اسلام آباد: (ویب ڈیسک) وزیراعظم ایک روزہ دورے پر آج ملاکنڈ جائیں گے جہاں عوامی جلسے سے خطاب کریں گے۔
تحریک انصاف کی عوامی رابطہ مہم جاری ، وزیراعظم ایک روزہ دورے پر آج ملاکنڈ جائیں گے۔ گورنمنٹ ڈگری کالج درگئی میں جلسے کی تیاریاں مکمل کر لی گئیں۔ وزیراعظم عمران خان عوام سے خطاب کریں گے۔
ذرائع کے مطابق وزیراعظم مالاکنڈ جانے سے قبل اجلاس کی صدارت کریں گے، حکومتی سیاسی کمیٹی کا اجلاس بنی گالہ میں ہو گا جس میں موجودہ سیاسی صورتحال پر مشاورت ہو گی۔اجلاس میں ارکان اسمبلی اور اتحادیوں سے رابطوں پربھی بات ہو گی، صدارتی ریفرنس کی تیاری سے متعلق یھی آگاہ کیا جائے گا ۔
وزیراعظم نے 27 مارچ کو ڈی چوک میں ہونے والے جلسے کا لوگو بھی ٹویٹ کیا، اپنے پیغام میں عمران خان کا کہنا تھا کہ انشااللہ 27 مارچ کو اسلام آباد میں امر بالمعروف کریں گے۔ حق کے ساتھ کھڑے ہیں، چاہتے ہیں عوام کی حاضری کے ریکارڈ ٹوٹ جائیں۔ سیاسی مافیاز کی طرف سے ان کی لوٹی ہوئی دولت کو بچانے کے لیے سیاست دانوں کو خریدنے کی مذمت کرتے ہیں۔

ملتان: (ویب ڈیسک) ملتان میں واسا کی 9 پرانی اور 52 نئی سکیموں کیلئے 8 ارب روپے کا بجٹ درکار ہے ، حکومت نے ایک ارب دے کر خاموشی اختیار کر لی۔
تاریخی شہر ملتان میں تیرہ سو کلو میٹر کی لائن اپنی پینتیس سالہ میعاد پوری کر چکی ہے جس کی تبدیلی کیلئے حکومت نے 8 ارب روپے منظور کر کے صرف ایک ارب روپے فراہم کیے جس کی وجہ سے فنڈز کی قلت کو جواز بنا کر تا حال دو سو کلو میٹر کی لائن ہی تبدیل کی جاسکی ہے جس سے چونگی نمبر نو، پرانا شجاع آباد اور نواب پور میں سڑک بیٹھنے کے متعدد واقعات رونما ہوچکے ہیں جس کا شہریوں اور تاجروں نے حکومت سے صورتحال کا نوٹس لینے کا بھی مطالبہ کیا ہے۔
ایم ڈی واسا کا موقف ہے کہ فنڈز کی عدم دستیابی کے باعث محکمے کیلئے ملازمین کو تنخواہوں کی ادائیگی کرنا بھی مشکل ہو گیا ہے تاہم محدود وسائل مختلف شاہراہوں پر سیوریج لائن کی مرمت کا کام جاری ہے جس کیلئے حکومت سے سپلیمنٹری گرانٹ بھی مانگ لی ہے۔
فنڈز کی عدم دستیابی پر چونگی نمبر نو ڈسپوزل کی اپ گریڈیشن اور دریائے چناب پر واٹرٹریٹمنٹ کا منصوبہ تاحال شروع نہیں ہو سکا جس سے سیوریج کے مسائل بھی کافی حد تک بڑھ گئے ہیں۔

کراچی: (ویب ڈیسک) کراچی کے علاقے شرافی گوٹھ میں شہری نے فائرنگ کرکے ایس ایچ او سمیت تین پولیس اہلکاروں کو زخمی کر دیا، فائرنگ کرنے والا ملزم مبینہ پولیس مقابلے میں ہلاک ہوگیا۔
کراچی کے علاقے شرافی کالونی میں شہری نے فائرنگ کر کے ایس ایچ او سمیت تین پولیس اہکاروں کو زخمی کر دیا ، فائرنگ کرنے والا ملزم مجید بھی پولیس سے فائرنگ کے تبادلے میں ہلاک ہوگیا۔ ایس ایس پی ملیر عرفان بہادر کا کہنا ہے سہراب گوٹھ میں تعینات پولیس اہلکار ندیم اور مجید نامی شخص کے درمیان مجید کی جانب سے اسلحہ کی نمائش کرنے سے منع کرنے پر جھگڑا ہوا تو ملزم مجید نے ندیم پر فائرنگ کرکے اسے زخمی کردیا۔
واقعہ کی اطلاع ملنے پر ایس ایچ او شرافی گوٹھ عدیل شاہ پولیس پارٹی کے ہمراہ پہنچے تو ملزم نے پولیس پارٹی پر بھی فائرنگ کی جس کے نتیجے میں ایس ایچ او عدیل شاہ اور اہلکار یاسر بھی زخمی ہوئے۔
پولیس نے ملزم کو خود کو قانون کے حوالے کرنے کا کہا لیکن ملزم اپنے گھر سے پولیس پر فائرنگ کرتا رہا۔ ایس ایس پی ملیر کے مطابق پولیس اور ملزم کے درمیان فائرنگ کا تبادلہ ہوا جس میں ملزم مجید شدید زخمی ہوا، اسے ہسپتال منتقل کیا جارہا تھا کہ راستے میں ہی ہلاک ہو گیا۔
پولیس نے جائے وقوعہ سے شواہد جمع کرکے ملزم کی لاش قانونی کارروائی کے لئے ہسپتال منتقل کردی ہے۔

اسلام آباد: (ویب ڈیسک) وزیراعظم کے سیکرٹری اعظم خان کو ایگزیکٹو ڈائریکٹر ورلڈ بینک مقرر کر دیا گیا، ان کو 21 فروری سے اس عہدے پر فائز کیا گیا ہے۔
وزیراعظم کے سیکرٹری اعظم خان کا ایگزیکٹو ڈائریکٹر ورلڈ بینک تقررکر دیا گیا، اعظم خان کی تقرری کا نوٹیفکیشن 21 فروری کو جاری کیا گیا۔ ورلڈ بینک کے ایگزیکٹو ڈائریکٹر نوید کامران کی مدت ملازمت 30 اکتوبر کو ختم ہو رہی ہے ۔
اعظم خان کی بطور ایگزیکٹو ڈائریکٹر ورلڈ بینک تقرری 4 سال کے لئے کی گئی ہے۔

لاہور: (ویب ڈیسک) ملک کے بیشتر علاقوں میں آج موسم خشک رہے گا، بالائی خیبر پختونخوا اور گلگت بلتستان میں چندمقامات پر تیز ہواؤں اورگرج چمک کے ساتھ بارش کا امکان ہے۔
موسم کا حال بتانے والوں کے مطابق آج خیبرپختونخوا میں چترال، سوات، ، مانسہرہ اور ایبٹ آباد میں تیز ہواؤں اورگرج چمک کے ساتھ بارش ہو سکتی ہے، پنجاب ،سندھ اور بلوچستان میں موسم خشک اور گرم رہے گا۔
کشمیر میں مطلع ابر آلود رہنے کی پیش گوئی ہے۔

لاہور: (ویب ڈیسک) کورونا سے مزید ایک شخص دم توڑ گیا، 375 نئے مریض بھی سامنے آ گئے۔
کورونا کی پانچویں لہر میں کمی کے بعد مثبت کیسز کی شرح ایک اعشاریہ صفر چھ ریکارڈ کی گئی، مزید ایک مریض دم تو ڑگیا،جاں بحق افراد کی تعداد تیس ہزار تین سو انتیس ہوگئی۔ چوبیس گھنٹے کے دوران 375 نئے مریضوں کا اضافہ ہوا، متاثرہ افراد کی تعداد پندرہ لاکھ اکیس ہزار سے تجاوز کر گئی۔ گذشتہ 24 گھنٹے میں کورونا کے 286 مریض صحت یاب ہوئے، صحت پانے والے افراد کی مجموعی تعداد 14 لاکھ 75 ہزار 759 ہوگئی۔
گذشتہ روز 33 ہزار 225 کورونا ٹیسٹ کیے گئے، اب تک ملک بھر میں 2 کروڑ 71 لاکھ 45 ہزار 508 کورونا ٹیسٹ کیے جا چکے ہیں۔ کورونا سے متاثر 506 مریضوں کی حالت تشویشناک بتائی گئی ہے۔=
صوبہ پنجاب میں تاحال 5 لاکھ 4 ہزار 393 کیسز پائے گئے ہیں، سندھ میں 5 لاکھ 73 ہزار 579 ، خیبرپختونخوا 2 لاکھ 18 ہزار 629 جبکہ بلوچستان میں 35 ہزار 458 کیسز رپورٹ ہوئے ہیں۔ اسلام آباد ایک لاکھ 34 ہزار 951، اور گلگت بلتستان میں کورونا مریضوں کی تعداد 11 ہزار 664 پائی گئی ہے، آزاد کشمیرمیں کورونا مریضوں کی تعداد 43 ہزار 214 تک پہنچ گئی ہے۔