اسلام آباد (آئی این پی، مانیٹرنگ ڈیسک) وزیراعظم نوازشریف کے صاحبزادے حسین نواز کے بعد حسن نواز بھی پانامہ کیس کی تحقیقات کےلئے قائم جے آئی ٹی میں پیش ہوگئے اور ان سے 6گھنٹے تک پوچھ گچھ کی گئی ، حسن نواز کو ایک گھنٹہ انتظار کرایا گیا ،انہوں نے مجموعی طور پر 7گھنٹے جوڈیشل اکیڈمی میں گزارے ، حسن نواز نے اپنی کمپنیوں نیلسن اور نیسکول ،لندن فلیٹس سمیت بیرون ملک کاروبار کی تفصیلات جے آئی ٹی کو پیش کیں جبکہ سوالات کے جوابا ت دینے سمیت دستاویزی شواہد بھی جے آئی ٹی کو جمع کرائے ، تفتیش ختم ہونے پر جوڈیشل اکیڈمی سے باہر نکلنے کے بعد حسن نوازمیڈیا سے گفتگو کئے بغیر سخت سیکیورٹی میں وزیراعظم ہاﺅس روانہ ہوگئے، دوسری طرف حسین نواز چوتھی بار آج (ہفتہ) کو پھر جے آئی ٹی میں پیش ہوں گے۔ جمعہ کو پانامہ کیس کی تحقیقات کے لئے قائم جے آئی ٹی کا اجلاس ایڈیشنل ڈائریکٹر جنرل ایف آئی اے واجد ضیاءکی زیر صدارت وفاقی جوڈیشل اکیڈمی میں ہوا، صبح10 بجے وزیراعظم کے صاحبزادے حسن نواز سخت سیکیورٹی میں جوڈیشل اکیڈمی پہنچے تو اکیڈمی کے مرکزی دروازے پر گاڑی سے اترے اور اندرداخل ہوگئے۔ حسن نواز کی گاڑی میں پانامہ کیس سے متعلق دستاویزات بھی تھیں جو ان کے سٹاف نے گاڑی سے نکال کرجوڈیشل اکیڈمی پہنچائیں۔ 11بجے جے آئی ٹی نے حسن نواز کو ایک گھنٹہ انتظار کرانے کے بعد اندر بلایا اور وہ جے آئی ٹی کے روبرو پیش ہوئے ۔ حسن نوازسے ان کی کمپنیوں ،لندن فلیٹس اور بیرون ملک جائیداد سے متعلق تمام ارکان نے تفصیلی پوچھ گچھ کی ۔دوپہر ڈیڑھ بجے جے آئی ٹی نے نماز کا وقفہ کیا توجے آئی ٹی ارکان اور حسن نوازنے جوڈیشل اکیڈمی میں موجود مسجد میں نماز ادا کی ،2بجے جے آئی ٹی نے دوبارہ کارروائی شروع کی تو حسن نواز پھر جے آئی ٹی کے سامنے پیش ہوئے اور انہوں نے اپنے ٹیکس اور کمپنیوں کی تفصیلات سمیت دیگر دستاویزات جے آئی ٹی کو جمع کرائیں۔ شام پانچ بجے حسن نواز کو جے آئی ٹی نے جانے کی اجازت دی جس کے بعد وہ جوڈیشل اکیڈمی سے باہر آئے تاہم میڈیا سے بات چیت کئے بغیر سخت سیکیورٹی میں وزیراعظم ہاﺅس روانہ ہوگئے ۔ ذرائع کے مطابق حسن نوازکی دوبارہ طلبی سے متعلق جے آئی ٹی جلد فیصلہ کرے گی جبکہ حسین نوازآج(ہفتہ) کو چوتھی بار جے آئی ٹی کے روبرو پیش ہوں گے اور جے آئی ٹی کے ارکان کے سوالوں کے جواب دیں گے ۔دوسری طرف حسن نواز کی جوڈیشل اکیڈمی آمد سے قبل مسلم لیگ (ن) کے رہنماﺅں کی بڑی تعداد سیکٹر ایچ ایٹ پہنچی اور انہوں نے حسن نواز کا استقبال کیا جبکہ وزیراعظم کے معاون خصوصی ڈاکٹر آصف کرمانی ، دانیال عزیزاور دیگر رہنماﺅں نے معمول کے مطابق میڈیا سے بھی بات چیت کی۔
