی بینک کے چیئرمین ڈاکٹر محمد سلیمان الجاسر نے ملاقات کی۔
ملاقات میں وزیراعظم نے پاکستان کے ساتھ آئی ایس ڈی بی کی دیرینہ اور قابل اعتماد شراکت داری کی تعریف کی، توانائی، مالیات، ٹرانسپورٹیشن، تعلیم اور صحت جیسے مختلف شعبوں میں اس کے کردار، کورونا ویکسینز کی خریداری کے لیے پاکستان کے لیے آئی ایس ڈی بی کے تعاون کو بھی سراہا۔
ڈاکٹر الجاسر نے وزیر اعظم کو آئی ایس ڈی بی کے پروگراموں کے بارے میں بریفنگ دی، افغانستان ہیومینٹیرین ٹرسٹ فنڈ کو فعال کرنے پر بھی گفتگو ہوئی۔
اسلامی ترقیاتی بینک کے چیئرمین نے کہا کہ فنڈ 19 دسمبر 2022 کو اسلام آباد میں منعقدہ او آئی سی کے غیر معمولی اجلاس کے ذریعے قائم کیا گیا تھا، افغان عوام جنہیں انسانی اور معاشی امداد کی اشد ضرورت تھی۔
وزیراعظم عمران خان نے کہا کہ پاکستان آئی ایس ڈی بی کے ساتھ اپنی شراکت داری کو بہت اہمیت دیتا ہے، پاکستان بینک سے مزید تعاون اور تعلقات کی مضبوطی کا منتظر ہے۔

اسلام آباد: (ویب ڈیسک) وزیراعظم عمران خان نے سوشل میڈیا پر اداروں اور افسران کے خلاف چلنے والی مہم کا نوٹس لیتے ہوئے ملوث افراد کو قانون کی گرفت میں لانے کی ہدایت کردی۔
وزیراعظم عمران خان کی زیر صدارت پارٹی رہنماؤں کا اجلاس ہوا، جس میں سوشل میڈیا پر گزشتہ روز سے جاری مہم کا معاملہ زیر بحث آیا۔
ذرائع کے مطابق وزیراعظم نے اداروں اور افسران کے خلاف سوشل میڈیا پر چلنے والی مہم کا نوٹس لیا اور مہم چلانے والے عناصر کے خلاف سخت کارروائی کی ہدایت کی۔
ذرائع کے مطابق سوشل میڈیا پر مہم چلانے والوں کے خلاف ایف آئی اے سائبر کرائم ونگ کو کارروائی کی ہدایت کی گئی ہے۔ اجلاس میں وزیراعظم کو سوشل میڈیا پر مہم چلانے والوں سے متعلق رپورٹ پیش کی گئی۔

اسلام آباد: (ویب ڈیسک) وفاقی وزیر توانائی حماد اظہر نے کہا ہے کہ اگلے چند دن پاکستان کے مستقبل کے حوالے سے بہت اہم ہیں۔
انہوں نے یہ بات سماجی رابطوں کی ویب سائٹ ’ٹوئٹر‘ پرجاری کردہ اپنے ایک بیان میں کہی ہے۔ انہوں نے کہا کہ اس وقت پاکستان بمقابلہ چند کرپٹ خاندان ہیں۔
پاکستان تحریک انصاف سے تعلق رکھنے والے وفاقی وزیر حماد اظہر نے کہا کہ عمران خان کے نام پر ووٹ لینے والے اپنی حکومت بنانے کا خواب دیکھ رہے ہیں۔
انہوں ںے کہا کہ پاکستان کو واپس زرداری، شریف اور فضل الرحمان کے تاریک دور میں دھکیلا جا رہا ہے۔

اسلام آباد: (کوہ نورنیوز) وزیراعظم عمران خان نے چین میں مسافر طیارے کے حادثے میں ہونے والے المناک جانی نقصان پر گہرے دکھ کا اظہار کیا ہے۔سماجی رابطے کی ویب سائٹ ٹوئٹر پر پیغام جاری کرتے ہوئے وزیراعظم عمران خان نے لکھا کہ غم کی اس گھڑی میں اپنے چینی بھائیوں اور بہنوں کے ساتھ کھڑے ہیں۔ انہوں نے مزید لکھا کہ سوگوار خاندانوں کے ساتھ اپنی گہری تعزیت اور ہمدردی کا اظہار کرتا ہوں۔خیال رہے کہ چینی ائیر لائن کا بوئنگ 737 طیارہ جنوبی چین میں گر کر تباہ ہوگیا، طیارے میں عملے کے ارکان سمیت 132 افراد سوار تھے۔چینی میڈیا کے مطابق اندرونی پرواز چین کے صوبے یننان سے گوانگڈونگ جا رہی تھی، طیارے کا ملبہ جنوبی چین کے پہاڑوں میں مل گیا ہے اور کسی کے بچ جانے کا امکان نہ ہونے کے برابر ہے۔میڈیا رپورٹ کے مطابق طیارہ 29 ہزار فٹ کی بلندی پر سفر کر رہا تھا کہ اچانک دو منٹ کے اندر 3 ہزار فٹ کی بلندی پر آگیا اور پھر ریڈار سے غائب ہوگیا۔ریسکیو اہلکار طیارے کے ملبے تک پہنچ گئے ہیں اور امدادی کارروائیاں جاری ہیں۔