لاہور(عثمان علی)آلودہ دھند کے بعد کیا تیزابی بارش کے خطرات بھی ہیں اس سوال نے نئی بحث کو جنم دیدیا،ماہرین کا کہنا ہے شہر پر چھائی آلودہ دھند میں سلفرڈائی آکسائیڈ،کاربن مونوآکسائید،کاربن ڈائی آکسائیڈ سمیت دیگر گیسیں موجود ہیں جو بارش کے پانی کیساتھ مل کر پانی کی پی ایچ ویلیو کم کر کے اس میں تیزابی خصوصیات پید ا کر سکتی ہیں اور اگر صورتحال مزید ابتر ہوئی تو تیزابی بارش کا امکان موجودہے اگرچہ یہ امکان نہ ہونے کے برابر ہے تاہم اس کو ردبھی نہیں کیاجاسکتا۔اس حوالے سے گفتگو کرتے ہوئے ماہر ماحولیات وہیلتھ اینڈسیفٹی ڈاکٹرحسن زاہد کاکہنا تھا کہ تیزابی بارش کا امکان نہ ہونے کے برابر ہے لیکن اس وقت کی صورتحال کا اگر جائزہ لیا جائے تو یہ بات مدنظر رکھنی چاہیے کہ صورتحال اگر مزید ابتر ہوئی تو اس تھیور ی کو رد نہیں کیا جاسکتا۔ان کا کہنا تھا کہ اس صورتحال سے بچنے کیلئے مندرجہ ذیل اقدامات بھی کیے جانے چاہئیں:ایسی فیکٹریاں جو دھواں چھوڑ رہی ہیں ان کو چند د ن کیلئے بندکر دیاجائے ،ٹوسٹروک رکشوں کیخلاف کریک ڈاون کیا جائے اور جہاں جہاں ترقیاتی منصوبے جاری ہیں اس کے ارگرداور شہر کی دیگر سڑکوں پر پانی کا چھڑکاو کیا جائے ۔
تیزابی بارش
