ممبئی: (ویب ڈیسک) بالی ووڈ کے سینئر اداکار انوپم کھیر نے کہا ہے کہ میں کورونا کی وجہ سے اسپتال کے بستر پر دم توڑنا نہیں چاہتا۔
اداکار انوپم کھیر نے کورونا ویکسین کے حوالے سے ایک آگاہی ویڈیو اپنے سوشل میڈیا اکاؤنٹ پر شیئر کی ہے جس میں انہوں نے کورونا پروٹوکولز اور ویکسین کی اہمیت بتاتے ہوئے کہا ہے کہ دو بار ویکسین لگوانے کے باوجود ماسک پہننا کیوں ضروری ہے۔
انوپم کھیر نے کہا میں نے کورونا ویکسین اپنے لیے لگوائی ہے اور میں ماسک آپ لوگوں کے لیے پہنتا ہوں۔ مجھے نہیں معلوم کہ ویکسین میں کیا ہے اور جب مجھے بچپن میں کبھی کوئی ویکسین لگی تو مجھے اس وقت بھی معلوم نہیں تھا کہ اس میں کیا ہے۔ ہم نے سائنس پر بھروسہ کیا۔ ایسی بہت سی چیزیں ہیں جن کے بارے میں میں نہیں جانتا لیکن پھر بھی استعمال کرتا ہوں۔
انوپم کھیر نے کہا میں نے مکمل طور پر ویکسین لگوالی ہے امید ہے جلد ہی بوسٹر شوٹ بھی لگوالوں گا۔ مجھے نہیں معلوم اس میں (ویکسین میں) کیا ہے۔ اداکار نے زندگی میں عام طور پر استعمال ہونے والی اشیا اور دوائیوں کی مثال دیتے ہوئے کہا کہ انہیں نہیں معلوم درد کم کرنے والی ادویات (پین کلرز)، صابن، شیمپو اور پرفریومز میں کون سے اجزا شامل کیے جاتے ہیں یا ریسٹورنٹ میں کھانا بناتے وقت اسٹاف اپنے ہاتھوں کو صحیح طرح سے دھوتے ہیں یا نہیں۔
لیکن میں یہ جانتا ہوں کہ زندگی مختصر ہے میں سفر کرنا چاہتاہوں، بغیر خوف کے لوگوں کو گلے لگانا چاہتا ہوں، زندگی کی چھوٹی چھوٹی چیزوں کو محسوس کرنا چاہتاہوں جیسا کہ پہلے (کورونا سے قبل) تھا۔
انوپم کھیر نے کہا کہ میں نے ویکسین حکومت کو خوش کرنے کے لیے نہیں لگوائی اور نہ ہی اسلیے لگوائی کہ دوسرے بھی لگوائیں۔ بلکہ میں کووڈ 19 کی وجہ سے اسپتال کے بستر پر مرنا نہیں چاہتا۔

لاہور: (ویب ڈیسک) گلوکار واداکار علی ظفر نے کہا ہے کہ وہ ملزمان جن کے وارنٹ جاری ہوچکے ہیں خود ساختہ جیت کی خوشیاں منارہے ہیں۔
علی ظفر نے مائیکرو بلاگنگ ویب سائٹ پر کہا ان کی جیت جھوٹ غلط معلومات پر مبنی ہے، جس بات پر خوشیاں منائی جارہی ہے ایسا کوئی عدالتی حکم آیا نہیں، میں ایسی تہمت پر صبر کرتا رہا لیکن جلد ریکارڈ کو درست کریں گے۔
گلوکار نے کہا جو بھی ہوا اس پر میں اکثر خاموش رہا، الزام لگانے والوں کے ہر رابطے اور پیسوں کے حوالے سے خاموش نہیں رہوں گا۔
واضح رہے کہ علی ظفر ان دونوں دبئی ایکسپو میں پرفارم کرنے گئے ہیں، دبئی ایکسپو میں پرفارمنس کی خبریں چلتے ہی سوشل میڈیا پر علی ظفر کے خلاف مہم شروع ہوگئی، اس سے قبل بھی متعدد بڑے پلیٹ فارمز پر علی ظفر کی شمولیت سے قبل ان کے خلاف سوشل میڈیا مہم شروع کی گئی۔

کراچی: (ویب ڈیسک) سابق مارننگ شو کی میزبان اور اداکارہ نادیہ خان نے پاکستان پیپلز پارٹی کی رکن سندھ اسمبلی شرمیلا فاروقی کی جانب سے ان کے خلاف قانونی کارروائی پر ردعمل دیا ہے۔
چند روز قبل سوشل میڈیا پر نادیہ خان کی شرمیلا فاروقی کی والدہ انیسہ فاروقی کے ہمراہ ایک ویڈیو وائرل ہوئی تھی جس میں نادیہ خان بظاہر تو انیسہ فاروقی سے ان کے میک اپ اور جیولری وغیرہ کے بارے میں پوچھ رہی تھیں لیکن ان کا انداز تمسخر اڑانے والا تھا۔
نادیہ خان کے اس رویے کو سوشل میڈیا صارفین نے بہت زیادہ محسوس کیا اور ان پر ایک عمر رسیدہ خاتون کا مذاق اڑانے پر شدید تنقید کی گئی۔
شرمیلا فاروقی نے بھی نادیہ خان کے اپنے والدہ کے ساتھ اس رویے پر سخت برہمی کا اظہار کرتے ہوئے ان کے خلاف سائبر کرائم میں شکایت درج کروائی۔ تاہم اب نادیہ خان نے اپنے یوٹیوب چینل پر ایک طویل ویڈیو شیئر کی ہے جس میں وہ انیسہ فاروقی کا تمسخر اڑانے کی وضاحت دیتی ہوئی نظر آرہی ہیں۔
نادیہ خان کی ویڈیو کا ایک مختصر کلپ سوشل میڈیا پر وائرل ہورہا ہے جس میں وہ کہہ رہی ہیں مجھے وہ خواتین بہت اچھی لگتی ہیں جو ہر عمر میں اپنا خیال رکھتی ہیں۔ نادیہ خان نے کہا کہ وہ ویڈیو میں انیسہ فاروقی کی تیاریوں کی تعریف کررہی تھیں جس پر وہ بہت خوش ہوئیں۔
مارننگ شو کی میزبان نے کہا کہ میں نے ویڈیو میں انیسہ فاروقی کے لیے ایک بھی برا لفظ نہیں کہا حالانکہ شرمیلا نے میرے لیے ’’بے شرم‘‘ کا لفظ استعمال کیا۔ یہ غلط لفظ ہے، یہ میری بے عزتی ہےاور یہ جرم ہے۔
نادیہ خان نے کہا اگر آپ کسی کو بدنام کرتے ہیں یا کسی کی نجی چیزوں کو وائرل کرتے ہیں تو یہ سائبر کرائم ہے لیکن اتنی پڑھی لکھی خاتون شرمیلا فاروقی کو سمجھ نہیں آرہا کہ میری اور انیسہ فاروقی کی ویڈیو میں سائبر کرائم کہاں ہے۔
نادیہ خان نے کہا کہ شکایت درج کرنے سے نہ مجھے اور نہ میرے گھروالوں کو کوئی فرق پڑرہا ہے۔ مارننگ شو کی میزبان نے شرمیلا فاروقی کی اس بات پر بھی اعتراض کیاکہ شرمیلا نے اگر سائبر کرائم میں شکایت درج کروائی تو اس کا ڈھنڈورا میڈیا پر کیوں پیٹا۔ اگر آپ کو اپنی والدہ کا اتنا احساس ہے تو آپ بغیر اعلان کیے جائیں۔ لیکن آپ کو ہر جگہ میڈیا چاہئے تاکہ آپ ہمدردیاں سمیٹ سکیں۔