گوجرانوالہ (خصوصی رپورٹ)کمسن گھریلو ملازمہ کو تشدد اور زیادتی کا نشانہ بنائے جانے کا انکشاف ہوا ہے۔ لیڈی ڈاکٹر نے زیادتی کی تصدیق کر دی۔ تفصیلات کے مطابق منگل کے روز نجی ہاﺅسنگ سوسائٹی کے رہائشی محمد آصف نے چائے لانے میں تاخیر پر گھریلو ملازمہ رخسار پر چائے پھینک دی تھی جس سے اسکا چہرہ بری طرح جھلس گیا تھا، واقعہ کی اطلاع ملنے پر اروپ پولیس نے بچی کو ڈسٹرکٹ ہسپتال منتقل کر کے آصف اور اس کے بھائی عثمان کو حراست میں لے لیا تھا، تاہم دوران تفتیش رخسار نے پولیس کو بتایا کہ آصف اور اسکا بھائی عثمان اسے زیادتی کا نشانہ بناتے اور کسی کو بتانے پر سنگین نتائج بھگتنے کی دھمکیاں دیتے رہے ہیں۔ رخسار کی جانب سے زیادتی کے انکشاف پر پولیس نے اسے میڈیکل کیلئے ڈسٹرکٹ ہسپتال منتقل کیا جہاں پر لیڈی ڈاکٹر نے بچی کے ساتھ زیادتی کی تصدیق کر دی ہے۔ دوسری جانب پولیس نے مقدمہ درج کر کے تحقیقات شروع کر دی ہیں۔ علاوہ ازیں کمسن گھریلو ملازمہ کو زیادتی کا نشانہ بنائے جانے کے کیس میں مزید پیش رفت ہوئی ہے۔ بچی کی نشاندہی پر مالی کو گرفتار کر لیا گیا ہے۔ ملزم کا تعین کرنے کیلئے ڈی این اے ٹیسٹ کروانے کا فیصلہ کیا گیا ہے۔ پولیس نے بچی کی نشاندہی پر آصف کے گھر میں ملازم مالی کو بھی حراست میں لیکر تفتیش شروع کر دی ہے۔
