لاہور (مانیٹرنگ ڈیسک) چینل فائیو کے پروگرام ”لائیو ایٹ 10 “ میں گفتگو کرتے ہوئے پیپلزپارٹی کے رہنما شوکت بسرا نے کہا ہے کہ حسین نواز کی تصویر چودھری نثار نے لیک کروائی کیونکہ جے آئی ٹی کو متنازع بنانے کی کوشش کی جا رہی ہے۔ ماضی میں انہوں نے سپریم کورٹ پر حملہ کیا تھا، اب سے حیلے بہانوں سے جے آئی ٹی پر حملہ کر رہے ہیں۔ تحریک انصاف کی رہنما تنزیلہ عمران نے کہا ہے کہ حسین نواز کی تصویر لیک ہونے کی ذمہ داری متعلقہ ادارے پر ہے۔ اگر تصویر کسی نے کسی کی تضحیک کی غرض سے وائرل کی ہے تو اسکی بھرپور مذمت کرتے ہیں۔ انہوں نے کہا کہ پاک بھارت میچ کی ذمہ داری نجم سیٹھی وشہریار خان پر ہے ان سے باز پرس ہونی چاہیے کہ ایسی ٹیم سلیکشن کس کے کہنے پر ہوئی۔ سابق ٹیسٹ کرکٹر اکرم رضا نے کہا ہے کہ پاک بھارت میچ میں ٹیم مینجمنٹ کی سٹریجیڈ میں درست نہیں تھی۔ باﺅلرز نے اچھی پرفارمنس نہیں دکھائی۔ کپتان کی ذمہ داری ہوتی ہے کہ وہ بہتر منصوبہ بندی کرے۔ ٹیم سلیکشن بہت بری ہوئی۔ وہاب ریاض اور شاداب کے بجائے جنید خان یا فہیم اشرف ہوتے تو ٹیم کی کارکردگی کچھ اور ہوتی۔ قومی ٹیم کے کھلاڑیوں کو پاکستان کوچ ہی کنٹرول کر سکتے ہیں۔ ہمارے پاس ماضی کے مایہ ناز کھلاڑی موجود ہیں اگر ابھی بھی انکی خدمات نہ لی گئیں تو کرکٹ مزید نیچے آئے گی۔ پاک بھارت میچ میں آخری اوور میں عماد وسیم کو دینا سمجھ سے بالاتر ہے۔ آخری اوور ہمیشہ فاسٹ باﺅلر سے کرایا جاتا ہے۔ انٹرنیشنل کرکٹ میں کوچ اور ٹیم مینجمنٹ فیل ہو چکی ہے۔ تجربہ کار شاہد اقبال نے کہا ہے کہ قومی کرکٹ ٹیم کا برسوں سے برا حال ہے اس سے باقی تمام کھیل میں متاثر ہوئے۔ ملک کے دیگر اداروں کی طرح کرکٹ بورڈ بھی فیل ہو چکا ہے۔
