لاہور(خصوصی رپورٹ ) پنجاب فوڈ اتھارٹی نے مارچ میں لیے گئے کوکنگ آئل اور گھی کے سیمپلز کے نتائج جاری کر دیے ہیں۔ کوکنگ آئل اور گھی سمپلنگ مہم کے جاری کردہ نتائج کے مطابق 151پراڈکٹس کےلئے گئے نمونہ جات میں سے 92نمونہ جات پاس جبکہ 45فیل ہوئے۔ تجزیے میں فیل اور مضر صحت قرار پانے والے کوکنگ آئل پراڈکٹس میں کسان سن فلاور کوکنگ آئل، ایوا سن فلاو کوکنگ آئل ، درجہ اول کوکنگ آئل، سحر کو کنگ آئل شامل ہیں جبکہ بناسپتی گھی میں سلویٰ، شاہ تاج ، گائے ،سیزن، سحر، سویرا ، یادگار ، درجہ اول ، ذائقہ بناسپتی انسانی استعمال کے لیے مضر قرار دیے گئے ہیں۔ امبر بناسپتی، پیوررائل پریمیر ، شہباز ، کیئر ، مجاہدبھی تجزیے میںفیل ہو گئے۔ ایشیا، خیبر ، عسکری ، لطیف ، کوثر، حفیظ ، تازہ، دعا، مہر بناسپتی بھی انسانی استعمال کے لیے مضر صحت قرار دیے ہیں۔ 14پراڈکٹس کے نمونے کم غذائی اجزاءکی موجودگی پر غیر معیاری قرار دیے گئے ہیں۔ ان میں شان کوکنگ آئل، اسلام آباد، مروہ، ایوین، ایشیاءپیور، ہانڈی، شاہ تاج پریمیم کوکنگ آئل ، داتا، پرائم ، ہانڈی، غوثیہ، ممتا، اسلام آباد، آشیانہ اور مہر بناسپتی، سویا سپریم، انعام، رانی گولڈ، تاز ہ گولڈ، رحمت، ص، مالٹا بناسپتی غیر معیاری قرار دیے گئے۔ پنجاب فوڈ اتھارٹی نے عوام کو فیل ہونے والے پراڈکٹس کی موجودہ سپلائی نہ خریدنے کی ہدایت کی ہے۔ تجزیے میں پاس ہونے والی کمپنیوں کی فہرست پنجاب فوڈ اتھارٹی کی ویب سائٹ www.pfa.gop.pkپر دیکھی جا سکتی ہے۔ پاس ہونے والوں کی فہرست پنجاب فوڈ اتھارٹی فیس بک پیج سے بھی لی جا سکتی ہے۔ فیل ہونے والی کمپنیوں کو تمام مال مارکیت سے ہٹانے کی ہدایت کر دی گئی ہے۔ ہدایات پر عمل نا کرنے کی صورت میںسخت کاروائی ہو گی۔فیل ہونے والی تمام کمپنیوں کو 10لاکھ فی کس جرامنہ عائد کیا گیا ہے۔ غیر معیاری قرار دی گئی کمپنیوں کو کوالٹی بہتر کرنے کے لیے 1ماہ کی مہلت دی گئی ہے۔ 1ماہ بعد تمام نمونے دودبارہ لیے جائیں گے۔ یاد رہے کہ مارچ میں 120کمپنیوں کے 151 پراڈکٹس کے نمونہ جات ٹیسٹ کے لیے بھیجے گئے تھے۔ کوکنگ آئل اور گھی کے معیار کو قائم رکھنے کے لیے پنجاب فوڈ اتھارٹی سال میں 2مرتبہ اعلانیہ جبکہ ایک دفعہ سرپرائز طریقے سے نمونے لے گی۔ تمام نمونے عالمی معیار کی ISOسرٹیفائیڈ لیبارٹری PCSIRسے چیک کروائے گئے ہیں۔ تما م کمپنیوں کے سیمپل ان کے نمائندوں کی موجودگی میں اٹھائے گئے تھے۔ نمونے لینے سے پہلے تما م کمپنیوں کو خامیاں دور کرنے اور اصلاح کے لیے مناسب وقت دیا گیا تھا۔ پنجاب فوڈ اتھارٹی کا گٹکا فری پنجاب مشن کے تحت گٹکا سپلائی کرنے والوں کے خلاف کریک ڈاﺅن جاری ہے۔ اس سلسلے میں ڈی جی پنجاب فوڈ اتھارٹی نورالامین مینگل نے 5 لاکھ پیکٹ گٹکا تلف کر دیا۔ کروڑوں روپے مالیت کا گٹکا پنجاب فوڈ اتھارٹی ہیڈ آفس میں تلف کیا گیا۔ گزشتہ 2ماہ سے جاری گٹکے کے خلاف کریک ڈاﺅن میں دیگر شہروں اور صوبوں سے گٹکا سمگل کرنے کی کئی کوششوں کو ناکام بنایا گیا اورگٹکے کے بڑے وئیر ہاﺅسز پکڑے گئے جن سے کروڑوں روپے کی مالیت کا گٹکا برآمد کیا گیا۔ تمام گٹکا ابلاغ اور عوام کے نمائندوں کی موجودگی میں تلف کیا گیا۔ اس حوالے سے ڈی جی فوڈ اتھارٹی نورالامین مینگل کا کہنا تھا کہ پنجاب کو گٹکا فری بنانے کا عزم پورا کریں گے۔ گٹکا کینسر اور دیگر مضر بیماریوں کی بڑی وجہ ہے جس کی فروخت پر مکمل پابندی عائد کی جا چکی ہے ۔ گٹکے کی فروخت ، سمگلنگ یا کسی بھی ایسی سرگرمی میں ملوث افراد کے خلاف سخت کاروائی عمل میں لائی جائے گی۔
