کراچی (آئی این پی) پیپلز پارٹی کراچی ڈویژن کے صدر ڈاکٹر عاصم حسین لندن روانہ ہوگئے۔ تفصیلات کے مطابق سندھ ہائی کورٹ نے ڈاکٹر عاصم حسین کا نام ایگزٹ کنٹرول لسٹ (ای سی ایل) سے نکالنے کا حکم دیا تھا جس کے بعد وہ کراچی کے جناح انٹرنیشنل ایئرپورٹ سے لندن روانہ ہوگئے۔ نجی ٹی وی سے گفتگو کرتے ہوئے ڈاکٹر عاصم حسین نے کہا پاکستان میرا گھر ہے اور میرا جینا مرنا یہیں ہے، بیرون ملک سے علاج کرا کر واپس آﺅں گا اور پھر دوسروں کا علاج کروں گا۔خیال رہے کہ عدالت نے اپنے حکم میں کہا تھا کہ ڈاکٹر عاصم ایک مہینے بعد علاج کرا کے واپس آجائیں جب کہ عدالت 60 لاکھ روپے زر ضمانت کے عوض ان کی ضمانت منظور کی۔ڈاکٹر عاصم کو رینجرز نے دہشت گردوں کے علاج و معالجے کی سہولت کے الزام میں گرفتار کیا تھا جب کہ ان پر 479 ارب روپے کی کرپشن کا بھی الزام ہے جس میں ان کے خلاف نیب نے ریفرنس دائر کر رکھا ہے۔سندھ ہائیکورٹ نے 29 مارچ کو ڈاکٹر عاصم کی ضمانت منظور کی جس کے بعد انہیں 31 مارچ کو رہا کیا گیا تھا۔

کراچی (وحید جمال سے )پیپلزپارٹی کی قیادت نے ڈاکٹر عاصم حسین پر نوازشات کا سلسلہ جاری رکھتے ہوئے انہیں سرکاری عہدے کے ساتھ ساتھ پیپلزپارٹی کی تنظیمی عہدے کراچی پیپلزپارٹی کے صدر کے منصب پر فائز کردیا یہ عہدہ خالصتاًتنظیمی ہے جبکہ یہ باقاعدہ سیاسی طورپر پیپلزپارٹی کے رکن نہیں ہیں نہ تھے اس کے باوجود سندھ ہائر ایجوکیشن کمیشن کے عہدے پر بھی برقرار ہیں پیپلزپارٹی کراچی کے صدر نامزد ہونے کے باوجود سندھ حکومت نے انہیں سندھ ہائر ایجوکیشن کمیشن کے عہدے سے نہیں ہٹایا یہ باقاعدہ سندھ ہائر ایجوکیشن کمیشن کے عہدے پر ذمہ داریاں ادا کررہے ہیں جبکہ آئینی اور قانونی طورپر کسی پارٹی کے عہدیدار یا سیاسی شخصیت کو ہائر ایجوکیشن کمیشن کا سربراہ نہیں بنایا جاسکتا کیونکہ مذکورہ عہدے کیلئے نہ صرف مطلوبہ قابلیت بلکہ غیر جانبدارانہ بھی ہونا ضروری ہے جبکہ ڈاکٹر عاصم حسین نے عدالت عالیہ کی پیشی کے موقع پر میڈیا سے گفتگو کرتے ہوئے کہا تھا کہ انہوں نے سیاست سے توبہ کرلی ہے پیپلزپارٹی کی قیادت نے ڈاکٹر عاصم حسین کو پیپلزپارٹی کراچی کا صدر بنادیا اس فیصلے کو پیپلزپارٹی سمیت ان سے متعلقہ شخصیات کی جانب سے اچھی نظر سے نہیں دیکھا گیا ہے ذرائع کے مطابق سابق صدر آصف علی زرداری نے پاکستان آنے کا عندیہ دیا ہے سابق صدر آصف علی زرداری 2017کے اوائل میں احتجاج انتخابی مہم کیلئے تیاری کررہے ہیں وہ پاکستان آمد سے قبل اپنے تمام پسندیدہ دوستوں کو رہا اور عہدوں پر بحال دیکھنا چاہتے ہیں ڈاکٹر عاصم حسین کی تقرری کا وقت سیاسی اہمیت کا حامل ہے جہاں تک پیپلزپارٹی کے جیالوں اور کارکنوں کا تعلق ہے اس اقدام کی حمایت اور اسے قبول کرتے ہیں یا نہیں اس بارے پیپلزپارٹی کے حلقوں میں چئہ میگوئیاں سامنے آرہی ہیں سابق صدر پیپلزپارٹی اور سندھ حکومت اپنے قریبی بااعتماد دوستوں کو بھی لانے کا ارادہ رکھتے ہیں انہوں نے اپنے قریبی حلقوں میں خاموش پیغام دیا ہے کہ میں آگیا ہوں آئندہ آنے والے چند روز میں ایسے مزید اقدامات نظرا ٓسکتے ہیں ذرائع کے مطابق پیپلزپارٹی کے رہنما پہلے مقابلے میں زیادہ پر اعتماد دکھائی دیتے ہیں آنے والے دنوںمیں یہ سلسلہ جاری رہا تو کراچی آپریشن پر کئی سوالات سامنے آئیں گے اگر گونرر سندھ سابق چیف جسٹس سعید الزاماں صدیقی کی صحت بہتر نہ ہوئی تو ڈاکٹر عاصم حسین پیپلزپارٹی اور مسلم لیگ ن کے سمجھوتے کے نتیجے میں گورنر سندھ کے امیدوار کی حیثیت سے سامنے آسکتے ہیں اگر ڈاکٹر عاصم حسین کی صحت بہتر ہوئی تو انہیں وزیر اعلیٰ سندھ کا مشیر بھی بنایا جاسکتا ہے ذرائع کے مطابق ڈاکٹر عاصم حسین اسٹیبلشمنٹ کی گڈلک میں نہیں ہیں سندھ رینجرز نے ان کی گرفتاری پر بہت سخت موقف اختیار کیاتھا انٹیلی جنس ایجنسیوں کے نمائندوں پر مشتمل مشترکہ تحقیقاتی ٹیم نے انہیں جیٹ بلیک قرار دیا تھا جو سب سے زیادہ خطرناک مجرموں کیلئے استعمال کیاجاتا ہے ڈاکٹر عاصم حسین کی گرفتاری نے وفاق اور سندھ کے درمیان اختلافات کو مزید بڑھایا ڈاکٹر عاصم حسین کی پیپلزپارٹی کراچی کے صدرکی حیثیت سے تقرری کا فیصلہ پیپلزپارٹی کی اکثریت کی مرضی کے خلاف نظر آتا ہے ۔

کراچی (ویب ڈیسک)احتساب عدالت نے کرپشن اور دہشت گردوں کی معاونت کے الزام میں گرفتار پیپلز پارٹی کے رہنما اور سابق مشیر پیٹرولیم ڈاکٹر عاصم کو ان کے ذاتی اسپتال میں علاج کی اجازت دے دی ہے۔ڈاکٹر عاصم حسین نے کراچی کی احتساب عدالت میں ہائیڈرو تھراپی اور دیگر طبی سہولیات سے متعلق درخواست دائر کی تھی۔ درخواست میں موقف اختیار کیا گیا تھا کہ میڈیکل بورڈ نے خراب طبیعت کی وجہ سے انہیں چلنے پھرنے سے منع کیا ہے اور میڈیکل بورڈ نے علاج کے لیے ہائیڈرو تھراپی پر زور دیا ہے لیکن ان کے اپنے اسپتال کے علاوہ کراچی کے کسی بھی بڑے سرکاری یا نجی اسپتال میں ہائیڈرو تھراپی کی سہولت نہیں ہے، اس لئے انہیں اپنے ذاتی اسپتال میں علاج کی اجازت دی جائے۔