ملتان (وقائع نگار) وفاقی تحقیقاتی ادارے (ایف آئی اے) نے بیرون ملک بھیک مانگنے کے
لیے جانے والے افراد، انسانی اسمگلنگ میں ملوث عناصر اور بھکاری مافیا کے سہولت کاروں کے خلاف کارروائیاں تیز کر دی ہیں۔ ایئرپورٹس پر امیگریشن حکام کی جانب سے مشکوک مسافروں کی کڑی نگرانی کی جا رہی ہے، جبکہ بیرون ملک جانے والے مسافروں کے سفری ریکارڈ، ویزوں، پاسپورٹس، دیگر دستاویزات اور سفر کے اصل مقاصد کی تفصیلی جانچ پڑتال کی جاتی ہے۔ مشکوک سرگرمیوں یا غیر قانونی ہجرت کے خدشات سامنے آنے پر متعلقہ مسافروں کو آف لوڈ کرکے مزید تفتیش اور قانونی کارروائی عمل میں لائی جاتی ہے۔ بیرون ملک بھیک مانگنے کے بڑھتے ہوئے رجحان کی روک تھام اور پاکستان سے انسانی اسمگلنگ کے نیٹ ورکس کے خاتمے کے لیے خصوصی اقدامات کیے گئے ہیں۔ اس مقصد کے لیے ایئرپورٹس پر رسک پروفائلنگ کا نظام بھی استعمال کیا جا رہا ہے، جس کے ذریعے مشکوک سفری سرگرمیوں، غیر معمولی سفری ریکارڈ اور مشتبہ دستاویزات کی بنیاد پر مسافروں کی نشاندہی کی جاتی ہے۔رپورٹ کے مطابق سال 2025 کے دوران ایف آئی اے نے امیگریشن سے متعلق مختلف خدشات اور غیر قانونی ہجرت کی روک تھام کے تحت مجموعی طور پر 39 ہزار 786 مسافروں کو آف لوڈ کیا۔ تاہم رپورٹ میں واضح کیا گیا ہے کہ آف لوڈ کیے جانے والے مسافر بیرون ملک بھیک مانگنے کے لئے اور مختلف امیگریشن خلاف ورزیوں اور سفری دستاویزات سے متعلق خدشات رکھنے والے مسافر شامل تھے۔ایف آئی اے حکام کے مطابق بیرون ملک بھیک مانگنے کے لیے جانے والے افراد کے پیچھے بعض منظم گروہ اور سہولت کار بھی سرگرم ہیں جو شہریوں کو بیرون ملک روزگار یا دیگر مواقع کا جھانسہ دے کر مختلف ممالک میں بھیک مانگنے کے لیے بھیجتے ہیں۔ ایسے عناصر کے خلاف انٹیلی جنس معلومات کی بنیاد پر کارروائیاں کی جا رہی ہیں، جبکہ انسانی اسمگلنگ میں ملوث نیٹ ورکس کی نشاندہی کرکے ذمہ دار افراد کو قانون کے کٹہرے میں لانے کے لیے اقدامات جاری ہیں۔ ایئرپورٹس پر امیگریشن چیکنگ کے دوران مسافروں سے بیرون ملک قیام کے مقاصد، ہوٹل یا رہائش کے انتظامات، سفری اخراجات اور ویزے کی نوعیت سے متعلق سوالات بھی کیے جاتے ہیں تاکہ حقیقی سفری مقاصد کا تعین کیا جا سکے۔ خصوصاً ایسے مسافروں پر توجہ دی جاتی ہے جن کے سفری حالات، دستاویزات یا بیانات میں تضاد پایا جائے۔
مسافر آف لوڈ
